উপ রাস্ত্রপতি শ্রী এম. ভেঙ্কয়া নাইদুনা ঙসি অৱাং নোংপোক লমদমগী লমকোয় মতিং মপুং ফানা লোকশিন্নবা, পোৎলমশিং পুথোক পুশিন তৌবদা লায়নবা, সর্ভিস দেলিভরী ফগৎহন্নবা অমদি লমদমসিগী মপুং ফাবা চাউখৎ লমজেলদা থৌদাং লৌননবা হেন্না ফবা লম্বী থোং লৈবগী তঙায়ফদবা ৱাফম ফোঙদোকখ্রে‍।

হীরম অসিগী মতাংদা শ্রী নাইদুনা তোঙান তোঙানবা প্রোজেক্তশিংগীদমক কেন্দ্রনা থাদখিবা ফন্দশিং অরোন অথুপ লৈতনা অমদি মওং চুম্না শীজিন্নদুনা অৱাং নোংপোক স্তেতশিংদা পায়খৎলিবা চাউখৎ থৌরাংগী থৌওংশিং থুনা পায়খৎননবা ৱাফম থমখি‍। “করিগুম্বা মফমসিদা লৈরিবা প্রোজেক্ত পুম্নমক পন্থবা অমদি থৈদোকপা তৌদনা খোঙলৈ থুনা পায়খৎলবদিো অৱাং নোপোক স্তেতশিংদা লৈবাকসিগী চাউখৎপগী ইঞ্জিন ওইবা ঙম্বগীম তিং লৈ”, হায়না শ্রী নাইদুনা ফোঙদোকখি‍। “লৈবাক অসিনা চাউখৎপা হায়বসি অৱাং নোংপোক চাউখত্তনা মপুং ফাবা ওইদে” হায়না মহাক্না মখা তাখি‍।

অৱাং নোংপোক্তা লালহৌবগী ইরাং নেমথরকপদা নুংঙাইবা ফোঙদোক্লদুনা, শ্রী নাইদুনা “ইং চিকপা ফীভম চাউখৎপগীদমক মথৌ তাই” হায়না থমখি‍। তংদু লৈতাবা ফীভম অমা লৈরিবসিবু লমদমসিদা চাউখৎপা খুৎলৈ থুনা পুরক্নবগীদমক শীজিন্নহৌনবা ৱাফম মহাক্না থমখি‍।

ৱাফমশিং অসি উপ রাস্ত্রপতিনা সিলোংদা নেসনেল হায়ৱে-৪০গী সিলোং-দাউকি সেক্সনগী ফীভম ফগৎহনবগী/পাকথোকপগী উরেপ উয়ুং তমবগী থৌরমদা শরুক য়ারদুনা ফোঙদোকখিবনি‍।

অৱাং নোংপোক্কী চীং-মানগী মফম ওইবা অমদি নোংজুথাগী মতম শাংবা অসিনা লম্বী শেমগৎ শাগৎপদা অপনবা হেক হেক ওইরি হায়বা ৱাফম থম্লদুনা শ্রী নাইদুনা চীং-মানগী লম্বী শেমগৎ-শাগৎপগী অমদি দিজাইন তৌবগী থবক্তা ইনোভেসন পুরক্নবা ৱাফম থমখি‍। “লৈবাকসিদা লৈরিবা তেক্নিকেল ইন্সতিত্যুসনশিংনা তাঞ্জা অসি হেন্না ফবা লম্বীগী মওং মতৌ পুথোক্নবা অমদি থবক পায়খৎপগী মতম হন্থহন্নবা পাম্বৈশিং পুথোক্নবা খুদোংদোচাবা লৌহৌগদবনি”, হায়না মহাক্না ফোঙদোকখি‍।

