કેન્દ્રીય માહિતી અને પ્રસારણ મંત્રી શ્રી અનુરાગ ઠાકુરે આજે ગુજરાતમાં ચાર દિવસીય 'માધવપુર ઘેડ મેળા'ના ત્રીજા દિવસે હાજરી આપી હતી. આ કાર્યક્રમમાં મણિપુરના મુખ્યમંત્રી શ્રી એન બિરેન સિંહ અને ગુજરાત સરકારના મંત્રીઓએ પણ હાજરી આપી હતી.

આ પ્રસંગે શ્રોતાઓને સંબોધતા મંત્રીએ જણાવ્યું હતું કે માધવપુર ઘેડ ઉત્સવ એ ભારતના લોકોને જોડવાનું સર્વોચ્ચ પ્રતીક છે અને આ ઉત્સવ દેશના સુદૂર પૂર્વ અને પશ્ચિમને સાથે લાવે છે. ઉત્તર-પૂર્વના રાજ્યોમાં થઈ રહેલા વિકાસ કાર્યો પર બોલતા શ્રી ઠાકુરે જણાવ્યું હતું કે લૂક ઈસ્ટ પોલિસી વર્તમાન સરકાર હેઠળ જ એક્ટ ઈસ્ટ પોલિસી બની છે અને ત્યારથી ભારતના ઉત્તર પૂર્વીય રાજ્યોએ ઈન્ફ્રાસ્ટ્રક્ચર અને સુવિધાઓમાં અભૂતપૂર્વ વિકાસ જોયો છે.

શ્રી ઠાકુરે જણાવ્યું હતું કે પ્રધાનમંત્રી નરેન્દ્ર મોદીની આગેવાની હેઠળની સરકારે ભારતના વિસરાયેલા સાંસ્કૃતિક વારસાને પુનઃજીવિત કરવા માટે સક્રિયપણે કામ કર્યું છે અને પ્રધાનમંત્રીના નેતૃત્વમાં એક તરફ કેદારનાથજી મંદિરનો ભવ્ય ઉત્થાન જોવા મળ્યો છે જ્યારે સોમનાથ મંદિરની ભવ્યતાએ નવી ઊંચાઈઓ હાંસલ કરી છે. મંત્રીએ કાશી વિશ્વનાથ કોરિડોર, રામ મંદિરના નિર્માણ અને ચાર ધામના બ્યુટિફિકેશન પર કેન્દ્ર સરકાર દ્વારા કરવામાં આવેલા કાર્યોની પ્રશંસા કરી હતી.

મંત્રીએ કહ્યું કે જ્યારે ભારતે 1947માં રાજકીય સ્વતંત્રતા મેળવી હતી, ત્યારે સાંસ્કૃતિક સ્વતંત્રતા પ્રાપ્ત થઈ ન હતી અને માત્ર 2014માં જ સાંસ્કૃતિક રાષ્ટ્રવાદ રાજકીય પ્રવચનનો નિર્ણાયક ભાગ બની ગયો હતો. મંત્રીએ વર્તમાન અને ભાવિ પેઢીઓને તેમના સાંસ્કૃતિક મૂળ સાથે જોડાવા માટે આહવાન કર્યું અને કહ્યું કે આપણી જવાબદારી છે કે આપણા સાંસ્કૃતિક વારસાની વાર્તાઓ લોકોમાં પ્રસારિત થાય.

મંત્રીએ અબુ ધાબીની તેમની તાજેતરની મુલાકાતને યાદ કરી અને કહ્યું કે પ્રધાનમંત્રીના નેતૃત્વમાં સ્થાપિત સુમેળભર્યા સંબંધોને કારણે એક ગલ્ફ દેશ હવે ભવ્ય સ્વામી નારાયણ મંદિરનું ઘર બનશે.

શ્રી અનુરાગ ઠાકુરે વચન આપ્યું હતું કે I&B મંત્રાલય તેના મીડિયા એકમો સાથે મળીને તહેવારને પ્રોત્સાહન આપશે અને તેની ભવ્યતામાં વધારો કરશે.

માધવપુર ઘેડ ઉત્સવ 10 થી 13 એપ્રિલ 2022 દરમિયાન યોજવામાં આવી રહ્યો છે. આ ઉત્સવનું ઉદ્ઘાટન ભારતના રાષ્ટ્રપતિ દ્વારા કરવામાં આવ્યું હતું અને ગુજરાત સરકાર દ્વારા સાંસ્કૃતિક મંત્રાલય અને પૂર્વોત્તર ક્ષેત્રના વિકાસ મંત્રાલયની ભાગીદારીમાં આયોજિત કરવામાં આવે છે.

SD/GP/NP

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com