ରାଷ୍ଟ୍ରପତିଙ୍କ ସଚିବାଳୟ
ଏକବିଂଶ ଶତାଦ୍ଦୀରେ ଭାରତକୁ ଜ୍ଞାନର ବିଶ୍ୱସ୍ତରୀୟ ମହାଶକ୍ତିରେ ପରିଣତ କରିବା ହେଉଛି ଜାତୀୟ ଶିକ୍ଷାନୀତିର ଏକ ଲକ୍ଷ୍ୟ ଏବଂ ଏହି ଜାତୀୟ ଲକ୍ଷ୍ୟଗୁଡିକୁ ହାସଲ କରିବା ନିମନ୍ତେ ଏନ୍ଆଇଟି ରାଉରକେଲା ଭଳି ପ୍ରତିଷ୍ଠାନଗୁଡିକୁ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିବାକୁ ପଡିବ: ରାଷ୍ଟ୍ରପତି କୋବିନ୍ଦ
ଏନ୍ଆଇଟି ରାଉରକେଲାର ୧୮ତମ ଉତ୍ସବରେ ଯୋଗଦେଲେ ଭାରତର ରାଷ୍ଟ୍ରପତି
Posted On:
21 MAR 2021 7:00PM by PIB Bhubaneshwar
ଏକବିଂଶ ଶତାଦ୍ଦୀରେ ଭାରତକୁ ଜ୍ଞାନର ବିଶ୍ୱସ୍ତରୀୟ ମହାଶକ୍ତିରେ ପରିଣତ କରିବା ହେଉଛି ଜାତୀୟ ଶିକ୍ଷାନୀତିର ଏକ ଲକ୍ଷ୍ୟ ଏବଂ ଏହି ଜାତୀୟ ଲକ୍ଷ୍ୟଗୁଡିକୁ ହାସଲ କରିବା ନିମନ୍ତେ ଏନଆଇଟି ରାଉରକେଲା ଭଳି ପ୍ରତିଷ୍ଠାନଗୁଡିକୁ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିବାକୁ ପଡିବ ବୋଲି ଭାରତର ରାଷ୍ଟ୍ରପତି ରାମନାଥ କୋବିନ୍ଦ କହିଛନ୍ତି । ଓଡିଶାର ରାଉରକେଲାଠାରେ ଆଜି (ମାର୍ଚ୍ଚ ୨୧, ୨୦୨୧) ଏନ୍ଆଇଟି ରାଉରକେଲାର ଅଷ୍ଟାଦଶ ସମାବର୍ତନ ଉତ୍ସବରେ ସେ ଉଦବୋଧନ ଦେଇଛନ୍ତି ।
ରାଷ୍ଟ୍ରପତି କହିଛନ୍ତି ପୂର୍ବ ଭାରତର ଦ୍ୱିତୀୟ ସର୍ବବୃହତ ସରକାରୀ ପ୍ରଯୁକ୍ତିବିଦ୍ୟା ପ୍ରତିଷ୍ଠାନ ଭାବରେ ଏନ୍ଆଇଟି ରାଉରକେଲା ଇଞ୍ଜିନିୟରିଂ ଓ ପ୍ରଯୁକ୍ତି ବିଦ୍ୟା କ୍ଷେତ୍ରକୁ ଉଲ୍ଲେଖନୀୟ ଅବଦାନ ରଖିଛି । ଛଅ ଦଶନ୍ଧିରୁ ଅଧିକ ସମୟ ଧରି ଏହି ପ୍ରତିଷ୍ଠାନ ଦେଶର ବୈଷୟିକ ବୃତିଧାରୀମାନଙ୍କୁ ସମୃଦ୍ଧ କରିଆସୁଛି ।
ସମଗ୍ର ଭାରତ ଏବଂ ଅନ୍ୟାନ୍ୟ ଦେଶରୁ ବହୁ ଛାତ୍ରଛାତ୍ରୀ ଏନ୍ଆଇଟିରେ ଅଧ୍ୟୟନ କରୁଥିବା ବିଷୟ ଉଲ୍ଲେଖ କରି ରାଷ୍ଟ୍ରପତି କହିଛନ୍ତ ୭୦୦୦ରୁ ଉର୍ଦ୍ଧ୍ୱ ଛାତ୍ରଛାତ୍ରୀଙ୍କ ଏହି ୭୦୦ ଏକରର କ୍ୟାମ୍ପସ ସମୃଦ୍ଧ ବିବିଧତାର ପ୍ରତିନିଧିତ୍ୱ କରୁଛି । ଏହା ଶିକ୍ଷାର ପରାଗଣ ନିମନ୍ତେ ଅନୁକୂଳ ପରିବେଶ ସୃଷ୍ଟି କରିବା ସହ ବିଭିନ୍ନ ସଂସ୍କୃତି ମଧ୍ୟରେ ସମନ୍ୱୟକୁ ପ୍ରୋତ୍ସାହିତ କରିଥାଏ । ଏହା ମଧ୍ୟ ବିଭିନ୍ନ ଦେଶର ଲୋକଙ୍କ ମଧ୍ୟରେ ପ୍ରତ୍ୟକ୍ଷ ସମ୍ପର୍କକୁ ମଜବୁତ କରିଥାଏ ।