অৱাং নোংপোক লমদমগী লম্বী-থোংগী খুদোংচাদবা ফীভমশিংগী মতাঙদা পল্লদুনা শ্রী নাইদুনা নোংথক্কী চত্থোক চৎশিনগী পাম্বৈ ফগৎহনবগী মরুওইবা ৱাফমশিংসু থমখি‍। রিজনেল কন্নেক্তিভিতী স্কিমগী মখাদা লমদমসিদা নোংথোক্কী চত্থোক চৎশিনগী পাম্বৈ ফগৎলক্লে হায়বা ৱাফম পল্লদুনা মহাক্না অৱাং নোংপোক্কা লৈবাক্কী অতৈ মফমশিংগগী মরক্তা দাইরেক্ত ফ্লাইত মশিং হেনগৎহন্নবা ৱাফম থমখি‍।

এন.ঐচ.-৪০গী ফীভম ফগৎহনবা/পাকথোকপনা স্তেত অসিদা তুরিজমগী ফীভম মশক থোক্না ফগৎলক্কদবা ৱাফমসু শ্রী নাইদুনা ফোঙদোকখি‍। মেঘালয়াবু তুরিজমগী য়াম্লবা মতিং লৈবা ফজরবা স্তেত অমনি হায়না শক্তাক্লদুনা শ্রী নাইদুনা তুরিজম য়োকখৎনবা অমদি লম কোয়বশিংগী ইনফ্রাস্ত্রকচরশিং ফগৎহন্নবা কেন্দ্র অমসুং স্তেত লৈঙাক পুন্না হোৎনমিন্ননবা ৱাফম থমখি‍। তুরিজম য়োকখৎপা মতমদা লমদমসিগী তরু তরুবা ইকোলোজিকেল সিস্তেম অসিবু মওং অমত্তদা শোকহন্দনবা চেকশিন থৌরাং লৌখৎকদবনি হায়না মহাক্না ফোঙদোকখি‍।

মেঘালয়াগুম্বা স্তেতশিংদা এগ্রো-ওন্ত্রিপ্রিন্যুরশিংগী মরুওইবা ৱাফম পল্লদুনা উপ রাস্ত্রপতিনা স্তেত অসিদা হোর্তিকলচরনা চাউরবা মফম কল্লি অমদি নৌনা মচিন তুমখৎলক্লিবা ওন্ত্রপ্রিন্যুরশিংনা সপ্লাই চেন্দা ভেলু হাপচিন্নবা চাউরবা মতিং লৈ হায়খি‍। হীরম অসিগী মতাঙদা মহাক্না মেঘালয়া লৈঙাকপু নহাশিংগী মরক্তা ওন্ত্রপ্রিন্যুরসিপকী পুক্নিং থৌগৎনবা অমদি মখোয়বু স্কিলদা য়ুম্ফম ওইবা মহৈ মশিং তমবিনবা প্রাইম হব ইনিসিএতিক হৌদোকপগীদমক্তা থাগৎখি‍।

লকাদোং য়াইঙং অমসুং শিং মকুপ্নচিংবা স্তেত অসিগী মমীং লৈরবা পোত্থোকশিং খুদম ওইনা পীরদুনা ঐখোয়গী লমদমসিগী হোর্তিকলচরগী পোত্থোকশিং মালেমগী কৈথেলদা য়োন্ননবা অমদি উত্থোক্নবা চাউরবা তাঞ্জা অমা লৈ হায়না শ্রী নাইদুনা ফোঙদোকখি‍। মহাক্না নহাশিংগী মফমদা এগ্রো-ওন্ত্রপ্রিন্যুর ওইনা ইনোভেত তৌনবা অমদি অপীকপা লৌমীশিংগী পোত্থোকশিংগী চপ চাবা মমল কৈথেলদা ফংহন্নবগীদমক পোত্থোক পুথোকপগী চাং, পেকেজিং ফগৎহন্দুনা লৌমীশিংবু খুৎশম্নবিদুনা পুখৎপিনবা ৱাফম থমখি‍।

উপ রাস্ত্রপতিনা থৌরমদুদা শরুক য়াখিবা মিস রেবিকা ভেনেসা সুচিয়ংবু মেঘালয়াগী অহানবা ইন্দিজিনস নুপী চীফ সেক্রেতরীগী ফম পায়রকপগীদমক্তা নুংঙাইবা ফোঙদোকখি‍। মহাক্কী মায় পাকপা অসিনা মেঘালয়াগী নহাশিংবু লৈঙাক্কী থবকশিংবু করিয়র চোইস অমা ওইনা লৌবদা চাউনা ইহুল পীরগনি হায়না মহাক্না মখা তাখি‍।

