କେନ୍ଦ୍ର ବାଣିଜ୍ୟ, ଉଦ୍ୟୋଗ, ବୟନ, ଖାଉଟି ବ୍ୟାପାର  ଓ ଯୋଗାଣ ମନ୍ତ୍ରୀ ପୀୟୂଷ ଗୋୟଲ ଆଜି ଏଠାରେ ନିବେଶକ ଓ ବ୍ୟାପାର ବାଣିଜ୍ୟ ପାଇଁ ଜାତୀୟ ଏକକ ବାତାୟନ(ସିଙ୍ଗଲ ୱିଣ୍ଡୋ)ବ୍ୟବସ୍ଥାର ଶୁଭାରମ୍ଭ କରିଛନ୍ତି। ଏହି ଅବସରରେ ସେ କହିଛନ୍ତି ଯେ  ଜାତୀୟ ସିଙ୍ଗଲୱିଣ୍ଡୋ ବ୍ୟବସ୍ଥା ବା ଏନ୍‌ଏସ୍‌ଡବ୍ଲୁଏସ୍ ଭାରତକୁ ଆତ୍ମନିର୍ଭର କରିବା ଦିଗରେ ଏକ ବିରାଟ ପଦକ୍ଷେପ ।

ସେ କହିଛନ୍ତି ଯେ ଏହି ବ୍ୟବସ୍ଥାର ଆରମ୍ଭ ଫଳରେ ଆନୁମୋଦନ ଓ ପଞ୍ଜୀକରଣ ପାଇଁ ସରକାରୀ ଦପ୍ତରକୁ ଦୌଡିବାର ପୁରୁଣା ପରମ୍ପରାର ଅବସାନ ଘଟିବ । ସ୍ୱାଧୀନତାର ଅମୃତ ମହୋତ୍ସବ ପାଳନର ୭୫ତମ ସପ୍ତାହରେ ଏହା ନିବେଶକ, କ୍ଷୁଦ୍ର ଓ ମଧ୍ୟମ ଉଦ୍ୟୋଗର ମାଲିକଙ୍କୁ ଅନେକ ଅସୁବିଧାରୁ ମୁକ୍ତି ଦେବ । ଏହା ଦ୍ୱାରା କେବଳ ଭାରତ ନୁହେଁ ବିଦେଶର ନିବେଶକ ଓ ଉଦ୍ୟୋଗୀ ମଧ୍ୟ ବିଶେଷଭାବେ ଉପକୃତ ହେବେ ।

ସେ  ଆହୁରି କହିଛନ୍ତି ଯେ ଏହି ଏନଏସ୍‌ଡବ୍ଲୁଏସ ସରକାରୀ ଦପ୍ତରକୁ ଦୌଡିବାର ଝିନ୍‌ଝଟ୍‌ରୁ ସମ୍ପୃକ୍ତ ପକ୍ଷଙ୍କୁ ମୁକ୍ତି ଦେବା ସହିତ ବ୍ୟାପାର ବାଣିଜକୁ ସୁଗମ କରିବ ଓ ଲୋକଙ୍କ ଜୀବନ ସହଜ ହେବ । କାଗଜକାମ, ନକଲ, ତଥ୍ୟ ସଂଗ୍ରହ ଜନିତ ଜଞ୍ଜାଳରୁ ନିବେଶକ ଓ ଉଦ୍ୟୋଗୀ ତ୍ରାହି ପାଇବେ । ‘ଉଇଣ୍ଡୋ ଉଇଦିନ ଉଇଣ୍ଡୋ’ ବ୍ୟବସ୍ଥାରେ ସେମାନଙ୍କୁ ସବୁ ସୁବିଧା ସହଜରେ ମିଳିବ ।

