ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ
ପ୍ରଧାନମନ୍ତ୍ରୀ ଜାନୁଆରୀ ୫ ତାରିଖରେ ପଞ୍ଜାବ ଗସ୍ତରେ ଯିବା ସହିତ ୪୨,୭୫୦ କୋଟିରୁ ଅଧିକ ମୂଲ୍ୟର ଏକାଧିକ ବିକାଶମୂଳକ ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ କରିବେ
ଦିଲ୍ଲୀ-ଅମୃତସର-କଟ୍ରା ଏକ୍ସପ୍ରେସ ୱେ ର ଭିତ୍ତିପ୍ରସ୍ତର ସ୍ଥାପନ କରାଯିବ; ଏହା ଦିଲ୍ଲୀରୁ ଅମୃତସର ଏବଂ ଦିଲ୍ଲୀରୁ କଟ୍ରା ପର୍ଯ୍ୟନ୍ତ ଯାତ୍ରା ସମୟକୁ ଅଧା କରିବ
ପ୍ରଧାନମନ୍ତ୍ରୀଙ୍କ ଦୃଷ୍ଟିକୋଣ ଆଧାରରେ ପ୍ରମୁଖ ଧାର୍ମିକ ପୀଠଗୁଡ଼ିକର ସୁଗମତାକୁ ବଢାଇବା ପାଇଁ ଶିଖ ଧାର୍ମିକ ସ୍ଥଳୀଗୁଡିକୁ ଉନ୍ନତ ସଂଯୋଗୀକରଣ କରାଯିବ; ବୈଷ୍ଣୋ ଦେବୀ ପୀଠରେ ପହଞ୍ଚିବା ବି ସହଜ ହେବ
୪ ଲେନ୍ ବିଶିଷ୍ଟ ଅମୃତସର-ଉନା ସେକ୍ସନର ବିକାଶ ହେବ; ଚାରୋଟି ପ୍ରମୁଖ ଜାତୀୟ ରାଜପଥକୁ ସଂଯୋଗ କରିବ
ରଣନୀତିକ ମୁକେରିଆନ-ତଲୱାର ନୂଆ ବ୍ରଡ ଗଜ୍ ରେଳ ଲାଇନ୍ ପାଇଁ ଭିତ୍ତିପ୍ରସ୍ତର ସ୍ଥାପନ କରାଯିବ ; ସମ୍ପୃକ୍ତ ଅଞ୍ଚଳରେ ସବୁଦିନିଆ ସଂଯୋଗ ଯୋଗାଯିବ
ଦେଶର ସମସ୍ତ ଅଞ୍ଚଳରେ ବିଶ୍ୱ ସ୍ତରୀୟ ସ୍ୱାସ୍ଥ୍ୟ ସେବା ଯୋଗାଇବା ପାଇଁ ପ୍ରଧାନମନ୍ତ୍ରୀଙ୍କ ପ୍ରୟାସ ଆଧାରରେ ଏହି ଅଞ୍ଚଳରେ ସ୍ୱାସ୍ଥ୍ୟ ଭିତ୍ତିଭୂମିର ବ୍ୟାପକ ବିକାଶ ହୋଇପାରିବ ।
ଫିରୋଜପୁର ଠାରେ ପିଜିଆଇ ସାଟେଲାଇଟ୍ ସେଣ୍ଟର ଏବଂ କପୁରଥାଲା ଓ ହୋଶିଆରପୁର ଠାରେ ଦୁଇଟି ମେଡିକାଲ୍ କଲେଜ୍ର ଭିତ୍ତିପ୍ରସ୍ତର ସ୍ଥାପନ କରାଯିବ ।
Posted On:
03 JAN 2022 3:48PM by PIB Bhubaneshwar
ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ୨୦୨୨ ମସିହା ଜାନୁୟାରୀ ୫ ତାରିଖ ଦିନ ପଞ୍ଜାବର ଫେରୋଜପୁର ଗସ୍ତ କରିବେ ଏବଂ ଅପରାହ୍ନ ପ୍ରାୟ ୧ ଟା ସମୟରେ ୪୨,୭୫୦ କୋଟିରୁ ଅଧିକ ମୂଲ୍ୟର ଏକାଧିକ ବିକାଶମୂଳକ ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ କରିବେ । ଏହି ପ୍ରକଳ୍ପଗୁଡ଼ିକ ମଧ୍ୟରେ ଦିଲ୍ଲୀ-ଅମୃତସର-କଟ୍ରା ଏକ୍ସପ୍ରେସୱେ; ଅମୃତସର-ଉନା ସେକ୍ସନର ଚାରି ଲେନ୍ କାର୍ଯ୍ୟ; ମୁକେରିଆନ୍ - ତଲୱାର ନୂତନ ବ୍ରଡ୍ ଗଜ୍ ରେଳ ଲାଇନ; ଫିରୋଜେପୁର ଠାରେ ପିଜିଆଇ ସାଟେଲାଇଟ୍ କେନ୍ଦ୍ର ଏବଂ କପୁରଥାଲା ଓ ହୋଶିଆରପୁରର ଦୁଇଟି ନୂତନ ମେଡିକାଲ୍ କଲେଜ ଆଦି ରହିଛି ।
ସମଗ୍ର ଦେଶରେ ଯୋଗାଯୋଗକୁ ସୁଦୃଢ କରିବା ପାଇଁ ପ୍ରଧାନମନ୍ତ୍ରୀଙ୍କ ନିରନ୍ତର ପ୍ରୟାସ ଅନୁଯାୟୀ ପଞ୍ଜାବରେ ଏକାଧିକ ଜାତୀୟ ରାଜପଥ ବିକାଶମୂଳକ ପଦକ୍ଷେପ ଗ୍ରହଣ କରାଯାଇଛି । ଏହାଦ୍ୱାରା ରାଜ୍ୟରେ ଜାତୀୟ ରାଜପଥଗୁଡିକର ମୋଟ ଦୈର୍ଘ୍ୟ ଦୁଇଗୁଣରୁ ଅଧିକ ସହିତ ୨୦୧୪ ରେ ପ୍ରାୟ ୧୭୦୦ କିଲୋମିଟରରୁ ୨୦୨୧ ମସିହାରେ ୪୧୦୦ କିଲୋମିଟରରୁ ଅଧିକ ହୋଇଛି । ପ୍ରମୁଖ ଧାର୍ମିକ ପୀଠଗୁଡିକରେ ଉପଲବ୍ଧତା ବୃଦ୍ଧି ପାଇଁ ପ୍ରଧାନମନ୍ତ୍ରୀଙ୍କ ଦୂରଦୃଷ୍ଟି ପୂରଣ ଦିଗରେ ଏହା ମଧ୍ୟ ଏକ ପଦକ୍ଷେପ ହେବ ।
୬୬୯ କିଲୋମିଟର ଦୈର୍ଘ୍ୟ ଦିଲ୍ଲୀ-ଅମୃତସର-କଟ୍ରା ଏକ୍ସପ୍ରେସୱେ ପ୍ରାୟ ୩୯,୫୦୦ କୋଟି ଟଙ୍କା ବ୍ୟୟରେ ବିକାଶ କରାଯିବ । ଏହା ଦିଲ୍ଲୀରୁ ଅମୃତସର ଏବଂ ଦିଲ୍ଲୀରୁ କଟ୍ରା ପର୍ଯ୍ୟନ୍ତ ଯାତ୍ରା ସମୟକୁ ଅଧା କରିଦେବ । ଏହି ନୂତନ ଏକ୍ସପ୍ରେସୱେ ପ୍ରମୁଖ ଶିଖ ଧର୍ମପୀଠ ସୁଲତାନପୁର ଲୋଧି, ଗୋଣ୍ଡୱାଲ ସାହିବ, ଖଦୁର ସାହିବ, ତାରନ ତାରନ ଏବଂ କଟ୍ରାସ୍ଥିତ ବୈଷ୍ଣୋ ଦେବୀଙ୍କ ପବିତ୍ର ହିନ୍ଦୁ ମନ୍ଦିରର ସ୍ଥାନଗୁଡ଼ିକୁ ସଂଯୋଗ କରିବ । ଏହି ଏକ୍ସପ୍ରେସୱେ ତିନିଟି ରାଜ୍ୟ/କେନ୍ଦ୍ରଶାସିତ ଅଞ୍ଚଳ ହରିଆନା, ଚଣ୍ଡିଗଡ, ପଞ୍ଜାବ ଏବଂ ଜାମ୍ମୁକାଶ୍ମୀର ପ୍ରମୁଖ ଆର୍ଥିକ କେନ୍ଦ୍ର ଯଥା ଅମ୍ବାଲା, ଚଣ୍ଡିଗଡ଼, ମୋହାଲି, ସାଙ୍ଗୁର, ପଟିଆଲା, ଲୁଧିଆନା, ଜଳନ୍ଧର, କପୁରଥାଲା, କାଠୁଆ ଏବଂ ଶାମ୍ବା ଆଦିକୁ ସଂଯୋଗ କରିବ ।