শ্রী সত্য পাল মলিক, ইকায়খুম্নরবা মেঘালয়াগী গভর্নর, শ্রী কোনরদ সংমা, মেঘালয়াগী মুখ্য মন্ত্রী, শ্রী পি. তীনসোং, মেঘালয়াগী উপ মুখ্য মন্ত্রী, মিস রেবিকা ভেনেসা সুচিয়ং, মেঘালয়া লৈঙাক্কী চীফ সেক্রেতরী অমদি অতৈ মীওইশিং থৌরমদুদা শরুক য়াখি‍। রোদ ত্রান্সপোর্ত অমসুং হায়ৱেজকী কেন্দ্র মন্ত্রী শ্রী নিতিন গারকরিসু হান্না রেকোর্দ তৌরবা ভিদিও পাউজেল অমগী খুত্থাঙদা শরুক য়াখি‍।

উপ রাস্ত্রপতিগী মপুং ফাবা ৱারোল মখাদা পীরি:

“ইচিন ইনাউশিং,

ঙসি সিলোংদগী দাউকি ফাওবগী নেসনেল হায়ৱে এন.ঐচ.-৪০গী ফীভম ফগৎহন্নবা/পাকথোকহন্নবা উরেপ উয়ুং তমবগী থৌরমসিদা ময়ামগী মরক্তা পনবা ফংবা ঐ য়াম্না নুংঙাই‍।

ঐগী অৱাং-নোংপোক্কী খোঙচত্তা মীত্রংগুম্লবা লমদম অমা ওইরিবা মেঘালয়াদা লাকপদা য়াম্না নুংঙাইবা ফাওই‍। মীৎফম হোংবা য়াদ্রবা মহৌশাগী ফজবা অমদি ইনাক খুল্লবা নাৎকী খেন্নবা কয়ানা থল্লবা মেঘালয়ানা ঐখোয়গী লৈবাক্কী চাউখৎ থৌরাংদা মতম পুম্বদা মরুওইবা থৌদাং য়াদুনা লাক্লি‍। ঙসিগী থৌরমসিদা স্তেত অসিগী মীয়ামগী মফমদা য়াইফ পাউজেল পীজরি!

ইচিন ইনাউশিং,

হায়ৱে অসিগী ফীভম ফগৎহন্নবা/পাকথোহন্নবা প্রোজেক্ত অসি জপান ইন্তরনেসনেল কোওপরেসন এজেন্সীদগী মতেংগা লোয়ননা পায়খৎপা ভারত লৈঙাক্কী য়াম্না থাক ৱাংবা অমদি মরুওইবা থৌরাং অমনি‍। মসিনা লমদমসিদা হেন্না ফবা কন্নেক্তিভিতী পুরক্দুনা অৱাং নোংপোক লমদমসিদা অমদি ঐখোয়গী মরুপ মপাং ওইরিবা য়ুমলোন্নবা বঙ্গলাদেসকা মরুওইবা মরী অমা পীগনি‍ হায়না পানরি‍। লম্বী অসিনা স্তেত অসিদা লমকোয় ইন্দস্ত্রীদসু অচৌবা ইনোৎ অমা পীদুনা মেঘালয়াগী মপুং ফাবা চাউখৎ থৌরাংদা মতেংসু ওইগনি‍।

প্লানিংগী থাক্তা লৈরিবা সিলোং ৱেস্তর্ন বাইপাসকী মথক্তা তুরা-দালু সেক্সন অমসুং রানিকোর-মহেসখোলা-বাঘমারা সেক্সনবু লেন অনিদা ওনখৎপা য়াওনা তোঙাত তোঙানবা প্রোজেক্তশিংসু স্তেত অসিদা প্লান তৌরি অমদি পায়খৎলি হায়বা ঐ খঙলে‍। হায়রিবশিং অসি অফবা থৌরাংশিংনি অমদি মিসন মোদতা খোঙলৈ থুনা থবক পায়খৎপা মথৌ তাই‍।

