অসামগী মুখ্য মন্ত্রী, শ্রী হেমন্ত বিস্বা সর্মা অমসুং মেঘালয়গী মুখ্য মন্ত্রী, শ্রী কোনরাদ সাঙমানা ঙসি নই দিল্লীদা কেন্দ্রগী হোম মিনিস্তর, শ্রী অমিত শাহগী মমাংদা অসাম অমসুং মেঘালয়গী রাজ্যগী মরক্তা লৈরিবা ঙমখৈগী খেৎনবা অদুগী মফম ১২গী মনুংদা ৬কী ৱারোইশিন পুরক্তুনা পুৱারী ওইররগদবা য়ানচে অমা খুৎয়েক পীনখি। মসি শান্তি লৈবা অমসুং নুংঙাই-য়াইফরবা নোর্থ ইস্ত অমগীদমক্তা প্রধান মন্ত্রী, শ্রী নরেন্দ্র মোদীগী বিজন অদুবু মপুং ফাহনবদা য়াম্না চাউবা মাইপাকপা অমনি।থৌরম অদুদা কেন্দ্রগী হোম এফিয়র্সকী মন্ত্রালয়, অসামগী সরকার অমসুং মেঘালয়গী সরকারদগী সেনিবর ওফিসরশিংশু শরুক য়াখি।

থৌরম অসিগী মতাংদা ৱা ঙাংলদুনা, কেন্দ্রগী হোম মিনিস্তর, শ্রী অমিত শাহনা হায়খি মদুদি ঙসি অসি চয়েৎনবা অমত্তা লৈতবা নোর্থ ইস্তকীদম পুৱারী ওইহৌরগদবা নুমিৎনি। মহাক্না হায়খি শ্রী নরেন্দ্র মোদীনা শান্তিগী লম্বেলদা, চাউখৎ থৌরাংদা, নুংঙাই-য়াইফনবা অমসুং নোর্থ ইস্তকী কলচরেল হেরিতেজগী প্রোমোশনগীদমকতা থবক কয়া অমা হোৎনখি, মহাক্না ২০১৪দা প্রধান মন্ত্রী হেক ওইবদগী ঐখোয়না লোইনা উরিবনি হায়না মহাক্না হায়খি।  ২০১৯দা মহাক্না হোম মিনিস্তর ওইরবা মতুংদা, ঐহাক্না প্রধান মন্ত্রী উনবা মতমদা, মহাক্না, সরকারগী মরু ওইবা মিৎয়েং থমগদবা হীরম মরি অসিগী মতাংদা হায়রকখি হায়না মহাক্না হায়খি। মহাক্না হায়খি মদুদি মসিগী ২০১৯দগীনা ২০২২ ফাওবগী খোংচৎ অসি অচৌবা মাইপাকপা অমা ফংবদা য়াম্না চাউনা মাইপাকপা ঙমখি।

শ্রী অমিত শাহনা হায়খি মদুদি হৌখিবা চহি অহুম অসিদা, ভারত সরকারনা প্রধান মন্ত্রী, শ্রী নরেন্দ্র মোদীগী লুচিং মখাদা নোর্থ ইস্তকী রাজ্যশিংদা এক্সত্রিমিজম লোইশিন্নবা অমসুং তুং কোইনা শান্তি লৈনবা য়ানচে কয়া অমা খুৎয়েক পীনখি। এক্সত্রিমিস্তশিংবু ত্রিপুরাগী মেনস্ত্রীম সোসাইতীদা পুরক্নবা ২০১৯গী ওগস্ততা এন.এল.এফ.তি. (এস.দি.) এগ্রীমেন্ত খুৎয়েক পীনখি, মসিনা ত্রিপুরাবু ইং-চিকপা শান্তি লৈবা রাজ্য অমা ওইহনবদ বাম্না চাউবা থৌদাং লৌখি। চহী ২৩ শুরবা ব্রু-রিআঙ রেফ্যুজী খ্রাইসিসপু মতম চুপ্পগী ওইনা লোইশিন্না ২০২০গী জনুৱারী ১৬ মমিং লৈরবা এগ্রীমেন্ত অদু খুৎয়েক পীনখি। মসিগী মখাদা পুনশি ৱানা লেল্লম্বা ত্রাইবল ৩৭,০০০না হৌজিক্তি দিগ্নিতী লৈবা পুনশি মহিং অমা হিংলি। শ্রী শাহনা হায়খি মদুদি চহি ৫০ লিরবা বোদোগি ইসু অদুবু অসামগী অশেংবা শক্তম অমত্তা কাইহন্দনা ২০২০গী জনুৱারী ২৭তা বোদো একোর্দ খুৎয়েক পীনখি। অসাম সরকার অমসুং ভারত সরকারনা এগ্রীমেন্ত অদুগী চাদা ৯৫ নিংবা থুংহনখি অমসুং ঙসিদি বোদোলেন্দ অসি শান্তি লৈবা মফম অমা ওইনা খঙনরে অমসুং চাউখৎ-থৌরাংগী লম্বিদা চংশিল্লে। অসামগী কার্বি রিজনদা মতম শাংনা লেরকপা চবেৎনবা অদুবু লোইশিন্নবা ২০২১গী সেপ্তেম্বর ৪দা কার্বি-আঙলোং এগ্রীমেন্ত অসি খুৎয়েক পীনখি। মসিগী মখাদা খুৎলাই পাইবা কেদর ১,০০০না খুৎলাই থাদোক্তুনা মেনস্ত্রীমদা চংজখি।