ଅମୃତସର-ଉନା ସେକ୍ସନର ଚାରି ଲେନିଂ କାର୍ଯ୍ୟ ପ୍ରାୟ ୧୭୦୦ କୋଟି ଟଙ୍କା ବ୍ୟୟରେ କରାଯିବ । ଏହି ୭୭ କିଲୋମିଟର ଦୈର୍ଘ୍ୟ ସେକ୍ସନଟି ଅମୃତସରରୁ ଭୋଟା କରିଡରର ଏକ ଅଂଶ ଏବଂ ସମଗ୍ର ଉତ୍ତର ପଞ୍ଜାବ ଏବଂ ହିମାଚଳ ପ୍ରଦେଶ ସହିତ ଚାରିଟି ପ୍ରମୁଖ ଜାତୀୟ ରାଜପଥ ଅମୃତସର-ଭଟିଣ୍ଡା-ଜାମନଗର ଅର୍ଥନୈତିକ କରିଡର, ଦିଲ୍ଲୀ - ଅମୃତସର - କଟ୍ରା ଏକ୍ସପ୍ରେସୱେ, ଉତ୍ତର-ଦକ୍ଷିଣ କରିଡର ଏବଂ କଙ୍ଗରା-ହାମିରପୁର-ବିଳାସପୁର-ଶିମଲା କରିଡରକୁ ସଂଯୋଗ କରିବ । ଏହା ଘୋମନ୍, ଶ୍ରୀ ହରଗୋବିନ୍ଦପୁର ଏବଂ ପୁଲପୁକଟା ଟାଉନ୍ (ପ୍ରସିଦ୍ଧ ଗୁରୁଦ୍ୱାର ପୁଲପୁକଟା ସାହିବଙ୍କ ଘର) ରେ ଧାର୍ମିକ ସ୍ଥାନଗୁଡିକର ସଂଯୋଗକୁ ବିକାଶ କରିବାରେ ସାହାଯ୍ୟ କରିବ ।
ପ୍ରଧାନମନ୍ତ୍ରୀ ୪୧୦ କୋଟିରୁ ଅଧିକ ଟଙ୍କା ବ୍ୟୟରେ ର୍ନିମିତ ହେବାକୁ ଥିବା ମୁକେରିଆନ୍ ଏବଂ ତଲୱାର ମଧ୍ୟରେ ପ୍ରାୟ ୨୭ କିଲୋମିଟର ଦୈର୍ଘ୍ୟର ଏକ ନୂତନ ବ୍ରଡ୍ ଗଜ୍ ରେଳ ଲାଇନର ଭିତ୍ତିପ୍ରସ୍ତର ସ୍ଥାପନ କରିବେ । ଏହି ରେଳ ଲାଇନ ନାଙ୍ଗାଲ ଡ୍ୟାମ-ଦୌଲତପୁର ଚୌକ୍ ରେଳ ଷ୍ଟେସନ ପର୍ଯ୍ୟନ୍ତ ସମ୍ପ୍ରସାରିତ ହେବ । ଏହି ଅଞ୍ଚଳରେ ଏହା ଏକ ସବୁଦିନିଆ ପରିବହନ ମାଧ୍ୟମ ଯୋଗାଇବ । ଏହି ପ୍ରକଳ୍ପ ମଧ୍ୟ ରଣନୈତିକ ଗୁରୁତ୍ୱ ବହନ କରେ କାରଣ ଏହା ଜାମ୍ମୁ କାଶ୍ମୀରର ଏକ ବିକଳ୍ପ ମାର୍ଗ ଭାବରେ କାର୍ଯ୍ୟ କରିବ, ମୁକେରିଆନ୍ ଠାରେ ଥିବା ଜଲନ୍ଧର-ଜାମ୍ମୁ ରେଳ ଲାଇନରେ ଯୋଡି ହେବ । ଏହି ପ୍ରକଳ୍ପ ପଞ୍ଜାବର ହୋଶିଆରପୁର ଏବଂ ହିମାଚଳ ପ୍ରଦେଶର ଉନା ଲୋକଙ୍କ ପାଇଁ ବିଶେଷ ଲାଭଦାୟକ ହେବ । ଏହି ଅଞ୍ଚଳର ପର୍ଯ୍ୟଟନକୁ ଏହା ବୃଦ୍ଧି କରିବ ଏବଂ ପାହାଡିଆ ଅଞ୍ଚଳ ତଥା ଧାର୍ମିକ ଗୁରୁତ୍ୱପୂର୍ଣ୍ଣ ସ୍ଥାନଗୁଡିକ ସହିତ ସଂଯୋଗକୁ ସହଜ କରିବ ।
