سڑکوں پر نقل و حمل اور شاہراہوں کے مرکزی وزیر جناب نتن گڈکری نے سڑکوں کی حفاظت سے متعلق مسائل کو اجتماعی طور پر حل کرنے کے لئے ذمہ داروں کو حساس بنانے پر زور دیا ہے۔ پیر کو سڑکوں پر نقل و حمل اور شاہراہوں کی وزارت اور قومی شاہراہوں کے حکومتِ ہند کے ادارے کی طرف سے سیوو لائف فاؤنڈیشن (ایس ایل ایف) کے تعاون سے منعقدہ ایک تقریب میں انہوں نے کہا کہ سڑکوں کی حفاظت ایک بہت سنگین مسئلہ ہے اور سڑک حادثات بالکل برداشت نہ کی جائیں۔ انہوں نے کہا کہ ہم نے سڑکوں کی حفاظت کو سب سے زیادہ ترجیح دی ہے اور 2024 تک سڑک حادثات میں ہونے والی اموات میں 50 فیصد کمی لانے کانشانہ مقرر کیا ہے۔

جناب گڈکری نے اعلیٰ عہدیداروں کو ہدایت دی کہ وہ سڑکوں کی حفاظت کو جلد از جلد بہتر بنانے کے لئے سیوو لائف فاؤنڈیشن کی طرف سے پیش کردہ مختلف حکمت عملیوں اور حل پر غور کریں اور انہیں عمل میں لائیں۔

وزیر موصوف نے کہا کہ مخدوش مقامات پر فوری کارروائی کی جائے۔ انہوں نے کہا کہ کارروائی کرتے ہوئے تین چیزوں کو زیر غور لایا جائے؛ فوری اقدامات، وسط مدتی کارروائی اور طویل مدتی کارروائی۔ انہوں نے کہا کہ تمام علاقائی افسران اور پروجیکٹ ڈائریکٹروں کو حادثات کُلّی طور پر ٹالنے کا عہد کرنا چاہیے۔

***

ش ح۔ ع س ۔ ک ا