প্রধানমন্ত্রীগী লোইশঙ
জর্মনীগী জি. ৭ সমিততা ‘হেন্না ফবা তুংগী লম্বিদা ইনভেস্ত তৌবা: ক্লাইমেত ইনর্জী, হেল্থ ’কী মতাংদা পাংথোকখিবা সেসনদা প্রধান মন্ত্রীনা থমখিবা ৱাফম
Posted On:
27 JUN 2022 9:24PM by PIB Imphal
লাইবক থিবদি, মালেমগী চাউখৎ-থৌরাংগী পান্দমশিং অমসুং মহৌশাগী ফিভমবু ঙাকশেনবগী মরক্তা ফন্দামেন্তেলগী ওইবা চয়েৎনববা অমা লৈ হায়না থাজনরি। লাইরবা লৈবাকশিং অমসুং লাইরবা মীশিংনা অকোইবদা লেরিবা মহৌশাগী ফিভমদা শোকহল্লি হায়বা অতোপ্পা অরানবা ৱাখল্লোন অমসু লৈরি। অদুবু চহি লিশিং কয়াগী ভারতকী পুৱারীনা মসিগী ভ্যু অসিবু মপুং-ফানা য়ানিংদবা উৎলি। থাইনঙৈগী ভারতনা য়াম্না নুংঙাই-য়াইফবা মতম থেংনরকখি; অদু ওইরদি ঐখোয়না মীনাই থম্বগী চৎনবী অসি চহি চা কয়া খাংদুনা লাকখি, অমসুং ঙসি নিংতম্বা ভারত অসি মালেম পুম্বগী ওইনা খ্বাইদগী য়াম্না য়াংনা চাউখৎলক্লিবা অচৌবা ইকোনোমীনি। অদুবু মসিগী মতম অসিদা ভারতনা অকোইবদা লৈরিবা ফিভম অসিগী ওইবা মশাগী কমিৎমেন্ত অদু খরা ফাওবা হোংবা লৈখিদে। মালেমগী মীশিংগী ১৭% ভারত্তা লৈ। অদুবু গ্লোবল কার্বন ইমিশনশিংদা ঐখোয়গী কন্ত্রিব্যুশন অসি ৫% খক্তনি। মসিগী মরু ওইবা মরমদি মহৌশাগা পুন্না হিংমিন্নবগী থিয়োরীদা য়ুমফম ওইবা ঐখোয়গী হিংবগী মওং অসিননি।
নখোয় পুম্নমক্না মসিদা য়ানিংগনি মদুদি ইনর্জী শিজিন্নবা ফংবা হায়বসি শেল পাইবশিং খক্তগী খুদোংচাবা ওইহল্লোইদবনি- লাইরবা ইমুং অমসু ইনর্জীদা চপ-মান্নবা হক লৈ। অমসুং জিয়োপোলিতিকেল তেন্সনশিংনা মরম ওইরগা ইনর্জীগী মমল অসি য়াম্না ৱাংবা মতম অসিদা মসিবু নীংশিংবা হায়বসি য়াম্না মরু ওই। মসিগী প্রিন্সিপল অসিদগী পুক্নিং থৌগৎলদুনা, ঐখোয়না ভারত্তা য়ুমথোং খুদিংগী এল.ই.দি. বল্বশিং অমসুং চাক থোংনবা অশেংবা গ্যাসশিং পীরি অমসুং লাইরবশিংগীদমক্তা ইনর্জী ফংহন্দুনা কার্বোন ইমিসন তন মিলিয়ন কয়া অমা থিংবা ঙম্মি হায়বদু উৎখি।
ঐখোয়গী ক্লাইমেত কমিৎমেন্তশিংদা লৌরিবা ঐখোয়গী ফিরেপ অসি ঐখোয়গী পর্ফোর্মেন্স অদুদগী ময়েক শেংনা খঙবা ঙম্লি। ঐখোয়না নন-ফোসিল ফ্যুএল সোর্সশিংদগী চাদা ৪০গী ইনর্জী কেপাসিতীগী পান্দম অদু চহি ৯ ঙনখৎনা ফংবা ঙম্লে। পেত্রোলদা ইথানোলগী চাং চাদা ১০ য়ানশিনবগী তার্গেত অদু থা ৫ ঙনখৎনা ফংবা ঙমখ্রে। ভারততা মালেম অসিগী অহানবা মপুং ফানা সোলর পাৱরনা চলাইবা এবরপোর্ত লৈ। ভারতকী চাউরবা রেলৱেজ সীস্তেম অসি হন্দক্কী দেকেদ অসিদা নেত জিরো ওইরগনি।
এক্সেলেন্সীশিং,
