પ્રધાનમંત્રી શ્રી નરેન્દ્ર મોદી વર્ચ્યુઅલ માધ્યમથી 9 સપ્ટેમ્બર, 2021ના ​​રોજ 13મા બ્રિક્સ (બ્રાઝિલ, રશિયા, ચીન, ભારત અને દક્ષિણ આફ્રિકા) શિખર સંમેલનની અધ્યક્ષતા કરશે. ઉલ્લેખનીય છે કે ભારત વર્ષ 2021માં બ્રિક્સની અધ્યક્ષતા કરી રહ્યું છે. આ બેઠકમાં બ્રાઝિલના રાષ્ટ્રપતિ મહામહિમ શ્રી જાઈર બોલ્સોનારો; રશિયાના રાષ્ટ્રપતિ મહામહિમ શ્રી વ્લાદિમીર પુતિન; ચીનના રાષ્ટ્રપતિ મહામહિમ શ્રી શી જિનપિંગ; અને દક્ષિણ આફ્રિકાના રાષ્ટ્રપતિ મહામહિમ શ્રી સાઈરિલ રામાફોસા ઉપસ્થિત રહેશે. ભારતના રાષ્ટ્રીય સુરક્ષા સલાહકાર શ્રી અજીત ડોવાલ, ન્યૂ ડેવલપમેંટ બેંકના અધ્યક્ષ શ્રી માર્કોસ ટ્રોયજો, બ્રિક્સ બિઝનેસ કાઉન્સિલના અસ્થાયી અધ્યક્ષ શ્રી ઓંકાર કંવર અને બ્રિક્સ મહિલા બિઝનેસ એલાયન્સના અસ્થાયી અધ્યક્ષ ડૉ. સંગીતા રેડ્ડી આ અવસર પર શિખર સંમેલનમાં ઉપસ્થિત રાજાધ્યક્ષોની સામે પોત-પોતાની જવાબદારીઓ હેઠળ વર્ષ દરમિયાન કરવામાં આવેલા કાર્યોની વિગતો પ્રસ્તુત કરશે.

સમિટની થીમ 'બ્રિક્સ@15: સાતત્ય, એકત્રીકરણ અને સર્વસંમતિ માટે ઇન્ટ્રા-બ્રિક્સ સહયોગ' છે. ભારતે તેની અધ્યક્ષતા માટે ચાર પ્રાથમિકતા ધરાવતા ક્ષેત્રોની રૂપરેખા આપી હતી. આ ચાર ક્ષેત્રોમાં બહુપક્ષીય પ્રણાલીમાં સુધારો, આતંકવાદ વિરોધી, SDGs હાંસલ કરવા માટે ડિજિટલ અને ટેકનોલોજીકલ સાધનોનો ઉપયોગ અને લોકો વચ્ચે લોકોના આદાનપ્રદાનમાં વધારાનો સમાવેશ થાય છે. આ વિસ્તારો ઉપરાંત, નેતાઓ કોવિડ-19 રોગચાળાની અસર અને અન્ય વર્તમાન વૈશ્વિક અને પ્રાદેશિક મુદ્દાઓ પર પણ મંતવ્યોનું આદાન-પ્રદાન કરશે.

પ્રધાનમંત્રી શ્રી નરેન્દ્ર મોદી બીજી વખત બ્રિક્સ શિખર સંમેલનની અધ્યક્ષતા કરશે. અગાઉ તેમણે 2016માં ગોવા સમિટની અધ્યક્ષતા કરી હતી. આ વર્ષે ભારત બ્રિક્સની અધ્યક્ષતા એવા સમયે કરી રહ્યું છે જ્યારે બ્રિક્સનું 15મુ સ્થાપના વર્ષ ઉજવવામાં આવી રહ્યું છે. આ સમિટની થીમમાં પણ પ્રતિબિંબિત થાય છે.  

SD/GP/BT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com