মতৌ অসুম্না অতৈ অৱাং নোংপোক স্তেতশিংদা কন্নেক্তিভিতী ফগৎহন্নবা লৈঙাক্না স্পিসিএল এক্সেলেরেতেদ রোদ দেভেলপমেন্ত প্রোগ্রাম ফোর নোর্থ ইস্ত (এস.এ.আর.দি.পি.-এন.ই.) অমসুং ভারতমালা পরিয়োজনাগী মখাদা তোঙান তোঙানবা প্রোজেক্ত কয়া পায়খৎলি‍। হৌজিক ফাওবদা এস.এ.আর.দি.পি.-এন.ই.গী মখাদা কিমি ৩৮৫০ পীবদা কিমি ২৮১৫ লোইশিল্লক্লে অমদি ভারতমালা পরিয়োজনাগী মখাদা কিমি ২১১৮ পীবগী মনুংদা কিমি ৫১৪ লোইশিল্লে হায়না ঐঙোন্দা হায়‍। ঐনা রোদ ত্রান্সপোর্ত অমসুং হায়ৱেজ মন্ত্রালয়বু অৱাং নোংপোক লমদমশিং শমজিন্ননবা মখোয়গী খোঙফম চেৎপা থবক্কীদমক থাগৎলি‍।

মরূপশিং,

লম্বী থোং ফবা হায়বসি শেন্মিৎলোন চাউখৎনবগী মরুওইবা পাম্বৈ অমনি হায়বা অদোমসু খঙবিরে‍। অফবা লম্বী থোংগী নেতৱর্ক হায়বসি লল্লোন ইতিক চাউখৎহন্নবা, পোত্থোক অমসুং সর্ভিস পুথোক পুশিন তৌনবা অমদি স্তেতশিংগী মরক্তা চত্থোক চৎশিনগী ফীভম ফগৎহন্নবা য়াম্নমক মরুওই‍। মরম অসিনা লম্বী হায়বসি মতমসিগী শেন্মিৎলোন অমা হেক্তগী লাইফলাইননি‍।

মফমসিগী লম্বীশিংগী মরমদা য়াম্না মরুওইবা ইসু অমা হায়রগদি লেপ্পা নাইদনা মেন্তেনেন্স চঙবসিনি‍। ৱাফমসিদা লৈঙাক্না অমদি লোকেল ওথোরিতীশিংনা লম্বী শাংদোকপা অমদি পাকথোকপগা লোয়ননা পুক্নিং চঙবা মথৌ তাই‍।

লমদমসিগী লৈমায়গী ফীভমসিনা মরম ওইরগা লম্বী লমজাও শেমগৎনবা অমদি পাকথোক্নবা লৈবাক ফংবগী চাংসু ৱাৎলি‍। মেঘালয়াগুম্বা স্তেতশিংদা লৈরিবা নোজুথাগী মতম অসিনসু লম্বী শেমগৎপগী থবক থৌরমশিং অমসুং লোইশিনবদা অপনবা অমসু ওইহল্লি‍। অসিগুম্বা ইসুশিং অসিনা চীং-মানগী মফমশিংদা লম্বী শেমগৎপদা অমদি দিজাইন্দা ইনোভেসন মথৌ তাহল্লি‍। লৈবাকসিদা লৈরিবা তেক্নিকেল ইন্সতিত্যুসনশিংনা তাঞ্জা অসি হেন্না ফবা লম্বীগী মওং মতৌ পুথোক্নবা অমদি থবক পায়খৎপগী মতম হন্থহন্নবা পাম্বৈশিং পুথোক্নবা খুদোংদোচাবা লৌহৌগদবনি‍।

