"దేశవ్యాప్తంగా గణనీయమైన సంఖ్యలో యాక్టివ్ కేసులు గృహ ఐసోలేషన్‌లో కొవిడ్‌19 నుండి కోలుకుంటున్న దృష్ట్యా, లబ్ధిదారులకు సకాలంలో నాణ్యమైన ఆరోగ్య సంరక్షణను అందించడం కోసం టెలి-కన్సల్టేషన్ సేవల పరిధిని విస్తరించడంపై దృష్టి పెట్టడం చాలా ముఖ్యం". రాష్ట్ర ఆరోగ్య మంత్రులు మరియు ప్రిన్సిపల్ సెక్రటరీలు/అడిషనల్ చీఫ్ సెక్రటరీలు మరియు తొమ్మిది రాష్ట్రాలు/యూటీల (జమ్మూ & కాశ్మీర్, హిమాచల్ ప్రదేశ్, పంజాబ్, చండీగఢ్, ఉత్తరాఖండ్, హర్యానా, ఢిల్లీ, లడఖ్ మరియు ఉత్తరప్రదేశ్) అడ్మినిస్ట్రేటర్‌లతో ఈరోజు సంభాషించిన సందర్భంగా కేంద్ర ఆరోగ్య మరియు కుటుంబ సంక్షేమ శాఖ మంత్రి డాక్టర్ మన్సుఖ్ మాండవియా ఈ విషయాన్ని తెలిపారు. కేంద్ర ఆరోగ్య మరియు కుటుంబ సంక్షేమ శాఖ సహాయ మంత్రి డాక్టర్ భారతి ప్రవీణ్ పవార్ మరియు నీతి ఆయోగ్ సభ్యులు (ఆరోగ్యం) డాక్టర్ వీకే పాల్ సమక్షంలో ఈ సూచన తెలిపారు. రాష్ట్రాలు మరియు కేంద్ర పాలిత ప్రాంతాలు హబ్ మరియు స్పోక్ మోడల్‌ను అవలంబించాలని మరియు మరింత ఎక్కువ టెలి-కన్సల్టేషన్ కేంద్రాలు తెరవబడేలా చూడాలని ఆయన కోరారు. దీని వల్ల లబ్ధిదారులు జిల్లా కేంద్రాలలో ఉన్న నిపుణుల నుండి సలహాలను పొందగలుగుతారు. ఈ-సంజీవని 2.6 కోట్ల మందికి పైగా లబ్ధిదారులకు సేవలను అందించగలిగిందని, ప్రజలు తమ ఇంటి నుండి ఈ విధానంలో వైద్య సలహాలను పొందవచ్చని ఆయన తెలిపారు. "ఇది గేమ్-ఛేంజర్‌గా నిరూపిస్తుంది మరియు చేరుకోలేని మరియు సుదూర ప్రాంతాలకు మరియు ముఖ్యంగా ప్రస్తుత శీతాకాలంలో ఉత్తర ప్రాంతాలకు అపారమైన విలువ మరియు ప్రాముఖ్యతను కలిగి ఉంటుంది" అని ఆయన హైలైట్ చేశారు. ' రాష్ట్రాలు/యూటీలు ఈ కేంద్రాలు 24X7 పని చేసేలా మరియు సామాన్య ప్రజలకు మరియు ఆరోగ్య నిపుణులకు సౌలభ్యం ఉండేలా చూసుకోవాలి. కనీస అవాంతరాలు మరియు ప్రయాణాలను నిర్ధారించడానికి, అటువంటి నిపుణుల సలహాలను బ్లాక్ స్థాయిలు, ద్వితీయ లేదా ప్రాథమిక ఆరోగ్య కేంద్రాల స్థాయిలలో కూడా అందించవచ్చు' అని ఆయన పేర్కొన్నారు. హోం ఐసోలేషన్‌లో ఉన్నవారిని జాతీయ మార్గదర్శకాలకు అనుగుణంగా సమర్థవంతంగా పర్యవేక్షించేలా చూడాలని రాష్ట్రాలు మరియు కేంద్ర పాలిత ప్రాంతాలకు ఆయన సూచించారు.

