কেন্দ্রগী ফাইনান্স মন্ত্রী নির্মলা সীতারমন্না হায়খি মদুদি ২০২২-২৩গী কেন্দ্রগী বজেৎনা নহারোলশিংনা তৌবা ঙম্বা, মখোয়গী তেক্নোলোজিকেল ওইবা হৈ-শিংবা অমসুং এন্ত্রেপ্রিন্যুর ওইবা ইথিলশিং খঙলি অমসুং পুক্নিং থৌগৎলি।

 “ঐখোয়গী নিং-খা তম্বগী ৭৫শুবা চহিদা, লাক্কদৌরিবা চহি ২৫ অসি ভারতকী চাউখৎ থৌরাংগী য়াম্না মরুওইবা তাঙ্কক অমা ওইরগনি; মরম অদুনা হায়রিবা চহিশিংগী বজেৎ অসি নহারোলগী শক্তি, এন্ত্রেপ্রিন্যুরগী শক্তিদা পুক্নিং থৌগৎকদবনি,” হায়না মহাক্না হায়খি।

“লোকদাউনগা লোয়ননা, ঐখোয়না চহি অনিগী মনুংদা হৌজিকসু য়ুনিকোর্ন ৪৫ শিন-লাংবা ঙম্লি। হায়রিবা অসি তশেংনা নহারোলগী শক্তিনি। ৱাখল্লোনগী ওইবা শক্তি,” হায়না মহাক্না হায়খি।

মহাক্না ঙসি বেঙ্গালুরুদা ইন্দিয়ন গ্লোবেল ফোরুমগী তাউনহোল অমদা “ফাইনান্সিং ইন্দিয়জ গ্লোবেল ফ্যুচর” হায়বা অসিদা ৱা ঙাংখি।

ক্রিপ্তো সেক্তরদা সরকারনা চংশিল্লিবা অসিগা মরী লৈনবা ৱাহং অমদা পাউখুম পীরদুনা, মহাক্না হায়খি মদুদি ক্রিপ্তো সেক্তরগী মতাংদা খন্ন-নৈনরী অমসুং ইন্দস্ত্রীশিংবু শরুক য়াননবা কৌরি।  

মহাক্না ২০২২-২৩গী কেন্দ্রগী বজেৎকী মরুমদা লৈরিবশিং শন্দোক্না তাকখি অমসুং হায়খি মদুদি হায়রিবা বজেৎ অসিনা থম্লিবা পান্দম অসি লৈবাক অসিদা লৈরিবা মীয়াম্বু তেক্নোলোজীদা মাংজিল থাহনবা, খুদোং চাবা পীবা অমসুং থবকশিং হেন্না ফংহনবা অসিনি।

মহাক্না হরাওবসু ফোংদোকখি মদুদি লৈবাক অসিদা লৈরিবা মীচম প্রজা ফাওবনা মশামক দিজিতেল বেঙ্কিংদা চিংশিন্দুনা, ইকোনোমীবু দিজিতাইজেসন তৌবদা খোঙকাপ অমা মাংলোমদা চংশিল্লি।

 “লৈবাক অসিগী মীচম প্রজাশিংনা মশামক দিজিতেল বেঙ্কিং, ক্যু.আর. কোদনচিংবা অসিদা চংশিল্লকপা অসি য়াম্না নুঙাইবা ফাওজৈ। দিজিতেল বেঙ্কিংনা লোকদাউন মনুংদা পৈশা হকথেংননা য়ৌহনবদা সরকারবু মতেং পাংখি,” হায়না মহাক্না হায়খি।

***