লৈবাক অসিগী অহানবা “অমৃত সরোৱর” অসি ঙসি রামপুর (য়ু.পি.)গী পতৱাইদা কেন্দ্রগী মাইনোরিতী এফিয়র্স মন্ত্রী, শ্রী মুখতার অব্বাস নকৱি অমসুং উত্তর প্রদেশকী জল শক্তি মন্ত্রী, শ্রী স্বাতন্ত্র দেব সিংনা শঙ্গাখ্রে।

থৌরম অদুদা ৱা ঙাংলদুনা, শ্রী নকৱিনা হায়খি মদুদি মসিগী চিংলেম্বা “অমৃত সরোৱর” অসি প্রধান মন্ত্রী, শ্রী নরেন্দ্র মোদীনা পুক্নিং থৌৎগত্তুনা অমসুং উত্তর প্রদেশকী মুখ্য মন্ত্রী, শ্রী য়োগি অদিত্যনাথকী লমজিং-লমতাক মখাদা শাখিবনি।

মন্ত্রী অসিনা হায়খি মদুদি মীচম প্রজাশিং, খুঞ্জাশিংনা শরুক য়াবা অমসুং তেবাং পীদুনা অমসুং গ্রাম পঞ্চায়ত অমসুং জিলাগী এদমিনিস্ত্রেশন্না মতম চানা থবক পাইখৎপা অদুনা অতেনবা মতমগী মনুংদা মশিগী চিংলেম্বা “অমৃত সরোৱর” অসি হাংদোকপদা য়াম্না মরু ওইবা থৌদাং লৌখি।

মহাক্না হায়খি মদুদি মমাং থাগী “মন কি বাত” থৌরমদা, প্রধান মন্ত্রী, শ্রী নরেন্দ্র মোদীনা রামপুরগী পতৱাইদা লৈরিবা “অমৃত সরোৱর” অসিগী মতাংদা পনখি।

প্রধান মন্ত্রী, শ্রী নরেন্দ্র মোদীনা “মন কি বাত”তা হায়খি, “ঐহাক্না খঙবা পাম্লি মদুদি অমৃত সরোৱরগী ফিরেপ অসি লৌরবা মতুংদা, মফম কয়া খোংজেল য়াংনা থবক তৌবা হৌখ্রে। ঐহাক্না য়ু.পি.দা রামপুরগী পতৱাইগী গ্রাম পঞ্চায়ত অসিগী মতাংদা খঙলকখি। গ্রাম সভাগী লমদা পুখ্রি অমা লৈরম্মি অদুবু মফম অদু অমোৎ-অকাই অমসুং ফত্তা-হাওদিনা পিক থল্লম্মি। য়াম্না কন্না হোৎনদুনা, লমদম অদুগী মীশিং অমসুং লম অদুগী স্কুলগী মহৈরোইশিংগী মতেংদগী অমোৎপা পুখ্রি অদু হৌখিবা চয়োল খরদা অওনবা অমা পুরকখি। হৌজিক্তি পাত অদুগী মপান্দা থৌরাং কয়া অমা পাংথোকখ্রে খুদম ওইনা রিতেনিং ৱাল, বাউন্দরী ৱাল, ফুদ কোর্ত, ফাউন্তেনশিং অমসুং লাইতিং তৌখ্রে। ঐহাক্না রামপুরগী পতৱাই গ্রাম পঞ্চায়ত, খুঙ্গং অদুগী খুঞ্জাশিং, অঙাংশিংবু মসিগী থবক অসিগীদমক্তা থাগৎপা ফোংদোক্লি।”

শ্রী নকৱিনা হায়খি মদুদি মসিগী “অমৃত সরোৱর” অসিনা অকোইবগী ফিভম ঙাকশেন্দুনা থম্বা অমসুং ঈশিং লিদুনা থম্বদা মতেং পাংবদা নত্তনা মনাক নকপদা লৈবা মীশিংগী পুক্নিং চিংশিন্নিংঙা ওইবা মফম অমসু ওইগনি। ফুদ কোর্ত, ফাউন্তেনশিং অমসুং লাইতিং অমসুং অতোপ্পা ফেসিলিতীশিং থম্বদা নত্তনা মসিগী “অমৃত সরোৱর” অসিদা বোতিংসু লৈ।

থৌরম অদুদা ৱা ঙাংলদুনা, শ্রী স্বাতন্ত্রা দেব সিংনা হায়খি মদুদি রামপুরগী পতৱাইদা লৈরিবা “অমৃত সরোৱর” অসি সরকার অমসুং খুনাইগী মরক্তা কোওর্দিনেশন অমসুং কোওপরেশন পীনবনা কয়া য়াম্না চাউবা অহোংবা অমা পুরকপগে হায়বদুগী খুদম্নি। মহাক্না হায়খি মসিগী “অমৃত সরোৱর” অসিনা অকোইবদা লৈরিবা ফিভমবু ঙাকশেন্দুনা থম্বদা মতেং পাংবদা নত্তনা মনাক নকপা মফমশিংদা লৈবা মীশিংগীদমক্তা পুক্নিং চিংশিন্নিংঙাই ওইবা মফম অমসু ওইগদৌরিবনি। “আজাদি কা অমৃত মাহোতসব”কী মখাদা উত্তর প্রদেশকী জিলা খুদিংমক্তা "অমৃত সরোৱর” ৭৫ শানবা খোজেল য়াংনা থবক তৌরি হায়না শ্রী স্বাতন্ত্র দেব সিংনা হায়খি।

উত্তর প্রদেশকী রাজ্য মন্ত্রী, শ্রী বালদেব সিং ঔলাখ, রামপুর জিলা পঞ্চায়ত চেয়রমেন, শ্রী খয়ালিরাম লোধি, মিলাক এম.এল.এ., শ্রীমতি রাজবালা, এম.এল.সি., শ্রী জয় পাল সিং ব্যাস, পি.এ.সি.এফ.ই.দি. চেয়রমেন, শ্রী সুর্য়া প্রকাশ পাল, বি.জে.পি. রামপুর দিস্ত্রিক্ত প্রেসিদেন্ত, শ্রী অভয় গুপ্তা, কমিস্নর মোরাদাবাদ, শ্রী অঞ্জনেয়া কুমার সিং, দিস্ত্রিক্ত মেজিস্ত্রেত রামপুর, শ্রী রবিন্দ্র কুমার মান্দর, চীফ দেবেলপমেন্ত ওফিসর, শ্রীমতি গজল ভারদৱাজ অমসুং অতোপ্পা দিগ্নিতরীশিংনা থৌরম অদুদা শরুক য়াখি।

*****