नवी दिल्‍ली, 23 ऑगस्‍ट 2021

भारत सरकारच्या विज्ञान आणि तंत्रज्ञान मंत्रालयातील जैवतंत्रज्ञान विभाग क्षयरोगाच्या रुग्णांवर गंभीर कोविड -19 संसर्गाचा होणारा परिणाम अभ्यासण्यासाठी ब्रिक्स देशांसोबत सहकार्याने सार्स-कोव्ही-1 एनजीएस-ब्रिक्स संघ तसेच बहुकेंद्रित कार्यक्रमाची अंमलबजावणी करत आहे.  

सार्स-कोव्ही-1 एनजीएस-ब्रिक्स संघ म्हणजे कोविड-19 बाधितांच्या आरोग्याशी संबंधित अधिक ज्ञान मिळविण्यासाठी आणि आरोग्यविषयक परिणामांमध्ये सुधारणांसाठी योगदान देण्याच्या हेतूने सुरु करण्यात आलेला एक आंतर-शाखीय सहकार्य उपक्रम आहे. हा संघ, अत्यंत आधुनिक जनुकीय तंत्रज्ञान तसेच साथरोग विषयक व जैवमाहितीविषयक साधने वापरून भविष्यात रोगनिदान आणि कोविड-19 तसेच इतर विषाणूंच्या संसर्गाचा माग ठेवण्यासाठी वैद्यकीय तसेच सार्वजनिक आरोग्यविषयक संशोधन आणि वैद्यकीय तसेच संसर्ग शोधासाठी घेतलेले नमुने यांच्याबाबतचे हस्तक्षेप यांच्या संदर्भातील जनुकीय माहितीचे भाषांतर वेगाने होण्यास  मदत करेल. यामध्ये सहभागी झालेल्या भारतीय संघाकडून  राष्ट्रीय जैववैद्यकीय जनुकीय तंत्रज्ञान संस्था (प्रा.अरिंदम मैत्रा, प्रा.सौमित्र दास,डॉ.निधान विश्वास),डीएनए अंगुलीचिन्हे आणि निदान केंद्र (डॉ.अश्विन दलाल)  आणि भारतीय विज्ञान संस्था (डॉ.मोहित के.जॉली) यांच्यासह ब्राझीलची  राष्ट्रीय वैज्ञानिक आकडेमोड प्रयोगशाळा -एलएनसीसी/ एमसटीआय (डॉ.अना तेरेझा रिबेरो दे वास्कोन्सेलोस), रशियाची स्कोलकोव्हो विज्ञान आणि तंत्रज्ञान संस्था (प्रा.जॉर्जी ब्राझीकीन),चीनतर्फे बीजिंग जनुकीय संस्था, चीन विज्ञान अकादमी (प्रा.मिंगकुन ली) आणि दक्षिण आफ्रिकेकडून क्वाझुलू-नताल विद्यापीठ (प्रा. तुलिओ दे ओलीव्हीएरा) यांचा या उपक्रमात समावेश असेल.

दुसऱ्या बहुकेंद्रित कार्यक्रमात भारत,ब्राझील आणि दक्षिण आफ्रिका यांच्या संशोधकांचा आंतर-शाखीय संघ गंभीर स्वरूपाच्या कोविड-19 संसर्गाच्या क्षयरोगाने बाधित रुग्णांवर होणाऱ्या परिणामांचा साथरोग आणि सहव्याधी दृष्टीकोनातून अभ्यास करणार आहे.

हा सहकार्यात्मक अभ्यास फुफुसांचा क्षयरोग झालेल्या आणि कोविड-19 संसर्ग झालेल्या अथवा न झालेल्या रुग्णांबाबत सह्व्याधीविषयक मौल्यवान माहिती पुरवेल आणि या रोगांच्या अधिक उत्तम व्यवस्थापनासाठी ती उपयुक्त ठरेल.

जैवतंत्रज्ञान विभागाचे सचिव डॉ.रेणू स्वरूप यांनी सांगितले की विभागाने ब्रिक्स देशांशी या विषयाच्या अभ्यासाबाबत भागीदारी करून योग्य दिशेने छोटी पावले उचलली आहेत. ब्रिक्स भागीदारी कार्यक्रमाचा खर्च उचलण्याच्या दिशेने विभाग नियोजन करीत आहे असेदेखील त्यांनी सांगितले.

अधिक माहितीसाठी डॉ.अरिंदम मैत्रा (ईमेल: am1@nibmg.ac.in) आणि डॉ.सुभाष बाबू (ईमेल: sbabu@nirt.res.in) यांच्याशी संपर्क साधावा.

ब्रिक्स एसटीआयआराखडा कार्यक्रमाविषयी अधिक माहिती जाणून घेण्यासाठी http://brics-sti.org या संकेतस्थळाला भेट द्या. 
 

* * *

S.Patil/S.Chitnis/D.Rane

सोशल मिडियावर आम्हाला फॉलो करा: @PIBMumbai    /PIBMumbai    /pibmumbai  pibmumbai[at]gmail[dot]com