উত্তর প্রদেশকী রাজ্যপাল শ্রীমতি অনন্দিবেন পতেল জি, কেন্দ্রগী কেবিনেত্তা য়াওরিবা ঐগী কলিগশিং অমদি লখনৌগী এম.পি. অমসুং ঐখোয়গী সেনিয়র কলিগ, শ্রী রাজনাথ সিংহ জি, শ্রী হর্দীপ সিংহ জি, মহেন্দ্র নাথ পান্দে, মমিং লৈরবা মুখ্য মন্ত্রী য়োগি অদিত্যনাথ জি, দিপুতী মুখ্য মন্ত্রী শ্রী কেশব প্রসাদ মৌর্য জি, শ্রী দিনেশ শর্ম জি, কেন্দ্রগী কেবিনেত্তা য়াওরিবা ঐগী কলিগ, শ্রী কৌশাল কিশোর জি, রাজ্য সরকারগী মন্ত্রীশিং, এম.পি.শিং, এম.এল.এ.শিং, লৈবাক অসিগী তোঙান তোঙানবা শরুকশিংদগী শরুক য়ারিবা ইকাই খুম্নরবা মন্ত্রী পুম্নমক, অতোপ্পা মশক নাইরবা মীওই পুম্নমক অমদি উত্তর প্রদেশতকী নুংশিংরবা ইচল-ইচেশিং অমদু ইয়াম্বা-ইনাউশিং৷

ঐনা লখনৌদা লাকখিবা মতমদা, অৱাধ লমদমগী পুৱারি, মলিহাবদি দুসেরিগুম্বা ফজরবা লোন, চাবা থকপগী হৈনবীশিং, স্কিলফুল ৱর্কমেনশিপ, আর্ত-আর্কিতেকচর, পুম্নমক অসি পুক্নিং চিংশিন্নিংঙাই ওই৷ লৈবাক অসিগী মফম পুম্নমক্তা লৈরিবা এক্সপর্তশিংনা ৱাখল পুনশিন্নরগনি অমদি অনৌবা আর্বান ইন্দিয়া,হায়বদি ভারতকী শহরশিংগী অনৌবা কমপ্লেক্সনদা ৱাখল থাদরগনি হায়বা ৱাখল্লোন অসি ঐনা পামখি৷ মফম অসিদা পাংথোক্লিবা এগজিবিসন অসিনা চহি ৭৫গী এচিবমেন্তশিং অমদি মনিং-মখা তম্লকপগী মসিগী অমিৃত কুহ্মৈ অসিদা লৈবাক্কী অনৌবা রিজোলুসনশিং উৎলি৷ দিফেন্স এগজিবিসন অমা মমাংগী মতমদা শিনখিবা মতমদা, মফম অদুদা লখনৌ খক্তদগী নত্তনা উত্তর প্রদেশ পুম্বদগী মীয়াম লাকখি৷ হন্দক্কী মতম অসিদসু, মফম অসিদা পাংথোক্লিবা এগজিবিসন অসি য়েংবা লাকপিনবা ঐনা প্রজাদা হায়জরি৷ ভারতকী হৈ-শিংবশিং উৎলিবা অমদি ঐখোয়গী থাজবা হেনগৎহল্লিবা এগজিবিসন অসি নখোয়না শোইদনা য়েংবিয়ু৷

য়ু.পি. শহরশিংগী চাওখৎ-থৌরাংগা মরী লৈনবা প্রোজেক্ত ৭৫ ঙসি শঙ্গাবা নত্রগা মখোয়গী উরেপ-উয়ুং তমখ্রে৷ ঙসিদি, য়ু.পি.গী জিলা ৭৫দা লৈরিবা বেনিফিসরী ৭৫,০০০না মখোয়গী পক্কা য়ুমশিংগী শোশিং ফংখ্রে৷ হায়রিবা মরুপ-মপাং পুম্নমক্না চহি অসিদা মখোয় মখোয়গী অনৌবা য়ুমশিংদা দুসেরা, দিৱালি, ছথ, গুরু পুরব, ইদ-ই-মিলদ অমদি অহেনবা হরাউ-কুহ্মৈ কয়া অমা পাংথোক্লগনি৷ মফম অসিদা মীওই খরগা ৱারি শানরবা মতুংদা ঐঙোন্দা অপেনবা পোকখ্রে অমদি চাকলেনগী বার্তন অমসু ফংলি৷ লৈবাক অসিদা পি.এম. অৱাস য়োজনাগী মখাদা পীরিবা য়ুমশিংগী মনুংদা, য়ুমশিং অদুগী মপু চাদা ৮০ হেনবদি নুপীশিং অমদি জোইন্ত ওনরশিং ওই হায়বসিদা ঐ য়াম্না নুংঙাইবা ফাওই৷

নুপীশিংগী য়ুমশিং অসিগা মরী লৈনবা অফবা ৱারেপ অমসু য়ু.পি. সরকারনা লৌখৎখ্রে হায়না ঐঙোন্দা হায়রকখ্রে৷ য়ুমশিং রেজিস্ত্রেসন তৌবা মতমদা স্তাম্প দ্যুতীদা ২%গী রিবেত অমা লুপা লাখ ১০ য়ৌনা নুপীশিংদা ফংহল্লি৷ মসি য়াম্না থাগৎপা য়াবা ৱারেপ অমনি৷ নুপীশিংগী মমিংদা লৈরিবা লন-থুমগী মপু ওইবগী মতাংদা ৱারি শানবা মতমদা ঐখোয়গী ৱাখলদা অদুক য়ৌনা নুংঙাইতবা তৌদে৷ নখোয়বু ঐনা শংশার অমদা পুশিনজগে অমদি মতম অদুদা ৱারেপ অসিগী মরু ওইবা অদু নখোয়না খঙলক্কনি৷

