بندرگاہوں، جہاز رانی اور آبی گزر گاہوں کی وزارت کا مقصد طویل مدتی اسٹریٹجک بنیادی ڈھانچے کے منصوبے سے مضبوط وژن اور قیادت کو فروغ دے کر سرمایہ کاروں کے اعتماد کو مضبوط کرنا ہے جس میں سرمایہ کاری کے قابل منصوبے شامل ہیں جو اقتصادی، سماجی اور ماحولیاتی طور پر پائیدار اور عملی طور پر قابلِ ترسیل ہیں۔ ان بصیرت انگیز اقدامات میں سے ایک پارا دیپ بندرگاہ پر سرمایہ کاری کا منصوبہ ہے جو بندرگاہ کو عالمی معیار کی جدید بندرگاہ میں تبدیل کر دے گا۔ یہ فیصلہ مستقبل کے نقطہ نظر کے ساتھ لیا گیا ہے کیونکہ وزیر اعظم مشرقی ریاستوں کی ترقی پر زور دیتے رہے ہیں۔

اس منصوبے میں پارا دیپ پورٹ پر پبلک پرائیویٹ پارٹنرشپ (PPP) موڈ کے تحت تعمیر، کام اور منتقلی (BOT) کی بنیاد پر مغربی گودی کی ترقی سمیت اندرونی بندرگاہ کی سہولیات کو بڑھانا اور بہتر بنانا شامل ہے۔ پروجیکٹ کی تخمینہ لاگت 3,004.63 کروڑ روپے ہے۔

بندرگاہوں، جہاز رانی اور آبی گزر گاہوں کے مرکزی وزیر جناب سربانند سونووال نے کہا کہ پروجیکٹ کی کامیابی پارا دیپ پورٹ کو میگا پورٹ بنانے کی طرف ایک سنگ میل ہے۔ انھوں نے کہا کہ یہ مشرقی ریاستوں کی ترقی کے وزیر اعظم کے وژن کے مطابق ہے۔ وزیر موصوف نے کہا کہ یہ منصوبہ کیپ سائز کے جہازوں کو ہینڈل کرنے کی بندرگاہ کی صلاحیت میں اضافہ کرے گا، پورٹ کی صلاحیت میں 25 ایم ایم ٹی پی اے کا اضافہ کرے گا اور اس کے نتیجے میں بندرگاہ کی کارکردگی میں بہتری، بہتر کارگو ہینڈلنگ، تجارت میں اضافہ اور سماجی و اقتصادی ترقی اور روزگار کی پیداوار بھی شامل ہے۔

یہ منصوبہ بندرگاہ کی بھیڑ کو کم کرنے میں سہولت فراہم کرے گا، سمندری مال برداری کو کم کرے گا جس سے کوئلے کی درآمدات سستی ہوں گی، اور بندرگاہ کے اندرونی علاقوں میں صنعتی معیشت کو فروغ ملے گا جس سے روزگار کے مواقع پیدا ہوں گے۔

پارا دیپ پورٹ اتھارٹی کو 1966 میں خام لوہے کی برآمد کے لیے ایک مونو کموڈٹی پورٹ کے طور پر شروع کیا گیا تھا۔ پچھلے 54 سالوں میں، بندرگاہ نے مختلف قسم کے EXIM کارگو کو ہینڈل کرنے کے لیے خود کو تبدیل کیا ہے جس میں لوہا، کروم ایسک، ایلومینیم انگوٹ، کوئلہ، پی او ایل، کھاد کے خام مال، چونا پتھر، کلنکر، سٹیل کی تیار مصنوعات، کنٹینرز وغیرہ شامل ہیں۔ پارا دیپ پورٹ اتھارٹی (رعایتی اتھارٹی) مشترکہ معاون پروجیکٹ کے بنیادی ڈھانچے کے کام جیسے بریک واٹر کی توسیع اور دیگر ذیلی کام فراہم کرے گی۔

یہ پارا دیپ پورٹ کے اندرونی علاقوں میں قائم اسٹیل پلانٹس کی بڑی تعداد کو مدنظر رکھتے ہوئے دانے دار سلیگ اور تیار سٹیل کی مصنوعات کی برآمد کے علاوہ کوئلے اور چونے کے پتھر کی درآمدات کی ضروریات کو پورا کرے گا۔

                                               **************

ش ح۔ ف ش ع-م ف

29-05-2022

U: 5869