তেজপুর য়ুনিভর্সিতী কম্ম্যুনিতীনা লোকেল অমসুং লৈবাক্কী শিংনবশিংগীদমক্তা অনৌবা মওং চেনবা ৱারোইশিন পীগদবনি হায়না ভারতকী রাস্ত্রপতি, শ্রী রাম নাথ কোবিন্দনা ফোংদোকখ্রে। মহাক্না ঙসি (ফেব্রুৱারী ২৬, ২০২২) অসমগী তেজপুরদা পাংথোকখিবা তেজপুর য়ুনিভর্সিতীগী ১৯শুবা কনভোকেসন্দা ৱা ঙাংবদা ৱাফম অসি ফোংদোকখিবনি। তেজপুর য়ুনিভর্সিতীগী ফেকলতী অমসুং মহৈরোইশিংনা য়ুনিভর্সিতী অসিবু ইন্নোভেসনগী মরু ওইবা মফম অমা ওইহন্নবা হোৎনগদবনি হায়না মহাক্না ফোংদোকখি। লোকেল অমসুং লৈবাক্কী শিংনবশিংগী ৱারোইশিন পুরক্নবগীদমক্তা মহৈরোইশিংনা থৌওং অসিদা খুন্নাইবু শরুক য়াহন্নবা অমসুং লোকেলগী রিসওর্সশিং শিজিন্ননবা পুক্নিং থৌগৎখি। অসমগী খুঙ্গং কয়াদা থক্নবা অফবা ঈশিং কয়া ফংহন্নবা তেজপুর য়ুনিভর্সিতীনা অনৌবা মখলগী ৱারোইশিন পুথোকখি তাবদা নুংঙাইবা ফাওই হায়না মহাক্না ফোংদোকখি। য়ুনিভর্সিতী অসিনা খুঙ্গংশিংগা মরী লৈনবগী চাং অসি হেন্না পাকথোকহনগদবনি হায়না মহাক্না ফোংদোকখি। য়ুনিভর্সিতীগী খুন্নাইদা লৈবা থৌদাংগী মখাদা মখোয়না খুঙ্গং খরা কোন্দুনা মদুগী মপুং ওইবা চাউখৎ থৌরাংগী থবক পায়খৎপসু য়াই।

অসম অসি মহৌশাগী ফজবা অমসুং ইনাক খুল্লবা বাইও-দাইবর্সিতীগী খুদোল ফংবা রাজ্য অমনি হায়না রাস্ত্রপতিনা হায়খি। মসিবু ঐখোয়না ঙাক-শেন্দুনা য়োকখৎকদবনি। অসমগী মীওই খুদিংনা, মরুও ওইনা নহারোলশিংনা মসিবু য়োকখৎপা অমসুং তুং কোইনা চৎকদবা চাউখৎপা পুরকপগী হীরমদা মাংজিল থাদুনা লৈগদবনি। তেজপুর য়ুনিভর্সিতীনা পায়খৎপা রিন্যুএবল ইনর্জীগী থবকশিং, মরু ওইনা খুঙ্গংশিংদা, অসিগী মতাংদা তাবদা নুংঙাইবা ফাওই হায়না মহাক্না ফোংদোকখি। নহারোলশিংনা গ্রহ অসিবু শংনা লৈহনবদা অহেনবা থৌদাং লৌফম থোকই অমসুং মখোয়না মশাগী থবক্কী খুত্থাংদা হীরম অসিগী মতাংদা মমুৎ তানা খঙলে হায়বসে তাক্লবনি হায়না মহাক্না মখা তাখি।

অসম রাজ্য অসিনা বাইও-দাইবর্সিতী য়োকখৎপগী মতাংদা শীংথানীংঙাই ওইরবা থবক কয়া পাংথোক্লি হায়না রাস্ত্রপতিনা ফোংদোকখি। কাজিরঙ্গা নেস্নেল পার্ক, তাইগর রিজর্ব অমসুং ইলিফেন্ত রিজর্ব অসিনা অসিগুম্বা য়োকখৎপগী থৌওংদা মশক নাইবা খুদম অমা ওইরি। অসিগুম্বা থৌওং অসি নাগ্রিক খুদিংগী, মরু ওইনা মহৈরোই খুন্নাইগী শোইদনা পাংথোকফম থোকপা থবক ওইগদবনি হায়না মহাক্না ফোংদোকখি।

