وزیر اعظم جناب نریندر مودی نے اس سال کان فلم فیسٹیول میں بھارت کی ’کنٹری آف آنر‘ کے طور پر شرکت پر خوشی کا اظہار کیا ہے۔ ایک پیغام میں وزیر اعظم نے کہا کہ بھارت کی شرکت، ملک کی آزادی کے 75 سال، کان فلم فیسٹیول کی 75ویں سالگرہ اور بھارت اور فرانس کے درمیان سفارتی تعلقات کے 75 سال کے حسن اتفاق کے اہم موقع کی ترجمانی کرتی ہے۔

بھارت کو دنیا کا سب سے بڑا فلم ساز ملک قرار دیتے ہوئے، وزیر اعظم نے کہا کہ ہمارے فلمی شعبے کی کثیر جہتی شکل قابل ذکر ہے اور بیش قیمتی وراثت اور ثقافتی تنوع ہماری خصوصیت ہے۔ وزیر اعظم نے کہا کہ بھارت کے پاس کہنے کے لیے بہت ساری کہانیاں ہیں اور اس ملک میں درحقیقت دنیا کا کنٹینٹ ہب بننے کے بے پناہ امکانات موجود ہیں۔

فلم کے شعبے میں تجارت میں آسانی کو لے کر بھارت کے عزم کو دوہراتے ہوئے، جناب نریندر مودی نے کہا کہ مشترکہ طور پر بین الاقوامی فلم بنانے میں آسانی پیدا کرنے سے لے کر ملک بھر میں کہیں بھی فلم سازی کی اجازت کے لیے سنگل ونڈو کلیئرنس کے طریقہ کار کو یقینی بنانے کے ذریعے بھارت دنیا بھر کے فلم سازوں کو بلا روک ٹوک امکانات مہیا کرتا ہے۔

وزیر اعظم نے ستیہ جیت رے کی پیدائش کے سو سال مکمل ہونے کے موقع پر اس عظیم فلم ساز کی ایک فلم کو کان کلاسک کے زمرے میں دکھائے جانے کے مقصد سے محفوظ کیے جانے پر خوشی کا اظہار کیا۔

اس فلم فیسٹیول میں پہلی بار کی جا رہی کئی پہل میں سے ایک کے طور پر، بھارت کے اسٹارٹ اپ فلمی دنیا کے سامنے اپنی صلاحیتوں کا مظاہرہ کریں گے۔ وزیر اعظم نے امید ظاہر کی کہ انڈیا پویلین ہندوستانی سنیما کے مختلف پہلوؤں کو دکھائے گا اور بین الاقوامی شراکت داری اور سیکھنے کے عمل کی حوصلہ افزائی کرے گا۔

پس منظر:

فرانس میں 75ویں کان فلم فیسٹیول کے ساتھ ساتھ منعقد آئندہ ’مارچے ڈو فلم‘ میں بھارت باضابطہ طور پر ’کنٹری آف آنر‘ ہوگا۔ کنٹری آف آنر کا درجہ بھارت اور اس کے سنیما، اس کی ثقافت اور وراثت کو مرکز میں رکھ کر میجسٹک بیچ پر منعقد کیے جانے والے ’مارچے ڈو فلم‘ کی اوپننگ نائٹ میں فوکس کنٹری کے طور پر بھارت کی موجودگی کو یقینی بناتا ہے۔

بھارت ’’کان نیکسٹ‘‘ میں بھی کنٹری آف آنر ہے، جس کے تحت 5 نئے اسٹارٹ اپ کو آڈیو وژوئل صنعت کو آگے بڑھانے کا موقع دیا جائے گا۔ اینی میشن ڈے نیٹ ورکنگ میں دس پیشہ ور شریک ہوں گے۔ کان فلم فیسٹیول کے اس پروگرام میں بھارت کی حصہ داری کے ایک خاص توجہ کے طور پر، جناب آر مادھون کے ذریعے بنائی گئی فلم ’’راکیٹری‘‘ کا ورلڈ پریمیئر 19 مئی، 2022 کو مارکیٹ اسکریننگ کے پلائس ڈیس فیسٹیولز میں دکھایا جائے گا۔

مرکزی وزیر جناب انوراگ ٹھاکر ہندوستانی وفد کی قیادت کر رہے ہیں اور اس میں پورے بھارت کی فلمی ہستیاں شامل ہیں۔

*****

ش ح – ق ت – ت ع

U: 5454