প্ৰধানমন্ত্ৰীৰ কাৰ্যালয়
৩ জুনত উত্তৰ প্ৰদেশলৈ যাব প্ৰধানমন্ত্ৰী
লক্ষ্ণৌত ৮০,০০০কোটিৰো অধিক টকা পৰিমাণৰ ১৪০৬টা প্ৰকল্পৰ ‘ভূমি পূজন সমাৰোহ @৩.০’-ত অংশ গ্ৰহণ কৰিব প্ৰধানমন্ত্ৰীয়ে
কানপুৰৰ পৰৌনখ গাঁৱত এক সমাৱেশ সম্বোধন কৰিব প্ৰধানমন্ত্ৰীয়ে
Posted On:
02 JUN 2022 3:11PM by PIB Guwahati
অহা ৩ জুন, ২০২২ তাৰিখে প্ৰধানমন্ত্ৰী শ্ৰী নৰেন্দ্ৰ মোদীয়ে উত্তৰ প্ৰদেশ ভ্ৰমণ কৰিব। সেইদিনা দিনৰ ১১ বজাত তেওঁ লক্ষ্ণৌৰ ইন্দিৰা গান্ধী প্ৰতিষ্ঠানত অনুষ্ঠিতব্য উত্তৰ প্ৰদেশ বিনিয়োগকাৰী শীৰ্ষ সন্মিলনৰ ‘ভূমি-পূজন সমাৰোহ ৩.০’-ত উপস্থিত থাকিব। দুপৰীয়া প্ৰায় ১.৪৫ বজাত তেওঁ মাননীয় ৰাষ্ট্ৰপতি শ্ৰী ৰামনাথ কোৱিন্দৰ সৈতে পথ্ৰী মাতা মন্দিৰ দৰ্শনৰ উদ্দেশ্যে কানপুৰৰ পৰৌনখ গাঁৱত উপস্থিত হ’বগৈ। দিনৰ প্ৰায় ২ বজাত তেওঁলোকে ড০ বি আৰ আম্বেডকাৰ ভৱন দৰ্শন কৰাৰ পিচত ২.১৫ বজাত তেওঁলোক ‘মিলন কেন্দ্ৰ’লৈ যাব। এয়া হৈছে মাননীয় ৰাষ্ট্ৰপতিৰ পৈতিক গৃহ ভৱন। ৰাজহুৱা ব্যৱহাৰৰ কাৰণে উচৰ্গা কৰা এই ভৱনটো ইতিমধ্যে সমূহীয়া কেন্দ্ৰ(মিলন কেন্দ্ৰ) হিচাপে গঢ়ি তোলা হৈছে। ইয়াৰ পিচত প্ৰায় ২.৩০ বজাত তেওঁলোকে এখন জন সমাৱেশত অংশ গ্ৰহণ কৰিব।
ভূমি পূজন সমাৰোহত প্ৰধানমন্ত্ৰীয়ে ৮০,০০০ কোটিৰো অধিক টকা বিনিয়োগযুক্ত ১৪০৬টা প্ৰকল্পৰ আধাৰশিলা স্থাপন কৰিব। কৃষি আৰু আনুষংগিক খণ্ড, তথ্য প্ৰযুক্তি তথা ইলেক্ট্ৰনিক্স, এমএছএমই, উত্পাদন, নৱীকৰণযোগ্য শক্তি, ঔষধ, পৰ্যটন, প্ৰতিৰক্ষা তথা এৰ’স্পেচ, হস্ত তাঁত আৰু বস্ত্ৰশিল্পকে ধৰি বিভিন্ন খণ্ডৰ প্ৰকল্প ইয়াত সামৰি লোৱা হৈছে। দেশৰ শীৰ্ষ স্থানীয় উদ্যোগপতিসকলে এই সমাৰোহত অংশগ্ৰহণ কৰিব।
স্মৰ্তব্য যে, ২০১৮ চনৰ ২১ আৰু ২২ ফেব্ৰুৱাৰীত ‘উত্তৰ প্ৰদেশ বিনিয়োগকৰ্তা শীৰ্ষ সন্মিলন’ অনুষ্ঠিত হৈছিল। সেই বছৰৰে ২৯ জুলাই আৰু ২০১৯ চনৰ ২৮ জুলাইত ক্ৰমে প্ৰথম আৰু দ্বিতীয় ‘ভূমি পূজন সমাৰোহ’ অনুষ্ঠিত হৈছিল। প্ৰথম ভূমি পূজন সমাৰোহত ৬৫,০০০ কোটি টকা বিনিয়োগযুক্ত ৮১টা আৰু দ্বিতীয় ভূমি পূজন সমাৰোহত ৬৭,০০০ কোটি টকা বিনিয়োগযুক্ত ২৯০টা প্ৰকল্পৰ আধাৰশিলা স্থাপন কৰা হৈছিল।
***
DS/SKS/KB
(Release ID: 1831001)
Read this release in:
English
,
Urdu
,
Marathi
,
Hindi
,
Manipuri
,
Bengali
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam