ইলেক্সন কম্মিশনারশিং শ্রী রজিব কুমার অমদি শ্রী অনুপ চন্দ্র পান্দেগা লোইননা চীফ ইলেক্সন কম্মিশনার শ্রী সুশিল চন্দ্রনা ঙসি মরু ইওনা গোৱা, মনিপুর, পঞ্জাব, উত্তরখন্দ অমদি উত্তর প্রদেশকী রাজ্যশিংদা ওইরক্লিবা কোবিদ-১৯গী ফিভম অসি য়েংশিন্নবা অতোপ্পা অচৌবা রিভ্যু মীফম অমা পাংথোকখি৷ কোবিদ-১৯ লাইনা-লাইচৎকী হৌজিক হৌজিক ওইরিবা স্তেতস অমদি প্রোজেক্তেদ ত্রেন্দশিং অসি নৈননবা সেক্রেতরী জেনেরেল অমদি মরী লৈনবা দিপুতী জেনেরেলগা লোইনদুনা লাক্লিবা কম্মিসন অসিনা ভারত সরকারগী হকশেল অমদি য়াইফ-য়ুম্বাল মন্ত্রালয়গী সেক্রেতরী, চীফ সেক্রেতরীশিং অমদি ভোৎ থাদগদৌরিবা রাজ্য মঙাগী চীফ ইলেক্তোরেল ওফিসরশিংগা ভর্চুএল ওইবা মোদতা উনখি৷ পোলিং পর্সোনেলগী এরেঞ্জমেন্তশিং ওইনা অমদি মরী লৈনরিবা রাজ্যশিং অসিদা ভেক্সিন কাপ্পা য়ারবা মীওইশিংগী হৌজিক হৌজিক অহানবা, অনিশুবা ভেক্সিন কাপখিবগী স্তেতস অদুগা মরী লৈননা কুপথনা খন্ন-নৈনবশিং পাংথোকখি৷

ঙসি ফাওবদা অহোংবা লৈত্রিবা নত্রগা হন্থরক্লিবা কোবিদ-১৯ শন্দোকপগী রিপোর্তশিং অসিগী মতাংদা রাজ্যগী চীফ সেক্রেতরী পুম্নমক্না কম্মিসনদা খঙহনখি৷ হোস্পিতেলাইজেসন তৌবগী মশিং অসি হন্থরক্তুনা পোজিতিব ওইবগী চাং অসি তাথরক্লি হায়নসু মখোয়না ফোংদোকখি৷ পোলিতিকেল এক্তিবিতীনা মরম ওইদুনা মীয়ামগা শোক্ন-শম্নবা অসিনা খঙহৌদনা শন্দোকপা অসি থোক্তনবগীদমক কোবিদ প্রোতোকোল চেকশিন-থৌরাংশিং লেপ্প-লৈতনা মখাতানা য়েংশিনবা দরকার ওই হায়না রাজ্যগী ওফিসরশিংনা ফোংদোকখি৷ ফিজিকেল রেল্লীশিং, ইন্দোর/আউতদোর মীতিংশিং, য়ুম-য়ুম চংবগী কেম্পেন্দশিংদা অথিংবা থম্লিবশিং অসিদা কোমথোক্নবা খন্ন-নৈনবগা লোইননা ওইরক্লিবা ফিভম অসিদা ফিল্দ লেবেল ফঙ্কসনরীশিংনা ওর্দরশিং অসি প্রেক্তিকেল্লী ওইনা চৎনহনগদবনি হায়না চীফ ইলেক্সন কম্মিশনার শ্রী সুশিল চন্দ্রনা ফোংদোকখি৷

