সেপ্তেম্বর থা মনুংদা লৈবাক অসিগী অঙাংশিং, অহলশিং, মীরোল্লিবী নুপী অমসুং অঙাংগী মবুক পীথক্লিবা মমাশিংদা চিঞ্জাক হেন্না ফগৎহন্নবা অমসুং চিঞ্জাক ৱাৎপগী থেংনরিবা অৱাবা অসি মিসন মোদ অমা ওইনা কোহন্নবা প্রধান মন্ত্রী নরেন্দ্র মোদীনা য়াম্না কন্না হায়দুনা ‘পোশন মা’ অসি পাংথোক্লি। লোয়ননা, লৈবাকপোকপা নুমিৎতা গুৱাহাতিগী, রিজনেল আউতরিচ ব্যুরোনা ‘পোশন আভিয়ান’দা ৱেবিনার শিনখ্রে হায়রিবা অসিদা চিঞ্জাক্কী মরুওইবগী ৱা খন্নখ্রে। ৱেবিনারগী থীম অসি ‘পোশন অভিয়ান -  ন্যুত্রিসন এন্দ ইম্ম্যুনিতী এমোঙ ৱুমেন এন্দ চাইল্দ’ ওইখি।

গুৱাহাতিগী, আর.বি.ও., দিপুতী দাইরেক্তর, শ্রী অরিজিৎ চক্রবোর্তীগী মহাক্কী ৱা ঙাংবদা মতৌ করম্না পোশন অভিয়ান্না লাক্লিবা চহি অহুম অসিদা মতিক চানা চিঞ্জাক্কী অৱাৎপা হন্থহন্নবা হোৎনরিবগে হায়বা উৎখি। মহাক্না পাউদমখি মদুদি মিসন অসিগী মরুওইবা পান্দমদি লৈবাক অসিদা ২০২২ ফাওবগী মনুংদা চিঞ্জাক ফংদবগী থাক্তা লৈরিবা অসি হন্থহনবা অমসুং চিঞ্জাক্কী লৈরিবা ফিভম অসি ফগৎবনবা অসিনি।   

ক্লিনিকেল অমসুং স্পোর্তস ন্যুত্রিসনিস্ত, এম.বি.বি.এস., দাঃ পুজা জয়স্বলনা হায় মদুদি চিঞ্জাক অসি হকচাং ফনা অমসুং নুঙাই য়াইফনা লৈনবগীদমক পুন্সিগী তাঙ্কক খুদিংদা য়াম্না মরু ওই। মহাক্না পোশন অভিয়ান অসি চিঞ্জাক ৱাৎপগী লাইফ সাইকলদা থেংনরিবা অৱাবশিং অসি কোক্নবা প্রোমামেতিক ওইনা চংশিনবা অমনি হায়না খন্নখি। মহাক্না অখন্ননা মীরোল্লিবী নুপীগী বেলেন্স দাইত্তা মরুওইবা পীখি। মহাক্না মমা ওইবিশিংনা মতিক চানা চাগদবা প্রোতিন য়াওবা দাইত্তা মরুওইবা পীখি অমসুং মীরোল্লিঙৈ মতমদা এনেমিয়াদগী ঙাকথোক্নবা অফবা চিঞ্জাক্কী তঙাইফদবশিংগী মরমদা পার্তিসিপেন্তশিংদা পাউদমখি।   

আসমগী পোশন অভিয়ানগী, এস.পি.এম.য়ু.গী, কন্সলতেন্ত শ্রীমতি রোনিকা দেবর্শিনা মতৌ করম্না পোশন অভিয়ান্না অঙাংশিং, অহলশিং, মীরোল্লিবী নুপী অমসুং অঙাংগী মবুক পীথক্লিবা মমাশিংদা চিঞ্জাক হেন্না ফগৎহন্নবা ভারতকী মরুওইবা স্কীম অমা ওইনা মিৎয়েং থম্লি হায়বা উৎখি। মহাক্না রাজ্য অসিদা পোশন অভিয়ান পাংথোক্লিবা থবক কয়া অমা  অমসুং পোশন মা মনুংদা লৌখৎলিবা অখন্নবা থবকশিং উৎখি।

শ্রীমতি দবল্যু. পান্থোবি সিংহানা ৱেবিনার অসিবু য়েংশিনখি অমসুং শম্লপ্পা অমা পীখি অমসুং পি.আই.বি.গী, এম.সি.ও. শ্রীমতি স্মিতা সাইকিয়ানা ৱাঙাংলোইশিং অমসুং শরুক য়ারিবা পার্তিসিপেন্তশিংদা ভোত ওফ থেঙ্কস পীবগা লোয়ননা ৱেবিনার অসিগী লোইশিনবগী ৱা ঙাংখি। মফম অসিগী অঙ্গনৱাদি ৱার্কর অমসুং ইনফোর্মেসন অমসুং ব্রোদকাস্তিং মিনিস্ত্রীগী ওফিসিএলশিংনা ৱেবিনার অসিদা শরুক য়াখি। 

*****