ମନ୍ତ୍ରୀ ଶ୍ରୀ ଗୋୟେଲ କହିଛନ୍ତି ଯେ ପ୍ରଧାନମନ୍ତ୍ରୀଙ୍କ ନିର୍ଣ୍ଣାୟକ ଓ ଦୃଢ ନେତ୍ୱତ୍ୱ ଭାରତୀୟମାନଙ୍କୁ ବଡ ବଡ ସ୍ୱପ୍ନ ଦେଖିବାକୁ ସମର୍ଥ ଓ ଉତ୍ସାହିତ କରିଛି । ତାଙ୍କ ଦୂରଦୃଷ୍ଟି ବା ଭିଜନ ଆମ ପାଇଁ ରାଷ୍ଟ୍ରବିକାଶର ମିଶନରେ ପରିଣତ ହୋଇଛି । ଜାତୀୟସ୍ତରରେ ସରାକର ଓ ବିଜନେସ୍ ମଧ୍ୟରେ ଗୋଟିଏ ଇଣ୍ଟରଫେସ ସ୍ଥାପନର ଆବଶ୍ୟକତା ଅନେକ ଦିନରୁ ଅନୁଭୂତ ହେଉଥିଲା । ଆଜି ତାହା ସାକାର ହୋଇଛି । ଏହା କୋଟି କୋଟି ନାଗରିକଙ୍କ ପାଇଁ ସୁଖ ସମୃଦ୍ଧି ଆଣିବ ।

ସେ କହିଛନ୍ତି ଯେ ଏହି ୱିଣ୍ଡୋ ପୋର୍ଟାଲ ନିବେଶକଙ୍କ ପାଇଁ ଅନୁମୋଦନ ଓ ପଞ୍ଜୀକରଣର ୱାନ-ଷ୍ଟପ୍‌‌-ସପ୍ ଭାବେ କାର୍ଯ୍ୟ କରିବ । ସେମାନଙ୍କୁ ବିଭିନ୍ନ ସ୍ଥାନକୁ ଆଉ ଦୌଡିବାକୁ ପଡିବ ନାହିଁ ଓ ଏହି ଗୋଟିଏ ମାଧ୍ୟମରେ ଗୋଟିଏ ସ୍ଥାନରେ ସେମାନେ ନିଜର ସବୁ କାମ ସହଜରେ କରିପାରିବେ ।

ଆଜି ସୁଦ୍ଧା ଏହି ପୋର୍ଟାଲ ୧୮ଟି କେନ୍ଦ୍ରୀୟ ବିଭାଗ ଓ ନ’ଟି ରାଜ୍ୟଙ୍କ ଅନୁମୋଦନ ଲାଭ କରିଛି । ୨୦୨୧ ଡିସେମ୍ବର ସୁଦ୍ଧା ଏଥିରେ ଆଉ ୧୪ଟି କେନ୍ଦ୍ରୀୟ ବିଭାଗ ଓ ପାଂଚ ରାଜ୍ୟ ସାମିଲ ହେବେ । କମ୍ପ୍ୟୁଟର ମାଉସ୍ କ୍ଲିକ କରି ‘ଏଣ୍ଡ ଟୁ ଏଣ୍ଡ’ ସୁବିଧାରେ ସବୁ କାମ ସହଜରେ ହୋଇପାରିବ ।

 ସେ ଆହୁରି କହିଛନ୍ତି ଯେ ଏହା ଦ୍ୱାରା କାର୍ଯ୍ୟରେ ସ୍ୱଚ୍ଛତା, ପାରଦର୍ଶିତା, ଦାୟିତ୍ୱବୋଧ ଓ ସମ୍ବେଦନଶୀଳତା ଆସିବ ଏବଂ ବ୍ୟବସ୍ଥା ଅଧିକ କ୍ରିୟାଶୀଳ ହୋଇ ଏକ ଉତ୍ତମ ପରିବେଶ ସୃଷ୍ଟି ହେବ । ସମସ୍ତ ପ୍ରକାର ସୂଚନା ଓ ସହାୟତା ସେବା ଗୋଟିଏ ସିଙ୍ଗଲ୍ ଡ୍ୟାଶ ବୋର୍ଡରୁ ମିଳିବ । ନିବେଶକଙ୍କ ପ୍ରଶ୍ନର ଉତ୍ତର ଦେବାକୁ ଏକ ଆପ୍ଲିକାଣ୍ଟ ଡ୍ୟାଶ ବୋର୍ଡ ରହିବ । ଏହା ମାଧ୍ୟମରେ ନିବେଶକ ନିଜର ଆବେଦନ, ଏହାର ସ୍ଥିତି ଜାଣିପାରିବା ସହିତ ବିଭିନ୍ନ ପ୍ରଶ୍ନର ଉତ୍ତର ପାଇପାରିବେ ।