রাজ্যগী ওফিসরশিং অমদি ভারত সরকারগী হকশেল সেক্রেতরীদগী পীরকপা গ্রাউন্দ রিপোর্তশিং, ইনপ্যুতশিং, অচুম্বা ৱারোলশিং অমদি ফিভমশিং অসি কুপথনা খন্ন-নৈনরবা মতুংদা অমদি হৌজিক ওইরিবা ফিভম অসিদা পোলিতিকেল পার্তীশিংনা ইলেক্সন মোদতা তঙাই ফদবা পোলিতিকেল এক্তিবিতীগী দরকার ওইরিবশিং অসি য়েংলগা, কম্মিসননা মখাগীশিং অসিগুম্না ৱারেপখ্রে:

১.  ২০২২গী ফেব্রুৱারী ১১ ফাওবা রোদ শোশিং, পেদ-য়ত্রশিং, সাইকল/বাইক/ভেহিকল রেল্লীশিং অমদি মীয়ামগী খোংচৎ অমতা পাংথোকপা য়ারোই৷

২.   হৌজিক্তি কম্মিসন অসিনা ফেজ পুম্নমক্কী ওইনা দিজাইনেতেদ ওপন স্পেসশিংদা পোলিতিকেল পার্তীশিং নত্রগা মীখল থেংনগদৌরিবা মীহুৎশিংগী ফিজিকেল মীতিংশিং ২০২২গী ফেব্রুৱারী ১দগী পাংথোকপা য়াহনখ্রে, হায়রিবা মীতিংশিং অসি য়াম্লবদা মীওই ১০০০দগী হেনবা য়ারোই(হৌজিক লৈরিবা মীওই ৫০০ অসিগী মহুৎতা) নত্রগা গ্রাউন্দ কেপাসিতীগী ৫০% নত্রগা এস.দি.এম.এ.না সেত তৌখিবা লিমিত অসিদগী তাথগদবনি৷

৩.  য়ুমথোং-য়ুমথোং চংদুনা কেম্পেন্দ চৎথবগী লিমিত অসিসু কম্মিসন অসিনা হেনগৎহনখ্রে৷ মীও ১০গী মহুৎতা, হৌজিক্তি সেক্যুরিতী পর্সোনেল য়াওদনা মীও ২০না য়ুমথোং-য়ুমথোং চৎপগী কেম্পেন্দশিং অসি শরুক য়াবা য়াগনি৷ য়ুমথোং-য়ুমথোং চৎপগী কেম্পেন্দশিং অসিগী অতোপ্পা ইন্সত্রক্সনশিং মখাতানা লাকখিনি৷

৪.  পোলিতিকেল পার্তীশিংগী ওইনা য়াম্লবদা মীওই ৫০০দগী (হৌজিক হৌজিক মীওই ৩০০ ওইরিবা অসিগী মহুৎতা)তানা ইন্দোর মীতিংশিং পাংথোকপা নত্রগা হোল অদুগী কেপাসিতীগী ৫০% নত্রগা এস.দি.এম.এ.না সেত তৌখিবা লিমিত অদুদা পাংথোক্নবা কম্মিসননা হৌজিক্তি অয়াবা পীখ্রে৷

৫.  ইলেক্সনশিংগা মরী লৈনবা থবক-থৌরমশিংদা পোলিতিকেল পার্তীশিং অমদি মীখল থেংনগদৌরিবা মীহুৎশিংনা কোবিদকা চুনবা শাজৎ অমদি গাইদলাইনশিং অমদি মোদেল কোদ ওফ কন্দক্ত নিংথিনা ইনগদবনি৷

৬.  মথক্তা পল্লিবা হিরমশিং অসিগীদমক মাংজৌননা দিজাইনেতেদ স্পেসশিং খন্দোকপা অমদি তাকপা হায়বসিনা দি.ই.ও.গী থৌদাং ওইগদৌরি৷

২০২২গী জনুৱারী ৮দা ফোংখিবা ২০২২ ইলেক্সনশিং পাংথোকপগী রিভাইস ব্রোদ গাইদলাইনশিং অদুদা পল্লিবা লৈহৌরিবা অথিংবশিং অসি মখাতানা অদুমক থমখিগনি৷

******