ବୈଷୟିକ ଶିକ୍ଷାରେ ଅପେକ୍ଷାକୃତ କମ୍ ସଂଖ୍ୟକ ମହିଳାମାନଙ୍କ ଯୋଗଦାନ ପ୍ରସଙ୍ଗ ଉତ୍ଥାପନ କରି ରାଷ୍ଟ୍ରପତି କହିଛନ୍ତି ଯେ, ସେ ସମଗ୍ର ଦେଶରେ ଯେତିକି ସମାବର୍ତନ ସମାରୋହରେ ଯୋଗ ଦେଇଛନ୍ତି ସେଥିମଧ୍ୟରୁ ଅଧିକାଂଶ ଉତ୍ସବରେ ସେ ଦେଖିଛନ୍ତି ଯେ କଳା, ମାନବ ବିଜ୍ଞାନ, ଚିକିତ୍ସା ବିଜ୍ଞାନ, ଆଇନ୍ ଓ ଅନ୍ୟାନ୍ୟ ବହୁ ବିଷୟରେ ଛାତ୍ରୀମାନେ ଛାତ୍ରମାନଙ୍କଠାରୁ ଅଧିକ ଭଲ ପ୍ରଦର୍ଶନ କରୁଛନ୍ତି । ତେବେ ବୈଷୟିକ ଏବଂ ବିଜ୍ଞାନ ପାଠ୍ୟକ୍ରମରେ ମହିଳାମାନଙ୍କର ନାମଲେଖା କମ୍ ରହୁଥିବାର ଲକ୍ଷ୍ୟ କରାଯାଉଛି । ଏକ ସଦ୍ୟ ସର୍ବେକ୍ଷଣ ଅନୁଯାୟୀ ସମଗ୍ର ଭାରତର ଇଞ୍ଜିନିୟରିଂ ଓ ବୈଷୟିକ ପ୍ରତିଷ୍ଠାନଗୁଡିକରେ ମହିଳାମାନଙ୍କର ସଂଖ୍ୟା ମାତ୍ର ୨୦ ପ୍ରତିଶତ । ଛାତ୍ରୀମାନେ ଯେଭଳି ଅନ୍ୟାନ୍ୟ କ୍ଷେତ୍ରରେ ଉତ୍କର୍ଷ ପ୍ରତିପାଦନ କରୁଛନ୍ତି ବୈଷୟିକ ଶିକ୍ଷା କ୍ଷେତ୍ରରେ ମଧ୍ୟ ସେହି ସମାନ ପ୍ରଦର୍ଶନ ନିମନ୍ତେ ସେମାନଙ୍କୁ ଉତ୍ସାହିତ କରାଯିବା ଉପରେ ସେ ଗୁରୁତ୍ୱାରୋପ କରିଛନ୍ତି । ବୈଷୟିକ କ୍ଷେତ୍ରରେ ମହିଳାମାନଙ୍କ ଉତ୍କର୍ଷ ଓ ଉନ୍ନତି ଜାତୀୟ ବିକାଶକୁ ଏକ ନୂତନ ଦିଗଦର୍ଶନ ଦେବ ବୋଲି ସେ କହିଛନ୍ତି । ଏହା ବିଜ୍ଞାନ ଓ ପ୍ରଯୁକ୍ତିବିଦ୍ୟା କ୍ଷେତ୍ରର ଉଚ୍ଚତର ସ୍ତରରେ ଲିଙ୍ଗଗତ ସଶକ୍ତିକରଣକୁ ପ୍ରୋତ୍ସାହିତ କରିବ । ଏକବିଂଶ ଶତାଦ୍ଦୀର ବିଶ୍ୱରେ ଅନ୍ୟତମ ଗୁରୁତ୍ୱପୂର୍ଣ୍ଣ ସ୍ତରରେ ମହିଳାମାନଙ୍କୁ ଅଦୃଶ୍ୟ ଅନ୍ତରାୟରୁ ଉନ୍ମୁକ୍ତ ହେବା ନିମନ୍ତେ ମଧ୍ୟ ଏହା ସହାୟକ ହେବ ।
