نئی دہلی۔ 04  دسمبر      بندرگاہوں، جہاز رانی، آبی گزرگاہوں اور آیوش کے مرکزی وزیر جناب سربانند سونووال آج منی پور کے دورے پر ہیں۔ انہوں نے آج مشہور لوکٹک جھیل  میں ہندوستان کے اندرون ملک آبی گزرگاہ (آئی ڈبلیو آے آئی) جیٹی کا معائنہ کیا۔ انہوں نے جھیل میں کشتی سے سیر بھی کی۔مرکزی  وزیر نے لوکٹک جھیل کی خوبصورتی اور سیاحت  نیز اس سے منسلک سرگرمیوں کے لحاظ سے اس میں موجود بے پناہ صلاحیتوں کے بارے میں بات کی۔ انہوں نے کہا، لوکٹک ایشیا کے سب سے بڑے آبی ذخائر میں سے ایک ہے اور اس کی خوبصورتی بے مثال ہے۔ یہ ہریالی، سمندری حیاتیات، نیلے پہاڑوں سے گھری ہوئی ہے۔ وزیر موصوف نے جھیل کے فروغ اور ترقی نیز اسے دنیا کے سب سے اہم سیاحتی مقامات میں سے ایک بنانے پر تفصیل سے بات کی۔

جناب سونووال نے اندرون ملک آبی گزرگاہ کی ترقی اور آیوش کے شعبوں میں حکومت منی پور کو مکمل تعاون فراہم کرنے کا یقین دلایا۔ انہوں نے کہا، وزیر اعظم جناب نریندر مودی رابطے، بنیادی ڈھانچے، نوجوانوں اور کسانوں کی ترقی پر زور دینے کے ساتھ تھ، شمال مشرقی خطہ پر پوری توجہ دے رہے ہیں۔ مرکزی وزیر نے منی پور کے وزیر اعلیٰ جناب این بیرن سنگھ کو عظیم خدمات انجام دینے پر احترام کا اظہار کیا اور کہا کہ ان  کی قیادت میں ریاست میں بہت ترقی ہوئی ہے۔

اس موقع پر مرکزی وزیر مملکت جناب آر کے رنجن سنگھ، ایم ایل اے جناب پی شرت چندر سنگھ، لوکٹک ڈیولپمنٹ اتھارٹی کے چیئرمین جناب ایل سوشیندر میتی اور دیگر معززین بھی موجود تھے۔  

۔۔۔۔۔۔۔۔۔۔۔۔۔۔۔۔۔۔۔۔۔

 (ش ح ۔ رض  ۔ ج ا  (

U-13773