કેન્દ્રીય યુવા બાબતો અને રમતગમત મંત્રી શ્રી અનુરાગ સિંહ ઠાકુરે આજે નવી દિલ્હીમાં બર્મિઘમ કોમનવેલ્થ ગેમ્સ (CWG) 2022 માટે ભારતીય ટીમના વિદાય સમારંભમાં ભાગ લીધો હતો. આ કાર્યક્રમનું આયોજન ભારતમાં ઑલિમ્પિક સ્પોર્ટ્સ માટેનું સંચાલન કરતી સંસ્થા ઈન્ડિયન ઑલિમ્પિક એસોસિએશન (IOA) દ્વારા કરવામાં આવ્યું હતું.

ઉપસ્થિત અન્ય મુખ્ય મહાનુભાવોમાં કેન્દ્રીય ગૃહ રાજ્ય અને યુવા બાબતો અને રમતગમત રાજ્ય મંત્રી શ્રી નિશિથ પ્રામાણિક, સ્પોર્ટ્સ ઓથોરિટી ઑફ ઈન્ડિયાના ડાયરેક્ટર જનરલ શ્રી સંદીપ પ્રધાન તેમજ આઇઓએના કાર્યકારી પ્રમુખ શ્રી અનિલ ખન્ના હતા.

215 મજબૂત ટીમમાંથી સમારોહમાં હાજર રહેલા કેટલાક સ્ટાર સભ્યોમાં ટોક્યો 2020 ઑલિમ્પિક મેડલ વિજેતાઓ બજરંગ પુનિયા, પી.આર. શ્રીજેશ, મનપ્રીત સિંહ, હરમનપ્રીત સિંહ અને લવલિના બોર્ગોહેન હતાં. હાજર રહેલા કેટલાક અન્ય અગ્રણી રમતવીરોમાં ઑલિમ્પિક મેડલિસ્ટ સાક્ષી મલિક, સ્પ્રિન્ટ સ્ટાર્સ દુતી ચંદ અને હિમા દાસ, એશિયન બૉક્સિંગ ચૅમ્પિયનશિપના ગોલ્ડ મેડાલિસ્ટ શિવ થાપા અને બોક્સર અમિત પંઘાલ જેવા અન્ય ખેલાડી સામેલ હતા.

આ સમારોહમાં ટુકડી માટે સત્તાવાર કીટનું પણ અનાવરણ કરવામાં આવ્યું હતું. IOAએ JSW ઇન્સ્પાયરને જોડ્યું છે, જેઓ પ્રવાસ અને પ્લેઇંગ કિટ્સ માટે કિટિંગ પાર્ટનર્સ તરીકે ટીમના મુખ્ય પ્રાયોજકો પણ છે. માન્યવર ઔપચારિક કિટિંગ પાર્ટનર્સ તરીકે બોર્ડમાં સામેલ થયા છે જ્યારે એડિડાસ ટીમના સત્તાવાર પર્ફોર્મન્સ ફૂટવેર પાર્ટનર્સ છે.

મુખ્ય અતિથિ તરીકે તેમનું સંબોધન કરતાં, શ્રી અનુરાગ સિંહ ઠાકુરે જણાવ્યું હતું કે, “આજે આપણા લોકપ્રિય પ્રધાનમંત્રી શ્રી નરેન્દ્ર મોદીની દૂરંદેશી અને અથાક પ્રયાસોથી ભારતીય રમતો વૈશ્વિક રીતે ઉચ્ચ સ્તરે પહોંચી છે. ગયા વર્ષની ઑલિમ્પિક ગેમ્સમાં પ્રદર્શન આપણું અત્યાર સુધીનું સર્વશ્રેષ્ઠ હતું અને આપણે તાજેતરના સમયમાં આપણી પોતાની આંખોથી સમગ્ર રમતગમતમાં આપણા ઍથ્લીટ્સમાં સુધારો જોયો છે. થોમસ કપની ઐતિહાસિક જીત આવો જ એક પ્રસંગ હતો.”

તેણે ઉમેર્યું, “આ ભારતીય CWG ટુકડી ચોક્કસપણે આપણી અત્યાર સુધીની સર્વશ્રેષ્ઠ અને સૌથી મજબૂત ટીમ છે અને મને વિશ્વાસ છે કે તેઓએ જીતેલા મેડલની સંખ્યા જે હોય, આપણા તમામ ઍથ્લીટ્સ ફરી વૈશ્વિક સ્તરે ભારતને ગૌરવ અપાવશે. આપણે સૌને તેમના પર ગર્વ છે અને આખો દેશ તેમની પાછળ હશે, પછી ભલે તે જીત હોય કે હાર. અમે તમને બધાને ખૂબ ખૂબ શુભેચ્છા પાઠવીએ છીએ.”

કેન્દ્રીય મંત્રીએ એ પણ જાહેર કર્યું કે તેઓ અત્યંત ખુશ છે કે 108 પુરૂષો અને 107 મહિલા રમતવીરોની સાથે CWG ટુકડીએ લૈંગિક સંતુલન પ્રાપ્ત કર્યું છે.

