য়ুরোপিয়ন কাউন্সিলগী প্রসিদেন্ত, শ্রী চার্ল্স মিচেলগী পাউজেলগী মখা পোন্না, প্রধান মন্ত্রী, শ্রী নরেন্দ্র মোদীনা ঙসি ভারত-ই.য়ু. লুচিংবশিংগী মীফমদা শরুক য়াখ্রে। মীফম অসি ই.য়ু. মেম্বর স্তেৎ ২৬কা লোয়ননা য়ুরোপিয়ন কাউন্সিল অমসুং য়ুরোপিয়ন কম্মিসনগী প্রসিদেন্তকা লোয়ননা হাইব্রিদ ফোর্মেত্তা পাংথোকখি। মীফম অসি ই.য়ু.না য়ুম্বু ওইদুনা ই.য়ু.+২৭ ফোর্মেত্তা ভারত য়াওদুনা  পাংথোকপা অহানবা মীফম্নি। মীফম অসিগী ৱাখল্লোন অসি য়ুরোপিয়ন য়ুনিয়ন কাউন্সিলগী পোর্তুগিজ প্রসিদেন্সীনা হৌদোকপনি।

লুচিংবশিংনা মীফম অসিদা দিমোক্রেসী, ফন্দামেন্তেল ফ্রীদম, রুল ওফ লো অমসুং মলতিলেতরেলিজমদা খোঙফম চেৎপদা য়ুম্ফম ওইদুনা ভারত-ই.য়ু.গী স্ত্রেতজিক পার্ত্নরশিপ্পু হেন্না মপাঙ্গল কলহন্নীংবগী অপাম্বা ফোংদোক্নখি। মখোয়না মখাদা পল্লিবা মরু ওইবা হীরম অহুমগী মতাংদা মখোয়গী ৱাখল্লোন ফোংদোক্নখিঃ ১) ফোরেন পোলিসী অমসুং সেক্যুরিতী; ২) কোবিদ-১৯, অইং-অশা অমসুং অকোয়বা, ৩) লল্লোন-ইতিক, কন্নেক্তিবিতী অমসুং তেক্নোলোজী। মখোয়না কোবিদ-১৯ লাইচৎ মাইয়োক্নবা অমসুং শেন্মিৎলোন হিংগৎহনবা, অইং-অশাগী শিংনবা থেংনবা অমসুং মলতিলেতরেল ইন্সতিত্যুসনশিংবু শেমগৎপগী মতাংদা হান্নদগী হেন্না খুৎশম্ননা চমিন্নবগী ৱাফম কয়া খন্নখি। ই.য়ু. অমসুং মসিগী মেম্বর স্তেৎশিংনা ভারতকী অনিশুবা ৱেভ অসিগা লান্থেংননবগীদমক্তা মখোয়না অথুবা মতমদা তেংবাংলকখিববু ভারতনা থাগৎপা ফোংদোকখি।

লুচিংবশিংনা খল-নাইবা অমসুং পাক-শনবা ফ্রী ত্রেদ অমসুং শেল থাদবগী হীরমশিংগী মতাংদা য়ানবা পুরক্নবা নৌনা অমুক খন্নবা হৌনবা ৱারেপ লৌখিববু তরাম্না ওক্নখি। ত্রেদ অমসুং শেল থাদবগী য়ানবা পুরকপগী থৌওং অনিমক হীরম অসিগী মতাংদা অথুবা মতমদা য়ানবা অমা পুরক্নবা পান্দমগা লোয়ননা মতম অমুক্তদা পাংথোক্কনি। মসিনা নাকল অনিমক্তা মখোয়না শেন্মিৎলোন্দা খুৎশম্নদুনা পাংথোকপা য়াবা হীরম খুদিংগী তসেংবা মতিক পুথোকপা ঙমহনবা অচৌবা মহৈ অমা ওইগনি। ভারত অমসুং ই.য়ু.না দবল্যু.তি.ও.গী শিংনবশিং, কাংলোন নাইহন্নবা তেংবাংনবা, কৈথেলগী খুদোংচাবা ফংহনবগী শিংনবশিং অমসুং নীংহন্নবা লৈতবা সপ্লাই চেন লৈবা, শেন্মিৎলোনগী থবক কয়াগী মরী হেন্না কনখৎপা অমসুং মওং য়ামখৎহন্নবগী খোঙফম চেৎপা ৱারী-ৱাতাই কয়া শারগনি হায়বগী ৱাফমসু লাউথোকখি।

