খুরুমজরি!

থৌরম অসিদা ঐখোয়দা থৌজাল পীবীরিবা ইকাই খুম্নরবা বাবা সাহেব পুরন্দরে, বাবা সাহেন সতকার সমারোহ সমিতিগী প্রসিদেন্ত সুমিত্রা তাই অমসুং শিবশহীদা থাজবা থম্লিবা বাবা সাহেবকী তুংইল্লিবা মীওইশিং!

শিব শাহীর বাবা সাহেব পুরন্দরেবু অহৌবদগী ইকাই খুম্নবা উৎচরি অমসুং ছত্রপতী শিবাজী মহারাজনা তাকপীরম্বা লম্বেলশিংদা চৎপা ঙমজনবা পাঙ্গল হাপীনবা ঐহাক্না ঈশ্বরদা থৌনীজরি।

ঐহাক্না ইকাই খুম্নরবা বাবা সাহেব পুরন্দরেজীনা মহাক্কী পুন্সিগী চহি চামা শুরকপা অসিদা য়াইফ-পাউজেল পীজরি। ঐখোয়না হৌজিক ফাওবদা ফংলিবা মহাক্কী লমজিং-লমতাক, মহাক্কী থৌজালশিং অসিগুম্না মখা তানা মতম শাংনা ফংজবা ওইজগে হায়না ঐহাক্না থৌনিজরি। অখন্নবা থৌরম অসিগীদমক্তা ঐহাক্না ইকাই খুম্নরবা সুমিত্রা তাইবুসু থাগৎপা ফোঙদোকচরি। অসিগুম্বা য়াইফরবা থৌরম অসিদা বাবা সাহেবকী থৌজাল ফংজনবা, মহাক্কী তুংইল্লিবা নখোয় ময়ামগা মরক্তা য়াওবগী ঐহাক্না খুদোংচাবা অসি ফংজবদা নুংঙাইবা পোকই। য়াইজবা থৌরম অসিদা ঐহাক্না লৈবাক শিনবা থুংবদা লৈরিবা বাবা সাহেবকী তুংইল্লিবা কয়াদা থাগৎপা ফোঙদোকচরি।

মরূপশিং,

পুন্সি শাংনা হিংনবা থৌনিজবা হায়বা অসি মীওইবা খুন্নাইগী খ্বাইদগী অথোইবা অমসুং অফবা ৱাখল্লোনশিংগী মরক্তা অমা ওইরি। ঐখোয়গী বেদাশিংদা ঋষিশিংনা চহি চামা হেন্না পুন্সিখি, ঐখোয়গী ঋষিশিংনা অসুম্না হায়রমখি -

জীবম শারদ শতম।।

 বুদ্ধেম শারদ শতম।।

 রোহেম শারদ শতম।।

হায়বদি, ঐখোয়না চহি চামা হিংসি, চহি চামগী খনসি, অমসুং চহি চামা মাংদা চংশিনসি। বাবা সাহেব পুরন্দরেগী পুন্সিদা শেম্বীবা মপুগী অমত্তা ওইনা তিন্ননবা হোৎনরিবা মীওইশিংগী অথোইবা ৱাখল্লোন অসি য়াওরি। অরানবা তৌরুবগী মশানা মশাবু চৈরাক পীজবা মতমদা কনাগুম্বনা মাগী পুন্সিদা তিন্ননবা ৱাখল্লোন পোকই, থাজবা কয়া মশাদা পোকচবা হৌরকই।   বাবা সাহেবনা মহাক্কী পুন্সিগী চহি চামা শুরকপা অসিদা লৈবাক অসিনা নীংখা তমখিবগী চহি ৭৫ শুরকপা অসিগা পুন্না তামিন্নরি। মান্ননা তামিন্নরিবা অসি মহাক্না মশাবু চৈরাক পীজবা অসিদা ইমা ভারতনা অপেনবা পোক্তুনা মহাক্না হকথেংননা থৌজাল পীরি হায়না বাবা সাহেব মশামক্না শোইদনা ফাওরমগনি হায়না ঐহাক্না থাজৈ।