রাস্ত্রপতিনা অৱাং নোংপোক রাজ্যশিংনা ওর্গানিক ফার্মিংদা অহেনবা মিৎয়েং চঙই হায়বা ৱাফম পল্লদুনা, তেজপুর য়ুনিভর্সিতীনা লমদম অসিগী লৌউ-শিংউগী পোত্থোকশিংবু ব্রান্দিং অমসুং মার্কেতিং তৌবদা মরু ওইবা থৌদাং য়াবা য়াই হায়না ফোংদোকখি। সিরিএলদা য়ুম্ফম ওইবা চাবা য়ারবা চিঞ্জাক অমসুং থৈবোং প্রোসেস তৌনবগীদমক্তা ‘প্রধান মন্ত্রী ফোর্মেলাইজেসন ওফ মাইক্রো ফুদ প্রোসেসিং ইন্তর্প্রাইস স্কিম’গী মখাদা য়ুনিভর্সিতী অসিনা ইনক্যুবেসন সেন্তর অমা শেম্বগী অয়াবা ফংলে তাবদা মহাক্না নুংঙাইবা ফাওই হায়না পাউদমখি। অদুগা মসিগী ফুদ ইঞ্জিনিয়রিং অমসুং তেক্নোলোজী বিভাগপুসু স্কিম অসিবু থবক ওইনা পাংথোক্নবা রাজ্যগী থাক্তা লৈবা তেক্নিকেল ইন্সতিত্যুৎ ওইনা শকখঙখ্রবনি। থোইদোক হেন্দোকপা মহাও অমসুং মনমগীদমক্তা মমিং লৈরবা অসমগী তোপ-তোপ্পা জোহা চেংগী মতাংদা পল্লদুনা অসমগী য়ুনিভর্সিতীশিংনা লৌমীশিংদা অসিগুম্বা তোঙানবা মখলগী চেং অসিগী ব্রান্দিং, মমিং হেন্না চৎহনবা অমসুং য়োনবগী থৌওংশিংদা তেংবাংবা য়াই হায়না রাস্ত্রপতিনা ফোংদোকখি। মতৌ অসিগুম্বা খুমাং চাউশিলহনবা য়াবা লৌউ-শিংউগী তোঙানবা অতোপ্পা পোত্থোক কয়া অমসু লৈরি হায়না মহাক্না মখা তাখি।

কোবিদ লাইচৎনা মহৈ-মশিংদা অয়েৎপা কয়া পীখিববু পল্লদুনা, রাস্ত্রপতিনা লাইচৎ অসিনা ঐখোয়গী অৱাবা য়াম্না তাগনবা মীওই কাংলুপকী এজুকেসন্দা অয়েৎপা কয়া পীখি হায়বা ৱাফম ফোংদোকখি। লাইচৎ মনুংদা পুথোকখিবা নেস্নেল এজুকেসন পোলিসী ২০২০দা তেক্নোলোজীগী মতেংদগী দিজিতেল এজুকেসন্দা অহেনবা মিৎয়েং চঙবগী অখন্নবা ৱাফম কয়া য়াওই হায়না মহাক্না পনখি। অৱাংবা থাক্কী মহৈ-মশিং তম্বা ফংবা হেন্না লাইহন্নবা পান্দমগা লোয়ননা, কেন্দ্র সরকারনা লৈবাক শিংবা থুংবগী মহৈরোইশিংদা মালেমগী থাক্তা লৈবা মহৈ তম্বীবগী পথাপ লৈবা অমসুং মহৈরোইগী ময়ুমদা কান্নবশিং অসি ফংহনগদবা দিজিতেল য়ুনিভর্সিতী অমা লিংখৎনবা ৱারেপ লৌখ্রে হায়না ফোংদোকখি। দিজিতেল য়ুনিভর্সিতী অসিনা ভারতকী তোঙানবা লোল অমসুং আই.সি.তি. ফোর্মেত্তা মহৈ তম্বগী খুদোংচাবা পীগনি। হায়রিবা খোংথাং অসিদা তেজপুর য়ুনিভর্সিতীসু অসামিজ অমসুং অৱাং নোংপোক্কী অতোপ্পা লোলশিংদা মগুন ৱাংবা দিজিতেল কন্তেন্ত কয়া পীদুনা মরু ওইবা স্তেকহোলদর অমা ওইবা য়াগনি হায়না মহাক্না মখা তাখি।

রাস্ত্রপতিনা তেজপুর য়ুনিভর্সিতী অপুনবা তীম অসিনা হৌখ্রবা, হৌজিক্কী মতম অমসুং তুংগী মতমগী মহৈরোইশিংবু অমত্তা ওইবগী ইথিলনা পুন্দুনা থমদুনা য়ুনিভর্সিতী অসিগী পান্দম – জোপান বোগাম তীব্রো গোতিরে – অসিগী মাইকৈদা খোঙজেল য়াঙনা চঙশিন্নবা হায়খি। অসিগুম্বা মিৎয়েং শানবা পান্দম য়ৌনবগীদমক্তা খোঙজেল য়াঙনা চঙশিনবা অসিনা মরম ওইরগা য়ুনিভর্সিতী অসিনা হৌজিক্কী মহৈরোইশিংনা ৱারেপ লৌবা মীওইশিংগী মনুংদা অমা ওইরক্কদবা ইং ২০৪৭কী মতমদা মপাঙ্গল হেন্না লৈবা ভারত অমা ওইরক্কদবা অসিদা মশক থোক্না শরুক তম্বা ঙমগনি হায়না ফোংদোকখি। নীংতম্বা ফংলবা মতুংগী চহি ৭৫ মপুং ফারকপগী মতম তাক্লিবা ‘নীংতম্বগী অমৃত মহোৎসব’কী নুংঙাইবা ফোংদোকপগী অশেংবা ইথিলদি ঐখোয়না হৌজিক ফাওবদা তম্লক্লিবা মহৈশিংগী মতেংনা অৱাংবা পান্দম অমা তানবনি হায়না মহাক্না ফোংদোকখি। ইকুই কুইদবা তুংগী মতমদা তেজপুর য়ুনিভর্সিতীনা এন.আই.আর.এফ.কী খ্বাইদগী মকোক থোংবা ফম ১০গী মনুং চনবা ঙম্নবা হোৎনসি হায়না রাস্ত্রপতিনা হায়খি।

(রাস্ত্রপতিগী ৱারোল য়েংনবগীদমক্তা মফমসিদা নম্বীয়ু)

***