প্রধান মন্ত্রী, শ্রী নরেন্দ্র মোদীনা দিসেম্বর ১৩-১৪দা ভরানসীদা চৎকনি। মহাক্না দিসেম্বর ১৩গী নুংথিলগী পুং ১গী অদুৱাইদা শ্রী কাশি ভিশ্বনাথ লাইশঙদা চত্তুনা থৌনীজগনি অমসুং মসিগী মতুংদা লুপা করোর ৩৩৯ চঙনা শাবা শ্রী কাশি ভিশ্বনাথ ধামগী অহানবা তাঙ্কক শঙ্গাগনি।

বাবা ভিশ্বনাথ খুরুম্বা লাকপা মীওইশিংনা শেংলবা তুরেলদা ইরুপ্পা, মদুদগী গঙ্গাজল পুরক্তুনা লাইশঙদা অমুক কৎচবগী চহি কয়াদগী চৎনদুনা লাক্লবা থৌওং পাংথোকপদা অচিনবা অমসুং নীংথিনা য়েংশিন্দ্রবা লম্বী মরক্তা চৎপগী অৱাবা কোকহনবসি প্রধান মন্ত্রীনা মতম কুইনদগী মঙজরক্লবা মঙলান্নি। শ্রী কাশি ভিশ্বনাথ লাইশঙদগী গঙ্গা তুরেল তোর্বান ফাওবা নুংঙাইনা চৎপা য়াবা লম্বী শেম্বগী মঙলান অসিবু মঙফাওনহন্নবগীদমক্তা শ্রী কাশি ভিশ্বনাথ ধাম অসিবু প্রোজেক্ত অমা ওইনা শেম্নবা ৱাহৌদোক পুথোক্নখি। অসিগুম্বা সেংলবা থবক অসি হৌনবগীদমক্তা, প্রধান মন্ত্রীনা মার্চ ৮, ২০১৯দা প্রোজেক্ত অসিগী উরেপ-উয়ুং তমখি।

প্রোজেক্ত অসিগী থাক খুদিংদা প্রধান মন্ত্রীনা  য়াম্না থৱাই য়াওখি। তোয়না মীফম ফম্বা, য়েংশিনবা অমসুং শেন্নবগী থবকশিংবু প্রধান মন্ত্রী মশামক্না পাংথোকখি অমসুং প্রোজেক্ত অসিবু হেন্না ফগৎহন্নবগীদমক্তা অমসুং নাম্ম-শোইবা মীওইশিং য়াওনা অতোপ্পা লাইনীংবশিংদা নুংঙাইহন্নবগীদমক্তা মহাক্না পাউতাক অমসুং কান্নবা ৱাফম কয়া লেপ্তনা পীখি। প্রোজেক্ত অসিদা রেম্প, এস্কেলেতর অমসুং মতমগী অতোপ্পা খুদোংচাবশিং লৈহন্দুনা নাম্ম-শোইবা অমসুং অহলশিংদা হেন্না নুংঙাইহন্নবা মওংদা প্রোজেক্ত অসিগী মওং-মতৌ শেমখি।

প্রোজেক্ত অসিগী অহানবা তাঙ্কক্তা অপুনবা বিলদিং ২৩ শঙ্গাগনি। মখোয়শিং অসিনা অতোপ্পা খুদোংচাবশিংগা লোয়ননা য়াত্রি সুবিধা কেন্দ্র, তুরিস্ত ফেসিলিতেসন সেন্তর, ভেদিক কেন্দ্র, মুমুকশু ভবন, ভোগশালা, সিতী ম্যুজিয়ম, ভ্যুইং গেল্লরী, ফুদ কোর্ত য়াওদুনা শ্রী কাশি ভিশ্বনাথ লাইশঙদা লাকপা মীওইশিংদা মখল কয়াগী খুদোংচাবা ফংহনগনি।

