মকোক থোংবশিং,

মশক নাইরবা মরূপশিং,

তেক অমসুং ফাইনেন্সকী তাইবঙদগী ঐগী খোঙবু মীয়ামশিং অমসুং লৈবাক ৭০ হেনবদগী শরুক য়াবিরিবা মীওই লিশিং লিশিং পুম্নমক,

খুরুমজরি!

মরূপশিং,

অহানবা ‘ইনফিনিতি ফোরম’ অসি হৌদোকপদা ঐঙোন্দা নুংঙাইবা ফাওই অমদি ময়াম পুম্নমকপু তরাম্না ওকচরি‍। ‘ইনফিনিতি ফোরম’ হায়বসিনা ভারত্তা লৈরিবা ফিনতেক্কী চাউরবা ওইথোকপা য়াবশিংবু মশক তাক্লি‍। মসিনা মালেম পুমবদা কান্নবা পীননবা ভারতকী ফিনতেক্তা লৈরিবা চাউরবা মতিংবুসু উৎলি‍।

মরূপশিং,

শেলয়েক্কী পুৱারীনা অওনবা চাউনা লাকখিবা উৎলি‍। মীওইবনা হোংলকপগা লোয়ননা ঐখোয়গী ত্রাঞ্জেক্সনগী মওং মতৌসু হোংলক্লি‍। বার্তর সিস্তেমদগী মেতেলদা, কোইনদগী নোত, চেক্তগী কার্দ অসুম্না লাক্তুনা ঙসি মফমসিদা য়ৌরক্লিবনি‍। মমাঙদদি চাউখৎপনা মালেম শিনবা থুংনা য়ৌরকপদা দিকেদ কয়া চঙলম্মি, অদুবু ঙসিগী গ্লোবেলাইজেসনকী মতমসিদদি মদু লৈত্রে‍। তেক্নোলোজীনা শেলথুমগী তাইবঙসিদা অচৌবা অহোংবা অমা পুরক্লি‍। মমাঙ চহিদা ভারত্তা অহানবা ওইনা এ.তি.এম.দগী সেল লৌথোকপদগী মোবাইল পেমেন্তনা মশিং হেনখি‍। ব্রাঞ্চ ওফিস অমত্তা লৈতবা মপুং ফানা দিজিতেল ওইবা বেঙ্কশিং অশেংবা ওইরে অমদি চহি তরাসিগী মনুংদা ময়ামগী ওইবা মফম অমা ওইরকপা য়ারি‍।

মরূপশিং,

তেক্নোলোজী লৌশিনবদা অমদি মসিগী মতাঙদা অনৌবা ৱাখল্লোনশিং পুথোকপদা ভারতনা কনাগীসু মতুং তাদে হায়বা মালেমগী মফমদা উৎখ্রে। দিজিতেল ইন্দিয়াগী মখাদা অওনবা পুরক্কদবা থৌরাংশিং লৌখৎপনা লৈঙাক্লোন্দা শীজিন্নবা য়াগদবা ইনোভেতিব ওইবা ফিনতেক সোলুসনশিংগী থোং হাংদোক্লে‍। তেক্নোলোজীনা ফাইনেন্সিএল ইনক্লুজনবু মপুং ফাহল্লি‍। ২০১৪দা ভারত মচা ৫০%গী মখাগী বেঙ্ক একাউন্ত লৈরমবদগী হৌখিবা চহি ৭সিদা জন ধন একাউন্ত ৪৩০ হাংদোক্তুনা ঐখোয়না মসিবু মীপুম খুদিংগী ওইহনবগী চাংদু য়ৌনা চঙশিল্লে‍। হৌজিক ফাওবদা রুপে কার্দ মিলিয়ন ৬৯০ পীখ্রে‍। রুপে কার্দনা মমাঙ চহিদা অপুনবা ত্রাঞ্জেক্সন বিলিয়ন ১.৩ য়ৌখি‍। মমাঙগী থা খক্তদা য়ু.পি.আই.না ত্রাঞ্জেক্সন বিলিয়ন ৪.২গী ময়াদা তৌখি‍।

