উপ রাস্ত্রপতি, শ্রী এম. ভেঙ্কয়া নাইদুনা ঙসি ইন্দস্ত্রীদা মাং থাদুনা লৈবাক অসিদা স্পোর্তসপু পুক্নীং থৌগৎনবা খঙহনখ্রে। মহাক্না তোকিও ওলিম্পিক্সতা ভারতনা উৎখিবা শীংথানীংঙাই ওইবা পর্ফোর্মেন্স অদুদা অপেনবা পোক্লদুনা ঐখোয়না মথংদা হেন্না ফগৎনবা পান্দম থম্বা তাই হায়না ফোঙদোকখ্রে।

অৱাং-নোংপোক থংবা লমদমদা মহাক্না লাকপা খুদিংদা মঙোন্দা থৌনা হাপ্পী অমসুং ৱাখল নৌথোকহল্লি হায়না ঙসি মহাক্না ফোঙদোকখ্রে। অৱাং-নোংপোক থংবা রাজ্য নিপান অসি ভারতকী লুহুপতা থিল্লিবা সানাগী তম্ফাশিংনি হায়রদুনা মহাক্না মহৌশাগী ওইবা ফজবা অমসুং চীংশাং-নাপোমশিংগী পুক্নীং হুরবা ফজবা অসিগা মফম অসিগী মীয়ামগী পুকচেল চাওবা মতৌ অসিগা পুনশিনবনা মসি কাউবা ঙম্লরোইদবা এক্সপরিয়েন্স অমা ওইরি হায়না মহাক্না ফোঙদোকখ্রে।

নুমিৎ নিপান্নিগী খোঙচৎতা অৱাং-নোংপোক থংবা রাজ্যশিংদা লাকখিবা উপ রাস্ত্রপতিনা ঙসি মনিপুরদগী মখোয় মশাগী লমশিংদা শীংথানীংঙাই ওইবা পন্দুপ য়ৌবা ঙমখিবা মাইপাক্লবা মীওই কাংলুপ অমগা ৱারী-ৱাতায় শাখ্রে। ইম্ফালগী রাজ ভৱন্দা পাঙথোকখিবা থৌরম অদুদা শরুক য়াখিবশিংগী মরক্তা ওলিম্পিয়নশিং, লিতরেতী অমসুং কলচরেল ফিগরশিং, আর্তিসনশিং অমসুং ওজাশিং য়াওখি। শ্রী নাইদুনা মখোয়গী মাইপাকপশিং অদুগীদমক মখোয়বু থাগৎপা ফোঙদোকখ্রে অমসুং মখোয় মশাগী লমশিংদা মীথোই-মীহেনবা ওইনবা মতম চুপ্পদা পান্দম থমগদবনি হায়না মখোয়দা হায়খ্রে।

“These are meant to protect me..."

Vice President, Shri Venkaiah Naidu remarked in a lighter vein after wearing the boxing gloves presented to him by Mary Kom during an interaction with sports persons & achievers at Raj Bhavan, Manipur this evening. pic.twitter.com/Rjw921j2MT

— Vice President of India (@VPSecretariat) October 5, 2021

ৱারী-ৱাতায় শানবা অদুদা উপ রাস্ত্রপতিদা ভারতকী বোক্সিং লিজেন্দ শ্রীমতি এম.সি. মেরী কোম্না বোক্সিং গ্লোব জুরা অমা খুদোল তমখি। শ্রী নাইদুনা গ্লোবশিং অদু উপশিল্লবা মতুংদা নোক্তুনা “মসিনা ঐহাকপু ঙাকথোক্লগনি” হায়না ফোঙদোকখ্রে।

মনিপুর অসি ভারতকী স্পোর্তসকী পাৱরহাউসনি হায়রদুনা মহাক্না স্পোর্তসকী লমদা লৈবাক অসিগী মীংচৎ পুরক্নবা হোৎনবা মতমদা অপীকপা রাজ্য অসিনা মাংজিল থারি হায়না ফোঙদোকখ্রে। মহাক্না মখা তারদুনা হায়, “মনিপুরগী ওলিম্পিয়নশিং অসিনা তশেংনা রাজ্য অসিবু অমদি লৈবাক অসিবু চাউথোকচবা পোকহল্লি”।

ভারতকী ফিরালবু হেন্না ৱাংনা পাইহনবগীদমক রাজ্য অসিগী শান্নরোয়শিংবু থাগৎলদুনা, শ্রী নাইদুনা হায়খি, “নখোয়না লৈবাক অসিগী হৌগৎলক্লিবা শান্নরোয় লিশিং কয়াগী ফীদম্নীংঙাই ওইবা মীশক অমসু ওইরি অমদি ইথিল পীনবগী হৌরকফম ওইরি।”

উপ রাস্ত্রপতিনা হন্দক্তা পাঙথোকখিবা তোকিও ওলিম্পিক্সতা ভারতকী শান্নরোয়শিংনা উৎখিবা পর্ফোর্মেন্স অদুদা হরাও-নুংঙাইবা ফোঙদোকখি অমসুং মহাক্না হায় ঐখোয়না মথংদা হেন্না ৱাংবা পান্দম ফংনবা হোৎনগদবনি।

রাজ্য অমসুং কেন্দ্র সরকারনা স্পোর্তসপু পুক্নীং থৌগৎনবা হোৎনরিবশিং অসি খঙলদুনা মহাক্না ইন্দস্ত্রীদা মাং থাদুনা স্পোর্তস থৌগৎনবা খঙহনখ্রে। মহাক্না রাজ্য সরকারদা খুঙ্গংগী থাক ফাওবা স্পোর্তসকী ইনফ্রাস্ত্রকচর অমসুং ত্রেনিং ফেসিলিতীশিং থম্নবা হায়খ্রে।

*****