তোঙান তোঙানবা হকশেলগা মরী লৈনবা ইসুশিংগী মরু ওইরিবা অদুগী মতাংদা এৱার্নেস শন্দোকপদা মেদিয়া ওর্গনাইজেসনশিংনা হেন্না প্রোএক্তিব ওইবা থৌদাং অমা লৌবা ঙম্মী হায়না ঙসি উপ রাস্ত্রপতি শ্রী এম ভেনকাইয়া নাইদুনা ফোংদোকখি৷ মীয়ামবু তাকপি-তম্বিনবা মেদিয়া ওর্গনাইজেসনশিংনা তোঙান তোঙানবা হেল্থ ইসুশিংগী মতাংদা এৱার্নেস কেম্পেন্দশিং শিন্দুনা থোক্লক্নবা মহাক্না হায়খি৷

উপ রাস্ত্রপতি শ্রী এম. ভেনকাইয়া নাইদুনা নেতৱার্ক ১৮ হাপ্লিবা দোকুমেন্তরী অমা, ‘সঞ্জীবানি : দি জর্নী' ফোংখিরম্মী অমদি এৱার্নেস শন্দোকপদা  অমসুং ভেক্সিনগী খোংজেল তপ্লিববু থেংনবদা মীৎয়েং থম্লিবা ফেদেরেল বেঙ্ককী কেম্পেন্দ- সঞ্জীবানি : এ শোত ওফ লাইফ, হৌদোকখিরম্মী৷

ভেক্সিনেসনগী মরু অদু পল্লদুনা, শ্রী নাইদুনা হায়খি, "ভেক্সিন কাপ্পা হায়বসিনা পুন্সিবু তেমশিংনবা য়াবা লাইনা কয়া অমদগী ঙাকথোকপদা য়াম্না মরু ওইবা থৌদাং অমা লৌরি৷ মরম অদুনা, ভেক্সিন কাপ্পগী কান্নবশিং অসি মীয়ামদা মরু ওইনা খুঙ্গংগী লমদমশিংদা লৈরিবা মীয়ামদা এৱার্নেস শন্দোক্নবা মীৎয়েং থমগদবনি৷"

ভারত্তা ঙসি ফাওবদা কোবিদ-১৯ ভেক্সিন দোজ কোতি ১৮৩ হেন্না কাপ্পা ঙমখিবা অসিদা সরকার, হেল্থকেয়র ৱার্করশিং অমদি প্রজাশিংনা পুন্না হোৎনমিন্নদুনা অপুনবগী ওইবা থৌদাং লৌমিন্নখিবা অসিগীদমক শ্রী নাইদুনা থাগৎখি৷ হৌজিক ফাওবা ভেক্সিন কাপ্তনা লৈরিবা মীওইশিংবু ভেক্সিন  কাপথোকপিনবা মহাক্না মীয়ামদা হায়জখি৷

কোর্পোরেৎ সোসিএল রেস্পোন্সিবিলিতীগী মরু ওইবা অদু পল্লদুনা, সি.এস.আর.না কম্পেনীশিংদা সমাজ অসিদা অমুক হন্না পীনবগী ফজরবা খুদোংচাবা অমা পীরি  হায়না শ্রী নাইদুনা ফোংদোকখি৷ সি.এস.আর. অসি চেরিতী নত্রগা ফিলানথ্রোপী অমা খক্তা নত্তে, মসি মীয়ামগী পুন্সিদা অহোংবা পুরক্নবা হোৎনরিবা থৌদাং অমনি হায়না মহাক্না ফোংদোকখি৷

চীফ কন্তেন্ত ওফিসর শ্রী সন্তোশ মেনন, নেতৱার্ক ১৮ দিজিতেলগী সি.ই.ও. শ্রী পুনীত সিংবি, সি.এন.বি.সি. তি.ভি. ১৮গী মেনেজিং দাইরেক্তর শ্রীমতি শীরীন ভান, স্পিসিয়েল প্রোজেক্ত নেতৱার্ক ১৮গী মেনেজিং ইদিতর শ্রী  অনন্দ নর্সিমহন, নেতৱার্ক ১৮ অমসুং ফেদেরেল বেঙ্ককী সেনিয়র একজিক্যুতিবশিং অমসুং অতোপ্পা মীওইশিংনা থৌরম অসিদা শরুক য়াখি৷

******