ইমুং অমদা হেক্তা য়েংবিয়ু৷ মসি চুম্মী নত্রগা লাল্লি হায়না ঐনা হায়জবা নত্তে৷ ঐদি ফিভম অদু খক্তা হায়জবনি৷ করিগুম্বা য়ুম অমা লৈরবা, য়ুম অদুগী মমিং অদু মাগী নুপাগী মমিংদা লৈ, করিগুম্বা লম অমা লৈরবা, লম অদুগী মহাক্কী নুপাগী মমিংদা লৈ, করিগুম্বা কার অমা লৈরবা, কার অদু মহাক্কী নুপাগী মমিংদা লৈ, করিগুম্বা স্কুতর অমা লৈরবা, স্কুতর অদু মহাক্কী নুপাগী মমিংদা লৈ৷ করিগুম্বা দুকান অমা লৈরবা, দুকান অদু মহাক্কী নুপাগী মমিংদা লৈ অমদি করিগুম্বা মহাক্কী নুপা অদুনা লৈখিদবা থোক্লবদি, মমিং অদু মহাক্কী মচানুপাগী মমিংদা ওল্লি৷ অদুবু মমাগী মমিংদদি করিগুম্বা অমতা লৈতে৷ অফবা সমাজ অমগীদমক বেলেন্স ওইনা থম্বদা খোঙথাং খরা লৌখৎপা তঙাই ফদে, মরম অদুনা সরকারনা পীরিবা য়ুমশিং অসিগী মপু অসি নুপীশিংনা ওইরগনি হায়না ঐখোয়না ৱারেপখ্রে৷

মরুপশিং,

লখনৌগী থাগৎনিংঙাই ওইরবা অতোপ্পা থৌরম অমসু লৈরি৷ লখনৌনা লৈবাক অসিদা ইমা ভারত্তা কৎথোকখিবা অতল জিগী মওংদা অশা অমা পীখ্রে৷ মহাকপু নিংশিংবা ওইনা, ঙসি বাবা সাহেব বিমরাউ অম্বেদকর য়ুনিভর্সিতীদা অতল বিহারি বাজপয়ী চিয়র শেমগৎলি৷ মসিগী চিয়র অসিনা লৈবাক অসি শেমগৎপদা অতল জিগী মংলান, মহাক্কী এক্সনশিং অমদি মহাক্কী কন্ত্রিব্যুসন অদু মালেমগী থাক্তা পুরক্লগনি হায়বসি ঐগী থাজবনি৷ ভারক্কী ফোরেন্দ পেলিসীগী চহি ৭৫ অসিদা তর্নিং পোইন্ত কয়া অমা লৈখি, অদুবু অতল জিনা মদুদা অনৌবা দাইরেক্সন অমা পীখি৷ লৈবাক অসি শম্নহন্নবগীদমক অমদি প্রজাশিংগী মরক্তা হেন্না নকশিন্ননবা মহাক্না হোৎনখিবশিং অদুনা হৌজিক হৌজিক লৈরিবা ভারতকী অকনবা ফাউন্দেসন ওইরি৷ অমুক্তা খন্দুনা য়েংবিয়ু৷ অমরোমদা, প্রধান মন্ত্রী গ্রাম সদক য়োজনা লৈ অদুগা অমরোমদনা গোল্দন ক্বাদ্রেঙ্গল-অৱাং-নোংপোক, নোংপোক-নোংচুপ, অমদি অৱাং-খা-নোংচুপ কোরিদোরশিং লৈ(হায়বদি নাকল অনিমক্তাখুঙ্গং অমদি শহর অনিমক্তা চাওখৎপা পুরক্নবা মহাক্না হোৎনখিবশিং অমদি মহাক্কী মংলান)৷

মরুপশিং,

মমাংগী চহিশিংদা, নেস্নেল হাইৱেজশিং শিজিন্নদুনা লৈবাক অসিগী মেত্রোপোলিতান সিতীশিং শমজিন্ননবগী ৱাখল্লোন অদু অতল জিনা পুথোরকখিবা মতমদা, মীওই খরনা মদুবু থাজখিদে৷ অদুগা চহি ৬-৭কী মমাংদা, লাইরবশিংগী পক্কা হাউস কোতি কয়া শাখিবা, তোইলেত কোতি কয়া শাখিবা, খোঙজেল য়াংনা চেনবা ঙম্বা ত্রেনশিং লৈহনখিবা, শহরশিংদা পাইপ গ্যাস ফংহনখিবা, ওপ্তিকেল ফাইবর য়াওনা মম্মোথ ইনফ্রাস্ত্রকচর প্রোজেক্তশিংগী মরমদা ঐনা ৱারি শাখিবা মতম ফাওবদা প্রজা মীয়ামদা চলম্নবশিং লৈখি৷ অদুবু মালেম অসিনদি কেম্পেন্দশিং অসিদা ভারতনা মাই পাক্লক্লিবা অসি উরি৷ পি.এম. অৱাস য়োজনাগী মখাদা ঙসি ভারতনা শারিবা পক্কা হাউস মশিং অসি মালেম অসিগী লৈবাক কয়াগী অপুনবা মীশিংদগী হেল্লিবনি৷

মরুপশিং,

২০১৪গী মমাংদা লৈরম্লিবা সরকার অসিনা লৈবাক অসিদা আর্বান হাউজিং স্কিমশিংগী মখাদা য়ুম লাখ ১৩ খক্তমক সেঙ্কসন তৌখ্রে৷ ফিগর অদু নিংশিংবিয়ু? মমাংগী সরকারনা য়ুম লাখ ১৩ সেঙ্কসন তৌখি অমদি য়ুম লাখ ৮ খক্তমক শাখি৷ ২০১৪দগী হৌরগা, ঐখোয়গী সরকার অসিনা পি.এম.অৱাস. য়োজনাগী মখাদা শহরশিংদা য়ুম কোতি ১.১৩ হেন্না শানবগী অয়াবা পীখ্রে৷ লাখ ১৩ অমদি কোতি ১.৩গী মরক্তা লৈরিবা খেন্নবা অদু অমুক্তা য়েংবিয়ু! মসিগী মনুংদা, য়ুম লাখ ৫০ হেনবদি শাবা লোইখ্রে অমদি লাইরবশিংদা খুৎশিন্নখ্রে৷

মরুপশিং,

য়ুম অমা হায়বসি চেকশিং অমসুং নুংশিং শিজিন্নরগা শাবা য়াই অদুবু মদু য়ুম অমনি হায়না কৌবদা মতিক চাদে৷ অদুবু মদুগী বিল্দিং অদুনা ইমুং অদুগী মীওই খুদিংমক্কী মংলান অদুগা চুশিন্নরবা তারবদি বিল্দিং অদু য়ুম অমা ওইরক্কনি, মসিদা তোৎন-তিন্নদুনা পুন্না হিংমিন্নগনি অমদি ইমুং অদুগী মীওইশিংনা পান্দম অমা ফংননবগীদমক থমোই শেংনা হোৎনগনি৷

মরুপশিং,

য়ুম দিজাইন তৌবদগী হৌদুনা য়ুম শাবা ফাওবদা বেনিফিসরীশিংদা ঐখোয়না মপুং ফানা মনিং তমহল্লি৷ মখোয়না অপাম্বগী মতুং ইন্না মখোয়গী ময়ুমশিং অদু শাবা য়াই৷ দিল্লীগী এয়র-কন্দিসন রুমশিংদা লৈরিবা মীওই অমতনা থোংনাউ অসি মসিদা-মদুদা পানগদবনি হায়না লেপ্পা য়ারোই৷ ২০১৪গী মমাংদদি সরকারগী স্কিমশিং অসিগী মখাদা শারিবা য়ুমশিংগী সাইজকী মতাংদা ময়েক শেংবা পোলিসী অমতা লৈরমদে৷ য়ুম খরনা স্ক্ব্যার মিতর ১৫গী লমদা শাখি অদুগা অতোপ্পা য়ুম খরনা স্ক্ব্যার মিতর ১৭কী লমদা শাখি৷ অদুগুম্লবা অপিকপা য়ুমশিং অদুদা হিংবা হায়বসি য়াম্না অরুবা ওইখি৷

২০১৪গী মতুংদা, শাগদৌরিবা য়ুমশিংগী সাইজকী মতাংদা অচৌবা পোলিসী অমা ঐখোয়গী সরকারনা শেমখি৷ স্ক্বের মিতর ২২দগী হেন্না পিকপা য়ুম অমা শাদনবা ঐখোয়না ৱারেপখি৷ য়ুমশিংগী সাইজ হেনগৎলকপগা লোইননা, ঐখোয়না বেনিফিসরীশিংগী বেঙ্ক একাউন্তশিংদা দাইরেক্লী শেল থাবা হৌখি৷ য়ুমশিং শানবা লাইরবশিংগী বেঙ্ক একাউন্তশিংদা থাখিবা শেল অদুগী মরমদা খরা খজিক্তমক খন্ন-নৈনখ্রে৷ কেন্দ্র সরকারনা পি.এম. অৱাস য়োজনা-আর্বানগী মখাদা লাইরবশিংগী বেঙ্ক অকাউন্তশিংদা লুপা কোতি লাখ অমা ত্রান্সফর তৌখ্রে হায়বসি খঙলকপদা নখোয় ঙক্কনি৷

মরুপশিং,

ঐখোয়না মোদীবু প্রধান মন্ত্রী ওইহনখ্রে অদুবু মোদীনা করি তৌখ্রগে? হায়না লেপ্তনা হায়বা মীওই খরা ঐখোয়গী লৈবাক অসিদা লৈরি৷ ঙসিদি, অহানবা ওইনা, ঐনা নখোয়দা করিগুম্বা খরা হায়বা পাম্মী, মসিগী মতুং তারকপদা অয়ুক নুংথিল নাইদনা ঐখোগী মাইয়োক্তা ৱা ঙাংদুনা লৈরিবা মরু ওইবা ওপোনেন্ত খরদি হেন্না খোইশাওনরগনি৷ মদু ঐনা খঙই অদুবু ঐনা নখোয়দা ফোংদোক্কদবনি হায়না ঐনা খল্লি৷

ঐগী ইমুং-মানুংগী মীওইশিং ওইরিবা অমদি স্লমশিংদা হিংদুনা লৈরম্লিবা অমদি পক্কা য়ুম অমদা লৈবা ফংলমদবা অসিগুম্লবা ইমুং কোতি ৩ স্কিম অমগী মখাদা লাখপতি ওইহন্নবগী খুদোংচাবা অমা পীখ্রে৷ চাওরাক্না ইমুং কোতি ২৫-৩০গী মনুংদা লাইরবা ইমুং কোতি অহুমদি অতেনবা মতম অমদা লাখপতি ওইখ্রে৷ মতৌ         করম্না মোদীনা অসিগুম্লবা ক্লেমশিং অসি হায়বা ঙম্লিবনো হায়না হৌজিক্তি নখোয়না ঐঙোন্দা হংলক্লগনি৷ প্রধান মন্ত্রী অৱাস য়োজনাগী মখাদা শাখিবা হুম কোতি অহুম অদুগী মমল অদু অমুক্তা নখোয়না খনবিয়ু৷ হায়রিবা মীওইশিং অসি ঙসিদি লাখপতিশিং ওইরে৷ ঐখোয়না পক্কা হাউস কোতি অহুম শাদুনা লাইরবা ইমুংশিংগী খ্বাইদগী চাওরবা মাংলান অদু ঐখোয়না মংফাওনহনখ্রে৷

মরুপশিং,

হোৎনবা য়াবা পুম্নমক হোৎনরবসু উত্তর প্রদেশতা য়ুমশিং শাবদা প্রোগ্রেস অমতা লৈখিদবগী মতম অদু ঐনা নিংশিংলকই৷ ঙসিদি, ঐনা লখনৌদা লৈরিঙৈ অসিদা হিরম অদুগী অকুপ্পা মরোলশিং অদু নখোয়দা ঐনা হায়রগে হায়না ঐনা খল্লি! নখোয় তানবগী শেম শাদুনা লৈরিবরা? ঐখোয়গী আর্বান প্লানিং অসি পোলিতিক্সকী ভিক্তিম অমা ওইরক্লিবনো হায়বসি য়ু.পি.গী প্রজাশিংনা খঙবা য়াম্না তঙাই ফদে৷

মরুপশিং,

কেন্দ্র সরকারনা লাইরবশিংগী ময়ুম শানবা শেল পীখিরম্মী৷ য়োগি জিনা শক্তি পাইরক্ত্রিঙৈ মমাংদা উত্তর প্রদেশতা লৈরম্লিবা মমাংগী সরকার অসিনা লাইরবশিংগী য়ুমশিং শাবদা হকশিন্না লুম্না লৌরমদে৷ ২০১৭কী মমাংদা, য়ু.পি.গীদমক পি.এম. অৱাস য়োজনাগী মখাদা য়ুম ১৮,০০০ এপ্রুব তৌখি৷ অদুবু মফম অসিদা মতম অদুদা পাল্লম্বা সরকার অদুনা পি.এম. অৱাস য়োজনাগী মখাদা লাইরবশিংগীদমক য়ুম ১৮ ফাওবা শাখিবা লৈতে৷

হৌজিক লৈরিবা সরকার অসিনা য়ুম ১৮,০০০ এপ্রুব তৌখিবা অদুবু মমাংগী সরকারনা লাইরবশিংগীদমক য়ুম ১৮ ফাওবা শাখিদবা অসি অমুক্তা খন্দুনা য়েংবিয়ু? ঐগী ইয়াম্বা-ইনাওশিং অমদি ইচল-ইচেশিং, হায়রিবা হিরম অসিদা নখোয়না মুন্না অমুক্তা খনবিয়ু৷ শেল অমতা লৈখিদে, য়ুমশিং শানবগী এপ্রুবেল পীখি অদুবু য়ু.পি.দা পাল্লম্লিবা মীওইশিং অদুনা লেপ্পা লৈতনা মসিদা ফৎতনবা খুদি থিনবা শিল্লি৷ লাইরবশিং য়াওনা য়ু.পি.গী মীয়াম্না মখোয়না তৌরম্লিবা অদু মতম পুম্নমক্তা কাওবা ঙম্লোই৷

মরুপশিং,

য়োগি জিগী সরকার শেম্লবা মতুংদা য়ু.পিগী শহরদা লৈরিবা লাইরবশিংদা য়ুম লাখ মাপন শাবিখিবা অসিদা ঐ অপেনবা ফাওই৷ হৌজিক্তি, য়ুম লাখ ১৪ য়ু.পি.গী শহরশিংদা লৈরিবা ঐখোয়গী লাইরবা ইয়াম্বা-ইনাওশিং অমদি ইচল-ইচেশিংগীদমক য়ুমশিং শেম-শাবগী থবক তোঙান তোঙানবা স্তেজতা লৈরি৷ মৈ,ইশিং, গ্যাস, তোইলেতনচিংবা ফেসিলিতীশিংসু য়ুমশিংদা ফংহল্লি, হরাউ নুংঙাইবগা লোইননা য়ুমদা নৌনা চংবগী থৌরম পাংথোক্লি৷

হৌজিক্তি ঐহাক উত্তর প্রদেশতা লাকচগে, নখোয়দা হোমৱার্ক খরসু পীবগুম ঐঙোন্দা ফাওই৷ পীদব্রনে ঐনা? অদুবু নখোয়না মদু তৌগদবনি? নখোয় তৌগদ্র? মসি ঐনা ই-পাউ চেশিংদা পাখ্রে অমদি য়োগি জিদসু ঐনা হংখ্রে৷ দীপাবলিদা লেম্প লাখ ৭.৫ থাল্লকপা মতমদা অয়োদ্যদা প্রোগ্রাম অমা লৈরগনি৷ মৈ থানবগী কম্পিতিসন অসিদা য়াওনবা ঐনা উত্তর প্রদেশতা তকশিল্লি৷ কনানা লেম্পশিং হেন্না থানগদগে?  অয়োদ্য নত্রগা ঙসি পীখিবা য়ুম লাখ মাপননা থাল্লকপা লেম্প লাখ ১৮গী মরক্তা? মসি ওইথোকপা য়াগদ্র? হৌখিবা চহি তরেৎতা য়ুমশিং ফংখ্রবা ইমুং লাখ মাপন অসিনা মখোয় মখোয়গী য়ুমগী মপান্দা লেম্প অনি অনি থানগদবনি৷ অয়োদ্যদা লেম্প লাখ ৭.৫ থাল্লকপা মতমদা লাইরবা ইমুংশিংগী য়ুমথোংশিংদা লেম্প লাখ ১৮ থাল্লক্লগনি৷ মপু ইবুংঙো রামনা পেঞ্জগনি৷

ইয়াম্বা-ইনাওশিং অমদি ইচল-ইচেশিং,

হৌখিবা চহি খুজিং খরদা, ঐখোয়গী শহরশিংদা অচৌবা বিল্দিং কয়া অমা শারকখ্রে অদুবু হায়রিবা বিল্দিংশিং অসি শারিবা শিন্মীশিং অদুদি স্লমশিংদা লৈরি৷ স্লমশিংগী ফিভম অসি অদুক্কী মতিক শোকই, মফম অদুদা তঙাই ফদবা ফেসিলিতীশিং খুদম ওইনা ইশিং অমসুং তোইলেত মতিক চানা লৈতে৷ পক্কা হাউসশিং শারকপা অসিনা স্লমশিংদা লৈরিবা ঐখোয়গী ইয়াম্বা-ইনাউশিং অমদি ইচেল-ইচেশিংদা অচৌবা মতেং অমা ওইখ্রে৷খুঙ্গংগী মফমশিংদগী শহরশিংদা থবক শুবা চৎলিবা শিন্মীশিংনা অহোংবা মমলদা হেন্না ফবা লৈফমশিং ফংনবা সরকার অসিনা স্কিম অমা হৌদোকখ্রে৷

মরুপশিং,

আর্বান মিদল ক্লাসকী প্রোব্লেমশিং অমদি চেলেঞ্জশিং অসি মাই পাক্না থেংনবা ঙম্নবা ঐখোয়গী সরকারনা য়াম্না কন্না থৱাই য়াওনা হোৎনখ্রে৷ রিএল স্তেত রিগুলেতরী ওথোরিতী (আর.ই.আর.এ.) অসিসু অসিগুম্বা অচৌবা খোঙথাং অমনি৷ হাউজিং সেক্তর পুম্বদা চিংনবা লৈরিবা অমদি শেমজিন শাজিল্লিবা ময়াম অসি লোইশিন্নবা মসিগী লো অসিনা মতেং পাংখ্রে৷ মসিগী লো অসি চৎনরক্তুনা, য়ুম লৈরিবা মীওইশিংনসু মতম চানা পিচার ফংলি৷ শহরশিংদা শাবা লোইশিন্দনা লৈরিবা য়ুমশিং অসি শাবা লোইশিন্নবা লুপা কোতি লিশিং কয়াগী অখন্নবা ফন্দ অমা ঐখোয়না দিজাইন তৌখ্রে৷ হন্দক্তা ইকুই কুইদ্রিঙৈদা, মোদেল তিনেন্সী এক্ত রাজ্যশিংদা চৎননবা খঙহনখ্রে, এক্ত অদুবু য়ু.পি. সরকারনা অথুবা মতমদা চৎনখিবা অসিদা ঐ নুংঙাইবা ফাওই৷ মসিগী লো অসিদা, লম মপু অমসুং তিনেন্তগী মরক্তা মতম কুইনদগী লৈরক্লবা প্রোব্লেমশিং অসি থেংনরি৷ মসিনা য়ুম অমবু মতম খরগী ওইনা ৱাইদুনা শিজিন্নহনবদা লাইথোকহল্লগনি অমদি রেন্তেল প্রোপর্তী মার্কেৎকী ফিভম হেন্না ফগৎহল্লগনি, অহেনবা ইনবেস্তমেন্ত কৌরগনি অমদি থবক্কী খুদোংচাবশিং হেন্না ফংহল্লগনি৷

ইয়াম্বা-ইনাওশিং অমদি ইচল-ইচেশিং,

কোরোনাগী মতমদা য়ুমদগী থবক শুবগী মতাংদা অনৌবা রুলশিং শেম্লকখিবা অসিনা মরম ওইদুনা আর্বান মিদল ক্লাসকী পুন্সি হেন্না লাইথোকহল্লকখ্রে৷ কোরোনাগী মতমদা তোখায় তোখায়না থবক শুনরকপা অসিনা মিদল ক্লাস কলিগশিংদা অচৌবা পোত্থাফম অমা ওইখ্রে৷

