ঙসি ইন্দিয়ন এয়র ফোর্সনা মমিং লৈরবা নোংথক্কী লান্মী এয়র ফোর্সকী লৈখিদ্রবা মার্সেল অর্জন সিংহ দি.এফ.সি.গী মফমদা মহাক্কী ১০৩শুবা মপোক কুমওন নুমিত্তা শ্রদ্ধাঞ্জলি কৎখ্রে‍। নুমিৎ অসিদা মার্সেল অসিনা লৈবাক্কী অমদি ইন্দিয়ন এয়র ফোর্সকীদমক লৌরমবা থৌদাংশিংবু ঐখোয়না নীংশিংলি‍।

এয়র ফোর্সকী মার্সেল অর্জন সিংহ লায়লপুরদা (হৌজিক্না পাকিস্তানগী ফৈসলবাদ) এপ্রিল ১৫, ১৯১৯দা পোকখি‍। মশাগী চহি ১৯ শুরকপদা মহাক আর.এ.এফ. কলেজ, ক্রেনৱেলদা ত্রেনিং তৌনবগীদমক খনখি অমদি দিসেম্বর ১৯৩৯দা পাইলোৎ ওফিসর ওইনা রোয়েল এয়র ফোর্সতা লৌশিনখি‍। মহাকপু মালেমগী অনিসুবা লাঞ্জাও মনুংদা বর্মা কেম্পেনগী মতমদা মশক থোক্না লুচিংবগী শক্লোন লৌখিবা, হৈ শিংবা অমদি থৌনা উৎখিবগীদমক দিস্তিঙ্গুইস ফ্লাইং ক্রোস (দি.এফ.সি.) পীদুনা ইকায় খুম্নখি‍। ওগস্ত ১৫, ১৯৪৭দা ভারতনা নীংখা তম্লবা মতমদা, দিল্লীগী রেদ ফোর্ত মথক্তা আই.এ.এফ.কী এয়রক্রাফ্ত চাম্মা হেনবগী ফ্লাই-পাস্ত লুচিংবগী তোপ তোপ্পা ইকায় খুম্নবা পীখি‍। ওগস্ত ০১, ১৯৬৪দা অর্জন সিংহনা মশাগী চহি ৪৪ শুরকপদা এয়র মার্সেলগী রেঙ্কতা চীফ ওফ এয়র স্তাফ (সি.এ.এস.)কী ফম পুখি‍।

সেপ্তেমবর ১৯৬৫তা পাকিস্তান্না ওপরেসন গ্রান্দ স্লাম চত্থরক্তুনা লৈবাকসিগী মরুওইবা ময়োল্লম অখ্নুরদা  লান্দারকপদা লৈবাকসিদা শিংনবা অমা লাকখি‍। নোংথক্কী তেংবাং পীননবা অমদি কয়াম থুনা আই.এ.এফ.না ওপরেসনগীদমক শেম শাবা ঙমগদগে হায়বা ৱাফমদা ঙাকশেল মন্ত্রীগী ওফিস্তা কৌরকপা মতমদা, মহাক্কী মোং হাদবা মতৌ উত্তুনা “…পুং অমদা” হায়না পাউখুম পীখি‍। তশেংনমকসু, ইন্দিয়ন এয়র ফোর্সনা পাকিস্তানকী লাঞ্জঙ অদুদা পুং অমগী মনুংদা লান্দাদুনা পাকিস্তান এয়র ফোর্সপু নমথদুনা ভারত লান্মীবু মায় পাকহনবদা মতেং পাংখি‍।

১৯৬৫গী লান মনুংদা মহাক্না উৎখিবা লুচিংবগী মতৌগীদমক মহাক্কী মফমদা পদ্ম বিভুসন লান্থোকখি‍। অর্জন সিংহনা ইন্দিয়ন এয়র ফোর্সকী অহানবা এয়র চীফ মার্সেল ওইখি‍। জুলাই ১৯৬৯দা থবক্তগী পোত্থারবা মতুংদা মহাক্না আই.এ.এফ.কী য়াইফনবা অমদি চাউখৎনবগীদমক থৌদাং চাউনা লৌরমখি‍। মহাক্না ১৯৭১দগী ১৯৭৪ ফাওবা স্বিৎজর্লেন্দ, দি হোলী সী এন্দ লীচতেন্তৈন্দা এমবেসেদর ওইনা চত্তুনা লৈবাক্কী থৌগল মখা তানা তৌরবা মতুংদা মহাক্না ১৯৭৪দগী ১৯৭৭ ফাওবা নাইরোবিদা লৈবা হাই কম্মিসন ওফ ইন্দিয়া তু কেনয়াবু লুচিংখি‍। মহাক্না ১৯৭৮তগী ১৯৮১ ফাওবা দি মাইনোরিতী কম্মিসন ওফ ইন্দিয়াগী মেমবর ওইনা অমদি ১৯৮৯দগী ১৯৯০ ফাওবা দিল্লীগী লেফ্তনেন্ত গভর্নর ওইনা লৈরমখি‍।

মহাক্কী সর্ভিসপু শকখঙবা ওইনা ভারত লৈঙাক্না জনুৱারী ২০০২দা অর্জন সিংহবু এয়র ফোর্সকী মার্সেলগী রেঙ্ক পীরদুনা মহাকপু ইন্দিয়ন এয়র ফোর্সকী অহানবা ‘ফাইভ স্তার’ রেঙ্ক ওফিসর হাপখি‍। আই.এ.এফ.কীদমক মহাক্না লৌরমবা থৌদাং নীংশিংবা ওইনা, এয়র ফোর্স স্তেসন পনাগরবু ২০১৬দা এয়র ফোর্স স্তেসন অর্জন সিংহ হায়না মমিং ওনখি‍।

মহাক্কী ইচঙ থৌবা মচৎ, মথৌ নীংথিনা তৌবা, লুচিংবগী অমসুং লাল্লোং য়াৎপগী হৈ শিংবদুনা মহাকপু ইন্দিয়র এয়র ফোর্সকী আইকন অমা ওইনা লৌনৈ‍।

***