కొవిడ్‌ టీకా కార్యక్రమ పరిధిని దేశవ్యాప్తంగా మరింత విస్తరించడానికి, వేగవంతం చేయడానికి కేంద్ర ప్రభుత్వం నిబద్ధతతో ఉంది. టీకా సార్వత్రీకరణ నూతన దశ జూన్ 21 నుంచి ప్రారంభమైంది. రాష్ట్రాలు, కేంద్ర పాలిత ప్రాంతాలకు మరిన్ని టీకాల లభ్యత, టీకాల లభ్యతపై దూరదృష్టిని పెట్టడం ద్వారా టీకా కార్యక్రమం వేగవంతమైంది. ఆయా రాష్ట్రాలు, కేంద్ర పాలిత ప్రాంతాలు చక్కటి ప్రణాళికతో పని చేయడానికి, టీకా సరఫరా గొలుసును క్రమబద్ధీకరించడానికి దీనిని ప్రారంభించారు.

    సార్వత్రిక టీకా కార్యక్రమంలో భాగంగా, రాష్ట్రాలు, కేంద్ర పాలిత ప్రాంతాలకు ఉచితంగా కొవిడ్ టీకాలను అందించడం ద్వారా కేంద్ర ప్రభుత్వం మద్దతునిస్తోంది. టీకా సార్వత్రీకరణ కొత్త దశలో, దేశంలో తయారయ్యే టీకాల్లో 75 శాతాన్ని కేంద్ర ప్రభుత్వం సమీకరించి, వాటిని రాష్ట్రాలు, కేంద్ర పాలిత ప్రాంతాలకు ఉచితంగా సరఫరా చేస్తోంది.

    ఇప్పటివరకు 32.92 కోట్లకు పైగా (32,92,01,800) టీకా డోసులను రాష్ట్రాలు, కేంద్ర పాలిత ప్రాంతాలకు కేంద్ర ప్రభుత్వం అందించింది. కేంద్ర ప్రభుత్వం ద్వారా ‍(ఉచితంగా), రాష్ట్రాల ప్రత్యక్ష సేకరణ విధానాల ద్వారా ఇవి సమకూరాయి.

    వీటిలో, వృథాతో కలిపి మొత్తం వినియోగించినవి 31,67,50,891 డోసులు. (ఈ రోజు ఉదయం 8 గంటల వరకు అందుబాటులో ఉన్న సమాచారం ప్రకారం).

    రాష్ట్రాలు, కేంద్ర పాలిత ప్రాంతాల వద్ద 1.24 కోట్లకుపైగా (1,24,50,909) నిల్వలు, వినియోగించని టీకా డోసులు ఉన్నాయి.

    ఇంకా, 94,66,420కు పైగా టీకా డోసులు పంపిణీకి సిద్ధంగా ఉన్నాయి. మరో 3 రోజుల్లో రాష్ట్రాలు, కేంద్ర పాలిత ప్రాంతాలకు అవి అందుతాయి.