కొవిడ్ 19 నియంత్రణ మరియు నిర్వహణ కోసం ప్రజారోగ్య సంసిద్ధత మరియు జాతీయ కొవిడ్19 టీకా కార్యక్రమం పురోగతిని సమీక్షించడానికి వర్చువల్ సమావేశం జరిగింది. ఉన్నత స్థాయి సమీక్షా సమావేశంలో పాల్గొన్న వారిలో రాష్ట్ర ఆరోగ్య మంత్రులు శ్రీ అనిల్ విజ్ (హర్యానా) మరియు డాక్టర్ ధన్ సింగ్ రావత్ (ఉత్తరాఖండ్) ఉన్నారు. కోవిడ్-19 మహమ్మారిపై పోరాటంలో కేంద్రం నుండి నిరంతర మద్దతుకు రాష్ట్ర ఆరోగ్య మంత్రులు కేంద్ర ఆరోగ్య మంత్రికి కృతజ్ఞతలు తెలిపారు.

కొవిడ్-19 నియంత్రణ మరియు నిర్వహణలో రాష్ట్రాలు/యూటీలకు మద్దతు ఇవ్వడానికి కేంద్రం కట్టుబడి ఉందని పునరుద్ఘాటిస్తూ డాక్టర్ మన్సుఖ్ మాండవియా 9 రాష్ట్రాలు మరియు కేంద్రపాలిత ప్రాంతాలు ఆరోగ్య మౌలిక సదుపాయాలను బలోపేతం చేయడం కోసం ఈసీఆర్‌పీ-II ప్యాకేజీ కింద కార్యకలాపాలను సమీక్షించి, వేగవంతం చేయాలని అభ్యర్థించారు. వివిధ ఇన్‌ఫ్రా ప్రాజెక్టుల కోసం మంజూరైన మొత్తాన్ని సమర్ధవంతంగా ఉపయోగించడం ద్వారా ప్రస్తుత ఖాళీలను పూడ్చాలని ఆయన ఆరోగ్య మంత్రులు మరియు రాష్ట్ర అధికారులను కోరారు. "పటిష్టమైన ఆరోగ్య మౌలిక సదుపాయాలతో, మెరుగైన సంసిద్ధతతో ఎలాంటి ఆరోగ్య అత్యవసర పరిస్థితిని మరియు ప్రజారోగ్య సంక్షోభాన్ని ఎదుర్కోగలము" అని ఆయన చెప్పారు. కొవిడ్-19 పోర్టల్- https://covid19.nhp.gov.in/లో హాస్పిటల్ బెడ్‌లు, పీఎస్‌ఏ ప్లాంట్లు, ఆక్సిజన్ పరికరాలు వంటి మౌలిక సదుపాయాల లభ్యత, ఆక్యుపెన్సీ మరియు వినియోగాన్ని క్రమం తప్పకుండా నవీకరించాలని రాష్ట్రాలకు సూచించబడింది. ఈ నవీకరణ ఒక పెద్ద చిత్రాన్ని పొందడంలో మరియు సమర్థవంతమైన ప్రజారోగ్య ప్రతిస్పందన కోసం అనేక స్థాయిలలో డేటా ఆధారిత నిర్ణయాలు తీసుకోవడంలో సహాయపడుతుందని గుర్తించబడింది.

రాష్ట్రాలు మరియు యుటిలలో పరీక్షలను వేగవంతం చేయవలసిన అవసరాన్ని కేంద్ర ఆరోగ్య మంత్రి పునరుద్ఘాటించారు. ఆర్టీపీసీఆర్ పరీక్షలో తక్కువ వాటాను చూపుతున్న రాష్ట్రాలు/యూటీలు ఆర్టీపీసీఆర్ ద్వారా పరీక్షలను వేగవంతం చేయాలని అభ్యర్థించబడ్డాయి. రాష్ట్రాలు మరియు కేంద్ర పాలిత ప్రాంతాలు కూడా అభివృద్ధి చెందుతున్న క్లస్టర్‌లు మరియు హాట్‌స్పాట్‌లపై నిశితంగా గమనించాలని మరియు రాష్ట్రంలో మరణాలతో పాటు ఆసుపత్రిలో చేరిన కేసుల ధోరణిని పర్యవేక్షించాలని గుర్తు చేశారు.

