হকশেল অমসুং য়াইফ-য়ুম্বাল মন্ত্রালয়

মতম চুপ্পদা ব্লদ সুগর লেবেল য়েংশিল্লু অমসুং কন্ত্রোল তৌদুনা থম্বীয়ু: দাইবেতিসনা নারবা মীওইশিংগী পাউতাক

মাইল্দ কোবিদ-১৯ অনাবা মীওইশিংগী ওইনা স্তেরোইদশিং য়ারিবা মখৈ শিজিন্নদবা: দিরেক্তর, এম্স

চেকশিল্লু, অচম্বা লাইওংশিং ফাওবা লাইথোক্কনু, ম্যুকোর্মাইকোসিসতগী ঙাকথোকসি

Posted On: 21 MAY 2021 1:07PM by PIB Imphal

মুম্বাই, মে ২১, ২০২১


ব্লেক ফঙ্গস ইনফেক্সন হায়নসু খঙনবা ম্যুকোর্মাইকোসিস অসি অনৌবা লাইনা অমা নত্তে। অসিগুম্বা ইনফেক্সনশিং অসি লাইচৎকী মমাংদসু রিপোর্ত তৌরকখি। অদুম ওইনমক মসি থেংনবগী চাং য়াম্না নেম্মি। হৌজিক কোবিদ-১৯না মরম ওইদুনা তাংনা থোকপা অদুবু খুদোংথিনীংঙাই ওইবা ফঙ্গল ইনফেক্সন অসি মশিং য়াম্না রিপোর্ত তৌরক্লি। কোরোনাভাইরস দিজিজ এসোসিএতেদ ম্যুকোর্মাইকোসিস (সি.এ.এম.) অসি কোবিদ-১দগী ফগৎলক্লিবা নত্ত্রগা ফগৎখ্রবা মীওইশিংদা উবা ফংলি। ঐখোয়গী মমাংদা হীরম অসিগী পোস্ত অদুগী মখা চত্থদুনা, ঐখোয়না ইশাবু, ঐখোয়গী ইমুং-মনুংশিং করম্না ঙাকথোক্কনি হায়বা তমশিল্লসি।

এম্সকী দিরেক্তর, দা. রন্দীপ গুলেরিয়ানা হৌখিবা চয়োলদা প্রেস কনফরেন্স অমদা মসিগী কেস হেনগৎলকপগী মতাংদা ফোঙদোকখ্রে। “মমাংদা ম্যুকোর্মাইকোসিস অসি কনাগুম্বা ব্লদ সুগর (গ্লুকোস) লেবেলশিং অসি কা হেন্না ৱাংবগী কন্দিসন অমা ওইরিবা দাইবেতিস মেল্লিতস নারিবা মীওইশিংদা অয়াম্বনা থেংনখি। কেমোথেরাপী চত্থরিবা কেন্সর নাবা মীওইশিং, ত্রান্সপ্লান্ত তৌখ্রবা মীওইশিং অমসুং ইম্ম্যুনোসপপ্রেসন্তশিং (ইম্ম্যুন সিস্তেম শোন্থহনবা হীদাক-লাংথকশিং) শিজিন্নরিবা মীওইশিংনসু মসি নাগল্লি। অদুবু হৌজিক্তি কোবিদ-১৯ নাবা অমসুং মসিগী লায়েং চত্থবনা মরম ওইরগা কেসশিংগী মশিং হেনগৎলকপা উবা ফংখি। এম্স খক্তদা ফঙ্গল ইনফেক্সনগী কেস ২০ হেন্না লৈ, মখোয় পুম্নমক কোবিদ পোজিতিব ওইরবা ঙাক্তনি। রাজ্য কয়াদা কোবিদ নাবা মীওইশিংগী মরক্তা কেস ৪০০দগী ৫০০ রিপোর্ত তৌখি।”

 

মসিনা কোবিদ-১৯ নাবা মীওইশিংনা নারিঙৈ নত্ত্রগা নাবা ফগৎলবা মতুংদা করিগী অমদি করম্না শোকহনবগে?


কোবিদ-১৯ লায়েংবদা শিজিন্নবা হীদাক-লাংথকশিংনা লিম্ফোসাইৎশিং কাউন্ত হন্থহনগল্লি। লিম্ফোসাইৎশিং অসি হ্বাইৎ ব্লদ সেলশিংগী মখল অহুমগী মনুংদা অমনি, মসিগী মথৌ অসি বেক্তরিয়া, ভাইরসশিং অমসুং পেরসাইৎশিংগুম্বা লাইনা থোকহল্লিবা পেথোজেনশিংগী মায়োক্তগী হকচাংবু ঙাকথোকপনি। লিম্ফোসাইৎশিংগী কাউন্ত হন্থরকপা অসিনা লিম্ফোপেনিয়া কৌবা মেদিকেল কন্দিসন অমা থোকহল্লি মসিনা খুদোংচাবা ঙাইদুনা লৈবা ফঙ্গল ইনফেক্সননা কোবিদ-১৯ নাবা মীওইশিংদা চংনবা লম্বী ওইরি।