ভারতগুম্বা অচৌবা লৈবাকনা অসিগুম্বা অপাম্বা ফিরেপ অমা উৎপা মতমদা, আতোপ্পা চাউখৎলক্লিবা লৈবাকশিংবুসু থৌগৎলি। ঐখোয়না জি.৭গী ইনাকখুনবা লৈবাকশিংনা ভারতনা হোৎনরিবশিং অসিবু মতেং পাংগনি হায়না থাজবা থম্লি। ঙসি ভারত্তা ক্লীন ইনর্জীগী য়াম্না চাউরবা মার্কেত অমা হৌগৎলক্লি। জি.৭গী লৈবাকশিংনা মসিগি লমশিং অসিদা রিসর্চ, ইনোৱেশন, অমসুং মেন্যুফেকচরিংদা ইনভেস্ত তৌবা য়াগনি। মসিদা ভারতনা অনৌবা তেক্নোলোজী খুদিংমক্কী পীবা ঙমগদৌরিবা চাং অসি মালেম পুম্বগীদমক্তা হোংনা ফংহনবা ঙমগনি। সার্কুলর ইকোনোমীগী খ্বাইদগী মপুং ওইবা থিয়োরীশিংনা ভারতকী কলচর অমসুং লাইফস্তাইলগী মপুম ওইবা শরুক অমা ওইদুনা লাক্লি।
ঐহাক্না মমাং চহিদা গ্লাসগোদা এল.আই.এফ.ই. – লাইফস্তাইল ফোর এনভাইরনমেন্ত কৌবা ইহৌ অমগীদমক্তা হায়খি। হন্দক্কী চহি অসিদা, ৱার্লদ এনভাইরনমেন্ত দেদা, ঐখোয়না এল.আই.এফ.ই. কেমপেনগীদমক্তা গ্লোবল ইনিসিবেতিব অমা হৌদোকখি। কেমপেন অসিগী পান্দম অসি ইকো-ফ্রনলী ওইবা পুনশি মহিং অমা হিংনবা পুক্নিং থোগৎপনি। ঐখোয়না মসিগী ইহৌ অসিগী ফোলোৱরশিংবু ত্রিপল পি. কৌবা য়াগনি হায়বদি ‘প্রো প্লানেত পিপল’, অমসুং ঐখোয়না ঐখোয়গী ইশাগী লৈবাকশিংদা ত্রিপল পি. মিশিংগী মশিং হনেগৎহন্নবগী থৌদাং অদু ঐখোয় পুম্নমক্না লৌগদবনি। মসিনা ঐখোয়গী তুংগী মিরোলশিংগীদমক্তা ঐখোয়গী য়াম্না চাউবা কন্ত্রিব্যুশন ওইগদোরিবনি।
এক্সেলেন্সীশিং,
মীওইবা অমসুং প্লানেত হেল্থ অসি অমনা অমগা মরী লৈনৈ। মরম অদুনা ঐখোয়না ৱান ৱার্ল্দ, ৱান হেল্থকী এপ্রোচ অসি লৌখৎলিবনি। লাইচৎ অসিগী মনুংদা, ভারতনা হেল্থ সেক্তরদা দিজিতেল তেক্নোলোজী শিজিন্নবগী অনৌ-অনৌবা লম্বি কয়া অমা থেংনখি। জি.৭ লৈবাকশিংনা মসিগী ইনোৱেশনশিং অসিবু অতোপ্পা চাউখৎলক্লিবা লৈবাকশিংদা য়ৌহনবদা মতেং পাংবা ঙমগনি। হন্দক্তা ঐখোয় পুম্নমক্না মালেমগী য়োগ নুমিৎ পাংথোকখি। কোবিদকী চিরবা মতমদা, য়োগ অসিনা মালেম শিনবা থুংনা লৈরিবা মীপুম খুদিমক্কীদমক্তা প্রিভেন্তিব হেল্থকীদমক্তা য়াম্না অচোবা খুৎলাই অমা ওইখি, মসিনা মী ময়াম অমা মখোয়গী ফিজিকেল অমসুং মেন্তেল হেল্থ নিংথিনা থম্বদা মতেং পাংখি।
য়োগাদা নত্তনা, ভারত য়াওনা মালেম অসিগী লৈবাক কয়া অমদা ত্রেদিস্নেল মেদিসিনগী য়াম্না মমল য়াম্লবা এসেতশিং লৈরি, হায়রিবশিং অসি হোলিস্তিক হেল্থকীদমক্তা শিজিন্নবা য়াগননি। হন্দক্তা দবল্যু.ঐচ.ও.না ভারত্তা গ্লোবল সেন্তর ফোর ত্রেদিস্নেল মেদিসিন লিংখৎনবগী ফিরেপ অদু ঐহাক্না য়াম্না নুংঙাইবা ফাওই। মসিগী সেন্তর অসিনা মালেম শিনবা থুংনদগী তোঙান-তোঙানবা ত্রেদিস্নেল মেদিসিন সীস্তেমশিংগী রিপোজিতরী অমা ওইবদা নত্তনা মসিগী লমসিদা রিসর্চ এন্না তৌনবগী থৌগৎলগনি। মসিনা মালেম অসিগী মীয়াম খুদিংমক্তা কান্নহল্লগনি।
থাগৎচরি।
***
(Release ID: 1837403)
Visitor Counter : 103
Read this release in:
English
,
Urdu
,
Hindi
,
Marathi
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam