প্রধান মন্ত্রী, শ্রী নরেন্দ্র মোদীনা ঙসি গুজরাতকী গান্ধীনগরদা নেস্নেল দিফেন্স য়ুনিভর্সিতীবু লৈবাক মীয়ামদা খুৎশিন্নখ্রে অমসুং মসিগী অহানবা কনভোকেসনগী থৌরমদা মশাগী ৱারোল থমখ্রে। হোম এফিয়র্স অমসুং কোওপরেসনগী কেন্দ্র মন্ত্রী, শ্রী অমিৎ শাহসু ঙসিগী থৌরম অসিদা শরুক য়াখি।  গুজরাতকী রাজ্যপাল অচার্য় দেবরাত অমসুং গুজরাতকী মুখ্য মন্ত্রী, শ্রী ভুপেন্দ্রভাই পতেল য়াওনা ঙসিগী থৌরম অসিদা অতোপ্পা মীথুংলেনশিংনা শরুক য়াখি।

থৌরম অসিদা ৱা ঙাংবদা, হোম এফিয়র্স অমসুং কোওপরেসনগী কেন্দ্র মন্ত্রী, শ্রী অমিৎ শাহনা ইং ২০০২দগী ২০১৩ ফাওবগী শ্রী নরেন্দ্র মোদীনা গুজরাতকী মুখ্য মন্ত্রী ওইরিঙৈগী মতমদগী হৌনা, মহাক্না লো অমসুং ওর্দরবু অনৌবা মিৎয়েংদগী য়েংবা হৌখ্রবনি হায়না ফোংদোকখি। লো অমসুং ওর্দর অমদি পুলিসকী থবকপু শুপ্নগী থবক অমখক ওইনা উবগী চৎনবী অসি ব্রিতিশকী মতমদগী হৌনা অদুমক লৈরকখি। অদুবু, শ্রী মোদীনা গুজরাতকী মুখ্য মন্ত্রীগী ফম পায়বা হৌখিবা মতমদা মহাক্না লৌখৎখিবা অহানবা খোঙথাংদি পুলিস ফোর্সপু মোদর্নাইজ তৌবনা ওইখি অমসুং মহাক্কী লুচিং মখাদা, গুজরাতনা পুলিস স্তেসনশিংবু মপুং ওইনা কম্প্যুতরাইজ তৌবা অহানবা রাজ্য ওইখি। শ্রী মোদীনা পুলিস স্তেসনশিংবু অমত্তা ওইনা শম্নহন্নবা স্তেত-ওফ-দি-আর্ত সোফৱেয়রগী ফম্বাক শেমখি, মসিগী মতুং ইন্না কন্সতেবল খনবা মতমদা কম্প্যুতর শিজিন্নবা হৈবশিংবু হেন্না পাম্বগী থাক্তা থমখি, সর্ভিস কন্সতেবলশিংগী অকুপ্পা ত্রেনিং প্রোগ্রাম অমা চত্থখি অমসুং পুলিস ফোর্স অপুনববু কম্প্যুতরাইজ তৌখি। মসিগী মতুংদা, জেল অমসুং ফোরেন্সিক লেবোরেতরীশিংবু শম্নহনবগী থবকশিংসু মখা তানা পায়খৎখি।

মতমদুগী গুজরাতকী মুখ্য মন্ত্রী, শ্রী নরেন্দ্র মোদীনা মরু ওইবা থৌদাং অহুম লৌখি – লৈবাক্কী খ্বাইদগী ফবা লো য়ুনিভর্সিতী শাবা, নেস্নেল দিফেন্স একাদমী অমগী ৱাখল্লোন হৌদোকখি অমসুং মালেমগী থাক্তা লৈবা ফোরেন্সিক সাইন্স য়ুনিভর্সিতী অমসু গুজরাত্তা লিংখৎখি হায়না শ্রী অমিৎ শাহনা পাউদমখি। লো অমসুং ওর্দরগা মরী লৈনবা হীরম অহুম্মকপু য়ুনিভর্সিতী অমা খক্তদা লৈহন্দুনা, শ্রী মোদীনা হায়রিবশিং অসিবু হেক হৌবদগী হৌনা মখোয়গী ত্রেনিংগী মনুংদা পুন্সিন্দুনা নহাশিংদা খুদোংচাবা অসি ফংহনখি। শ্রী মোদীনা গুজরাত্তা পথাপকী মনুংদা পাক চাউরবা অহোংবা অমা পুরকখি অমসুং করিগুম্বা মহৌরোই অমবু করিগুম্বা হীরম অমদা ত্রেন তৌরবদি, মখোয়না মাং থানা থোক্লক্তুনা মখোয়না ত্রেনিং ফংলিবা হীরম অদুগা মরী লৈনবশিংদা মশাগী শরুক তমদুনা পুম্নমক্কী তেংবাংগনি হায়বা মোদেল অমা লৈবাক মীয়াম মাঙদা থমখি হায়না মহাক্না মখা তানা ফোংদোকখি। পুলিস ফোর্সপু মোদর্নাইজ অমসুং কম্প্যুতরাইজ হেক তৌরবা মতুংদা, গুজরাত পুলসিকী কনভিক্সন রেৎনা শুপ্নগী চহি অহুমদা ২২%গী চাংদগী হেনখি হায়না শ্রী অমিৎ শাহনা পাউদমখি। রিসর্চ অমসুং দিভেলপমেন্ত ওইরো, অখঙ-অহৈ নত্ত্রগা সরকারগী থৌমী পুথোকপগী তঙাই ফদবা ওইরো, হায়রিবা হীরমশিং অসি প্রধান মন্ত্রীনা হৌদোক্লম্বনি।