ম্যুকোর্মাইকোসিস অসি ইম্ম্যুন সিস্তেম মথৌ নীংথিনা তৌদ্রবা অনাবশিংদা থোকপগী চাং হেন্না ৱাংঙি অমসুং কোবিদ-১৯ লায়েংবা অসিন ইম্ম্যুন সিস্তেমগী মথৌ তৌবা হন্থহল্লি মসিনা অসিগুম্বা অনাবশিং অদু ব্লেক ফঙ্গস ইনফেক্সন লৌরকপগী খুদোংথিবা অদু চাং ৱাংঙি।


লাইনা অমসুং লাইওংশিং:

ম্যুকোর্মাইকোসিস অসি মনা শোকহনবা মীওইবগী হকচাংগী কয়াৎকী মখা পোন্না খাইদোকই। শোকহল্লবা হকচাংগী শরুক অদুগী মতুং ইন্না খুদমশিং অমসুং লাইওংশিং অদুসু খেৎনৈ।

  • রাইনো ওর্বিতেল সেরেব্রেল ম্যুকোর্মাইকোসিস: ফঙ্গল স্পোরশিং শ্বর হোঞ্জিনখ্রগা ইনফেক্সন অসি থোকই। মসিনা নাতোন, মীৎকী অকোইবা/ আই সোক্কেৎ, ওরেল কেবিতীদা ইনফেক্ত তৌই অমসুং মসি ব্রেনদসু শন্দোকপা য়াই। লাইওংশিংদা কোক চিকপা, নাতোন ফুনবা, নপ চোবা (অশংবা মচু), সাইনস্তা নাবা, নাহী তাবা, মাই পোমখৎপা, মাইদা শোকপদা ফাওবা হন্থবা অমসুং উনা মচু ওলকপা য়াওরি।  
  • পলমোনরী ম্যুকোর্মাইকোসিস: স্পোরশিং শ্বর হোঞ্জিনবা অমদি রেস্পিরেতরী সিস্তেম য়ৌবা মতমদা মসিনা থবোম্বীদা শোকহল্লি। লাইওংশিং অদুদি লাইহৌ, থবাক নাবা, লোক খুবা অমসুং লোক খুবদা ঈ য়াওবনি।

ফঙ্গস অসিনা গ্যাসত্রোইন্তেস্তিনেল ত্রেক, উনশা অমসুং অতৈ কয়াৎশিংদসু শোকহনবা য়াই অদুবু খ্বাইদগী তোইনা থেংনবা মওং অসি রাইনো সেরেব্রেল ম্যুকোর্মাইকোসিস অসিনি।

কোবিদ-১৯ নাবা মীওইশিংনা লৌখৎকদবা চেকশিল থৌরাংশিং:

মখাদা পীরিবা মেদিকেল কন্দিসনশিং অসি লৈবা মীওইশিংনা হেন্না চেকশিনগদবনি, মখোয়না মখোয়গী হকশেল চাং নাইনা মোনিতর তৌগদবনি অমসুং পীরিবা চেকশিল থৌরাংশিং অসি লৌখৎকদবনি।

দাইবেতিস নাবা (কন্ত্রোল তৌদবা দাইবেতিস) + স্তেরোইদ শিজিন্নবা + কোবিদ পোজিতিব – অহুমক অসি পুনশিনবা মতমদা লাইনা অসিদগী খুদোংথিবগী চাং ৱাংনা লৈ। মরম অসিনা দাইবেতিস লৈবা মীওইশিংনা মতম চুপ্পদা মখোয়গী ব্লদ সুগর লেবেল মোনিতর অমসুং কন্ত্রোল তৌদুনা লৈগদবনি।

স্তেরোইদশিং লান্না শিজিন্নবনা কনাগুম্বগী ইম্ম্যুন সিস্তেম হকথেংননা শোকহন্নবা মরমসু ওই।

মাইল্দ ওইবা কোবিদ পোজিতিব ওইবা মীওইশিংনা য়ারিবা মখৈ স্তেরোইদশিং শিজিন্নরোইদবনি। নাকল অমরোমদা স্তেরোইদশিং অসি মাইল্দ কোবিদ কেসশিং লায়েংবদা কান্নদে। অমরোমদনা স্তেরোইদশিং শিজিন্নবনা ম্যুকোর্মাইকোসিসগুম্বা সেকেন্দরী ইনফেক্সনদগী খুদোংথিবা নংবা হেনগৎলি। মসিআ কোবিদ-১৯ নাবা ফরবা মতুংদসু ফঙ্গল ইনফেক্সন নারকপগী চাং ৱাংঙি। মরম অসিনা করিগুম্বা কোবিদ নারবা মীওই অমগী ওক্সিজেন সেচ্যুরেসন লেবেল অসি নোর্মেল ওইরবা অমসুং মহাক অসি ক্লিনিকেলী মাইল্দ ওই হায়না কেতগোরাইজ তৌরবদি স্তেরোইদশিং শিজিন্নরোইদবনি।

https://static.pib.gov.in/WriteReadData/userfiles/image/WhatsAppImage2021-05-21at1.47.26PMKH7M.jpeg

