দেভেলপমেন্ত ওফ নোর্থ ইস্তর্ন রিজন (দোনর), কলচর অমসুং তুরিজমগী কেন্দ্র মন্ত্রী শ্রী জি. কিসন রেদ্দী মেঘালয়া অমসুং অসামদা নুমিৎ নিনিগী ওইবা খোঙচত্তা লাক্লম্মি‍। মেঘালয়াদা চৎখিবা খোঙচৎকী শরুক অমা ওইনা কেন্দ্র মন্ত্রীনা নোর্ত ইস্তর্ন কাউন্সিল (এন.ই.সি.) অমসুং নোর্থ ইস্ত রোদ সেক্তর দেভেলপমেন্ত স্কিম (এন.ই.আর.দি.এস.)কী তোঙান তোঙানবা চাওখৎ থৌরাংগী থবক অমসুং হৌজিক পায়খৎলিবা প্রোজেক্তশিং য়েংশিনখি‍। মহাক্না মেঘালয়াগী সিলোংদা লৈবা এন.ই.সি. সেক্রেতরিএত্তা য়েংশিন মীফমদা রাজ্য মন্ত্রী শ্রী বি.এল. ভর্মা, দোনর মন্ত্রালয়গী সেক্রেতরী শ্রী লোক রঞ্জন, নোর্থ ইস্তর্ন কাউন্সিল সেক্রেতরী শ্রী মোজেজ চলাই অমসুং অতৈ ওফিসিএল অমদি দিগ্নিতরীশিংগা লোয়ননা শরুক য়াখি‍।

এন.ই.সি. সিলোংগী কন্ফরেন্স ওদিতরিয়মদা পাঙথোকপা “নোর্থ ইস্তর্ন রিজন (এন.ই.আর.)দা চাওখৎ থৌরাংগী থবক্তা নোর্থ ইস্তর্ন কাউন্সিলগী হোংলক্লিবা থৌদাং” হায়না মিংথোনবা ৱর্কসোপ অমসু কেন্দ্র মন্ত্রী জি. কিসন রেদ্দীনা শরুক য়াখি‍। থৌরমদুগী অথোইবা মীথুং ইকায়খুম্নরবা উপ রাস্ত্রপতি শ্রী এ. ভেঙ্কয়া নাইদুনা ওইখি‍। থৌরম অদু রাজ্যপাল শ্রী সত্য পাল মলিক, মেঘালয়াগী মুখ্য মন্ত্রী শ্রী কোনরদ সংমা, দোনরগী রাজ্য মন্ত্রী শ্রী বি.এল. ভর্মা, দোনর সেক্রেতরী শ্রী লোক লঞ্জন, এন.ই.সি. সেক্রেতরী মোজেজ চলাই অমসুং অৱাং নোংপোক স্তেতশিংগী মীথুংশিং, একাদমিক ফ্রেতর্নিতী অমদি অতৈ থৌমীশিংসু শরুক য়াখি‍। মহাক্কী ৱারোলদা জি. কিসন রেদ্দীনা দোনর মন্ত্রালয়গী মায়কৈদগী উপ রাস্ত্রপতিবু মহাক্কী চিল্লবা মতম অমসুং সংবিধানগী থৌদাংদগী মতম খরা কাইথোকপীদুনা অস্থলক্ষ্মী স্তেতশিংসিদা চয়োল অমা চুপ্না লেংবিরক্লিবা অসিগীদমক্তা থাগৎপা ফোঙদোকখি‍। “সর অদোম্না ঐখোয়গী ইরক্তা তিনবিররিবসি তশেংনা নুংঙাইবা মীৎকুপ অমনি অদুগা মীয়ামগা লোয়নদুনা লৈনিংবগী ইহুল অসিমক্না অদোমবু লৈবাকসিগী খ্বাইদগী ইচং থৌবা উপ রাস্ত্রপতিশিংগী মরক্তা অমা ওইহল্লে‍। কেবিনেত মন্ত্রী অমা ওইনসু অদোম্না অৱাং নোংপোক লমদমগী চাওখৎনবগী মায়কৈদা থবক কয়া তৌবিরম্মি”, হায়না মহাক্না হায়খি‍।

