ভারতকী রাস্ত্রপতি, শ্রী রাম নাথ কোবিন্দনা ঙসি (মে ৪, ২০২২) অসামগী তামুলপুরদা বোরো সাহিত্য সভাগী ৬১শুবা চহিগী মীফম শরুক য়াখ্রে‍।

থৌরমদুদা ৱা ঙাঙলদুনা, রাস্ত্রপতিনা হায়খিবদা কেন্দ্র লৈঙাক অমসুং অৱাং নোংপোক লমদমদা লৈরিবা স্তেতশিংগী লৈঙাকশিংনা পুন্না হোৎনিন্নদুনা লমদম অসিদা কাঙলুপ মশেল নুংশিনবগী অমদি ইং-তপ্পগী ফীভম হেন্না কনখৎলক্লে‍। হায়রিবা অহোংবা অসিদা চাওখৎ থৌরাংগী থবকশিংনা মরুওইবা থৌদাং য়ারি হায়বা ৱাফম মহাক্না থমখি‍। মহাক্না অহোংবা অসিগীদমক কেন্দ্র লৈঙাক, স্তেত লৈঙাক অমসুং লমদম অসিগী মীয়ামবু থাগৎখি‍।

মে থা অসি বোরো মীয়ামগীদমক্তদি য়াম্না মরুওইবা থানি মরমদি মে ১দা মখোয়না বোরোফা উপেন্দ্র নাথ ব্রহ্মানা লৈখিদবগী কুমওন পাঙথোক্লি হায়না রাস্ত্রপতিনা ফোঙদোকখি‍। বোরোফানা “হিংউ অ্রমদি অতৈবুসু হিংহল্লু” হায়বা পাউজেল শন্দোক্লম্মি হায়না মহাক্না হায়খি‍। বোরোগী মশাগী শক্তমদা চাউথোকচনা হিংদুনা অতৈ ফুরূপশিংগা নুংশি চাননা লৈমিন্ননবা মহাক্কী পাউজেল মতম পুম্নমক্তা মরুওইবা পাউজেল ওইদুনা লৈহৌরগনি‍।

রাস্ত্রপতিনা বোরো সাহিত্য সভাবু হৌখিবা চহি ৭০সিদা বোরো লোল, সাহিত্য অমসুং নাৎ মপাঙ্গল কনখৎহনবদা মমল নাইদ্রবা থৌদাং লৌখৎবগীদমক্তা থাগৎখি‍। বোরো সাহিত্য সভাগী ফাউন্দর প্রসিদেন্ত জয় ভদ্র হগজর অমসুং জেনেরেল সেক্রেতরী সোনারাম থোসেন্না বোরো লোল শকখঙহনবদা শিংথানিংঙাই ওইবা থৌদাং লৌরমখি হায়না মহাক্না হায়খি‍। বোরো লোলবু স্কুল এজুকেসনগী মেদিয়ম অমা ওইহনবদা অমদি অৱাংবা থাক্কী মহৈ মশিং তমবদা মফম অমা কলহনবদসু সভা অসিনা মরুওইবা থৌদাং য়াখি‍।

হৌজিক ফাওবদা অইবা ১৭তা মখোয়গী বোরো লোলদা ইবা লাইরিকশিংগীদমক্তা সাহিত্য একাদমী মনা লান্থোকখ্রে হায়বা ৱাফম রাস্ত্রপতিনা থমখি‍। মখোয়গী মনুংদা ১০দি শৈরেং ইবদা পীখিবনি‍। মসিনা ববোরো অইবশিংগী মরক্তা শৈরেংবু হেন্না পাম্নবগী মমি উবা ফংই‍। নুপী কয়া অমসু বোরো সাহিত্যগী তোঙান তোঙানবা মওংশিংদা ইরিবা অসিদা মহাক্না নুংঙাইবা ফোঙদোকখি‍‍। মশাগী ওইজবা লাইরিকশিংদা সাহিত্য একাদমমি মনা ফংলবা অহল ওইরবা অইবশিংগী মরক্তা নুপী অনিখক য়াওই হায়বা ৱাফমসু মহাক্না থমখি‍। মহাক্না বোরো সাহিত্য সভাবু নুপী অইবীশিংদা পুক্নিং থৌগৎনবা হায়খি‍। সাহিত্যবু হিংহন্দুনা অমদি মতমগা চুননা থম্নবগীদমক নহা মীরোলনা শরুক য়াশিনবা য়াম্না মরু ওই‍। মরম অসিনা বোরো সাহিত্য সভানা নহা ওইণিবা অইবশিংবা অখন্নবা মওংদা পুক্নিং থৌগৎপিগদবনি‍।

অতোপ্পা লোলগী লাইরিকশিং বোরো লোলদা হন্দোকপগী থবক পায়খৎলি হায়বা ৱাফমসিদা রাস্ত্রপতিনা নুংঙাইবা ফোঙদোকখি‍। মসি মচু মমেন নাইবা লিতরেরী কম্ম্যুনিতী অমগী মচৎনি হায়না মহাক্না হায়খি‍। অসিগুম্বা হন্দোকপগী সাহিত্যশিং অসিনা বোরো লোলগী অপাবশিংদা ভারতকী অতৈ লোলশিংগী অমসুং মালেমগী সাহিত্যগী মরমদা খঙননবগী তাঞ্জা অমসু পীগনি হায়বগী থাজবা মহাক্না ফোঙদোকখি‍।

লমদম অমগী লোল মাঙহন্দনা থমবা অমদি য়োকখৎপা হায়বসি খুন্নাইগী অমদি লৈঙাক্কী থৌদাংনি হায়না রাস্ত্রপতিনা হায়খি‍। বোরো লোল য়োকখৎনবা থৌরাং পায়খৎনবগীদমক মহাক্না অসাম লৈঙাক্তা হায়খি‍।

হিন্দীদা রাস্ত্রপতিগী ৱারোল পানবগীদমক মসিদা নমবিয়ু‍।

*****