থা খুদিংগী জি.এস.তি. পোর্তেলদা ইনভোইস মিলিয়ন ৩০০গী ময়াদা থাগৎলক্লি‍। থা খুদিংগী জি.এস.তি. পোর্তেল খক্তদা য়ু.এস. দোলর বিলিয়ন ১২ হেনবগী পেমেন্ত তৌরি‍। লাইচৎ লৈজরগসু নুমিৎ খুদিংগী রেলৱে তিকেত মিলিয়ন ১.৫ ওনলাইন্দা কক্লি‍। মমাঙ চহিদা ফাসতেগনা অপনবা লৈতবা ত্রাঞ্জেক্সন বিলিয়ন ১.৩ তৌখি‍। পি.এম. স্বানিধিনা লৈবাক শিনবু থুংবদা লৈরিবা অপীকপা পোৎফম ফম্বশিংদা শেল পুবা ফংহনখি‍। অকক্নবা সর্ভিসশিং অহো অরাক লৈতনা ই-রুপিনা তার্গেতেদ দেলিভরী ঙমহনখি‍। ঐনা অসিগুম্বা ময়াম অমা হায়বা ঙম্মি, মসিদি শুপ্নতগী ভারতকী ফিনতেক্কী পাক চাউবা অমসুং মীৎয়েংগী খুদম খরখক্তনি‍।

মরূপশিং,

ফাইনেন্সিএল ইনক্লুজন্না ফিনতেক রিভোলুসনবু থৌদুনা চৎলি‍। ফিনতেক্না ইনকম, ইনভেস্তমেন্ত, ইন্সুরেন্স অমসুং ইন্সতিত্যুসনেল ক্রেদিত হায়বা য়ুম্বী ৪দা লেপ্লি‍। শেন্থোক হেনগৎলক্লবা মতমদা শেল  থাদবা ঙমহল্লি‍। ইন্সুরেন্স য়ৌহনবনা খুদোংথিবা হেন্না মায়োক্ননবা অমদি শেল হেন্না থাদনবা মতিং হাপকৎলি‍। ইন্সতিত্যুসনেল ক্রেদিতনা হেন্না পাকথোক চাউথোকহন্নবা মশা পানহল্লি‍। অদুগা ঐখোয়না হায়রিবা য়ুম্বী মরিমকসিদা থবক পায়খৎখি‍। পুম্নমকশিং অসিনা পুনশিল্লক্লবা মতমদা অদোম্না খঙহৌদনা ফাইনেন্সিএল সেক্তরদা মী মশিং হেন্না শরুক য়ারকপা থেংনরিবনি‍। অচৌবা য়ুম্ফমসিনা ফিনতেক ইনোভেসনকী চপ চারবা স্প্রিংবোর্দ ওইরকই‍। ভারত্তা ফিনতেক ইন্দস্ত্রীনা লৈবাকসিগী মীপুম খুদিংদা ফাইনান্স এক্সেস ফংহন্নবা অমদি ফোর্মেল ক্রেদিত সিস্তেমদআ চঙহন্নবগদমক অনৌবা ৱাখল্লোনশিং পুথোক্লি‍। হৌজিক্তি অসিগুম্বা ফিনতেক্কী থৌরাংশিংবু ফিনতেক রিভোলুসন্দা ওন্থোকপা মতম ওইরে‍। লৈবাকসিগী মীপুম খুদিংমকপু শেলথুমগী মপাঙ্গল হাপ্পদা মতেং ওইগদবা রিভোলুসন অমা ওইহনগদবনি‍।

মরূপশিং,

ঐখোয়না ফিনতেক্না য়ৌশিনবগী চাং পাকথোক চাউথোরক্লিবসিদা মীৎয়েঙ চঙবা তঙাই ফদবা ৱাফমশিংসু লৈরি‍। ফিনতেক ইন্দস্ত্রীনা চাউনা কাখৎপা ঙম্লি, মসিনা তাকপদি পুন্সি মহিং খুদিংগী মীওইশিংনা মসিগী কস্তমর ওইরি‍। মীয়াম্না ফিনতেকপু য়ারিবা অসিমক তোপ তোপ্পা ফীচর অমনি‍। ফীচর অদুদি থাজবনি‍। ভারতকী মীচম মীয়াম্না দিজিতেল পেমেন্ত অমসুং অসিগুম্বা তেক্নোলোজীশিং শীজিন্নদুনা ঐখোয়গী ফিনতেক ইকোসিস্তেমদামপুং ফানা থাজবা উৎলি‍। থাজবা অসি থৌদাং অমনি‍। থাজবা হায়বদি মীয়ামগী ইন্তরেস্ত মাঙহন্দনবা থবক লৌখৎপদুনি‍। ফিনতেক সিক্যুরিতী ইনোভেসন য়াওদনা ফিনতেক ইনোভেসন মপুং ফারোই‍।