কেন্দ্রগী হোম মিনিস্তরনা হায়খি মদুদি ঙসি চহি ৫০ শুরবা চয়েৎনবা অমমুক মসিগী এগ্রীমেন্ত অসিনা ৱারোইশিন পুরক্লগনি। তেল্লবা মতমগী মনুংদা, অসাম অমসুং মেঘালয়গী মরক্তা লৈরিবা চয়েৎনবগী ৱাফম ১২গী মনুংদা ৬তি ৱারোইশিন পুরকখ্রে অমসুং রাজ্য অনি অসিগী মরক্তা লৈরিবা ঙমখৈগী চাদা ৭০ ময়া নক্না চয়েৎনবা লৈতবা মফম ওইখ্রে হায়না মহাক্না হায়খি। নোর্থ ইস্ততা চাউখৎপা পুরকপা হায়বসি রাজ্যশিংগী মরক্তা লৈরিবা চয়েৎনবা অসি লোইশিন্দ্রিবা ফাওবা অমসুং খুৎলাই পাইবশিংনা খুৎলাই থাদোক্ত্রিবমখৈ ওইথোক্লোই হায়না মহাক্না হায়খি। মহাক্না প্রধান মন্ত্রী, শ্রী নরেন্দ্র মোদী অমসুং কেন্দ্র সরকারগী মাইকৈদগী রাজ্য অনিমমক্কী মুখ্য মন্ত্রীশিং অমসুং ওফিসিয়েলশিংবু থাগৎপা ফোংদোকখি।

কেন্দ্রগী হোম অমসুং কোওপরেশন মন্ত্রীনা হায়খি মদুদি প্রধান মন্ত্রীগী শান্তি লৈবা অমসুং নুংঙাই-য়াইফবা নোর্থ ইস্তকী মঙলান অদুবু মঙফাওনহন্নবা আজাদি কা অমৃত মাহোতসবকী চহি অসিদা থবক কয়া অমা হোৎনগদবনি। ২০১৯দগী ২০২২ ফাওবদা, খুৎলাই পাইবা কেদর ৬,৯০০ হেন্না সরেন্দর তৌরকখ্রে অমসুং খুৎলাই ৪,৮০০ হেন্না এদমিস্ত্রেশনদা সরেন্দর তৌরকখ্রে। মসি য়াম্না চাউবা মাইপাকপা অমনি। প্রধান মন্ত্রী, শ্রী নরেন্দ্র মোদীনা নোর্থ ইস্ত অসিবু অস্থলাক্সমি হায়না কৌই অমসুং হোৎনরিবশীং অসিনা, নোর্থিস্ত অসিবু লৈবাক অসিগী মেনস্ত্রীমগী শরুক অমা ওইহনবদা নত্তনা লৈবাক অসিগী চাউখৎ-থৌরাংদা ইন্নবগী শাফু অমা ওইগদৌরিবনি। মোদী সরকার অসিনা খুদম ওইনা নার্কোতিক্স লৈতবা, ঈশিং-ঈচাউ লৈতবা অমসুং মপানদগী লোন্না-থুপ্না চঙলক্তবা নোর্থ ইস্ত অমা ওইহন্নবা অনৌবা খোংথাং কয়া অমা লৌখৎলি অমসুং ভারত সরকার আমসুং নোর্থ ইস্তকী রাজ্যশিংনা মসিগী হীরম অসিদা অকক্নবা মতমগী মনুংদা খুমাং চাউশিল্লি হায়না মহাক্না হায়খি। অসাম অমসুং মেঘালয়গী মুখ্য মন্ত্রীশিংনা পোলিতিকেলগী ওইবা অচেৎপা থৌনা-লিংজেল উৎখি, রাজ্য খুদিংমক্কা খন্ন-নৈনরবা মতুংদা নোর্থ ইস্ত অসিবু ঐখোয়না চয়েৎনবা লৈতবা ওইহল্লগনি হায়না শ্রী অমিত শাহনা হায়খি।

অসামগী মুখ্য মন্ত্রী, শ্রী হেমন্ত বিস্বা সর্মা অমসুং মেঘালয়গী মুখ্য মন্ত্রী, শ্রী কোনরাদ সাঙমানা প্রধান মন্ত্রী, শ্রি নরেন্দ্র মোদী অমসুং হোম মিনিস্তর, শ্রী অমিত শাহদা মসিগী দেকেদ কয়া শাংলবা প্রোব্লেম অসিবু লোইশিনবীবগীদমক্তা  তৌবীমল খঙবা উৎখি

রাজ্যগী মরক্তা ঙমখৈগি চয়েৎনবা অসি মরী লৈনবা রাজ্যশিং কোওপরেশন পীদুনা অমসুং ঐখোয় মশেলগী মরক্তা কোওরেশন পীনদুনা অমসুং গ্যান তামিন্নবগী ৱাখল্লোনদা ঙমখৈগী ৱাথোক অসিবু নুংশি-চান্ননা লোইশিন্ননবগীদমক্তা কেন্দ্র সরকারনা মসিগী ফেসিলিতেতর ওইদুনা ৱারোইশিন পুরকপা হায়বসিনা কেন্দ্র সরকারগী কনসিস্তেন্ত এপ্রোচ ওইদুনা লাক্লি। মসিগী এগ্রীমেন্ত অসিনা কোওপরেতিব ফেদরেলিজমবু ময়েক শেংনা তাক্লি অমসুং রাজ্যশিংগী মরক্তা ঙমখৈগী চয়েৎনবশিং অদুবু ৱারোইশিন পুরক্নবগী রোদমেপ অমা পীরগনি।

চয়েৎনবা লৈতবা নুঙাই-য়াইফবা নোর্থ ইস্ত: লিঙ্ক

*****