প্রধান মন্ত্রী শ্রী নরেন্দ্র মোদীনা ২০২১গী দিসেম্বর ২১দা প্রয়াগরাজ চৎলগনি অমদি নুংথিলগী পুং ১ তাবা অদুৱাইদা নুপী লাখ ২ হেনবনা শরুক য়াগদৌরিবা অদুগুম্লবা থৌরম অমদা শরুক য়াগনি৷

নুপীশিংদা মরু ওইরিবা স্কিলশিং, ইন্সেন্তিবশিং অমদি রিসোর্সশিং ফংহন্দুনা মখোয়বু গ্রাসরুত লেবেলদগী শক্তি লৈহন্নবা প্রধান মন্ত্রীনা মংজরিবা মংলান অদুগী মতুং ইন্না প্রোগ্রাম অসি পাংথোক্কদৌরি৷ নুপীশিংবু সপোর্ত পীনবা ৱাখল্লোন অসিদা, প্রধান মন্ত্রীনা সেল্ফ হেল্থ গ্রুপশিং(এস.ঐচ.জি.শিং)গী বেঙ্ক একাউন্তদা লুপা কোতি ১০০০গী শেনফম অমা কাইথদুনা এস.ঐচ.জি.গী নুপী মেম্বর লাখ ১৬রোমদা কান্নবা পীরগনি৷ এস.ঐচ.জি.৮০,০০০না এস.ঐচ.জি. অমদা লুপা লাখ ১.১০গী কম্ম্যুনিতী ইনবেস্তমেন্ত ফন্দ ফংদুনা অমদি এস.ঐচ.জি. ৬০,০০০না এস.ঐচ.জি. অমদা লুপা ১৫০০০গী রিবোলবিং ফন্দ ফংদুনা দীনদয়াল অন্ত্যোদায়া য়োজনা-নেস্নেল রুরেল লিবলিহুদ মিসন (দি.এ.ৱাই.-এন.আর.এল.এম.)গী মখাদা শেনফম অসি কাইথরিবনি৷

প্রধান মন্ত্রীনা বি.সি.-সাখিস ২০,০০০গী একাউন্তদা অহানবা থাগী স্ত্রাইপেন্দ অদু ত্রান্সফর তৌদুনা মহাক্না বিজিনেস করেস্পোন্দেন্ত –সাখিশিং (বি.সি.-সাখিশিং) পুক্নিং থৌগৎপা অদু প্রোগ্রাম অসিদা উবা ফংলগনি৷ বি.সি-সাখিসনা গ্রাসরুত লেবেলদা দোরস্তেপ ফাইনান্সিয়েল সর্ভিসশিংগী প্রোবাইদরশিং ওইনা মখোয়গী থবক হৌরকপা মতমদা, মখোয়না মখোয়গী থবক অদুদা চুশিন্ননবা অমদি ত্রান্সেনশিংদা কম্মিসন লৌদুনা শেল তানবা হৌরক্নবগীদমক থা তরুক্কী ওইনা লুপা ৪০০০গী স্ত্রাইপেন্দ অমা পীরি৷

প্রোগ্রাম অদুগী মনুংদা, প্রধান মন্ত্রীনা মুখ্য মন্ত্রী কন্যা সুমঙ্গলা স্কিমগী মখাদা বেনিফিসরী লাখ ১ হেনবদা পুন্না লুপা কোতি ২০ হেনবগী শেনফমসু তান্সফর তৌরগনি৷ স্কিম অসিনা নুপী মচা অমদা মহাক্কী পুন্সিগী তোঙান তোঙানবা স্তেজশিংদা কন্দিসনেল কেশ ত্রান্সফর তৌরি৷ অপুনবা ত্রান্সফর অসি বেনিফিসরী অমদা লুপা ১৫০০০নি৷ স্তেজশিং অদুদি পোকপা মতমদা (লুপা ২০০০), ভেক্সিন কাপখিবা চহি অমা মপুং ফারকপদা (লুপা ১০০০), ক্লাস- Iদা মিং চনবা মতমদা (লুপা ২০০০), ক্লাস–VIতা মিং চনবা মতমদা  (লুপা ২০০০), ক্লাস-IXদা মিং চনবা মতমদা (লুপা ৩০০০), X নত্রগা XII মাই পাক্লবা মতুংদা দিগ্রী/দিপ্লোমা কোর্স অমা হেক্তগী মমিং চনবদা (লুপা ৫০০০) অসিনি৷

প্রধান মন্ত্রীনা সপ্লিমেন্তরী ন্যুত্রিসন মেনুফেকচরিং য়ুনিৎ ২০২গী উরেপ-উয়ুং তম্লগনি৷ হায়রিবা য়ুনিৎশিং অসি সেল্ফ হেল্প গ্রুপশিংনা ফন্দ থাদরি অমদি য়ুনিৎ অমদা চাওরাক্না লুপা কোতি ১গী শেনফম থাদদুনা শেমগৎলগনি৷ হায়রিবা য়ুনিৎশিং অসিনা রাজ্য অসিগী ব্লোক ৬০০তা ইন্তিগ্রেতেদ চাইল্দ দিবেলপমেন্ত স্কিম(আই.সি.দি.এস.)গী মখাদা সপ্লিমেন্তরী ন্যুত্রিসন সপ্লাই তৌরগনি৷

******