కోవిడ్-19తో పోరాడటానికి టీకా అనేది ఒక శక్తివంతమైన సాధనం అని డాక్టర్ మాండవ్య నొక్కి చెప్పారు. భారతదేశంలో మరియు ప్రపంచవ్యాప్తంగా చూసినట్లుగా టీకా తీసుకున్న వ్యక్తులు తీవ్రత మరియు ఆసుపత్రిలో చేరే అవకాశం తక్కువ. టీకాలు తీసుకోని వ్యక్తులు ఎక్కువ ఆసుపత్రిలో చేరడం కనిపిస్తుంది మరియు అందువల్ల టీకాలు వేయని వారికి టీకాలు వేయడం చాలా కీలకం. 15-18 ఏళ్ల మధ్య వయస్కుల్లో టీకాలు వేయడాన్ని ప్రోత్సహించాలని మరియు మొదటి మరియు రెండవ డోసుల కవరేజీ తక్కువగా ఉన్న జిల్లాల్లో పూర్తి కవరేజీని నిర్ధారించాలని ఆయన రాష్ట్రాలను అభ్యర్థించారు.

మా గత అనుభవంతో, 'టెస్ట్-ట్రాక్-ట్రీట్-వ్యాక్సినేట్ & కోవిడ్ సముచిత ప్రవర్తనకు కట్టుబడి ఉండటం'తోపాటు కేసుల పర్యవేక్షణ కూడా కోవిడ్ నిర్వహణకు కీలకమని డాక్టర్ మాండవ్య చెప్పారు.

కేంద్ర ఆరోగ్య శాఖ సహాయ మంత్రి డాక్టర్ భారతి ప్రవీణ్ పవార్ కొనసాగుతున్న వేవ్‌ సమయంలో అప్రమత్తత యొక్క ఆవశ్యకతను నొక్కి చెప్పారు. ఏదైనా పరిణామం చెందుతున్న పరిస్థితులకు అవసరమైన మందుల లభ్యతను నిర్ధారించాలని మరియు కొరత ఏర్పడినప్పుడు సకాలంలో కొనుగోలు ఆర్డర్‌లు అందేలా చూడాలని ఆమె రాష్ట్రాలు/యుటిలను కోరారు.

కోవిడ్ ఉధృతి, ఆసుపత్రిలో చేరడం, బెడ్ ఆక్యుపెన్సీ, టెస్టింగ్ మరియు వ్యాక్సినేషన్ డేటా వంటి వాటితో పాటు కోవిడ్ మేనేజ్‌మెంట్ కోసం ఉత్తమ అభ్యాసాల కోసం రాష్ట్రాలు మరియు యుటిలు చేపడుతున్న కార్యకలాపాల స్నాప్‌షాట్‌ను పంచుకున్నాయి. ఉత్తరప్రదేశ్ వంటి రాష్ట్రాలు హోం ఐసోలేషన్‌లో ఉన్నవారిని పర్యవేక్షించడానికి నిగ్రానీ సమితిల గురించి ప్రస్తావించాయి. కేంద్రపాలిత ప్రాంతమైన లడఖ్‌ హోమ్ ఐసోలేషన్‌లో ఉన్న రోగులకు మందులు, న్యూట్రిషన్ సప్లిమెంట్‌లు మరియు ఇమ్యూనిటీ బూస్టర్‌లను అందిస్తోంది.

శ్రీ రాజేష్ భూషణ్, కేంద్ర ఆరోగ్య కార్యదర్శి, డాక్టర్ బలరామ్ భార్గవ, డీజీ ఐసిఎంఆర్, డాక్టర్ మనోహర్ అగ్నాని, ఏఎస్ (ఆరోగ్య మంత్రిత్వ శాఖ), శ్రీమతి. ఆర్తీ అహుజా, ఏఎస్ (ఆరోగ్య మంత్రిత్వ శాఖ), శ్రీ లవ్ అగర్వాల్, జేఎస్ (ఆరోగ్య మంత్రిత్వ శాఖ), డాక్టర్ సుజీత్ కుమార్ సింగ్, డైరెక్టర్ (ఎన్‌సిడిసి), డాక్టర్ రణదీప్ గులేరియా, ఎయిమ్స్‌ న్యూఢిల్లీ డైరెక్టర్, మరియు రాష్ట్రాల నుండి సీనియర్ అధికారులు ఈ సమావేశంలో పాల్గొన్నారు. .

 

****