ভারত অমসুং ই.য়ু.না দিজিতেল, ইনর্জী, ত্রান্সপোর্ত অমসুং মীওই অমগা অমগা নক্নহনবদা মিৎয়েং চঙবা মিৎয়েং শানবা অমসুং পাক-শনবা ‘কন্নেক্তিবিতী পার্ত্নরশিপ’ অমা হৌদোকখি। মসিগী খুৎশম্নবা অসিনা খুন্নাই, শেন্মিৎলোন, শেল-থুম, অইং-অশা অমদি অকোয়বগী ফীভম কায়হন্দবা অমসুং মালেমগী আইন অমসুং মসিদা খোঙফম চেৎপবু ইকায় খুম্নবগী মতাংদা নাকল অনিনা লৈনরিবা ৱাখল্লোন্দা য়ুম্ফম ওইবনি। খুৎশম্নবা অসিনা কন্নেক্তিবিতী প্রোজেক্তশিংদা লৈরিবা প্রাইভেৎ অমসুং পব্লিক ফাইনেন্সিংগী থৌওংবু হেন্না খুমাং চাউশিলহনগনি। মসিনা ইন্দো-পেসিফিক য়াওনা অতোপ্পা লৈবাকশিংদা কন্নেক্তিবিতী শৌগৎপগী থৌওংশিংদা অনৌবা তেংবাংনবগী থৌওং লৈহনগনি।

ভারত অমসুং ই.য়ু.না পেরিস এগ্রীমেন্তকী পান্দম ফংনবা খোঙফম চেৎলিবা অমসুং অইং-অশা হোংবগী খুদোংচাদবশিং হন্থহনবা, চাননা হিংবা অমসুং নীংহন্নদনা মাইয়োক্নবগী পুন্না হোৎনমিন্নরিবা থৌওংশিংদা মপাঙ্গল হাপ্পগা লোয়ননা সি.ও.পি.২৬কী হীরমদা শেল-থুমগী ৱাফম য়াওনা মসিবু থবক ওইনা পাংথোক্নবা পাম্বৈ অমা শীনবগী ৱাফম্বু নৌহৌননা নীংশিংখি। ই.য়ু.না সি.দি.আর.আই. য়াওনবা ৱারেপ লৌখিববুসু ভারতনা তরাম্না ওকখি। ভারত অমসুং ই.য়ু.না এ.আই. অমসুং দিজিতেল ইনভেস্তমেন্ত ফোরমগী মতাংদা জোইন্ত তাস্ক ফোর্স অমা ঙন্না থবক হৌহনখিবা থৌওংগী খুত্থাংদা ৫জি., এ.আই., ক্বান্তম অমসুং হাই-পর্ফোরমেন্স কম্প্যুতিংগুম্বা দিজিতেল অমসুং চৎনবা হৌরক্লিবা তেক্নোলোজীশিংগী মতাংদা নাকল অনিগী তেংবাংনবগী থবকশিং হেন্না ফগৎহন্নবা য়ানবা পুরকখি।

লুচিংবশিংনা কাউন্তর তেরোরিজম, সাইবরসেক্যুরিতী অমসুং মেরিতাইম কো-ওপরেসন য়াওনা মখোয়গী মফম অমসুং মালেমগী খুদোংচাদবশিংনা মান্নবা হেনগৎলকপা অসি অফবা ফীভম অমনি হায়বা য়ানখি। লুচিংবশিংনা অয়েৎপা লৈতবা, পুম্নমক্কী ওইবা, মীপুম খুদিংমক্না শরুক য়াবা অমসুং কাংলোন্দা য়ুম্ফম ওইবা ইন্দো-পেসিফিক্কী মরু ওইবশিং শক-খঙখিবগা লোয়ননা ভারতকী ইন্দো-পেসিফিক ওসীন’স ইনিসিএতিব অমসুং ই.য়ু.গী ইন্দো-পেসিফিক্কী অনৌবা থৌরাং য়াওনা লমদম অসিদা হেন্না নকশিন্ননা থবক তৌমিন্নবগী য়ানবসু পুরকখি।

লুচিংবশিংগী মীফম অসিগা তান-চানবা অমা ওইনা, অইং-অশা, দিজিতেল অমসুং হেল্থকেয়রগী মতাংদা খুৎশম্নদুনা চৎপা য়াবা হীরমশিং খঙদোকপগী ভারত-ই.য়ু. ব্যুজিনেস রাউন্দতেবল অমসু মান্নবা মতমদা ফমখি। পুনে মেত্রো রেল প্রোজেক্তকী য়ুরো মিলিয়ন ১৫০গী শেল-থুমগী কন্ত্রেক্ত অমসু ভারত সরকারগী শেল-থুম মন্ত্রালয় অমসুং য়ুরোপিয়ন ইনভেস্তমেন্ত বেঙ্ককা খুৎয়েক পীনখ্রে। ভারত-ই.য়ু. লুচিংবশিংগী মীফম্না স্ত্রেতজিক পার্ত্নরশিপ অসিদা অনৌবা মাইকৈ অমা পীবগী মশক থোকপা থবক অমা পাংথোকখিবগা লোয়ননা জুলাই ২০২০দা পাংথোকখিবা ১৫শুবা ভারত-ই.য়ু. সম্মিত্তা য়ানবা পুরকখিবা মিৎয়েং শানবা ভারত-ই.য়ু. রোদমেপ ২০২৫বু থবক ওইনা পাংথোকপগী অনৌবা ইথিল অমসু পীখি।

***