ଏଥିରେ କେୱାଇଏ, କମନ ରେଜିଷ୍ଟ୍ରେସନ, ଷ୍ଟେଟ ରେଜିଷ୍ଟ୍ରେସନ ଫର୍ମ, ଡକୁମେଣ୍ଟ ରିପୋଜିଟରୀ ଓ ଇ-କମ୍ୟୁନିକେଶନ ସୁବିଧା ଉପଲବ୍ଧ ।

ଶ୍ରୀ ଗୋୟେଲ କହିଛନ୍ତି ଯେ ଭାରତ ଏବେ ଏକ ବଡ ଆର୍ଥିକ ଶକ୍ତି ଭାବେ ଆତ୍ମପ୍ରକାଶ କରୁଛି ଏବଂ ଏଥିପାଇଁ ସମଗ୍ର ବିଶ୍ୱର ଦୃଷ୍ଟି ଏହା ଉପରେ ରହିଛି । ଚଳିତ ଆର୍ଥିକ ବର୍ଷର ପ୍ରଥମ ତ୍ରୈମାସିକରେ ଭାରତ ଅର୍ଥନୀତି ୨୦% ଅଧିକ ଅଭିବୃଦ୍ଧି ହାସଲ କରିଛି ।

ଗତବର୍ଷ ଅଗଷ୍ଟ ତୁଳନାରେ ଚଳିତବର୍ଷ ଅଗଷ୍ଟରେ ଦେଶର ରପ୍ତାନୀ ୪୫.୪୭% ବଢିଛି । ଚଳିତ ଆର୍ଥିକ ବର୍ଷର ପ୍ରଥମ ତିନିମାସରେ ୨୨.୫୩ ବିଲିୟନ ଡଲାର ବିଦେଶୀ ପୁଞ୍ଜିନିବେଶ ଦେଶରେ ହୋଇଛି । ୨୦୨୦ରେ ଦେଶରେ ମୋଟ ୮୧.୭୨ ବିଲିୟନ ଡଲାର ଏଫଡିଆଇ ନିବେଶ ହୋଇଥିଲା । ଜିଆଇଆଇ ତାଲିକାରେ ଭାରତ ଏବେ ୪୬ ସ୍ଥାନରେ ପହଞ୍ଚିଛି । ଗତ ଛ’ବର୍ଷ ମଧ୍ୟରେ ଭାରତ ଏ କ୍ଷେତ୍ରରେ ୩୫ ପାହାଚ ଉପରକୁ ଉଠିଛି ।

ଶ୍ରୀ ଗୋୟେଲ କହିଛନ୍ତି ଯେ ଦ୍ରୁତ ଅର୍ଥନୈତିକ ବିକାଶ ସହିତ ଭାରତଏବେ ବିତ୍ତୀୟଧାରାକୁ ଫେରିଛି ଏବଂ ବିଶ୍ୱର ଅନ୍ୟତମ ଅତି ଦ୍ରୁତ ବିକାଶଶୀଳ ଅର୍ଥନୀତିର ମାନ୍ୟତା ହାସଲ କରିଛି । ‌ଗତ ସାତବର୍ଷ ଧରି ସରକାର ରେଉଁ ରାଷ୍ଟ୍ର ନିର୍ମାଣ ପ୍ରକ୍ରିୟା ଜାରି ରଖିଛନ୍ତି ଏହା ତାହାର ଫଳ । ମେକ୍ ଇନ୍ ଇଣ୍ଡିଆ,ଷ୍ଟାର୍ଟଅପ ଇଣ୍ଡିଆ ଓ ପିଏଲଆଇ ଭଳି ଯେଉଁସବୁ ଯୋଜନା କାର୍ଯ୍ୟକାରୀ ହେଉଛି ଏନ୍‌ଏସ୍ ଡବ୍ଲୁଏସ ତାହାକୁ ବଳଯୋଗାଇବ ବୋଲି ସେ କହିଛନ୍ତି ।

