হেভী ইন্দস্ত্রীগী কেন্দ্র মন্ত্রী দাঃ মহেন্দ্র নাথ পান্দেনা হৌজিক-হৌজিক চত্থরিবা নীংতম্বগী অমৃত মহোৎসবকী শরুক অমা ওইনা বি.ঐচ.ই.এল.গী মশানা শেম-শাজবা কোইলাদগী মীথানোল (সি.তি.এম.) পুথোকপগী ভারতকী অহানবা পাইলোত প্লান্তপু লৈবাক মীয়ামদা ঙসি শিন্নখ্রে। বি.ঐচ.ই.এল.গী সি.এম.দি., দাঃ নলিন সিংঘাল, হেভী ইন্দস্ত্রী মন্ত্রালয়গী জোইন্ত সেক্রেতরী, শ্রী জীতেন্দ্র সিংহ, বি.ঐচ.ই.এল.গী বোর্দকী ফংস্নেল দাইরেক্তরশিং অমসুং বি.ঐচ.ই.এল. অমদি হেভী ইন্দস্ত্রী মন্ত্রালয়গী সেনিয়র ওফিসিএলশিংসু ভর্চুএলদা পাংথোকপা থৌরমদুদা শরুক য়াখি।

দাঃ পান্দেনা বি.ঐচ.ই.এল.গী হাইদ্রবাদ য়ুনিত্তা শীন-লাঙখিবা ‘আত্মানির্ভর ভারতকী মখাদা শাখিবা পোত্থোকশিং”গী মতাংদা পাংথোকপা একজিবিসন অমসু হৌদোকখি। মসিগী অহেনবা ওইনা, তেলঙ্গানা লমদমগী “ভারতকী নীংতম ইহৌদা মীয়াম্না শকখঙবীদ্রবা অথৌবশিং”গা মরী লৈনবা ওদিও-ভিজুএল প্রজেন্তেসন অমসু উৎখি। বি.ঐচ.ই.এল.গী থৌমীশিংনা প্রোগ্রাম অসিদা ভর্চুএলগী খুত্থাংদা লৈবাক্কী তোঙান-তোঙানবা মফমশিংদগী শরুক য়ানখি। মশিং য়াম্লবা পার্তিসিপেন্তশিংনা থৌরম অসিগীদমক্তা ওনলাইন্দা লোগ-ইন তৌরকপগা লোয়ননা থৌরম অসি লাইব ওইনা ৱেবকাস্তসু তৌখি অমসুং মসিদা থৌমী কয়ানা ব্রোদকাস্ত মোদকী খুত্থাংদা থৌরম অসিদা মিৎয়েং তাখি।

মন্ত্রীনা থৌরম অসিদা ৱা ঙাংবদা প্রধান মন্ত্রী, শ্রী নরেন্দ্র মোদীগী মরোমদোম লেপচবা ভারত অমসুং লু-নানবা অমদি গ্রীন ফ্যুচরগী মঙলান অসি মঙফাওনহনবগী তঙাই ফদবা লৈ হায়না ফোংদোকখি। মঙলান অসিবু মঙফাওনহনবদা মেন্যুফেকচরিং সেক্তরগী থৌদাং অসি য়াম্না মরু ওইগনি হায়না মহাক্না হায়খি। সরকার অসিনা মেক ইন ইন্দিয়া অমসুং আত্মানির্ভর ভারতকুম্বা স্কিমশিংগী খুত্থাংদা মেন্যুফেকচরিং সেক্তরগী মরু ওইববু শকখঙবা হান্ননা হৌখ্রবনি হায়না মহাক্না মখা তানা পনখি। কেপিতেল গুদস ইন্দস্ত্রীনা মেন্যুফেকচরিং সেক্তরগী য়াংলেন শরু ওইগনি হায়না মহাক্না হায়খি। মসিনা য়ুজর ইন্দস্ত্রী ময়াম অমগী মেছিন অমসুং খুৎলায়গুম্বা মরু ওইবা ইনপুৎ কয়া পীরি।

খ্বাইদগী চাউবা ইঞ্জিনিয়রিং অমসুং মেন্যুফেকচরিং ইন্তর্প্রাইস অমা ওইদুনা বি.ঐচ.ই.এল.না সরকারগী মিৎয়েংবু মঙফাওনহনবদা লৌরিবা থৌদাংসি য়াম্না মরু ওই হায়না মন্ত্রীনা ফোংদোকখি। প্রধান মন্ত্রীনা হন্দক্তা লোইশিনখিবা কোপ২৬ মীফমদা লাউথোকখিবগুম্না বি.ঐচ.ই.এল.না ভারতকী ক্লাইমেত কম্মিৎমেন্তশিং ফংবা ঙমহন্নবা মরোমদোম লেপচবা ভারত অমা শেমগৎপদা মরু ওইবা থৌদাং লৌরি হায়না দাঃ পান্দেনা অমুক্কসু মিৎয়েং চঙখি।

বি.ঐচ.ই.এল.গী সি.এম.দি. দাঃ নলিন শিংঘালনা ‘একাম আইকোনিক ৱীক’ পাংথোক্লিঙৈ মনুংদা বি.ঐচ.ই.এল.না পায়খৎখিবা খোঙথাং কয়াগী মরমদা তাক্লদুনা হেভী ইন্দস্ত্রী মন্ত্রালয় অমসুং সরকারনা বি.ঐচ.ই.এল.বু তুং কোইনা তেংবাংবগীদমক্তা থাগৎপা ফোংদোকখি। শরুক য়ারিবা মীয়ামদা ৱা ঙাংলদুনা, আর. অমসুং দি. অসি বি.ঐচ.ই.এল.গী মরু ওইবা পাঙ্গল অমা মতম পুম্বদগী ওইদুনা লাক্লি অমসুং য়ুনাইতেদ নেসন্স ক্লাইমেত চেঞ্জ কনফরেন্স (কোপ২৬)কা মরী লৈননবা প্রধান মন্ত্রীগী ‘পাঞ্চঅমৃত’ মঙলানবু মঙফাওনহনবগী খোঙচত্তা লুচিংবগী থৌদাং লৌনবা বি.ঐচ.ই.এল.না খোঙফম চেৎলি হায়নসু মহাক্না ফোংদোকখি।

মরু ওইনা পনগদবা ৱাফম অমনা, বি.ঐচ.ই.এল. মশানা শেমগৎ-শাগৎচবা অমসুং ইন্সতোল তৌখিবা তি.পি.দি. কেপাসিতী ০.২৫গী সি.তি.এম. পাইলোত প্লান্তনা হৌজিক-হৌজিক হাই এশ ইন্দিয়ন কোলদগী ৯৯%গী চাংদগী হেন্না শেংবা মীথানোল পুথোক্লি। মশক থোকপা থৌওং অমা ওইনা, হাই এশ ইনিদয়ন কোলবু গেসিফিকেসন রুতকী খুত্থাংদা মতৌ অসিগুম্না মীথানোলদা ওন্থোক্লিবা অসি ভারত্তা খ্বাইদগী হান্না পাংথোকপা তেক্নোলোজী অমনি।

*****