ইয়াম্বা-ইনাওশিং অমদি ইচল-ইচেশিং,

করিগুম্বা নখোয়না নিংশিংলম্বা থোক্লবদি, ২০১৪গী মমাংদা ঐখোয়গী শহরশিংগী লুবা-নানবগী মরমদা নেগেতিব ওইবা ৱারিশিং শানবা ঐখোয়না য়াম্না তোইনা তোইনা তাখি৷ লুবা নানলক্তবা মোৎশিল্লকপা হায়বসিনা শহরশিং অমদি তুরিজমগী ফজবা মাংহনবা খক্তা নত্তনা মীয়ামগী হকশেলদসু চাওনা থোকহল্লি৷ মসিগী ফিভম অসি হোংদোক্নবা লৈবাক অসিনা স্বছ ভারত মিসন অমদি অমরুত মিসনগী মখাদা অচৌবা কেম্পেন্দ অমা পাংথোক্লি৷

চহিশিং অসিদা, প্রাইভেৎ তোইলেত লাখ ৬০ হেন্না অমদি কম্ম্যুনিতী তোইলেত লাখ তরুক হেন্না শহরশিংদা শাখ্রে৷ চহি তরেৎকী মমাং ফাওবদা, ৱেস্তকী চাদা ১৮ খক্তমক দিস্পোজ তৌবা য়ারম্মী,ঙসিদি মদু চাদা ৭০দা হেনগৎলকখ্রে৷ মফম অসিদা য়ু.পি.দসু,  হৌখিবা চহি খরা অসিদা ৱেস্ত প্রোসেসিংগী অচৌবা কেপাসিতী অমা শেমগৎখ্রে৷ ঙসিগী এগজিবিসন অসিদা অসিগুম্লবা হিরমশিং পুথোরকপা অসি য়াম্না নুংঙাই৷ হৌজিক্তি শহরশিংদা লৈরিবা অমোৎ-অকাই মপৈশিং অসি লৌথোক্নবা স্বছ ভারত অভিয়ন ২.০গী মখাদা কেম্পেন্দ অমা হৌদোকখ্রে৷

মরুপশিং,

শহরশিংগী মতিক-মগুন হেনগৎহনবদা এল.ই.দি. লাইতশিংনা অতোপ্পা য়াম্না মরু ওইবা রোল অমা লৌখ্রে৷ কেম্পেন্দ অমগী মখাদা সরকার অসিনা লৈবাক অসিদা লৈরিবা অরিবা স্ত্রিত লাইত লাখ ৯০ হেন্না এল.ই.দি.শিংদা শিন্দোকখ্রে৷ এল.ই.দি. স্ত্রিত লাইতশিং ইন্সতোল্দ তৌরক্তুনা, আর্বান বোদীশিংনা চহি খুদিংগী লুপা কোতি ১০০০রোমগী চাংদা কল্লি৷ হৌজক্তি হায়রিবা আর্বান বোদীশিং অসিনা শেনফম অদু অতোপ্পা দিবেলপমেন্ত ৱার্কশিংদা থাদরি৷ এল.ই.দি.না শহরশিংদা লৈরিবা মীয়ামগী ইলেক্ত্রিসিতী বিল চাওনা হন্থহল্লি৷ মমাংদা লুপা ৩০০ হেন্না পীরম্বা এল.ই.দি. বল্ব অদু সরকার অসিনা উজলা স্কিমগী মখাদা লুপা ৫০-৬০দা ফংহনখ্রে৷ স্কিম অসিগী মখাদা এল.ই.দি. বল্ব কোতি ৩৭রোম য়েন্থোকখ্রে৷ মসিনা মরম ওইদুনা, লাইরবা অমদি মিদল ক্লাসকী লুপা কোতি ২৪,০০০রোম ইলেক্ত্রিসিতী বিলদা কনবা ঙম্লে৷

মরুপশিং,

ঐখোয়না গুজরাত্তা লৈবা অপিকবা লৈকাই অমদা লৈরকখিবদা লখনৌ হায়না পল্লকপা মতমদা, মীয়াম্না অসুম্না হায়নরম্মী, মখোয়না লখনৌদা চৎপা মতমদা, মখোয়না ‘পেহলে আপ’ হায়না তাবা ফংলম্মী৷ ঐনা ফাগী ওইনা হায়বা তারবসু, ঐখোয়না তেক্নোলোজীদসু ‘পেহলে আপ’ হায়না হায়গদবনি৷ হৌখিবা চহি ৬-৭তা ভারতকী আর্বান সেক্তরদা অচৌবা অহোংবা লাকখিবা অসি তেক্নোলোজীনা মরম ওইরগনি৷ ঙসি, লৈবাক অসিগী শহর ৭০ হেনবদা চলাইরিবা ইন্তিগ্রেতেদ কম্মান্দ অমদি কন্ত্রোল সেন্তরশিংনা তেক্নোলোজী অসি য়াম্না মরু ওইনা শিজিন্নরি৷ লৈবাক অসিগী শহরশিংদা থম্লিবা সি.সি.তি.ভি. কেমেরাশিংগী অচৌবা নেতৱার্ক অসিবু পৱার তৌরিবা অসিসু তেক্নোলোজীননি৷ লৈবাক  অসিগী শহর ৭৫দা হৌজিক মতমগী সি.সি.তি.ভি. কেমেরা ৩০,০০০ হেন্না থম্লিবা অসিনা মরম ওইদুনা মরাল লৈবা মীওইশিংনা অরানবা থবক অমা তৌদ্রিঙৈ মমাংদা চাম্মারক হন্না খলহনবা ঙমহল্লী৷ ক্রিমিনেলশিং অসি দন্দি পীবদসু হায়রিবা সি.সি.তি.ভি.শিং অসিনা চাওনা মতেং পাংলি৷

