প্রধান মন্ত্রী, শ্রী নরেন্দ্র মোদীনা ঙসি ভিদিও কনফরেন্সিংগী থোংদা ‘কস্তমাইজ ক্রাশ কোর্স প্রোগ্রাম ফোর কোবিদ ১৯ ফ্রন্তলাইন ৱর্কর্স’ হৌদোকখ্রে। ত্রেনিং প্রোগ্রাম অসি রাজ্য ২৬তা লৈবা ত্রেনিং সেন্তর ১১১দা পাঙথোক্কনি। থৌরাং অসিগী মখাদা ফ্রন্তলাইন ৱর্কর লাখ অমা ত্রেন তৌগনি। স্কিল দিবেলপমেন্ত অমসুং ওন্তপ্রিনোর্শিপকী কেন্দ্রগী মন্ত্রী দা. মহেন্দ্র নাথ পান্দে অমসুং অতৈ কেন্দ্রগী মন্ত্রীশিং, রাজ্যশিংগী মন্ত্রীশিং, এক্সপর্তশিং অমসুং অতৈ স্তেকহোল্দরশিংনা থৌরম অসিদা শরুক য়াখি।

থৌরম অদুদা ৱা ঙাংলদুনা প্রধান মন্ত্রীনা হায় লোঞ্চ তৌবা অসি কোরোনাগী মায়োক্তা লান্থেংনবগী মথংগী মরু ওইবা খোঙথাং অমনি। প্রধান মন্ত্রীনা ভাইরস অসি লৈরি অমসুং ম্যুতেসন তৌরকপগী ওইথোকপসু লৈরি হায়না চেকশিনৱা থমখ্রে। লাইচৎ অসিগী অনিশুবা ৱেবনা ভাইরস অসিনা ঐখোয়দা পীবা য়াবা শীংনবশিংগী মখল অদু উৎখ্রে। লৈবাক অসিনা শীংনবশিং থেংননবা শেম শাদুনা লৈবা মথৌ তাই অমসুং ফ্রন্তলাইন ৱারিয়য় লাখ অমা হেনবদা ত্রেনিং পীগদৌরিবা অসি মাইকৈ অসিদা চংশিনবা খোঙথাং অমনি হায়না প্রধান মন্ত্রীনা ফোঙদোকখ্রে।

প্রধান মন্ত্রীনা ঐখোয়দা লাইচৎ অসিনা মালেমগী লৈবাক, ইন্সতিত্যুসন, খুন্নাই, ইমুং-মনুং অমসুং মীওইবা খুদিংমক্কী পাঙ্গল চাংয়েং তৌখি হায়না নীংশিংহনখ্রে। মসিগা লোইননা মসিনা ঐখোয়দা সাইন্স, সরকার, খুন্নাই, ইন্সতিত্যুসন নত্ত্রগা মীওইশিংদা ঐখোয়গী মতিক-ময়াইশিং অদু হেনগৎহন্নবা মীৎনা শিংনা লৈহনখি। ভারতনা শীংনবা অসি মায়োক্নখি অমসুং পি.পি.ই. কিৎশিং, তেস্তিং অমসুং কোবিদ কিয়র অমসুং লায়েংগা মরী লৈনবা অতৈ মেদিকেল ইনফ্রাস্ত্রকচর অসিনা হোৎনরিবা অসিগী খুদম ওইখি। শ্রী মোদীনা অৱাপ্পা মফমশিংদা লৈবা হোস্পিতালশিংদা ভেন্তিলেতরশিং অমসুং ওক্সিজেন কন্সেন্ত্রেতরশিং ফংহল্লি হায়না ফোঙদোকখ্রে। লানগুম্না খোঙজেল য়াংনা ওক্সিজেন প্লান্ত ১৫০০ হেন্না লিংখৎখ্রে। হোৎনরিবা পুম্নমক অসিগী মরক্তা স্কিল লৈবা মেনপাৱর খ্বাইদগী মরু ওই। মসিগীদমক অমসুং কোরোনা ৱারিয়রগী হৌজিক লৈরিবা নহা লাখ অমা ত্রেন তৌরি। ত্রেনিং অসি থা অনি-অহুম চত্থগনি হায়না প্রধান মন্ত্রীনা ফোঙদোকখ্রে।

মন্ত্রীনা হায় লৈবাক অসিগী মকোক থোংবা এক্সপর্তশিংনা রাজ্যশিং অমসুং য়ুনিয়ন তেরিতোরীশিংগী দিমান্দশিংগী মতুং ইন্না ঙসি হৌদোকখিবা কোর্স তরুক অসি দিজাইন তৌখি। ত্রেনিং অসিনা কোবিদ ৱারিয়রশিংদা কস্তমাইজ তৌরবা থবক তরুক মমিং ওইনা পল্লবদা হোম কিয়র সপ্পোর্ত, বেসিক কিয়র সপ্পোর্ত, এদভান্স কিয়র সপ্পোর্ত, ইমর্জেন্সী কিয়র সপ্পোর্ত, সেম্পল কল্লেক্সন সপ্পোর্ত অমসুং মেদিকেল ইক্বিপমেন্ত সপ্পোর্ততা ত্রেনিং পীগনি। মসিদা নৌনা স্কিলিং তৌবা লোইননা অসিগুম্বা মখলগী থবক্তা ত্রেনিং তৌখ্রবশিংদা অপস্কিলিং তৌবা য়াওগনি। কেম্পেন অসিনা হেল্থ সেক্তর ফ্রন্তলাইন ফোর্সতা অনৌবা ইনর্জ পীরগনি অমসুং ঐখোয়গী নহারোলদা থবক্কী খুদোংচাবশিংসু পীগনি।