ইচিল-ইনাওশিং,

নীংখা তমখিবগী চহি ৭৫ শুরকপা অসিগীদমক ঐখোয়দা ইথিল পীরিবা অতোপ্পা মান্ননা তামিন্নরিবা অমসু লৈ। আজাদী কা অমৃত মহোৎসবদা য়াওরিবা ৱাখল্লোন অসি অদোম্না শোইদনা খঙলম্লগনি, লৈবাক অসিনা নীংতম লান্মীশিং অমসুং ওমর ওইরবা আত্মাশিংগী পুৱারী ইনবা কেম্পেন অমা হৌখি।  বাবা সাহেব পুরন্দরেনা দিকেদ কয়া অফবা থবক অসি তৌদুনা লাক্লি। মহাক্কী পুন্সি অসি মিসন অসিগীদমক কত্থোক্তুনা লাকখি। মহাক্না শিবাজী মহারাজকী পুন্সি, মহাক্কী পুৱারী অসি মীয়ামদা খঙনবা চাউনা থৌদাং লৌখিবগীদমক্তা ঐখোয়না মহাক্কী লমন তোনশিল্লগনি। ২০১৯দা লৈবাক অসিনা মঙোন্দা ‘পদ্ম বিভুশন’গী মনা পীখি, অমরোমদা ২০১৫দা মতম অদুগী মহারাস্ত্রগী সরকারনা মঙোন্দা ‘মহারাস্ত্র ভুশন পুরস্কার’সু পীখি। মধ্য প্রদেশতসু শিবারজজীগী সরকারনা ‘ছত্রপতি শিবাজী’গী অথোইবা ভক্তা অসিদা কালিদাস পুরস্কার পীদুনা ইকাই খুম্নবা উৎখি।

মরূপশিং,

বাবা সাহেন পুরন্দরেজূনা ছত্রপতি শিবাজী মহারাজকী ভক্তা ওইরিবা অসি ইচম চম্না ওইখিবা নত্তে! শিবাজী মহারাজ, ভারতকী পুৱারীগী অথোইবা - মীওইববুদি ওইরি, অদুবু হৌজিক লৈরিবা মওং অসি মহাক্কী অমর ওইরবা মতম অদুনা ইথিলসু পীরি। করিগুম্বা শিবাজী মহারাজ অসি লৈরমদবা তারবদি ঐখোয়গী হৌখিবা মতম, ঐখোয়গী হৌজিক অমসুং ঐখোয়গী তুংলমচৎ অসি করম্না তৌরমগনি? হায়বা অসি অচৌবা ৱাংহং অমা ওইরি। ছত্রপতি শিবাজী মহারাজ য়াওদনা ভারতকী মাই পাকপা অসি করম তৌরমগনি হায়বা অসি খনবদা অৱাবা ওই। মতম অদুদা ছত্রপতিনা শিবাজীনা লৌখিবা থৌদাং অদুগা চপ মান্নবা থৌদাং অসি মহাকপু তুংইল্লিবশিং, মহাক্কী ঋষিশিংনা লেপ্তনা লৌরি। শিবাজী মহারাজকী ‘হিন্দবী স্বরাজ; অসি লম্বা লৈত্রবা অফবা লৈঙাক্কী, শোত্থরবা অমসুং খুদোংচাবা ফংদ্রবশিংদা ৱায়েল পীবগী অমসুং লোইলম লৈঙাক্কী মায়োক্তা হৌবা ইহৌগী খুদম অমনি। অথৌবা শিবাজীগী মেনেজমেন্ত, লৈবাক্কী সমুদ্রগী ওইবা শক্তি শীজিন্নবা, নেভীগী কান্নবা, ৱাতর মেনেজমেন্ত অসিগুম্বা হীরম কয়া অসি ঙসি ফাওবা শীংথানরি। অমসুং শিবাজী মহারাজকী শক্লোন্দা নীংখা তম্বা ভারত্তা অনৌ চারোন পুরকপগী মনা বাবা সাহেবতা পীফম থোকই।

