نئی دہلی، 27 مارچ 2022:

دبئی کے دورے کے دوسرے دن مرکزی وزیر جناب انوراگ ٹھاکر نے آج بیرون ملک مقیم بھارتیوں کی ہنرمندی کی تربیت کے لیے اسکل انڈیا انٹرنیشنل پروجیکٹ تیجس (ٹریننگ فار ایمریٹس جابز اینڈ اسکلز) کا افتتاح کیا۔ اس پروجیکٹ کا مقصد بھارتیوں کو ہنر مندی، سند اور بیرون ملک روزگار مہیا کرانا ہے۔ تیجس کا مقصد بھارتی افرادی قوت کو متحدہ عرب امارات میں مہارت اور بازار کی ضروریات کے لیے لیس ہونے کے قابل بنانے کی راہ استوار کرنا ہے۔

`

افتتاح کے موقع پر حاضرین سے خطاب کرتے ہوئے وزیر موصوف نے کہا کہ بھارت نوجوان آبادی رکھتا ہے۔ نوجوان ملک کی تعمیر اور شبیہ دونوں میں سب سے بڑے اسٹیک ہولڈر ہیں۔ وزیر موصوف نے کہا کہ ہماری توجہ اس آبادی کو ہنر مند بنانے اور دنیا کو بھارت سے بڑی ہنر مند افرادی قوت فراہم کرنا ہے۔ جناب ٹھاکر نے بھارت اور متحدہ عرب امارات کے درمیان مضبوط شراکت داری کے وزیر اعظم نریندر مودی کے وژن کا اعادہ کیا۔ تیجس کا مقصد ابتدائی مرحلے کے دوران متحدہ عرب امارات میں 10,000 نفری کی بھارتی افرادی قوت پیدا کرنا ہے۔

جناب انوراگ ٹھاکر نے بھارت اور متحدہ عرب امارات میں فلم اور انٹرٹینمنٹ اسپیس کی صنعت کے رہ نماؤں کے ساتھ متعدد مذاکرات بھی کیے۔ دن کا آغاز میڈیا اینڈ انٹرٹینمنٹ، ای ویژن کے سی ای او مسٹر اولیویر براملی سے ملاقات سے ہوا۔ میٹنگ میں موجود دیگر سی ای اوز میں ہنگامہ ڈیجیٹل میڈیا کے بانی جناب نیرج رائے اور ٹاٹا پلے کے ایم ڈی اور سی ای او جناب ہرت ناگپال شامل تھے۔ جناب ٹھاکر نے کہا کہ بھارت اور متحدہ عرب امارات آزادی کا امرت مہوتسو کے لیے پروگرامنگ پر مل کر کام کرسکتے ہیں۔ انھوں نے اے وی جی سی سیکٹر میں اشتراک کے لیے متحدہ عرب امارات کو مدعو کیا اور کہا کہ اگر پالیسی میں ضرورت ہو تو اس پر بھی عمل درآمد کیا جاسکتا ہے۔

وزیر موصوف نے ابوظہبی فلم کمیشن کے کمشنر جناب ہنس فریکن کے ساتھ بھی ایک مباحثے میں جناب کبیر خان اور جناب پریادرشن جیسی ممتاز بھارتی فلمی شخصیات سے ملاقات کی۔ وزیر موصوف نے اس بات پر روشنی ڈالی کہ انڈیا پویلین بہت بڑی کشش رہا ہے اور اس سے بھارت کی میڈیا کی صلاحیت ثابت ہوتی ہے۔ جناب ٹھاکر نے کہا کہ میڈیا اور انٹرٹینمنٹ سیکٹر بھارت کو دنیا میں مقام دلانے کی صلاحیت رکھتے ہیں۔ ہماری پوسٹ پروڈکشن صلاحیتیں اب دنیا کے مقابلے پر رکھی جاسکتی ہیں۔ وزیر موصوف نے بھارت میں آرکائیو کے وسیع ممکنہ شعبے میں موجود لوگوں کی توجہ بھی مبذول کرائی۔

اس کے بعد جناب ٹھاکر نے دبئی ایکسپو میں انڈیا پیویلین کے دورے کا آغاز کیا جہاں انھوں نے متحدہ عرب امارات کی حکومت میں بین الاقوامی تعاون کے وزیر مملکت محترمہ ریم الہاشمی سے بھی تبادلہ خیال کیا۔

دبئی ایکسپو پہنچنے پر بھارتی پویلین کے باہر موجود پرجوش بھارتی برادری نے نے وزیر موصوف کا شاندار استقبال کیا۔

دن کے آخری حصے میں جناب انوراگ ٹھاکر نے دبئی ایکسپو میں متحدہ عرب امارات، سعودی عرب اور اٹلی کے ملکی پویلین کا بھی دورہ کیا۔

***

(ش ح - ع ا- ع ر)

U. No. 3313