লমদমসিদা লম্বী-থোংগী খুদোংচাদবা ফীভমশিং অসি য়েংলগা নোংথক্কী চত্থোক চৎশিনগী পাম্বৈ অসি অৱাং নোংপোক্কী ওইনা কন্নেক্তিভিতীগী মরুওইবা মশক অমা ওইহল্লি‍। হীরমসিগী মতাঙদা রিজনেল কন্নেক্তিভিতী স্কিমগী মখাদা সিলোং অমসুং অতৈ ময়োল্লমশিংগী দাইরেক্ত ফ্লাইতনা শম্নহনবগী ফীভমদা মশক থোক্না ফগৎলে হায়বা খঙবদা নুংঙাইবা ফাওই‍। লাক্কদৌরিবা চহিশিংদা অৱাং নোংপোক অমসুং লৈবাকসিগী অতৈ মফমশিংগী মরক্তা দাইরেক্ত ফ্লাইত মশিং হেন্না হেনগৎলকপা উবা পাম্মি‍।

ইচিন ইনাউশিং,

হেন্না ফবা ইনফ্রাস্ত্রকচর অমসুং কন্নেক্তিভিতীগী খ্বাইদগী ফবা মহৈশিংগী মরক্তা অমা হায়রগদি তুরিজমদা হেনগৎলকপসিনি‍। মেঘালয়া অসি তুরিজমগী মতিং চাউনা লৈবা মপুং ফানা লোকশিনবা মথৌ তাবা ফজরবা স্তেত অমনি‍। প্রোজেক্ত অসি লোইশিল্লকপদা মেঘালয়াগী তুরিজমদা অচৌবা ইনোৎ অমা হাপকনি হায়না ঐনা থাজৈ‍।

মতৌ অসুম্না স্তেত অমুং কেন্দ্র লৈঙাক্না লম কোয়বা মীশিং হেন্না লাকহন্নবা অমদি ইনফ্রাস্ত্রকচরগী ফীভম ফগৎহন্নবা কন্না হোৎনরি‍। তুরিজমগী মতিং ৱাংনা লৈবা অনৌবা মফম কয়া নৌনা থেংনরক্লি‍। লম কোয়বশিংগী ফেসিলিতীগী ফীভম ফগৎহনবখক্তা নত্তনা স্তেত অসিগী ফজরবা মফমশিং মীয়ামদা পাক শন্না খঙহন্নবগীদমক অহেনবা অপুনবা থৌরাংশিং মথৌ তাই‍। তুরিজম য়োকখৎপা মতমদা ঐখোয়গী তরু তরুবা ইকোলোজিকেল সিস্তেম অসিবু মওং অমত্তদা মাঙহন্দনবা ঐখোয়না লৌখৎফম থোকপা থৌরাংশিং লৌখৎপা তাই‍। তুরিজম অমসুং দেভেলপমেন্তকী মরক্তা চপ চাবাখল অমা লৈবা মথৌ তাই‍।

ইচিন ইনাউশিং,

হৌখিবা চহিশিংসিদা মেঘালয়না এগ্রো-ওন্ত্রপ্রিন্যুরসিপ য়োকখত্তুনা মাগী শেন্মিৎলোন দাইভরসিফাই তৌরি খঙবদা ঐঙোন্দা নুংঙাইবা পোকই‍। স্তেত অসিগী চাউরবা মফম হোর্তিকলচরগী মখাদা লৈরিবসিগী হায়রগদি, ফীভমসিদনা মচিন তুমখৎলক্লিবা ওন্ত্রপ্রিন্যুরশিংদা সপ্লাই চেন্দা ভেল্যু হাপচিন্নবা য়াম্লবা তাঞ্জা কয়া পীরি‍।

হীরম অসিগী মতাঙদা, নহাশিংগী মরক্তা ওন্ত্রপ্রিন্যুরসিপকী পুক্নিং থৌগৎনবা অমদি মখোয়বু স্কিলদা য়ুম্ফম ওইবা মহৈ মশিং তমবিনবা প্রাইম হব ইনিসিএতিব অমা মেঘালয়া লৈঙাক্না হৌদোক্লে হায়বা ঐ খঙলে‍। মসি য়াম্না অফবা থৌরাংনি অমদি নীংথিনা অমদি পুকচেল শেংনা পায়খৎলবদি প্রধান মন্ত্রীগী আত্ম নিরভর ভারতকী খোল্লাউদা চাউনা ইনোৎ পীগনি‍।