মহাক্না ইরম্বশিং অমসুং মহাক্কী লাইরিকশিংদা মহাক্না শিবাজী মহারাজতা লেংদ্রবা থাজবা থম্মি হায়বগী খুদম ফংই।

শিবাজী মহারাজকা মরী লৈননা বাবা সাহেব পুরন্দরেগী ৱারী লিবগী মওং, মহাক্কী ৱাহৈশিং অসিনা ঐখোয়গী ৱাখলগী লাইশঙদা শিবাজী মহারাজপু হিংগৎহল্লি। দিকেদ মরিগী মমাংদা অহমদাবাদতা পাঙথোকখিবা অদোমগী প্রোগ্রাম অদু ঐহাক্না য়াম্না মুন্না নীংশিংলি অমসুং ঐহাক্না মদু চাং নাইনা য়াওখি।

 বাবাসাহেবনা মতম পুম্বদা নহাশিংদা ইথিল পীবগা লোইননা অশেং মশক অমদা পুৱারী খংহন্নবা কন্না হোৎনরি। মসিগী বেলেন্স অসি ঙসিগী লৈবাক অসিগী পুৱারীদা য়াম্না মরু ওইরি। মহাক্কী ইকাই খুম্নবা অমসুং মঙোন্দা য়াওরিবা সহিত্যগী ঞ্জান অসিনা লাক্কদবা পুৱারীদা অপনবা পীদে। লৈবাক অসিগী নহা ওইরিবা হিস্তরিয়নশিংদা ঐহাক্না হায়জনীংবদি নখোয়না নিংতম্বগী অমৃত মহোসবতা নিংতম্বগী পুৱারী ইবা মতমদা মসিগী ইথিল অমসুং ওথেন্তিসিতী অসি নখোয়গী ৱাখল্লোন্দা খনগদবনি।  

মরূপশিং,

বাবাসাহেব পুরন্দরেগী হোৎনখিবশিং অসি মহাক্না পুৱারী খংনবা খক্তা নত্তে। মহাক্না মহাক্কী পুন্সিদা কত্থোকপগা লোইননা শিবাজী মহারাজগুম্না হিংনবনা হোৎনরি। মহাক্না পুৱারীগা লোইননা হৌজিক্কী মতমগীসু খল্লি।

গোৱা লিবরেসব ইহৌদগী দাদ্রা-নগর হবেলী ফাওবদা মহাক্না লৌখিবা থৌদাং অসি ঐখোয় পুম্নমক্কী ফীদমনীংঙাই ওইরবা অমা ওইখি। মহাক্কী ইমুং-মনুংসু লেপ্পা লৈতনা সোসিএল ৱর্ক অমসুং ম্যুজিকেল আর্তসতা কত্থোক্লি। অদোম্না শিব-সৃস্তী শেমগৎনবা হৌজিকসু কন্না হোৎনরি। লৈয়াক অসিগী মাংদা থম্না অদোম্না পুন্সি চুপ্পগী হোৎনরক্লিবা শিবাজী মহারাজগী ৱাখল্লোনশিং অসিনা চহি চা কয়া ঐখোয়দা ইনোৎ হাপ্পগনি।  

মসিগী থাজবা অসিগা লোইননা ঐহাক্না অদোমগী হকচাং ফনা লৈনবা মা ভাবানীগী খুয়া খাদা ঐহাক্না ইকোক নোন্না খুরুমজরী। অদোমগী অসিগুম্বা থৌজালশিং মখাতানা ফংবা ওইজগে, মসিগী য়াইফ-পাইজেল অসিগা লোইননা ঐহাক্কী ৱারোল অসি তেনশিনজরগে।

খুরুমজরী!

*****