মরুপশিং,

ঙসিদি, মোদর্ন তেক্নোলোজীনা লৈবাক শিনবা থুংনা শেমগৎ-শাগৎলিবা সিৱেজ ত্রিতমেন্ত প্লান্তশিংগী কেপাসিতী অসি হেনগৎহনখ্রে৷ নেস্নেল কম্মন মোবিলিতী কার্দ অসি তেক্নোলোজী মশামক্কী খুদোল অমনি৷ থৌরম অসিদা, ইলেক্ত্রিক বস ৭৫ লমথাখ্রে; মসি মোদর্ন তেক্নোলোজীগী রিফ্লেক্সন অমনি৷

মরুপশিং,

লাইতহাউস প্রোজেক্তকী মখাদা লখনৌদা শারিবা য়ুম অমা ঐনা উরে৷ য়ুম অদুদা শিজিন্নরিবা তেক্নোলোজী অদুনা প্লাস্তর নত্রগা রংগী দরকার ওইদে৷ হায়রিবা য়ুমশিং অসিদা মাংজৌননা শেম্লবা ৱালশিং শিজিন্নগনি৷ মসিনা য়ুমশিং শাবগী খোঙজেল য়াংখৎহনগনি৷ মসিগী প্রোজেক্ত অসিদগী লৈবাক পুম্বদগী লখনৌদা লাক্লিবা মীয়াম পুম্নমক্না কয়া অমা খঙবা ঙম্লগনি অমদি মখোয় মখোয়গী শহরশিংদা অসিগুম্লবা শানবা হোৎনরগনি হায়না ঐনা থাজৈ৷

মরুপশিং,

তেক্নোলোজীনা লাইরবগী পুন্সি মতৌ করম্না হোংহনখিবগে হায়বদু পি.এম. এস.ভি.এ.নিধি য়োজনানা খুদম অমসু ওইরি৷ লখনৌগুম্বা শহর কয়া অমদা মার্কেৎশিংগী তোঙান তোঙানবা মখলশিংগী চৎনবি অমা লৈরম্মী৷ ঐখোয়গী স্ত্রিত বেন্দরশিংনা চয়োলগী ওইনা ফম্বা মার্কেৎকী ফজবা হেনগৎহল্লি৷ পি.এম. এস.ভি.এ.নিধি য়োজনাগী মখাদা, স্ত্রিত বেন্দরশিং অসি বেঙ্কশিংগা লিঙ্ক তৌরি৷ স্কিম অসিগী মখাদা মরুপ লাখ ২৫ হেনবদা লুপা কোতি ২৫০০ হেনবগী শেল-থুমগী ওইবা মতেং পাংখ্রে৷ এস.ভি.এ.নিধি য়োজনাদগী য়ু.পি.গী মরুপ লাখ তরেৎ হেন্না কান্নবা ফংহনখ্রে৷ মখোয়গী বেঙ্কিং হিস্ত্রীগা লোইননা, মখোয়না দিজিতেল ত্রান্সেক্সন হেন্না হেন্না পাংথোক্লি৷

এস.ভি.এ.নিধি স্কিমদগী খ্বাইদগী হেন্না কান্নবা ফংলিবা মকোক থোংবা শহর অহুমগী মনুংদা, অনি অমদি উত্তর প্রদেশতগী য়াওরকপা অসিনা ঐনা য়াম্না নুংঙাইবা ফাওই৷ লৈবাক অসিদা লখনৌদা অহানবা মফমদা লৈ অমদি কানপুরনা অনিশুবা মফমদা লৈ৷ কোরোনাগী মতম অসিদা মসি অচৌবা মতেং অমনি৷ মসিগীদমক য়োগি জিগী সরকারবু ঐনা থাগৎলি৷

মরুপশিং,

ঙসি, ঐখোয়গী স্ত্রিত বেন্দরশিংনা দিজিতেল ত্রান্সেক্সনশিং শিজিন্নবগী মতাংদা ঐনা ৱারি শারকপা মতমদা, ঐনা মমাংগী মতমদা চৎনদুনা লৈরম্বা স্কিম অদুসু নিংশিংলকই৷ মতৌ করম্না লাইরিক হৈবা ৱাৎলবা মীওইশিংনা দিজিতেল ত্রান্সেক্সনশিং অসি তৌবা ঙম্লিবনো হায়না হায়নখি৷ অদুবু এস.ভি.এ.নিধি স্কিমদা য়াওরিবা স্ত্রিক বেন্দরশিং অসিদি হৌজিক ফাওবদা দিজিতেল ত্রান্সেক্সন কোতি তরেৎ হেন্না তৌখ্রে৷ হৌজিক্তি, মখোয়না হ্বোলশেলরশিংদগী পোৎ-চৈ লৈবা মতমদা, মখোয়না দিজিতেল পেমেন্ত খক্তমক তৌই৷ ঙসিদি, অসিগুম্বা মরুপশিং অসিনা মরম ওইদুনা, ভারতনা দিজিতেল পেমেন্তশিংদা অনৌবা রেকোর্দ থম্বা ঙম্লি৷ হৌখিবা থা অহুমদা হায়বিদ জুলাই, ওগস্ত, সেপ্তেম্বরদা, কোতি লাখ ৬ হেনবগী দিজিতেল ত্রান্সেক্সন থা খুদিংগী তৌখ্রে৷ বেঙ্কশিংদা মীয়াম চৎপগী চাং হন্থরকখ্রে৷ ভারতনা তেক্নোলোজী শিজিন্নবগী অহোংবা অমদি মপাঙ্গল অদু মসিনা উৎলি৷