প্রোজেক্ত অসিদা শ্রী কাশি ভিশ্বনাথ লাইশঙগী অকোয়বদা লৈবা লন-থুম ৩০০ হেনববু লৈবগী থৌওং য়াওখি। প্রোজেক্ত অসিগীদমক্তা মীয়াম খুদিংনা তেংবাংহনবগী প্রধান মন্ত্রীগী মপুং ৱাখল্লোন অসি মরী লৈনবা মীওইশিংগী মরক্তা য়ানবা পুরক্তুনা লন-থুমশিং অসি নীংথিজনা লৈবগী থৌওংদা য়ুম্ফম ওইখি। থৌওং অসি পাংথোকপা মতমদা, দুকান ফম্বা চাউরাকপা ১৪০০, য়ুম্বু অমসুং ভরাদা লৈবা মীওই কয়াগী মতিক চাবা খুদোংচাবা শিনবীদুনা নীংথিজনা পাংথোকখি। প্রোজেক্ত অসি পায়খৎনবা হোৎনবদা লন-থুম লৈবগী নত্ত্রগা মতিক চাবা খুদোংচাবা শিনবগী মতাংদা লৈবাক্কী কোর্ত অমত্তদা হীরম অসিগা মরী লৈনবা লিতিগেসন অমত্তা পন্দুনা লৈখিদবা অসিনা থৌওং অসি মাই পাক্না পাংথোকখি হায়বগী খুদম্নি।

প্রোজেক্ত অসি পায়খৎপা মতমদা হেরিতেজ স্ত্রকচর অমত্তদা অকায়-অতোয় লৈতনা হান্নগুম্না লৈহনবা অসি প্রধান মন্ত্রীগী মঙলান্নি। হায়রিবা ৱাখল্লোন অসি অরিবা লন-থুমশিং থুগায়বগী থবক-থৌরমশিংদা য়াম্না কান্নখি অমসুং মসিদা অরিবা লাইশঙ ৪০ হেন্না নৌনা খঙদোকখি। হায়রিবা লাইশঙশিং অসি নৌনা শেমদোক্তুনা ফজহনখি অমসুং হান্নগী মওং মতৌদসু অহোংবা অমত্তা লৈহনখিদে।

প্রোজেক্ত অসিনা স্ক্বার ফীত লাখ ৫ হেন্না কোন্দুনা অদুক্কী মতিক চাউরে অমসুং হান্নগী মফম্না কল্লম্বা পাক চাওবদি শুপ্নগী স্ক্বার ফীত ৩০০০ খক্নি। কোবিদ লাইচৎ লৈজরবসু, প্রোজেক্ত অসিগী থবক-থৌরমশিংদা অরেপ্পা লৈখিদে অমসুং হান্নবা য়াৎখিবা থৌরাংগী মতুং ইন্না মখা চত্থখি।

প্রধান মন্ত্রীনা ভরানসীগী খোঙচৎকী মনুংদা দিসেম্বরগী নুংথিলগী পুং ১২ অদুৱাইদা মহাক্না কাল ভৈরব লাইশঙদসু চৎকনি অমসুং পুং ৬তনা রো-রো ভেসেল তোংদুনা গঙ্গা আর্তীদসু য়েংদুনা শরুক য়াগনি। প্রধান মন্ত্রীনা দিসেম্বর ১৪গী নুংথিলগী পুং ৩.৩০ তাবা মতমদা ভরানসীগী স্বরভেদ মহামন্দিরদা সদগুরু সদাফালদেও ভিহাঙ্গম য়োগ সন্সথানগী ৯৮শুবা মপোক কুমওন্দা শরুক য়াগনি। প্রধান মন্ত্রীনা নুমিৎ নিনিগী খোঙচৎ অসিদা বিহার অমসুং নাগালেন্দগী উপ-মুখ্য মন্ত্রীগা লোয়ননা অসম, অরুনাচল প্রদেশ, গোৱা, গুজরাত, হরিয়ানা, হিমাচল প্রদেশ, করনাতকা, মধ্য প্রদেশ, মনিপুর, ত্রিপুরা, উত্তর প্রদেশ অমসুং উত্তরাখন্দগী মুখ্য মন্ত্রীশিংগী মীফম অমসু শরুক য়াগনি। মীফম অসিনা লৈঙাকপগা মরী লৈনবা খ্বাইদগী ফবা থৌওং লান্নবগী খুদোংচাবা পীগনি অমসুং তীম ইন্দিয়াগী ৱাখল্লোনবু মপাঙ্গল হেন্না কনখৎহনবগী প্রধান মন্ত্রীগী মঙলানগী মতুং ইন্না পাংথোকপনি।

***