“প্রধান মন্ত্রী শ্রী নরেন্দ্র মোদী জীনা নোর্থ ইস্তর্ন কাউন্সিলগীদমক্তা লেপ্লিবা ফিরেপ অসি মহাক্কী থবক্না নীংথিনা উৎলি‍। ২০১৬দা মহাক্না চহি ৪০গী মনুংদা নোর্থ ইস্তর্ন কাউন্সিলগী মীফম য়াওবা অহানবা প্রধান মন্ত্রী ওইদুনা ৬৫শুবা প্লেনরীদা ৱা ঙাঙখি”, হায়না কেন্দ্র মন্ত্রীনা মখা তাখি‍। মহাক্কী ৱারোলদা জি কিসন রেদ্দীনা অৱাং নোংপোক্তা হেন্না ফবা লম্বী থোং, রেলৱে অমসুং নোংথক্কী লম্বী শেমদুনা ইনফ্রাস্ত্রকচর অমসুং কন্নেক্তিভিতীগী ফীভম ফগৎহন্নবা লৈঙাক্না পায়খৎলিবা থৌরাংশিংগী মতাঙদসু পনখি‍। “কেপিতেল রেল কন্নেক্তিভিতী প্রোজেক্তকী শরুক অমা ওইনা অসাম, অরুনাচল প্রদেশ অমসুং ত্রিপুরা হায়রিবা অৱাং নোংপোক স্তেত অহুমসিগী ময়োল্লমশিং মেন ইন্দিয়ন রেলৱেজ নেতৱর্ক্কা শমজিন্নরে‍। লেমহৌরিবা কোনুং ৫ শমজিন্নবগী থবক চঙশিল্লি‍। নোংথক্কী কন্নেক্তিভিতীগী শরুক অমা ওইনা এন.ই.আর.দা অচৌবা কেপিতেল গ্রীনফিল্দ এয়র কন্নেক্তিভিতী প্রোজেক্ত ২গী থবক হৌজিক চঙশিল্লি,” হায়না মহাক্না হায়খি‍। কেন্দ্র মন্ত্রীনা এন.ই.আর.দা লৌউ শিংউগী লমদা লৈঙাক্না পায়খৎলিবা থৌরাংশিংগী মতাঙদসু ৱা ঙাঙখি‍। “নেসনেল মিসন ওন ইদিবল ওইল্স অমসুং ওইল পাল্ম অমসুং নোর্থ ইস্তর্ন রিজনেল এগ্রিকলচরেল মার্কেতিং কোর্পোরেসন (নেরামার্ক) অমুক হিংগৎহন্নবা হন্দক্তা মন্ত্রী মন্দলনা লৌখিবা ৱারেপ অনি অসিনা অৱাং নোংপোক লমদমগী লৌউ-শিংউগী লমদা চাউনা ইনোৎ হাপ্লগনি,” হায়না মহাক্না ফোঙদোকখি‍।

নোর্থ ইস্তর্ন কাউন্সিলগী থবক থৌরমশিংবু থাগৎলদুনা জি. কিসন রেদ্দীনা ফোঙদোকখিবদা, “নোর্থ ইস্তর্ন কাউন্সিল লৈরকপা চহি ৪০সিদা অৱাং নোংপোক লমদমগী চাওখৎ থৌরাংদা অচৌবা থৌদাং লৌদুনা লাক্লি‍। এন.ই.সি.না শ্রী নরেন্দ্র মোদী জীগী মঙলানবু মঙফাওনহন্নবা খোঙলৈ থুনা থবক কয়া পায়খৎখি‍। মরম অসিনা ঙসিগী ৱর্কসোপ অসি ঐখোয় পুম্নমক্কী ওইনা মরুওইবা থৌরম অমনি‍। এন.ই.সি.গী হোংলক্লিবা থৌদাং অসি ঐখোয়না অৱাং নোংপোক লমদমদা ওইহন্নিংলিবা ফীভমদুনা শেমগদৌরিবনি‍।”

কেন্দ্র মন্ত্রীনা, ইকায়খুম্নরবা ভারতকী উপ রাস্ত্রপতি শ্রী ভেঙ্কয়া নাইদু,  রাজ্যপাল শ্রী সত্য পাল মলিক, মেঘালয়াগী মুখ্য মন্ত্রী শ্রী কোনরদ সংমাগা লোয়ননা রাজ ভবস সিলোংদা মেঘালয়াগী চৎনবী, নাৎ অমসুং ফোল্কলোরশিং উৎপা কল্চরেল থৌরম অমা শরুক য়াখি‍।

************