نئی دہلی،  13/جولائی 2020 ۔ کیمیا و کھاد کے مرکزی وزیر جناب من سکھ منڈاویا نے کھاد کی پیداوار کے شعبے میں بھارت کو خودکفیل بنانے کے لئے محکمہ کھاد کی پہل کا آج جائزہ لیا۔ کیمیا و کھاد کے وزیر مملکت جناب بھگونت کھوبا بھی اس دوران موجود تھے۔ محکمہ کھاد کے سکریٹری جناب آر کے چترویدی اور وزارت کے دیگر سینئر افسران نے بھی اس میٹنگ میں حصہ لیا۔

جناب منڈاویا نے کہا کہ راماگنڈم پلانٹ کے شروع ہونے کے ساتھ ہی ملک میں 12.7 لاکھ میٹرک ٹن فی سال (ایل ایم ٹی پی اے) دیسی یوریا کی پیداوار شروع ہوگئی ہے اور اس سے یوریا کی پیداوار میں بھارت کو خودکفیل بنانے کے لئے وزیر اعظم نریندر مودی کے خواب کو حقیقت کی شکل دینے میں مدد ملے گی۔ اس پروجیکٹ سے نہ صرف کسانوں کو آسانی سے کھاد کی دستیابی بڑھے گی بلکہ ملک کے غذائی تحفظ کو یقینی بنانے کے علاوہ سڑکوں، ریلوے اور معاون صنعتوں وغیرہ جیسے بنیادی ڈھانچے کے فروغ سمیت ملک کی معیشت کو بڑھاوا ملے گا۔

وزیر موصوف نے یہ بھی بتایا کہ حکومت متبادل کھادوں کے استعمال کو فروغ دینے کے لئے بازار ترقیاتی تعاون (ایم ڈی اے) پالیسی کو نرم بنانے کا منصوبہ بنارہی ہے۔ اس سے قبل یہ پالیسی صرف شہری کھاد (کمپوسٹ) تک ہی محدود تھی۔ اس میں نامیاتی کچرے جیسے بایو گیس، گرین مینیور، دیہی علاقوں کے نامیاتی کھاد، ٹھوس/ سیال گھول وغیرہ کو شامل کرکے اس پالیسی کی توسیع کا مطالبہ کیا گیا ہے۔ یہ توسیع بھارت سرکار کی سوچھ بھارت مہم کی مکمل طور سے معاون ثابت ہوگی۔

کیمیا و کھاد کے وزیر کو بتایا گیا کہ درگاپور میں 12.7 لاکھ میٹرک ٹن کی صلاحیت والا میٹکس فرٹیلائزرس پلانٹ جلد ہی شروع ہوگا۔

******

م ن۔ م م۔ م ر

U-NO. 6506