ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರ ಅಧ್ಯಕ್ಷತೆಯಲ್ಲಿಂದು ನಡೆದ ಕೇಂದ್ರ ಸಚಿವ ಸಂಪುಟ ಸಭೆ, ವಿಪತ್ತು ನಿರ್ವಹಣಾ ಕ್ಷೇತ್ರದಲ್ಲಿನ ಸಹಕಾರಕ್ಕಾಗಿ ಭಾರತ ಮತ್ತು ತುರ್ಕಮೆನಿಸ್ತಾನ್ ನಡುವಿನ ತಿಳಿವಳಿಕೆ ಒಪ್ಪಂದ (ಎಂ.ಓ.ಯು)ಕ್ಕೆ ಅಂಕಿತ ಹಾಕಲು ತನ್ನ ಅನುಮೋದನೆ ನೀಡಿದೆ.

ಈ ತಿಳಿವಳಿಕೆ ಒಪ್ಪಂದವು ಒಂದು ವ್ಯವಸ್ಥೆಯನ್ನು ಜಾರಿಗೆ ತರಲು ಪ್ರಯತ್ನಿಸುತ್ತದೆ, ಆ ಮೂಲಕ ಭಾರತ ಮತ್ತು ತುರ್ಕಮೆನಿಸ್ತಾನ್ ಎರಡೂ ಪರಸ್ಪರ ವಿಪತ್ತು ನಿರ್ವಹಣಾ ಕಾರ್ಯವಿಧಾನಗಳಿಂದ ಪ್ರಯೋಜನ ಪಡೆಯುತ್ತವೆ ಮತ್ತು ವಿಪತ್ತು ನಿರ್ವಹಣಾ ಕ್ಷೇತ್ರದಲ್ಲಿ ಸನ್ನದ್ಧತೆ, ಪ್ರತಿಕ್ರಿಯೆ ಮತ್ತು ಸಾಮರ್ಥ್ಯ ವರ್ಧನೆ ಕ್ಷೇತ್ರಗಳನ್ನು ಬಲಪಡಿಸಲು ಇದು ಸಹಾಯ ಮಾಡುತ್ತದೆ.

ಈ ತಿಳಿವಳಿಕೆ ಒಪ್ಪಂದವು ಈ ಕೆಳಗಿನ ಕ್ಷೇತ್ರಗಳಲ್ಲಿ ಪರಸ್ಪರ ಪ್ರಯೋಜನಕಾರಿ ಆಧಾರದ ಮೇಲೆ ಸಹಕಾರವನ್ನು ಒದಗಿಸುತ್ತವೆ:

1. ತುರ್ತು ಪರಿಸ್ಥಿತಿಗಳ ಮುನ್ಸೂಚನೆ ಮತ್ತು ಮೇಲ್ವಿಚಾರಣೆ ಹಾಗೂ ಅವುಗಳ ಪರಿಣಾಮಗಳ ಮೌಲ್ಯಮಾಪನ; 
2. ವಿಪತ್ತು ನಿರ್ವಹಣೆಯಲ್ಲಿ ತೊಡಗಿರುವ ಸೂಕ್ತ ಸಂಸ್ಥೆಗಳ ನಡುವೆ ಸಕ್ಷಮ ಪ್ರಾಧಿಕಾರಗಳ ಮೂಲಕ ಸಂವಾದ; 
3. ಜಂಟಿ ಯೋಜನೆ, ಸಂಶೋಧನಾ ಯೋಜನೆಗಳ ಅಭಿವೃದ್ಧಿ ಮತ್ತು ಅನುಷ್ಠಾನ, ವೈಜ್ಞಾನಿಕ ಮತ್ತು ತಾಂತ್ರಿಕ ಪ್ರಕಟಣೆಗಳು ಮತ್ತು ವಿಪತ್ತು ನಿರ್ವಹಣಾ ಕ್ಷೇತ್ರದಲ್ಲಿನ ಸಂಶೋಧನಾ ಕಾರ್ಯಗಳ ಫಲಿತಾಂಶಗಳ ವಿನಿಮಯ; 
4. ಈ ತಿಳಿವಳಿಕೆ ಒಪ್ಪಂದದ ವ್ಯಾಪ್ತಿಯಲ್ಲಿ ಪರಸ್ಪರ ಸಮ್ಮತಿಸಿದಂತೆ ಮಾಹಿತಿ, ನಿಯತಕಾಲಿಕಗಳು ಅಥವಾ ಇತರ ಯಾವುದೇ ಪ್ರಕಟಣೆಗಳು, ವೀಡಿಯೊ ಮತ್ತು ಫೋಟೋ ಸಾಮಗ್ರಿಗಳು ಮತ್ತು ತಂತ್ರಜ್ಞಾನಗಳ ವಿನಿಮಯ; 
5. ಜಂಟಿ ಸಮ್ಮೇಳನಗಳು, ವಿಚಾರ ಸಂಕಿರಣಗಳು, ಕಾರ್ಯಾಗಾರಗಳು ಮತ್ತು ಸಂಬಂಧಿತ ಕ್ಷೇತ್ರಗಳಲ್ಲಿ ಕಸರತ್ತುಗಳು ಮತ್ತು ತರಬೇತಿಗಳ ಸಂಯೋಜನೆ;
6. ವಿಪತ್ತು ನಿರ್ವಹಣೆಯಲ್ಲಿ ತಜ್ಞರು ಮತ್ತು ತಜ್ಞತೆಯ ಅನುಭವಗಳ ವಿನಿಮಯ; 
7. ಶೋಧ ಮತ್ತು ರಕ್ಷಣಾ ಕಾರ್ಯಾಚರಣೆಗಳಲ್ಲಿ ಮೊದಲ ಪ್ರತಿಕ್ರಿಯೆದಾರರ ತರಬೇತಿ ಮತ್ತು ಸಾಮರ್ಥ್ಯ ವರ್ಧನೆ; ವಿಪತ್ತು ನಿರ್ವಹಣಾ ಕ್ಷೇತ್ರದಲ್ಲಿ ಸಾಮರ್ಥ್ಯ ವರ್ಧನೆಗೆ ಅನುಕೂಲವಾಗುವಂತೆ ತರಬೇತಿದಾರರು ಮತ್ತು ತಜ್ಞರ ವಿನಿಮಯ; 
8. ಪರಸ್ಪರರು ಸಮ್ಮತಿಸಿದಂತೆ, ತಾಂತ್ರಿಕ ಸೌಲಭ್ಯಗಳು ಮತ್ತು ಸಲಕರಣೆಗಳನ್ನು ಒದಗಿಸಲು, ವಿಪತ್ತು ನಿರ್ವಹಣೆಯಲ್ಲಿ ಪಕ್ಷಗಳ ಆರಂಭಿಕ ಎಚ್ಚರಿಕೆ ವ್ಯವಸ್ಥೆಗಳು ಮತ್ತು ಸಾಮರ್ಥ್ಯ ವರ್ಧನೆಗೆ ನೆರವು ಒದಗಿಸುವುದು;
9. ಪರಸ್ಪರ ಸಮ್ಮತಿಯಂತೆ, ತುರ್ತು ಸ್ಪಂದನೆಯಲ್ಲಿ ನೆರವು ಒದಗಿಸುವುದು; 
10. ವಿಪತ್ತು ತಾಳಿಕೊಳ್ಳುವ ಮೂಲಸೌಕರ್ಯಗಳ ಸೃಷ್ಟಿಗೆ ಜ್ಞಾನ ಮತ್ತು ಪರಿಣತಿಯ ಪರಸ್ಪರ ನೆರವಿನ ವಿನಿಮಯ; 
11. ಅಂತಾರಾಷ್ಟ್ರೀಯ ಮಾನ್ಯತೆ ಪಡೆದ ಮಾನದಂಡಗಳಿಗೆ ಅನುಗುಣವಾಗಿ ಪರಸ್ಪರ ಸಮ್ಮತಿಸಿದಂತೆ ಗುಣಮಟ್ಟ ನಿರ್ವಹಣಾ ವ್ಯವಸ್ಥೆಗಳನ್ನು ನಿರೂಪಿಸುವುದು;
12. ವಿಪತ್ತು ನಿರ್ವಹಣೆಗೆ ಸಂಬಂಧಿಸಿದ ಇತರ ಯಾವುದೇ ಚಟುವಟಿಕೆಗಳನ್ನು ಪಕ್ಷಕಾರರ ಸಕ್ಷಮ ಪ್ರಾಧಿಕಾರಗಳು ಪರಸ್ಪರ ಸಮ್ಮತಿಸಬಹುದು;

ಪ್ರಸ್ತುತ, ಭಾರತವು   ಸ್ವಿಟ್ಜರ್ಲ್ಯಾಂಡ್, ರಷ್ಯಾ, ಸಾರ್ಕ್, ಜರ್ಮನಿ, ಜಪಾನ್, ತಜಕಿಸ್ತಾನ್, ಮಂಗೋಲಿಯಾ, ಬಾಂಗ್ಲಾದೇಶ ಮತ್ತು ಇಟಲಿಯೊಂದಿಗೆ ವಿಪತ್ತು ನಿರ್ವಹಣಾ ಕ್ಷೇತ್ರದಲ್ಲಿನ ಸಹಕಾರಕ್ಕಾಗಿ ದ್ವಿಪಕ್ಷೀಯ/ಬಹುಪಕ್ಷೀಯ/ಎಂ.ಓ.ಯು./ ಉದ್ದೇಶದ ಜಂಟಿ ಘೋಷಣೆ/ ಸಹಕಾರ ಒಪ್ಪಂದಗಳಿಗೆ ಅಂಕಿತ ಹಾಕಿದೆ.

***