মরূপশিং,

ভারতনা থেংনরক্লিবশিং অমসুং মাগী হৈ-শিংববু মালেমগী মফমদা খঙহন্নবা অমদি মখোয়দগীসু তমহৌনবা ৱাখল্লোন্দা থাজবা থম্মি‍। ঐখোয়গী দিজিতেল পব্লিক ইনফ্রাস্ত্রকচর সোলুসনশিংনা মালেম পুমবগী মীয়ামগী পুন্সি মহিং ফগৎহনবা ঙমগনি‍। য়ু.পি.আই. অমসুং রুপেনচিংবা খুৎলায়শিংনা লৈবাক খুদিংদা অতৈগা মান্নদবা খুদোংচাবশিং পীগনি‍। শেন য়াম্না চঙদবা অমদি থাজবা য়াবা রিএল তাইম পেমেন্ত সিস্তেমগা লোয়ননা লৈবাক মনুংগী ওইবা কার্দ সিস্তেম অমসুং ফন্দ রিমিত্তেন্স সিস্তেমগী খুদোংচাবা পীগনি‍।

মরূপশিং,

গিফ্ত সিতী হায়বসি ইচম চমবা মফম অমা নত্তে‍। মসিনা ভারতকী ৱাশকপু মশক তাক্লিবনি‍। মসিনা ভারতকী দিমোক্রেতিক ভেল্যু, দিমান্দ, দিমোগ্রাফী অমসুং দাইভর্সিতী মশক তাক্লিবনি‍। মসিনা ৱাখল্লোন, ইনোভেসন অমসুং ইনভেস্তমেন্তগী মতাঙদা লৈরিবা ভারতকী খোঙফম তাক্লিবনি‍। গিফ্ত সিতীনা মালেমগী ফিনতেক্কী তাইবংগা ফাওনগদবা থোঙজাউনি‍। গিফ্ত সিতীদা লৈরিবা (আই.এফ.এস.সি.) অসি ফাইনেন্স অমসুং তেক্নোলোজী পুনশিনবনা ভারতকী তুংগী চাউখৎ লম্বীগী মরুওইবা শরুক অমা ওইগনি হায়বা ৱাখল্লোনসিদগী শেম্লকখিবনি‍। ঐখোয়গী পান্দমদি ভারতখক্তগী নত্তনা মালেমগী ওইনা খ্বাইদগী ফবা ইন্তর্নেসনেল ফাইনেন্সিএল সর্ভিস পীবদুনি‍।

মরূপশিং,

শেলথুম্না শেন্মিৎলোনগী পুন্সি হাপ্লিবা ঈনি অদুগা তেক্নোলোজীনা মদুবু পুদুনা চৎলিবনি‍। অন্তয়োদয়া অমসুং সর্বোদয়া ফংবদা অনিমক চপ মান্ননা মরুওই‍। ঐখোয়গী ফ্লেগসিপ ইনফিনিতি ফোরম অসি ইন্দস্ত্রী অসিগী ঙমখৈ লৈতবা তুংগী লম্বীদা চঙশিন্নবা মালেমগী ফিনতেক ইন্দস্ত্রীগী মরুওইবা স্তেকহোল্দর পুম্নমকপু পুনশিন্ননবা থৌরাংগী শরুক অমনি‍। মিস্তর মাইক ব্লুমবর্গকা ইকোন কোন্না উনখিবদা হীরমসিদা ঐখোয়না শানখিবা ৱারী ঐ নীংশিংলি‍। অদুগা ঐনা ব্লুমবর্গ গ্রুপপু মখোয়গী ঙাক্লৌগীদমক থাগৎচরি‍। ইনফিনিতি ফোরম থাজবগী ফোরম অমনি, ইনোভেসনগী থৱাইদা অমদি ৱাখল খনবগী পাঙ্গলদা থাজবদুনি‍। নহাশিংগী পাঙ্গল অমসুং মখোয়গী অওনবা পুরকপা পাম্বগী ইথিলদা থাজবদুনি‍। মালেমবু হেন্না ফবা মফম অমা ওইহন্নবগী থাজবদুনি‍। ঐখোয় পুন্না চঙশিনমিন্নসি অমদি মালেমগী ওইনা খ্বাইদগী চাউনা মাঙদা তাদুনা লৈরিবা ৱারৈশিংগী ৱাখৈ পুরক্নবগীদমক ফিনতেক্তা অনৌবা ফজবা ৱাখল্লোনশিং খুমাঙ চাউশিনহনমিন্নসি‍।

ময়ামবু থাগৎচরি!

***