মরুপশিং,

হৌখিবা চহিশিংদা, ভারত্তা লৈরিবা ত্রাফিক প্রোব্লেম অমদি পোলুসন চেলে়ঞ্জ অনিমক হোলিস্তিক এপ্রোচ অমা শিজিন্নদুনা থেংনখ্রে৷ মসিগী চপ চারবা খুদম অমা অদুদি মেত্রো ত্রেননি৷ ঙসিদি, ভারতনা লৈবাক পুম্বদা লৈরিবা অচৌবা শহরশিংদা মেত্রো সর্ভিসশিং খোঙজেল য়াংনা শন্দোরক্লি৷ ২০১৪দা, মেত্রোনা কি.মি. ২৫০ রুতকী মখাদা চেল্লম্মী, ঙসিদি কি.মি. ৭০০রোমগী চাংদা চেল্লি৷ মেত্রো ৱর্ক অসি কি.মি. ১,০৫০দা ওনখৎলক্লি হায়না ওফিসরশিংনা ঙসি ঐঙোন্দা তেল্লপনা ফোংদোকলমখি৷ মেত্রো নেতৱর্ক অসি য়ু.পি.গী শহর তরুক্তসু চাওথোরক্লি৷ উদান স্কিমদা নত্রগা শহর ১০০ হেনবদা ইলেক্ত্রিক বসশিং চলাইবগী পান্দম অদুবু ওইরবসু, মখোয়নসু শহর চাওখৎহনবদা অকনবা শাফু অমা পীরি৷ হৌজিক্তি ২১শুবা চহি-চাগী ভারতনা মল্তি-মোদেল কন্নেক্তিবিতীগী শক্তিগা লোইননা চংশিল্লক্লি অমদি শেম-শাবগী থবক খোঙজেল য়াংনা চত্থরি৷

অদুগা মরুপশিং,

হায়রিবা আর্বান ইনফ্রাস্ত্রকচর প্রোজেক্ত পুম্নমক্কী খ্বাইদগী চাওবা পোজিতিব ইম্পেক্ত অদুদি মেত্রো ৱর্কপু ওইগেরা, য়ুমশিং শেম-শাববু ওইগেরা, নত্রগা ইলেক্ত্রিসিতী অমসুং ইশিংগা মরী লৈনবা থবকপু ওইরবসু শহরশিংদা লৈরিবা মীয়ামদা থবক্কী খুদোংচাবা ফংহনবা অসিনা ওইরি৷ মখোয়বু এক্সপর্তশিংনা ফোর্স-মল্তিপ্লাইয়রশিংনি হায়না খল্লি৷ মরম অদুনা, হায়রিবা প্রোজেক্তশিং অসিগী মোমেন্তম অসি ঐখোয়না ঙাক্তুনা থমগদবনি৷

ইয়াম্বা-ইনাওশিং অমদি ইচল-ইচেশিং,

ভারত পুম্বগী পুন্সি অমদি ভারতকী কল্চর অসি উত্তর প্রদেশতা য়াওরি৷ লমদম অসি মপু ইবুংঙো শ্রী রাম, শ্রী কৃষ্ণ অমদি মপু ইবুংঙো বুদ্ধগী লমদমনি৷ য়ু.পি.গী মমললৈরবা হেরিতেজ অসি ঙাক শেন্নবগীদমক শহরশিং অসিবু মোদর্নাইজ তৌবা হায়বসি ঐখোয়গী ইথৌনি৷ উত্তর প্রদেশকী প্রজানা ২০১৭কী মমাং অমদি হৌজিক ওইরিবা য়ু.পি.গী খেন্নবা অসি নিংথিংনা খঙলে৷ মমাংগী মতমদা, য়ু.পি.দা মৈ নিংথিংনা ফংলমদে অমদি য়াম্না তোইনা তোইনা মৈ মুৎলম্মী৷ অসিগীসু মথক্তা, পোলিতিসিয়নশিংনা পামখিবা মফমশিংদা মৈ ফংখিরম্মী৷ ইলেক্ত্রিসিতী অসি খুদোংচাবা অমা ওইখিদে অদুবু পোলিতিক্সকী খুলাই অমা ওইখি, রিকম্মেন্দেসন লৈখিবা মতম খক্তদা লম্বী শেমখি অমদি ইশিংগী ফিভম অসিসু নখোয় পুম্নমক্না খঙলবা ঙাক্তনি৷

হৌজিক্তি মীপুম খুদিংমক্তা অমদি মফম খুদিংমক্তা চাং চপ মান্ননা মৈ ফংহল্লি৷ হৌজিক্তি লাইরবা ইমুংশিং ফাওবদা মৈ ফংলে৷ তেন্তক্না হায়রবদা, আর্বান দিবেলপমেন্তদা দরকার ওইরিবা পুম্নমক ঙসিদি য়ু.পি.দসু ফংলে৷

ঙসি উরেপ-উয়ুং তমখিবা প্রোজেক্তশিং অসি য়োগি জিগী লুচিং মখাদা অথুবা মতমদা লোইশিল্লগনি হায়না ঐনা থাজৈ৷

অমুক হন্না, দিবেলপমেন্ত প্রোজেক্তশিং অসিদা ময়াম পুম্নমকপু হন্না হন্না নুংঙাইবা ফোংদোকচরি।

হন্না হন্না থাগৎচরি!

*****