প্রধান মন্ত্রী, শ্রী নরেন্দ্র মোদীনা ঙসি ‘দিজিতেল ইন্দিয়া’না হৌদোকখিবা চহি তরুক মপুং ফারকপগী থৌরমদা, ভিদিও কনফরেন্সকী খুত্থাংদা দিজিতেল ইন্দিয়াগী বেনিফিসরীশিংগা উন্নখ্রে। ইলেক্ত্রোনিক্স অমসুং আই.তি.গী কেন্দ্রগী মন্ত্রী শ্রী রবি শঙ্কর প্রসাদ অমসুং এজুকেসনগী এম.ও.এস. শ্রী সঞ্জয় শামরাও ধোত্রেসু থৌরম অসিদী শরুক য়াখি।

থৌরম অদুদা ৱা ঙাংলদুনা, প্রধান মন্ত্রীনা হায় ভারতনা অনৌবা পুথোকপা অমসুং অনৌবশিং অসি পুথোকপগী য়াম্না থুনা চুশিনবগী হৈনবী লৈবা অসি পামনরক্লে। দিজিতেল ইন্দিয়া অসি ভারতকী ওইনা পাম্বৈ অমনি। দিজিতেল ইন্দিয়া অসি অত্মানির্ভর ভারতকী খুলায় অমনি। দিজিতেল ইন্দিয়া অসি ২১শুবা সেঞ্চুরীগী ভারতনা য়াম্না লিংবা অমা উৎথোরক্লি। প্রধান মন্ত্রীনা মহাক্কী লাইৱা মিনিমম গবর্নমেন্ত মেক্সিমম গবর্নান্স অসি ফোংদোরক্লি অমসুং মতৌ করম্না দিজিতেল ইন্দিয়ানা মীচম প্রজাদা সরকারগী মীয়ামগগী মরক্তা, সিস্তেম অমসুং ফেসিলিতী, অৱাবা মায়োক্নবা অমসুং পাম্বৈ অমা থিবা অসি হন্থহন্দুনা শক্তি  লৈহল্লি। দিজিলোকরনা মতৌ করম্না মীওই মিলিয়ন কয়াদা মরুওইনা লায়চৎ মনুংদা মতেং পাংবগে হায়বা মহাক্না খুদম পীদুনা উৎখি। লৈবাক শিনবা থুংবা অসিগী স্কুলগী সর্তিফিকেতশিং, মেদিকেলগী চে-চাংশিং অমসুং অতৈ অরুবা সর্তিফিকেতশিং দিজিতেল ওইনা থম্মী। মহাক্না হায় মদুদি থবকশিং হায়বদি দ্রাবিং লাইসেন্স, বার্থ সর্তিফিকেত, ইলেক্ত্রিসিতীগী বিল থীবা, ঈশিংগী বিল থীবা, ইনকম তেক্স থীবা অসিনচিংবা অসি য়াম্না থুনা অমসুং কোম্না ফংহল্লি অমসুং খুঙ্গংশিংদা, ই কমন সর্বিস সেন্তরশিং (সি.এস.সি.)না মীয়ামদা মতেং পীরি। হায়রিবা দিজিতেল ইন্দিয়া অসিনা ৱান নেসন ৱান রাসন কার্দকী খোঙথাংশিং মপুং ফাহল্লি। মহাক্না সুপ্রীম কোর্ততা খোঙথাংশিং অসি মরী লৈনবা রাজ্য পুম্বদা হৌদোক্নবা খঙহল্লি।            

প্রধান মন্ত্রীনা বেনিফিসরীশিংগী পুন্সিদা দিজিতেল ইন্দিয়ানা অহোংবা অমা পুরক্লিবা অসিদা অপেনবা ফোংদোকখ্রে। মহাক্না স্বানিধি স্কীমগী কান্নবা অমসুং মশাগী ওইবা সেক্যুরিতীগী অৱাৎপা লৈরিবশিং স্বামিতভা স্কীমনা অৱাবা কোকহল্লিবা অসি পনখি। মহাক্না রিমোৎ মেদিসিনগী ই-সঞ্জিবিনি স্কীমগী মতাংদা পনখি অমসুং হায়রিবা অসি নেস্নেল দিজিতেল হেলথ মিসনগী মখাদা মপুং ফানা পাংথোকপা প্লেতফোর্ম অমনি হায়না খঙহনখি।