କର୍ପୋରେଟ ସାମାଜିକ ଦାୟିତ୍ୱବୋଧ ଭଳି ବିଶ୍ୱବିଦ୍ୟାଳୟ ସାମାଜିକ ଦାୟିତ୍ୱବୋଧର ଆବଶ୍ୟକତା ଉପରେ ଉଲ୍ଲେଖ କରି ରାଷ୍ଟ୍ରପତି କହିଛନ୍ତି, ବିଶ୍ୱବିଦ୍ୟାଳୟ ଏବଂ ଅନୁଷ୍ଠାନଗୁଡିକ ସେମାନଙ୍କ ଆଖପାଖର ସମ୍ପ୍ରଦାୟଗୁଡିକୁ ସଶକ୍ତ କରିବା ଦିଗରେ ନିଶ୍ଚିତ ଭାବେ ଅବଦାନ କରିବା ଉଚିତ୍ । ‘ଉନ୍ନତ ଭାରତ ଅଭିଯାନ’ର ଅଂଶସ୍ୱରୂପ ଏନ୍ଆଇଟି ରାଉରକେଲା ୫ଟି ଗ୍ରାମକୁ ପୋଷ୍ୟଗ୍ରାମ ଭାବେ ଗ୍ରହଣ କରି ସେହି ଗ୍ରାମଗୁଡିକରେ ବିଜ୍ଞାନ ପରୀକ୍ଷାଗାରଗୁଡିକୁ ଉନ୍ନୀତ କରିବା ସହ ସେଠାରେ କମ୍ପ୍ୟୁଟର ଶିକ୍ଷା ଯୋଗାଇ ଦେଇଥିବାରୁ ରାଷ୍ଟ୍ରପତି ଖୁସି ବ୍ୟକ୍ତ କରିଛନ୍ତି । ସେ ଆହୁରି କହିଛନ୍ତି ଯେ ଏହି କ୍ୟାମ୍ପସରେ ଥିବା ଦାରିଦ୍ର୍ୟ ଉନ୍ମେଳନ ଗବେଷଣା କେନ୍ଦ୍ର ଓଡିଶାର କଳାହାଣ୍ଡି, ବଲାଙ୍ଗୀର ଓ କୋରାପୁଟ ଅଂଚଳର ଅବହେଳିତ ଲୋକମାନଙ୍କ ଉନ୍ନତି ଦିଗରେ କାର୍ଯ୍ୟ କରୁଛି । ଏଭଳି ପ୍ରଶଂସନୀୟ ପଦକ୍ଷେପ ନିମନ୍ତେ ସେ ଏନ୍ଆଇଟି ରାଉରକେଲାକୁ ସାଧୁବାଦ ଜଣାଇଛନ୍ତି ।
ଜାତୀୟ ଶିକ୍ଷାନୀତି ୨୦୨୦ର କାର୍ଯ୍ୟକାରୀତା ସମ୍ପର୍କରେ ଉଲ୍ଲେଖ କରି ରାଷ୍ଟ୍ରପତି କହିଛନ୍ତି ଯେ ଇଞ୍ଜିନିୟରିଂ ପ୍ରତିଷ୍ଠାନଗୁଡିକ କଳା ଏବଂ ମାନବ ବିଜ୍ଞାନ ଉପରେ ଅଧିକ ଗୁରୁତ୍ୱ ପ୍ରଦାନ ପୂର୍ବକ ଅଧିକ ସାମଗ୍ରିକ ଏବଂ ବହୁମୁଖୀ ଶିକ୍ଷା ଆଡକୁ ଅଗ୍ରସର ହେବା ଏହି ନୀତିର ଲକ୍ଷ୍ୟ । ଏନ୍ଆଇଟି ରାଉରକେଲା ଏହି ଆଭିମୁଖ୍ୟକୁ କିଛି ମାତ୍ରାରେ ଆପଣାଇ ସାରିଛି ବୋଲି ସେ କହିଛନ୍ତି । ଏନ୍ଆଇଟି ରାଉରକେଲା ଏହି ପ୍ରକ୍ରିୟାକୁ ଆହୁରି ଆଗକୁ ନେବା ସହ ଜାତୀୟ ଶିକ୍ଷା ନୀତିର ଅନ୍ୟାନ୍ୟ ପ୍ରମୁଖ ବିଷୟଗୁଡିକୁ କାର୍ଯ୍ୟକାରୀ କରିବ ବୋଲି ସେ ବିଶ୍ୱାସ ପ୍ରକଟ କରିଛନ୍ତି । ଏକବିଂଶ ଶତାଦ୍ଦୀରେ ଭାରତକୁ ଜ୍ଞାନର ବିଶ୍ୱସ୍ତରୀୟ ମହାଶକ୍ତିରେ ପରିଣତ କରିବା ହେଉଛି ଜାତୀୟ ଶିକ୍ଷାନୀତିର ଏକ ଲକ୍ଷ୍ୟ ଏବଂ ଏହି ଜାତୀୟ ଲକ୍ଷ୍ୟଗୁଡିକୁ ହାସଲ କରିବା ନିମନ୍ତେ ଏନଆଇଟି ରାଉରକେଲା ଭଳି ପ୍ରତିଷ୍ଠାନଗୁଡିକୁ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିବାକୁ ପଡିବ ବୋଲି ସେ କହିଛନ୍ତି ।
ଦୟାକରି ରାଷ୍ଟ୍ରପତିଙ୍କ ଅଭିଭାଷଣ ଦେଖନ୍ତୁ
***
JPM
(Release ID: 1706497)
Visitor Counter : 112