کامرس اور صنعت، امور صارفین، خوراک اور عوامی تقسیم اور ٹیکسٹائل کے مرکزی وزیر جناب پیوش گوئل نے کہا ہے کہ ہم اشیا اور خدمات کی برآمد میں تاریخی بلندی پر ہیں۔ آج یہاں 40ویں آئی آئی ٹی ایف کا افتتاح کرتے ہوئے انھوں نے کہا کہ دنیا ہندوستان کو عالمی سپلائی چین کو برقرار رکھنے میں ایک قابل اعتماد عالمی شراکت دار سمجھتی ہے۔

جناب گوئل نے کہا کہ لاک ڈاؤن کے باوجود ہندوستان عالمی برادری کو کوئی سروس سپورٹ فراہم کرنے میں ناکام نہیں ہوا ہے۔ ہندوستان میں ایف ڈی آئی ایک تاریخی بلندی پر ہے، جو پہلے 4 مہینوں میں ایف ڈی آئی کی اب تک کی بلند ترین سطح ہے۔ یہ گزشتہ سال کی اسی مدت کے مقابلے میں 62 فیصد زیادہ ہے۔ انھوں نے کہا کہ آئی آئی ٹی ایف یہ دکھائے گا کہ ہندوستان میں کاروبار دوبارہ پٹری پر آ گیا ہے۔

جناب گوئل نے ہندوستان کے پانچ اہم ستونوں یعنی معیشت، برآمدات، بنیادی ڈھانچہ، مانگ اور تنوع کو فہرست بند کیا۔ انھوں نے کہا کہ بہتر بنیادی ڈھانچہ، مانگ اور ترقی میں تنوع ایک بہتر اور نئے ہندوستان کا محور بنیں گے۔

جناب گوئل نے اتر پردیش میں بنیادی ڈھانچے کی بے مثال ترقی کے معیار کی تعریف کی۔ انھوں نے برآمدات کی ترقی پر زور دینے کے لیے ریاستی حکومت کی بھی ستائش کی۔

جناب گوئل نے کہا کہ آئی آئی ٹی ایف خود کفیل ہندوستان کے مشن کو آگے بڑھائے گا اور ووکل فار گلوبل کے خیال کی حوصلہ افزائی کرے گا۔

جناب گوئل نے کہا کہ ویکسین کی 110 کروڑ سے زیادہ خوراکیں دے کر، ہم دنیا میں سب سے بڑی ویکسینیشن مہم چلا رہے ہیں۔ اگلے سال 500 ملین ویکسین تیار کی جائیں گی اور ہندوستان میں 5 یا 6 ویکسین تیار کی جائیں گی جن میں دنیا کی پہلی نیزل ویکسین اور پہلی ڈی این اے ویکسین بھی شامل ہے۔ ہندوستان ویکسین سے تحفظ فراہم کرے گا اور دنیا کو ایک محفوظ مقام بنائے گا۔ ہندوستان اس بات کو یقینی بنائے گا کہ دنیا کے ہر حصے کو محفوظ بنانے کے لیے یکساں طور پر ویکسین دستیاب ہوں۔

جناب گوئل نے کہا کہ آئی آئی ٹی ایف ایک سال کے وقفے کے بعد اپنے 40ویں ایڈیشن میں واپس لوٹا ہے اور اسے ’آتم نربھر بھارت‘ اور ’آزادی کا امرت مہوتسو‘ کی دوہری طاقت حاصل ہے۔ انھوں نے مختصر وقت میں تجارتی میلے کا انعقاد کرنے اور 3,000 سے زیادہ نمائش کنندگان کی سب سے بڑی شرکت کے ساتھ یہ دکھانے کے لیے ITPO کی تعریف کی کہ دنیا ہندوستان کو ایک ”قابل اعتماد شراکت دار“ کے طور پر دیکھ رہی ہے۔

جناب گوئل نے کہا کہ ہندوستان دنیا کی صنعت اور خدمات کا مرکز بن سکتا ہے۔ ہندوستانی صنعت معیار، مسابقت اور معیشت کی بنیاد پر نئی بلندیوں تک پہنچ سکتی ہے۔ آئی آئی ٹی ایف ’لوکل گوز گلوبل‘ اور ’میک ان انڈیا فار دی ورلڈ‘ کے ہدف کو حاصل کرنے میں مدد کرے گا۔

جناب گوئل نے کہا کہ کووڈ-19 نے رکاوٹیں کھڑی کی ہیں لیکن ہندوستان نے وزیر اعظم جناب نریندر مودی کی جرات مندانہ اور فیصلہ کن قیادت اور عوام کی اجتماعی خواہش کے ذریعے ایک شاندار واپسی درج کی ہے۔

جناب گوئل نے کہا کہ مالی سال 2021-22 کے پہلے 4 مہینوں کے دوران، اب تک کی سب سے زیادہ ایف ڈی آئی آمد 27 بلین ڈالر تھی، جو کہ مالی سال 2020-21 کی اسی مدت کے مقابلے میں 62 فیصد زیادہ ہے۔ اپریل-اکتوبر 2021 میں اجناس کی تجارت کی برآمدات 232 بلین ڈالر رہی (اپریل-اکتوبر 2020 کے مقابلے میں 54 فیصد اور اپریل-اکتوبر 2019 کے مقابلے میں 25 فیصد زیادہ)۔

جناب گوئل نے کہا کہ بین الاقوامی ریٹنگ ایجنسی موڈیز نے ہندوستان کی خود مختار ریٹنگ آؤٹ لک کو ’منفی‘ سے ’مستحکم‘ کر دیا ہے۔ انھوں نے کہا کہ اکتوبر میں جی ایس ٹی کی وصولی بڑھ کر 1.3 لاکھ کروڑ روپے ہوگئی، دیوالی کے دوران 1.25 لاکھ کروڑ روپے کی خوردہ فروخت ہوئی، اکتوبر میں مینوفیکچرنگ PMI بڑھ کر 55.9 ہو گیا، سروسز PMI پچھلے مہینے 58.4 کی دہائی کی بلند ترین سطح پر پہنچ گیا۔

جناب گوئل نے کہا کہ ہندوستان اعتماد کے ساتھ سیکھ رہا ہے، اپنے علم کا استعمال کر رہا ہے اور 130 کروڑ شہریوں کے ’یقین، ساتھ اور دعاؤں‘ کے ساتھ ترقی کی راہ پر آگے بڑھ رہا ہے۔

                                               **************

ش ح۔ ف ش ع- ف ک   

U: 12847