এগ্রো-ওন্ত্রিপ্রিন্যুরসিপকী অফবা খুদম অমা হায়রগদি লকাদোং য়াইঙং অমসুং শিং মকুপকী দিমান্দ চাউনালৈরিবা অমদি হন্দক্তা কুইদ্রিঙৈদা মালেমদা মমীং চৎখিবসিনি‍। য়সুম্না ঐখোয়গী লমদমসিগী হোর্তিকলচরগী পোত্থোকশিং মালেমগী কৈথেলদা য়োন্ননবা অমদি উত্থোক্নবা চাউরবা তাঞ্জা অমা লৈ‍। ঐখোয়না এগ্রো-ওন্ত্রপ্রিন্যুর ওইনা ইনোভেত তৌনবা অমদি অপীকপা লৌমীশিংগী পোত্থোকশিংগী চপ চাবা মমল কৈথেলদা ফংহন্নবগীদমক পোত্থোক পুথোকপগী চাং, পেকেজিং ফগৎহন্দুনা লৌমীশিংবু খুৎশম্নবিদুনা পুখৎপিবা মথৌ তাই‍। ঐখোয়না ঐখোয়গী নহাশিংবু এগ্রো-ওন্ত্রপ্রিন্যুরসিপকী লমদা চাউনা থবক পায়খৎনবা পুক্নিং থৌগৎপা মথৌ তাই‍।

ইচিন ইনাউশিং,

লম্বীগী ফীভম ফগৎহনবা/পাকথোকপা অমদি মসিনা পুরক্লিবা হেন্না ফবা কন্নেক্তিভিতী অসিনা হেন্না পাক চাউবা মায়কৈ অমদা হেন্না ময়েক লারক্লি‍। পুনশিন্নদুনা, খোঙফম চেৎনা হোৎনমিন্নদুনা ঐখোয়না তোঙান তোঙানবা হীরমশিংদা মেঘালয়াগী চাউখৎ থৌরাংশিং খোঙলৈ য়াঙখৎহনবা ঙমগনি অমদি ফজরবা স্তেত অসিগী শুবা-নোমবা কল্লবা অখাঙ কনবা মীয়ামদা অচুম্বা ৱায়েল ফংহনবা ঙমগনি‍।

ঐনা লোইশিনদ্রিঙৈগী মমাঙদা মিস রেবিকা ভেনেসা সুচিয়ংবু মেঘালয়াগী অহানবা নুপী ইন্দিজিনস চীফ সেক্রেতরী ওইরকপসিদা নুংঙাইবা ফোঙদোকচরি‍। মহাক্কী মায় পাকপা অসিনা মেঘালয়াগী নহাশিংবু লৈঙাক্কী থবকশিংবু করিয়র চোইস অমা ওইনা লৌবদা চাউনা ইহুল পীরগনি‍।

অমুক্কা হন্না, মফমসিদা লাক্তুনা সিলোংদগী দাউকি ফাওবগী এন.ঐচ.-৪০গী ফীভম ফগৎহন্নবা/পাকথোক্নবা উরেপ উয়ুং তমবা ফংবসিদা ঐ য়াম্না নুংঙাইবা পোকই‍। অসিগুম্লবা তাঞ্জা অসিদা ঐনা রোদ ত্রান্সপোর্ত অমসুং হায়ৱেজ মন্ত্রালয়, মেঘালয়া লৈঙাক অমসুং থবক পায়রিবা এজেন্সী এন.ঐচ.আই.দি.সি.এল.গী মফমদা নুংঙাইবা ফোঙদোকচরি‍।

মশক নাইরবা প্রোজেক্ত অসি মায় পাকপা ওইরসু অমদি থৌরাং তৌরিবা মতমগী মনুংদা লোইশিনবা ঙমবা ওইরসনু হায়না ঐনা য়াইফরোল পীজরি‍।

মেঘালয়াগী মীয়ামদা য়াইফ পাউজেল পীজরি‍।

খুবলৈ,

মিতেলা,

জয় হিন্দ!””

*********