প্রধান মন্ত্রীনা হায় কোরোনা মনুংদা ভারতনা দিজিতেলগী পাম্বৈশিং শিজিন্নখিবা অসি খন্ননিঙাইনি অমসুং ঙসিদি মালেম পুম্বনা পুক্নিং চিংশিল্লি। মালেমগী ওইনা খ্বায়দগী চাওবা দিজিতেল কন্তেক্ত ত্রেসিং এপ, আরোগ্যা সেতু অসিনা কোরোনানা নাহল্লগদবা কয়া অমদগী কনখি। মহাক্না মখা তানা হায় মদুদি লৈবাক কয়া অমনা ভেক্সিনেসনগীদমক লৈরিবা ভারতকী কোৱিন এপ অসি অপাম্বা উৎলক্লি। অসিদুম্বা ভেক্সিনেসনগী থৌওংগীদমক য়েংশিন্নবা খুলায় অমা লৈবা হায়বসি ঐখোয়গী তেক্নিকেলগী হৈ-শিংবগী খুদম্নি।   

প্রধান মন্ত্রীনা হায় দিজিতেল ইন্দিয়া হায়বা অসি মীপুম খুদিংগী খুদোংচাবা অমনি, মীপুম খুদিংগা কান্নবা লৌফম্নি, ময়ামগী শরুক য়াফম্নি। দিজিতেল ইন্দিয়া হায়বা অসি সরকারগী সিস্তেমদা মীপুম খুদিংগী চংফম্নি। দিজিতেল ইন্দিয়া হায়বা অসি ময়েক শেংবা, নন-দিস্ক্রিমিনেতরী সিস্তেম অমসুং করপসনবু থুগাইবা অমনি। দিজিতেল ইন্দিয়া হায়বা অসি মতম, থবক অমসুং পৈশা মাংহন্দবা হায়বনি। দিজিতেল ইন্দিয়া হায়বা অসি য়াম্না থুনা কান্নবা পীবা, মপুং ফানা কান্নবা পীবনি। দিজিতেল ইন্দিয়া হায়বা অসি মিনিমম, গবর্নমেন্ত, মেক্সিমম গবর্নান্স হায়বনি।  

প্রধান মন্ত্রীনা হায় মদুদি দিজিতেল ইন্দিয়ানা কোরোনা মতমদা লৈবাক অসিদা কেম্পেইন তৌবদা মতেং পাংই। চাওখৎলবা লৈবাকশিংনা মখোয়গী নাগরীকশিংদা লোকদাউন্না মরম ওইদুনা শেলগী  তেংবাং পীবা ঙমদবা মতমদা, ভারতনা মীয়ামগী একাউন্দা হকথেংননা লুপা কোতি লিশিং কয়া অমা থাখি। দিজিতেল ত্রান্সেক্সন্না লৌমীগী পুন্সিদা অমুক্তা থোকখিদ্রিবা মওংদা অহোংবা পুরকখি। পি.এম.কিসান সামান নিধিগী মখাদা, লৌমীগী ইমুং কোতি ১০ হেনবগী বেঙ্ক একাউন্তা হকথেংননা লুপা কোতি লাখ ১.৩৫ হাপখি। দিজিতেল ইন্দিয়ানা ৱান নেসন, ৱান এম.এস.পি.গী মংলানসু মংফাওনরি।

প্রধান মন্ত্রীনা হায় দিজিতেল ইন্দিয়াগী ইনফ্রাস্ত্রকচরকীদমক য়াম্না পাক-চাওনা অমসুং অথুবদা মরুওইবা পীদুনা হোৎনরি। মহাক্না মখা তানা হায় মদুদি কমন সর্বিস সেন্তর লাখ ২.৫কী মখাদা মনুং হঞ্জিনবা মফমশিংদা ইন্তর্নেত য়ৌহল্লি। ভারত নেত স্কীমগী মখাদা, খুঙ্গংশিংদা ব্রোদবেন্দ ইন্তর্নেত য়ৌহন্নবা মিসন অমগী মখাদা থবক পায়খৎলি। পি.এম. ৱানিগী মখাদা, খুঙ্গংদা লৈবা নহারোলশিংদা হায়-স্পীদ (য়াম্না য়াংবা) ইন্তর্নেতগী হেন্না ফবা মথৌশিং পীনবা পায়খৎলি। লৈবাক শিনবা থুংনা মহৈরোয়শিংনা লৈবা ঙম্বা তেব্লেতশিং অমসুং দিজিতেল দিবাইজশিং পীরি। পান্দম অসি ফংননবা কম্পনীশিংদা সবসিদী কয়া অমা পীরি। হৌখিবা চহি ৬-৭ অসিদা দিজিতেল ইন্দিয়াগী ওইনা, স্কীম কয়াগী মখাদা লুপা কোতি লাখ ১৭ লোম বেনিফিসরীশিংগী বেঙ্ক একাউন্দা চংহনখি।

