ప్రధానమంత్రి శ్రీ నరేంద్ర మోదీ ప్రతిపాదించిన "పారదర్శకతతో అభివృద్ధి" అనే లక్ష్య సాధన దిశగా, జమ్మూ-కశ్మీర్ లో చేపట్టిన వివిధ అభివృద్ధి ప్రాజెక్టు ల పురోగతిని, కేంద్ర హోం మంత్రి శ్రీ అమిత్ షా, ఈ రోజు, న్యూ ఢిల్లీ లో సమీక్షించారు.  జమ్మూ-కశ్మీర్ ప్రజల సర్వతోముఖాభివృద్ధి, సంక్షేమం మోదీ ప్రభుత్వానికి అత్యంత ప్రధానం అని శ్రీ షా పేర్కొన్నారు.  జమ్మూ-కశ్మీర్ లో కేంద్ర ప్రభుత్వ పథకాలు 90 శాతం మంది ప్రజలకు చేరుకోవడాన్ని కేంద్ర హోంమంత్రి ప్రశంసించారు.  కోవిడ్-19 టీకాలు వేసే కార్యక్రమం జమ్మూ-కశ్మీర్‌ లో 76 శాతం, నాలుగు జిల్లాల్లో 100 శాతం చొప్పున అమలు చేసినందుకు లెఫ్టినెంట్ గవర్నర్ మరియు అతని బృందాన్ని శ్రీ అమిత్ షా ఈ సందర్భంగా అభినందించారు.

ప్రధానమంత్రి అభివృద్ధి ప్యాకేజీ, ఫ్లాగ్-షిప్, ఐకానిక్, పారిశ్రామిక అభివృద్ధి ప్రాజెక్టులను త్వరగా పూర్తి చేసినందుకు హోంమంత్రి సంతోషం వ్యక్తం చేశారు.  పశ్చిమ పాకిస్తాన్, పి.ఓ.జె.కే, నుండి వచ్చిన శరణార్థులతో పాటు, కశ్మీర్ నుండి జమ్మూకు వచ్చే వలసదారులు అందరికీ, శరణార్థుల ప్యాకేజీ కింద ప్రయోజనాలను త్వరగా అందించాలని కేంద్ర హోంమంత్రి ఆదేశించారు.

ప్రధానమంత్రి అభివృద్ధి ప్యాకేజీ, పారిశ్రామిక అభివృద్ధి ప్రాజెక్టులతో సహా అనేక ఇతర అభివృద్ధి పథకాలను వేగంగా పూర్తి చేయాలని శ్రీ అమిత్ షా కోరారు.  3,000 మెగావాట్ల పాకల్ దుల్ మరియు కిరు హైడ్రో-ఎలక్ట్రిక్ ప్రాజెక్టులతో పాటు, 3,300 మెగావాట్ల ఇతర ప్రాజెక్టులను కూడా వేగంగా ప్రారంభించాలని ఆయన ఆదేశించారు.

పంచాయతీరాజ్ సంస్థలు, పట్టణ స్థానిక సంస్థల బలోపేతం కోసం, సభ్యులకు వెంటనే శిక్షణ ఇవ్వాలని, శ్రీ అమిత్ షా అధికారులను ఆదేశించారు.  వారు కూర్చోడానికి సరైన ఏర్పాట్లు చేయాలనీ, ఈ సంస్థలు సజావుగా పని చేయడానికి వీలుగా సిబ్బందికి పరికరాలు, ఇతర వనరులను అందించాలనీ, ఆయన ఆదేశించారు.  దీనితో పాటు,  దేశంలోని వివిధ ప్రాంతాలను సందర్శించాలని, పంచాయతీ సభ్యులను, ఆయన ఆదేశించారు.  తద్వారా, దేశంలోని అభివృద్ధి చెందిన వివిధ పంచాయతీలు ఎలా పనిచేస్తున్నాయో, సమాచారం తెలుసుకునే అవకాశం, వారికి,  కలుగుతుందని, ఆయన తెలియజేశారు.

ఎక్కువ మందికి ఉపాధి కల్పించడానికి వీలుగా,  ఎం.జి.ఎన్‌.ఆర్‌.ఈ.జి.ఎ. పరిధిని పెంచవలసిన ఆవశ్యకతను, కేంద్ర హోం మంత్రి నొక్కి చెప్పారు.  అదే సమయంలో, రైతుల ఆదాయాన్ని పెంచడానికి వ్యవసాయంలో ఆధునిక పద్ధతులను ఉపయోగించ వలసిన అవసరం గురించి,  ప్రతి జిల్లాలో కనీసం ఒక వ్యవసాయ ఆధారిత పరిశ్రమను ఏర్పాటు చేయడం గురించి, కూడా ఆయన  మాట్లాడారు.  జమ్మూ-కశ్మీర్‌లో ఆపిల్ ఉత్పత్తిలో  నాణ్యత మరియు సాంద్రతలను పెంచేందుకు కృషి చేయాలని కూడా, ఆయన సూచించారు.  తద్వారా,  ఆపిల్ పండించే రైతులు, తమ పంటకు గరిష్ట ధరను అందుకుంటారు.

ఏటా నేరుగా రైతుల బ్యాంకు ఖాతాల్లోకి 6,000 రూపాయలు జమ చేసే ప్రధాన్ మంత్రి కిసాన్ యోజన మరియు కిసాన్ క్రెడిట్ కార్డ్ యోజన వంటి, రైతులకోసం అమలు చేస్తున్న పథకాల ప్రయోజనాలు, రైతులందరికీ అందేలా చూడాలని,  జమ్మూ-కశ్మీర్ కు చెందిన పాలనా యంత్రాంగాన్ని,  కేంద్ర హోంమంత్రి, ఆదేశించారు.

పారిశ్రామిక విధానం యొక్క ప్రయోజనాలు చిన్న తరహా పరిశ్రమలకు చేరేలా చూడాలని కూడా కేంద్ర హోంమంత్రి కోరారు. యువతకు ఉపాధి కల్పించడానికి చేస్తున్న ప్రయత్నాలను;  పబ్లిక్-డొమైన్ లో ఉంచిన అన్ని అభివృద్ధి పనుల జియో-ట్యాగింగ్ చేయడం, ప్రభుత్వ ఈ-మార్కెట్ ప్లేస్ (జి.ఈ.ఎమ్) ద్వారా కొనుగోలు చేయడం;  గ్రామ స్వరాజ్, సామాజిక భద్రత తో పాటు, ఇతర వ్యక్తిగత లబ్ధిదారుల పథకాలకు చెందిన దాదాపు వంద శాతం లబ్ధిదారుల బ్యాంకు ఖాతాల్లోకి నేరుగా డబ్బు జమ చేయడం;  వంటి సంస్థాగత సంస్కరణలను, కేంద్ర హోంమంత్రి ప్రశంసించారు.

ఈ సమావేశంలో - జమ్మూ-కశ్మీర్ లెఫ్టినెంట్ గవర్నర్, శ్రీ మనోజ్ సిన్హా తో పాటు, కేంద్ర ప్రభుత్వం మరియు జమ్మూ-కశ్మీర్ ప్రభుత్వాలకు చెందిన సీనియర్ అధికారులు పాల్గొన్నారు.

*****