نئی دہلی، یکم اپریل 2022:

وزارت اطلاعات و نشریات (ایم آئی بی) کے سکریٹری جناب اپوروا چندر نے آج بھونیشور میں وزارت کے تحت تمام محکموں کے کام کاج کا جائزہ لیا۔ پریس انفارمیشن بیورو، ریجنل آؤٹ ریچ بیورو، آل انڈیا ریڈیو، دوردرشن، این اے بی ایم اور سی بی ایف سی کے عہدیداروں نے اجلاس میں شرکت کی۔

سیکرٹری موصوف نے حکومت کے فلیگ شپ پروگراموں اور ترقیاتی پالیسیوں اور عام لوگوں تک حکومت کے اقدامات سے متعلق معلومات تک زیادہ رسائی کو یقینی بنانے پر زور دیا۔ انھّں نے کہا کہ عام لوگوں کی شرکت کو یقینی بنانے کے لیے اختراعی طریقے تیار کیے جائیں۔ جمعہ کو بھونیشور میں وزارت کے تحت تمام محکموں کے کام کاج کا جائزہ لیتے ہوئے جناب چندر نے عہدیداروں کو مشورہ دیا کہ وہ عام لوگوں کے ساتھ آسان رابطے کے لیے علاقائی اور مقامی مواد تیار کریں اور نشر کریں۔ "علاقائی مواد پر توجہ مرکوز کی جانی چاہیے۔ تبھی لوگ جڑ سکیں گے اور آپ ان تک مطلوبہ پیغام موثر طریقے سے پہنچا سکیں گے۔"

زیادہ افرادی قوت یا ملازمین کی ضرورت کے معاملے پر رد عمل ظاہر کرتے ہوئے انہوں نے کہا کہ موجودہ ملازمین کو ڈیجیٹل ٹیکنالوجی سے فائدہ اٹھاتے ہوئے بہترین طور طریقے استعمال کرنے چاہئیں۔ سکریٹری نے پرسار بھارتی کے تحت خاص طور پر آل انڈیا ریڈیو اور دوردرشن کے ذریعہ آمدنی پیدا کرنے کی اہمیت پر بھی خصوصی زور دیا۔ انہوں نے کہا کہ اس مقصد کے لیے مارکیٹنگ کی مناسب حکمت عملی تیار کی جائے۔ انہوں نے آل انڈیا ریڈیو اور دوردرشن کے افسران سے بھی مطالبہ کیا کہ وہ کوئز مقابلوں جیسے اختراعی شوز کا اہتمام کریں جو سامعین/ناظرین کے لیے پرکشش ہوں۔

انہوں نے وزارت کے تحت ریجنل آؤٹ ریچ بیورو جیسے فیلڈ میڈیا یونٹوں کی مختلف سرگرمیوں کے اثرات کا جائزہ لینے کے لیے ایک مناسب فیڈ بیک میکانزم تیار کرنے پر بھی خصوصی زور دیا۔ وزیر خارجہ نے کہا، "عام لوگوں سے رابطے کے لیے کی جانے والی مختلف سرگرمیوں سے عوام پر پڑنے والے اثرات کا جائزہ لینے کی کوشش کی جانی چاہیے۔ اس سے بہتر ابلاغی حکمت عملی کی تشکیل کی راہ ہموار ہوگی۔"

سیکرٹری موصوف نے وزارت کے تحت تمام محکموں کے لیے مختص انفرادی کاموں کو مکمل کرنے میں ان کی مشترکہ کوششوں کو سراہا۔ بعد میں سکریٹری نے بھونیشور میں دوردرشن مرکز کا دورہ کیا۔

***

(ش ح - ع ا - ع ر)

U. No. 3728