লৈবাক মীয়াম্না ইং ২০১৪দা শ্রী মোদীবু লৈবাক্কী প্রধান মন্ত্রী ওইনা খন্দুনা লৈবাক্কী সেবা তৌজনবা খুদোংচাবা অমা পীখিবা মতমদা, মহাক্না হীরম খুদিংদা চৎনরম্বা থৌওং খুদিংবু থুগাইদুনা মতমগী তঙাই ফদবগী মতুং ইন্না অনৌবা থৌওংগা লোয়ননা অনৌনা অওনবা কয়া পুরক্নবা হোৎনখি হায়না কেন্দ্রগী গৃহ মন্ত্রীনা ফোংদোকখি। নেস্নেল দিফেন্স য়ুনিভর্সিতীনা তোঙান-তোঙানবা হীরম কয়াগী লুপ কয়াদা মখোয়গী অপাম্বা ফংহন্নবা কান্নবা পাউতাক কয়া পীদুনা তেংবাংনরিবা অসি ঐহাক্কী ওইনা য়াম্না নুংঙাইবা ৱাফম অমনি। রাজ্য তরেৎকা মখোয়গী রাজ্যশিংদা কেম্পস হাংবগী য়ানবা লৈনখ্রবা নেস্নেল ফোরেন্সিক সাইন্স য়ুনিভর্সিতীনা রাজ্য অহুমদা মখোয়গী কেম্পস লৈরগদবা অসিগা মান্ননা নেস্নেল দিফেন্স য়ুনিভর্সিতী পাকথোক-চাউথোকপগী থবক থৌরমশিংসু লাক্কদৌরিবা মতমশিংদা খোঙজেল থুনা পায়খৎলগনি। মান্নবা থৌওং অমা ওইনা, নেস্নেল দিফেন্স য়ুনিভর্সিতীনা লমদম খুদিংদা মখোয়গী কেম্পস হাংনবা হোৎনগনি। শ্রী মোদীনা হেক মঙজবা মঙলানগুম্না নেস্নেল দিফেন্স য়ুনিভর্সিতীনা লো অমসুং ওর্দর ঙাক্নবা খল্লিবা থবক্কী থাক অহুম – কন্সতেবল, পি.এস.আই. অমসুং দি.ৱাই.এস.পি.গীদমক্তা মথৌ পাংথোক্তুনা মহৈরোইশিংবু প্রোফেস্নেল ওইনা ত্রেনিং তৌনবগীদমক্তা অফবা অকোয়বগী ফিভম অমসুং ইনফ্রাস্ত্রকচর অনিমক ফংহল্লি অমসুং মখোয়বু কর্মা য়োগী ওইহনগনি।

প্রোফেস্নেল ওইবগী মতৌ লৈরবা মতমদখক্তা হীরম অমদা কাঙলোন চুম্বা অহোংবা পুরকপা ঙমগনি অমসুং হীরমশিং অসিদা মথৌ পাংথোক্লিবা কর্ম য়োগীশিংনা মশাদা চাউথোকচবসু ফাওগনি হায়না শ্রী অমিৎ শাহনা হায়খি। ইং ২০১৮দগী হৌরগা হৌজিক্কী বেৎচ ফাওবগী মহৈরোই ১০৯১না ঙসি মখোয়গী দিগ্রী ফংলগনি অমসুং অদোম খুদিংনা ইশাগী অপাম্বা হীরমশিংদা পাম্বৈ অমা নত্ত্রগা অতোপ্পা পাম্বৈ অমদা শোইদনা ইশাগী শরুক পীবা ঙমগনি হায়না মখোয়গী মফমদা হায়জনীংই।

কেন্দ্রগী গৃহ অমসুং কোওপরেসন মন্ত্রীনা লৈবাক অসি খক্তা নত্তনা মালেম্না মখোয়গী লুচিংবনি খল্লিবা অমসুং হীরম খুদিংগী মতাংদা লৈরিবা মহাক্কী ৱাখল্লোন তানীংলিবা মীওই অমগী মখুত্তগী মহৈরোইশিংনা মখোয়গী দিগ্রী ফংলগনি হায়না ফোংদোকখি। মফমসিদা মহৈ তম্লিবা মহৈরোই খুদিংদা ঐহাক্না হায়জনীংবদি, লৈবাক অসিগী লো অমসুং ওর্দর শেমজিনবতা নত্তনা ইন্তর্নেল সেক্যুরিতী মপাঙ্গল কনখৎহনবা থম্মোয় শেংনা ইথৌ পাংথোকপা হায়বসি ঐখোয়গী পান্দম ওইগদবনি হায়বসিনি। লৈবাক শিনবা থুংবদা নেস্নেল দিফেন্স য়ুনিভর্সিতীগী কেম্পস হাংদোক্লকপা অমসুং ত্রেন নীংথিজনা তৌরবা মহৈরোইশিংনা তোঙান-তোঙানবা মফমগী পুলিস্তা অমসুং পুলিসকী তেংবাংবগী পথাপ্তা অখঙ-অহৈ ওইনা থবক তৌরকপা মতমদা লৈবাক অসিদা অপুনবগী ৱাখল্লোনগা লোয়ননা পুলিস ফোর্স চলায়বগী থৌওং অসিদি নেস্নেল দিফেন্স য়ুনিভর্সিতীনা পাংথোকপা ঙমগনি।

*****