প্রধান মন্ত্রীনা কোরোনাগী মতমনা স্কিল, রি-স্কিল অমসুং অপ-স্কিলগী মন্ত্র অসি কয়াম মরু ওইবা হায়বা উৎখ্রে হায়না ফোঙদোকখ্রে। প্রধান মন্ত্রীনা স্কিল ইন্দিয়া মিসন অসি লৈবাক অসিদা অহানবা ওইনা তোখাইনা হৌদোকখি, স্কিল দিবেলপমেন্ত মন্ত্রালয় অমা শেমখি অমসুং লৈবাক শিনবা থুংনা প্রধান মন্ত্রীগী স্কিল দিবেলপমেন্ত সেন্তরশিং হাংদোকখি। ঙসি স্কিল ইন্দিয়া মিসন্না লৈবাক অসিগী নহারোল করোর কয়াদা চহি খুদিংগী মথৌ তাবা ত্রেনিং পীবদা মতেং পাংলি। হৌখিবা চহিদগী স্কিল দিবেলপমেন্ত মন্ত্রালয়না লাইচৎ মনুংদসু লৈবাক অসিগী হেল্থ ৱর্কর লাখ কয়া ত্রেন তৌখ্রে।

প্রধান মন্ত্রীনা ঐখোয়গী লৈবাক্কী মীশিং অসি য়েংলগা হেল্থ সেক্তরদা দোক্তরশিং, নর্সশিং অমসুং পেরামেদিক্সকী মশিং হেনগৎহনবা মথৌ তাই। হৌখিবা চহি ৭ অসিদা অনৌবা এম্স, অনৌবা মেদিকেল কোলেজশিং অমসুং অনৌবা নর্সিং কোলেজশিং হৌনবা মীৎয়েং থম্বা এপ্রোচকী থবজ হৌখি। মসিগা মান্ননা মেদিকেল এজুকেসন অমসুং মরী লৈনবা ইন্সতিত্যুতনশিংবু রিফোর্মশিং অসিনা থৌগৎলি। হেল্থ প্রোফেস্নেলশিং শেম্নবা পাইখৎখিবগী খোঙজেল অসি মমাংদা অমুক্তা তৌখিদ্রি।

প্রধান মন্ত্রীনা হায় খুঙ্গংশিংদা লৈবা দিস্পেন্সরীশিংদা মথৌ তৌরিবা আশা ৱর্করশিং, এ.এন.এম., অঙ্গনৱাদি অমসুং হেল্থ ৱর্করশিং অসিগুম্বা হেল্থ প্রোফেস্নেলশিং অসি ঐখোয়গী হেল্থ সেক্তরগী মপাঙ্গল লৈবা য়ুবীশিংনি অমসুং মখোয়বু অয়াম্বা মতমদা লুনা লৌবিদে। মখোয়না মালেমগী খ্বাইদগী অচৌবা বেক্সিনেন কেম্পেন অসিদা মতেং পাংদুনা লাইনা ঙাকথোকপদা মরু ওইবা থৌদাং অমা লৌরি। প্রধান মন্ত্রীনা লৈবাক অসিগী মীওই খুদিংমক শাফনা থম্নবা অৱাবা পুম্নমক্কী মনুংদা থবক তৌখিবা অসিগুম্বা হেল্থ ৱর্করশিংবু থাগৎপা ফোঙদোকখ্রে। মহাক্না হায় খুঙ্গংদা লৈবা মনুং হঞ্জিনবা মফমশিং অমসুং চীংশিং অমদি ত্রাইবেলগী মফমসিংদা মখোয়না লাইনা শন্দোকপা থিংনবগী লৌরিবা থৌদাং অসি য়াম্না চাউই।

প্রধান মন্ত্রীনা হায় জুন ২১দগী হৌগদৌরিবা কেম্পেন অসিগা মরী লৈনবা গাইদলাইন ময়াম অমা থোকখ্রে। জুন ২১দগী চহি ৪৫গী মথক্তা মীওইশিংনা ফংলিবা বেক্সিনেসনগী খুদোংচাবা অসি চহি ৪৫গী মখাদা লৈবা মীওইশিংনসু চপ মান্ননা ফংলগনি।  কেন্দ্র সরকার অসি কোরোনাগী প্রোতোকল ঙাক্না প্রজা খুদিংমক্তা বেক্সিন লেম্না পীনবা হোৎনরি।

প্রধান মন্ত্রীনা ত্রেনীশিংদা য়াইফ-পাউজেল পীখ্রে অমসুং মহাক্না হায় লৈবাক অসিগী প্রজা মীয়ামগী পুন্সি কনবদা মখোয়গী অনৌবা হৈ-শিংবা অসি শিজিন্নগনি হায়না থাজবা থম্মি।

***