ଦେଶର ସମସ୍ତ ଅଞ୍ଚଳରେ ବିଶ୍ୱ ସ୍ତରୀୟ ଚିକିତ୍ସା ସୁବିଧା ଯୋଗାଇବା ପାଇଁ ପ୍ରଧାନମନ୍ତ୍ରୀଙ୍କ ଉଦ୍ୟମ ଅନୁଯାୟୀ, ପଞ୍ଜାବର ତିନୋଟି ସହରରେ ନୂତନ ଚିକିତ୍ସା ଭିତ୍ତିଭୂମିର ଭିତ୍ତ୍ିପ୍ରସ୍ତର ସ୍ଥାପନ ହେବ । ଫିରୋଜେପୁରର ୧୦୦ ଶଯ୍ୟା ବିଶିଷ୍ଟ ପିଜିଆଇ ସାଟେଲାଇଟ୍ ସେଣ୍ଟର ୪୯୦ କୋଟିରୁ ଅଧିକ ମୂଲ୍ୟରେ ର୍ନିମିତ ହେବ । ଏହା ୧୦ଟି ବର୍ଗ ଯଥା ଆଭ୍ୟନ୍ତରୀଣ ଔଷଧ, ଜେନେରାଲ୍ ସର୍ଜରୀ, ଅର୍ଥୋପେଡିକ୍ସ, ପ୍ଲାଷ୍ଟିକ୍ ସର୍ଜରୀ, ନ୍ୟୁରୋ ସର୍ଜରୀ, ସ୍ତ୍ରୀ ଓ ପ୍ରସୂତୀ ରୋଗ, ପେଡିଆଟ୍ରିକ୍ସ, ଚକ୍ଷୁ ଚିକିତ୍ସା, ଇଏନ୍ଟି ଏବଂ ମାନସିକ ସ୍ୱାସ୍ଥ୍ୟ-ଔଷଧରେ ସେବା ପ୍ରଦାନ କରିବ । ଏହି ସାଟେଲାଇଟ ସେଣ୍ଟର ଫିରୋଜପୁର ଏବଂ ନିକଟବର୍ତ୍ତୀ ଅଞ୍ଚଳରେ ବିଶ୍ୱ ସ୍ତରୀୟ ଚିକିତ୍ସା ସୁବିଧା ଯୋଗାଇବ ।
କପୁରଥାଲା ଏବଂ ହୋଶିଆରପୁରର ଦୁଇଟି ମେଡିକାଲ କଲେଜରେ ପ୍ରାୟ ୧୦୦ଟି ଆସନ କ୍ଷମତା ପାଇଁ ପ୍ରାୟ ୩୨୫ କୋଟି ଟଙ୍କା ବ୍ୟୟରେ ବିକାଶ କରାଯିବ । କେନ୍ଦ୍ରୀୟ ପ୍ରବର୍ତ୍ତିତ ଯୋଜନା ଜିଲ୍ଲା / ରେଫରାଲ୍ ହସ୍ପିଟାଲ୍ ସହିତ ସଂଯୁକ୍ତ ନୂତନ ମେଡିକାଲ୍ କଲେଜ୍ ପ୍ରତିଷ୍ଠାର ତୃତୀୟ ପର୍ଯ୍ୟାୟରେ ଏହି କଲେଜଗୁଡ଼ିକୁ ଅନୁମୋଦନ କରାଯାଇଛି । ଏହି ଯୋଜନା ଅଧୀନରେ ପଞ୍ଜାବ ପାଇଁ ମୋଟ ତିନୋଟି ମେଡିକାଲ କଲେଜକୁ ଅନୁମୋଦନ କରାଯାଇଛି । ପ୍ରଥମ ପର୍ଯ୍ୟାୟରେ ସାସ ନାଗରରେ ଅନୁମୋଦିତ କଲେଜ ଏବେ କାର୍ଯ୍ୟକ୍ଷମ ।
HS
(Release ID: 1787176)
Visitor Counter : 197
Read this release in:
English
,
Urdu
,
Marathi
,
Hindi
,
Bengali
,
Manipuri
,
Assamese
,
Punjabi
,
Gujarati
,
Tamil
,
Telugu
,
Kannada
,
Malayalam