ଏଠାରେ ସୂଚନାଯୋଗ୍ୟ ଯେ, ସରକାର ଦେଶର ବ୍ୟବସାୟ ବାତାବରଣରେ ଉନ୍ନତି ଆଣିବାକୁ ବିଶେଷ ଗୁରୁତ୍ୱ ଦେଇ କାର୍ଯ୍ୟ କରୁଛନ୍ତି । ସେଥିରେ ମେକ୍ ଇନ୍ ଇଣ୍ଡିଆ, ମେକ୍ ଫରି ଦ ୱାଲ୍ଡ କାର୍ଯ୍ୟକ୍ରମ ଅଗ୍ରାଧିକାର ପାଇଛି । ଏହାକୁ ଚରିତାର୍ଥ କରିବା ପାଇଁ ସରକାର ନିକଟରେ ପିଏଲଆଇ ଓ ଇଣ୍ଡିଆ ଇଣ୍ଡଷ୍ଟ୍ରିଆଲ ଲ୍ୟାଣ୍ଡ ବ୍ୟାଙ୍କ ସିଷ୍ଟମ ପ୍ରବର୍ତ୍ତନ କରିଛନ୍ତି । ମୋଟ ୧୩ଟି କ୍ଷେତ୍ର ପାଇଁ ଉତ୍ପାଦନଭିତ୍ତିକ ପ୍ରୋତ୍ସାହନ ନୀତି (ପିଏଲ୍‌ଆଇ) ଘୋଷଣା କରାଯାଇଛି । ଆତ୍ମନିର୍ଭାର ଭାରତ କାର୍ଯ୍ୟକ୍ରମରେ ବିଶ୍ୱସ୍ତରୀୟ ମାନୁଫ୍ୟାକଚରିଂ ଚମ୍ପିୟନ ସୃଷ୍ଟି କରିବାକୁ ଏହି ଯୋଜନାରେ ୨୭ବିଲିୟନ ଡଲାର ବ୍ୟୟବରାଦ ହୋଇଛି । କେନ୍ଦ୍ରୀୟ ବଜେଟରେ ଅର୍ଥମନ୍ତ୍ରୀ ଏସବୁ ପ୍ରସ୍ତାବ ରଖି ସେଥିପାଇଁ ବ୍ୟୟବରାଦ କରିଛନ୍ତି । ସିଙ୍ଗଲ ଉଇଣ୍ଡୋ ସିଷ୍ଟମ ସେଥିମଧ୍ୟରୁ  ଅନ୍ୟତମ ।

ଏହି ସିଙ୍ଗଲ ଉଇଣ୍ଡୋ ବ୍ୟବସ୍ଥାରେ ଗୋଟିଏ ସ୍ଥାନର ସବୁ ସୂଚନାକୁ ଏକାଠି କରି ହିତାଧିକାରୀଙ୍କୁ ଯୋଗାଇବା, ତଥ୍ୟଜନିତ ନକଲ ଓ ଭ୍ରାନ୍ତି ଦୂର କରିବା, ଆବେଦନର ସ୍ଥିତି ଅନୁଧ୍ୟାନ ଏବଂ ଠିକ୍ ସମୟରେ ଅନୁମତି ଓ ପଞ୍ଜୀକରଣ କରାଇବା ଆଦି ସୁବିଧା ଉପଲବ୍ଧ । ବିଭିନ୍ନ କେନ୍ଦ୍ରୀୟ ବିଭାଗ ଏବଂ ରାଜ୍ୟ ସରକାରଙ୍କ ସହ ବ୍ୟାପକ ବିଚାରବିମର୍ଶ ପରେ ଏହା ପ୍ରସ୍ତୁତ ହୋଇଛି । ସେହିଭଳି ଏ କ୍ଷେତ୍ରରେ ମଧ୍ୟ ଉଦ୍ୟୋଗ ସଂଘ, ପେସାଦାର ସଂଗଠନ ଓ ଲିଗାଲ ଫାର୍ମଗୁଡିକ ସହ ପରାମର୍ଶ କରାଯାଇ ସେମାନଙ୍କ ପ୍ରସ୍ତାବକୁ ଅନ୍ତର୍ଭୁକ୍ତ କରାଯାଇଛି ।

 ସବୁ ସମ୍ପୃକ୍ତ ପକ୍ଷଙ୍କ ସହଯୋଗରେ ଏହା ପ୍ରସ୍ତୁତ ହୋଇଥିବାବେଳେ ଏହାର ଡିଜାଇନ କରିଛି ଇନଭେଣ୍ଟଇଣ୍ଡିଆ। ସବୁ ମନ୍ତ୍ରଣାଳୟ ଓ ରାଜ୍ୟ ସରକାରଙ୍କ ପାଇଁ ଉପଯୁକ୍ତ ଓ ସହଜ ହେଉଥିବା ଟେକ୍ନୋଲୋଜି ଏଥିରେ ବ୍ୟବହାର କରାଯାଇଛି ।

*****

NS / SLP