તેમનાં સંબોધન દરમિયાન IOAના મહાસચિવ શ્રી રાજીવ મહેતાએ કહ્યું, “અમને ટીમ દ્વારા મજબૂત પ્રદર્શનનો વિશ્વાસ છે. તેમની તાલીમ અને તૈયારીઓ ઉચ્ચ કક્ષાની રહી છે અને ભારત સરકાર અને રમતગમત મંત્રાલયે બર્મિંગહામ CWG માટે અમે અમારા શ્રેષ્ઠ પગલાંને આગળ ધપાવીએ તેની ખાતરી કરવા માટે કોઈ કસર છોડી નથી. હું તેમના પ્રત્યે નમ્રતાપૂર્વક કૃતજ્ઞતા વ્યક્ત કરું છું અને અમારા તમામ ઍથ્લીટ્સ, કૉચ અને સપોર્ટ સ્ટાફને ખૂબ જ સફળ રમતોની શુભેચ્છા પાઠવું છું.”

શ્રી મહેતાએ બર્મિંગહામ ગેમ્સમાં મેડલ વિજેતા ખેલાડીઓ માટે IOA વતી ઈનામની રકમની પણ જાહેરાત કરી હતી. સુવર્ણ પદક વિજેતાઓને રૂ. 20,00,000 નું રોકડ ઇનામ આપવામાં આવશે જ્યારે રજત પદક વિજેતાઓ માટે રૂ. 10,00,000 રાખવામાં આવ્યા છે. બ્રોન્ઝ મેડલ વિજેતાઓને રૂ. 7,50,000 આપવામાં આવશે.

ટીમના કેટલાક સભ્યો કાં તો અનુકૂલન, તાલીમ અથવા સ્પર્ધા માટે યુનાઇટેડ કિંગડમમાં પહેલેથી જ છે, અથવા તેઓ વિશ્વભરમાં તેમની વ્યાવસાયિક સોંપણીઓમાં રોકાયેલા છે અને સીધા બર્મિઘમ પહોંચશે.

ભારતે ચાર વર્ષ પહેલાં ઑસ્ટ્રેલિયાના ગોલ્ડ કોસ્ટમાં યોજાયેલી ગેમ્સની અગાઉની આવૃત્તિમાં 26 ગોલ્ડ સહિત કુલ 66 મેડલ જીત્યા હતા અને પરંપરાગત પાવરહાઉસ ઑસ્ટ્રેલિયા અને ઈંગ્લેન્ડ પછી ત્રીજા સ્થાને રહ્યું હતું. 26માંથી 25 ગોલ્ડ સહિત 90%થી વધુ મેડલ બૅડમિન્ટન, બૉક્સિંગ, શૂટિંગ, ટેબલ ટેનિસ, વેઇટલિફ્ટિંગ અને રેસલિંગની છ રમતોમાંથી આવ્યા હતા. ઍથ્લીટિક્સ, પેરાસ્પોર્ટ્સ અને સ્ક્વોશ એ ભારત માટે અન્ય મેડલ વિજેતા રમતો હતી.

શૂટિંગ, જેણે ભારતને ગોલ્ડ કોસ્ટ ગેમ્સમાં સાત ગોલ્ડ સહિત 16 જેટલા મેડલ અપાવ્યા હતા, તે હવે CWG 2022નો ભાગ નથી, જો કે પહેલીવાર મહિલા ક્રિકેટનો સમાવેશ કરવામાં આવ્યો છે અને દેશની સૌથી લોકપ્રિય રમતમાં ભારત તેની તકો પસંદ કરશે.

બૅડમિન્ટન, બોક્સિંગ, હોકી, વેઈટલિફ્ટિંગ અને રેસલિંગ જેવી પરંપરાગત રીતે મજબૂત રમતોમાં ભારતીય ટુકડીઓ, જો તાજેતરનાં પરિણામો અને સાથે મળીને જોવા જઈએ તો અગાઉના વર્ષો કરતા નોંધપાત્ર રીતે મજબૂત છે અને તેણે  શૂટિંગના નુકસાનની ભરપાઈ કરવી જોઈએ.

ભારતીય CWG ટીમમાં મુખ્ય પ્રાયોજક તરીકે અદાણી સ્પોર્ટ્સલાઇન છે જ્યારે JSW ઇન્સ્પાયર મુખ્ય અને કિટિંગ પ્રાયોજક તરીકે છે. હર્બલલાઇફ ઓફિશિયલ ન્યુટ્રિશન પાર્ટનર, માન્યવર સેરેમોનિયલ કિટિંગ પાર્ટનર અને એડિડાસ પર્ફોર્મન્સ ફૂટવેર પાર્ટનર છે. INOX અને અમૂલ એસોસિયેટ સ્પોન્સર્સ છે, બોરોસિલ હાઇડ્રેશન પાર્ટનર્સ તરીકે અને SFA સ્પોર્ટ્સ એડ-ટેક પાર્ટનર તરીકે છે.

SD/GP/JD