স্তেরোইদশিং শিজিন্নরিবা মীওইশিংনা মখোয়গী ব্লদ সুগর লেবেল চেক তৌদুনা থমগদবনি। অয়াম্বা কেসশিংদা দাইবেতিক ওইদবা মীওইশিংদা স্তেরোইদশিং কাপ্লবা মতুংদা ব্লদ সুগর লেবেল অসি ৩০০দগী ৪০০ ফাওবা হেনগৎহল্লি। মরম অসিনা কনাগুম্বনা সুগর লেবেল অসি তোইনা মোনিতর তৌবা তঙাই ফদে।

 “কোবিদ-১৯ নাবা মীওইশিংনা স্তেরোইদশিংগী দোজ ৱাংনা শিন্নবা অসি কান্নদে। মাইল্দদগী মোদরেৎ দোজ অসিনা য়ারে। দেতাগী মতুং ইন্না স্তেরোইদশিং অসি নুমিৎ ৫দগী ১০ (য়াম্লবদা) খক্তা শিজিন্নগদবনি। মসিগী মথক্তা স্তেরোইদশিংনা ব্লদ সুগর লেবেল হেনগৎহনবা অসি কন্ত্রোল তৌবদা অৱাবা ওই।” মসিনা ফঙ্গল ইনফেক্সনগী চাং অসি হেনগৎহল্লি হায়না প্রোফেসর গুলেরিয়ানা ফোঙদোকখ্রে।

মাস্ক শোইদনা উপকদবনি। নুংশিৎতা ফংবা ফঙ্গল স্পোরশিং অসি নাতোনগী খুত্থাংদা হকচাংদা লাইনা চংঙি। মসিনা লাইনা অসি ঙাকথোকপদা মাস্ক উপ্পা হেন্না মরু ওইহল্লি। কনস্ত্রক্সন সাইৎশিংদা থবক তৌবা নত্ত্রগা চৎপা মীওইশিংনা হেন্না চেকশিনবা মথৌ তাই।


ফঙ্গিশিং অসি কদায়দা ফংবগে?

ম্যুকোর্মাইকোসিস অসি ম্যুকোর্মাইসিতিস কৌবা মোল্দশিংগী কাংলুপ অমনা থোকহল্লি। মসি মহৌশানা নুংশিৎ, ঈশিং অমসুং চানা থক্নবদসু য়াওই। মসিনা নুংশিৎতগী ফঙ্গল স্পোরশিংগী খুত্থাংদা হকচাংদা চংঙি নত্ত্রগা উনশাদা শোকপা, মৈনা পোকপা নত্ত্রগা স্কিন ইঞ্জরীগী মতুংদা নারকপসু য়াই।

https://static.pib.gov.in/WriteReadData/userfiles/image/1000ZD9G.jpghttps://static.pib.gov.in/WriteReadData/userfiles/image/200OAMC.jpg

ইনফেক্সন অসি ঙন্না খঙদোকপনা তুংদা মিৎ তাংবা নত্ত্রগা ব্রেন ইনফেক্সন থোরকপা য়াবা অদু হন্থহল্লি।

অতৈ ঙাকথোক্নবা ঙাক্না চৎকদবা পাম্বৈশিংদি :

 

১. হ্যুমিদিফায়রশিং শেংদোকপা অমসুং শিন্দোকপা (ওক্সিজেন কন্সেন্ত্রেতর শিজিন্নরিবশিং)

২. হ্যুমিদিফায়র বোত্তলদা স্তেরাইল নোর্মেল সলাইন শিজিন্নগদবনি অমসুং নুংতিগী শিন্দোকপা

৩. মাস্কশিং নুংতিগী দিসইনফেক্ত তৌগদবনি

 

অচম্বা লাইওংশিং ফাওবা লাইথোক্কনু:

মিৎ অমসুং নাতোনগী অকোইবদা নাবা অমসুং ঙাংবা, লাইহৌ (অয়াম্বনা কনদবা), এপিতেক্সিস (নাহী তাবা), নাতোন নত্ত্রগা সাইনস ফুনবা, কোকচিকপা, লোক খুবা, শ্বর হোনবা ৱাবা, ঈ ওবা, ৱাখল চোইরকপা অমসুং মীৎ উবগী চাং ৱাৎলকপা।


দোক্তরশিং অমসুং অতৈ হেল্থ কিয়র ৱার্করশিংগী থৌদাংশিং

কোবিদ-১৯ নাবা মীওইশিং দিসচার্জ তৌবা মতমদা ম্যুকোর্মাইকোসিসকী অঙনবা লাইওংশিং নত্ত্রগা খুদমশিংগী মতাংদা পাউতাক পীয়ু; মসিদা মাই নাবা, ফুনগৎপা, মহী কা হেন্না থোকপা, য়া কেনবা, থবাক নাবা অমসুং শ্বর হোনবা ঙম্লক্তবা য়াওরি।

 

***



(Release ID: 1720653) Visitor Counter : 89