প্রধান মন্ত্রীনা হায় হন্দক্কী চহি ১০ অসি দিজিতেল তেক্নোলোজীদা ভারত অসি য়াম্না খুমাং চাওশিল্লে, ভারত অসি মালেমগী ওইবা দিজিতেল ইকোনোমীদা শরুক য়াবা ঙম্লে। ৫.জি. তেক্নোলোজী অসিনা মালেম অসিদা য়াম্না শাথিনা অহোংবা  অমা পুরক্লগনি অমসুং ভারতনা মদুগীদমক শেম-শাদুনা লৈরি। মহাক্না থাজৈ মদুদি নহাশিংনা দিজিতেলগী শক্তিগী মতেংনা অনৌবা মফম অমদা য়ৌবা ঙম্লগনি। হায়রিশিং অসিনা হন্দক্কী দিকেৎ অসি ‘ইন্দিয়াগী দিকেৎ’ ওইহনবদা মতেং ওইরগনি।

প্রধান মন্ত্রীগা উনবদা  উত্তর প্রদেশতকী বালরামপুরদগী মিস সুহানি সাহু কৌবা মহৈরোয় অমনা মহাক্না দিক্সা এপ থেংরকখিবগী মতাংদা পাউদমখি অমসুং লোকদাউন্দ মনুংদা মহাক্কী মহৈ-তম্বদা য়াম্না কান্নখি হায়না পাউদমখি। মহারাস্ত্রগী হিঙ্গোলিদগী শ্রী প্রলাদ বোরঘাদনা ই-নাম এপ্না মহাকপু ত্রান্সপোর্তেসন্দা অহোংবা অমসুং শেল কনবা ঙম্বগী মতাংদা পাউদমখি। নেপালগী ঙমখৈ মনাক্তা লৈবা বিহারগী খুঙ্গং অমা ওইরিবা নোংচুপ চম্পরন্দগী শ্রী শুবম কুমারনা মতৌ করম্না মহাক্না ই-সঞ্জিবানি এপ খুত্থাংদা লখনৌ চৎতনা মহাক্কী মবোকপু দোক্তরগী পাউতাংক ফংহনখি হায়না পাউদমখি। লখনৌদগী দাঃ ভুপেন্দর সিংহনা ই-সঞ্জিবানি এপ খুত্থাংদা পাউতাক পীবা অসি এপ অসিগী খুত্থাংদা লাম্না লায়বা অমনি হায়না পাউদমখি। প্রধান মন্ত্রীনা মহাকপু দোক্তরগী নুমিৎতা য়াইফ পাউজেল পীখি অমসুং মতুং তাবদা হেন্না ফবা ই-সঞ্জিবানি এপকী খুদোংচাবা ফংহনগনি হায়না ৱাশক পীখি।       

উত্তর প্রদেশকী, বরানাসীদগী মিস অনুপামা দুবেনা মহিলা ই-হাতকী খুত্থাংদা নাৎকী ওইবা সারীশিং য়োনবগী থেংনবশিং পাউদমখি অমসুং লোয়ননা মহাক্না মতৌ করম্না খ্বায়দগী নৌরবা দিজিতেল পেদ শিজিন্নবা অমসুং সারী অসি দিজাইন তৌননবা স্তাইলুস শিজিন্নবগী মরমদা পাউদমখি। হৌজিক্না উত্তরাখন্দগী দেহরাদুন্দা লৈবা কোইনা চৎপা থবক শুবা শ্রী হরি রাম্না ৱান নেসন ৱান রাসনগী খুত্থাংদা লায়না রাসনশিং ফংবগী নুঙাইবা ফোংদোকখি। হিমাচল প্রদেশকী, ধরমপুরদগী শ্রী মেহর দত্ত শর্ম্মনা মতৌ করম্না কমন সর্বিস সেন্তরগী ই-স্তোরদা মনাক নকপা সহরশিংদা চৎতনা পোৎ-চৈশিং লৈবগী থেংনরকপশিং পাউদমখি। মধ্য প্রদেশকী উজেন্দগী লম্বী নাকন্দা পোৎ য়োনবা শ্রীমতি নাজমিন সাহনা মতৌ করম্না পি.এম. স্বানিদি য়োজনানা লায়চৎ মতুংদা শেলগী তেংবাং ফংখি হায়না পাউদমখি। মেঘালায়াদগী কে.পি.ও. এমপ্লোয়ি অমা ওইরিবা শ্রীমতি ৱাম্দামাফি সৈমলিনা হায় মদুদি মহাক্না ইন্দিয়া বি.পি.ও.স্কীম অসি কোবিদ-১৯ লায়চৎ মনুংদা মহাক্কী থবক্তা য়াম্না নুংনাংদবা ঙম্মী  হায়না নুঙাইবা ফোংদোকখি।

***