نئی دہلی، 5 ؍مارچ : وزیراعظم جناب نریندر مودی نے  آج ویڈیو کانفرنس کے ذریعے محکمہ برائے صنعت  اور  بین الاقوامی تجارت  اور نیتی آیوگ کے ذریعے  منعقدہ  پیدا وار سے منسلک ترغیبات (پی ایل آئی)  اسکیم سے متعلق ایک ویبنار سے خطاب کیا۔

 اس سال کے  مرکزی بجٹ میں  تجارت اور صنعت کو فروغ دینے کے لئے کئے گئے اقدامات پر اظہار خیال کرتے ہوئے وزیراعظم نے کہا کہ پچھلے 6 برسوں کے دوران  میک ان انڈیا  کی  مختلف سطحوں پر حوصلہ افزائی کرنے کے لئے متعدد کامیاب کوششیں کی گئی ہیں۔ انہوں نے  مینو فیکچرنگ کو فروغ دینے کے لئے رفتار اور پیمانے میں  اضافہ کرنے میں ایک بڑی چھلانگ لگانے کی ضرورت پر زور دیا۔ انہوں نے  دنیا بھر کی  مثالوں کا حوالہ دیا، جہاں  ممالک نے  اپنی مینو فیکچرنگ  کی صلاحیتوں میں اضافہ کرکے ملک کی ترقی کی رفتار کو  تیز کیا ہے۔ انہوں نے کہا کہ  مینو فیکچرنگ کی صلاحیتوں میں  اضافے سے  ملک میں روز گار کے مواقع میں اضافہ ہوگا۔

وزیراعظم نے کہا کہ حکومت کی  سوچ واضح ہے -  کم سے کم حکمرانی ، زیادہ سے زیادہ  گورننس اور حکومت زیرو ایفکٹ، زیر و ڈیفکٹ کی توقع کرتی ہے۔ انہوں نے کہا کہ حکومت صنعت ، مثلا  تجارت کرنے کی آسانی ، قوانین پر عمل در آمد کے بوجھ کو کم کرنے، لاجسٹک لاگتوں کو کم کرنے کے لئے ، کثیر ماڈل بنیادی ڈھانچے کی تعمیر ، ضلعی سطح پر آمدات کے مراکز  تعمیر کرنے کے لئے ہر سطح پر  کام کر رہی ہے۔

 انہوں نے کہا کہ  حکومت  اس بات پر یقین رکھتی ہے کہ ہر ایک چیز میں  حکومت کی مداخلت سے  حل کے بجائے مزید مسائل ہوتے ہیں۔ لہذا  خود  سیلف ریگولیشن ، سیلف اٹیسٹنگ اور سیلف سرٹیفکیشن پر  زور دیا جا رہا ہے۔ انہوں نے  ہندوستانی  کمپنیوں کو  اور ہندوستان میں کی جارہی مینوفیکچرنگ کو  عالمی سطح پر  مسابقتی بنانے  کی ضرورت  پر زور دیا۔ اسی طرح انہوں نے  ہماری پیداواری لاگت  ،مصنوعات، معیار  اور اس کی  افادیت  کے لئے  عالمی سطح پر پہچان پیدا کرنے کی ضرورت پر زور دیا۔ انہوں نے مزید کہا کہ ہمیں  اپنی  بنیادی  صلاحیت سے متعلق شعبوں میں جدید ترین ٹیکنالوجی اور زیادہ سے زیادہ  سرمایہ کاری کو  راغب کرنا ہوگا۔

سابقہ  اسکیموں اور موجودہ حکومت کی اسکیموں کے درمیان فرق کو  اجاگر کرتے ہوئے وزیراعظم نے کہا کہ  پہلے  صنعتی ترغیبات کا استعمال  کھلی سطح پر  اِن پٹ پر مبنی  سبسڈی کے لئے ہوتا تھا، اب  انہیں ایک مسابقتی عمل کے ذریعے  کارکردگی کی بنیاد پر  نشان زد کیا گیا ہے۔ وزیراعظم نے کہا کہ  پہلی مرتبہ  پیدا وار  سے منسلک ترغیبات کے تحت  13 سیکٹروں کو لایا گیا ہے۔ پیدا وار سے منسلک ترغیبات  (پی ایل آئی ) سے سیکٹر سے وابستہ  مکمل ماحولی نظام کو فائدہ پہنچا ہے۔  آٹو اور فارما میں  پی ایل آئی سے  آٹو کے  پرزے  ،طبی سامان اور  دواؤ کے  خام مٹیریل سے متعلق  غیر ملکی انحصار  بہت کم ہوگا۔ انہوں نے مزید کہا کہ  اعلی ترقی یافتہ سیل بیٹریوں،  سولر پی  وی ماڈیولز اور  اسپیشیلٹی اسٹیل کی مدد سے   ملک کے اندر  توانائی کے شعبے کو  جدید تر بنایا جائے گا۔ اسی طرح  ٹیکسٹائل اور خوراک کی ڈبہ بندی کے سیکٹر  کے لئے پیدا وار سے منسلک ترغیبات  (پی ایل آئی)  سے  پورے زرعی سیکٹر کو  فائدہ ہوگا۔

وزیراعظم  نے  کہا کہ  یہ نہایت فخر کی بات ہے کہ  ہندوستان کی تجویز  پر  اقوام متحدہ نے  سال  2023  کو  باجرہ کا بین الاقوامی سال  قرار دیا ہے۔ انہوں نے کہا کہ  70  سے زیادہ ملک ہندوستان کی تجویز کی حمایت کے لئے آگے آئے اور  اس تجویز کو اتفاق رائے سے  اقوام متحدہ جنرل اسمبلی میں  منظور کیا گیا۔ انہوں نے کہا کہ  یہ ہمارے کسانوں کے لئے بھی  ایک بڑا موقع ہے۔ انہوں نے  باجرے کی  تغذیاتی صلاحیت  یا   لوگوں کو  بیماری سے بچانے کے لئے موٹے اناج کی تغذیاتی صلاحیت سے متعلق 2023  میں   عالمی سطح پر ایک  مہم شروع کرنے پر زور دیا۔ انہوں نے کہا کہ  اقوام متحدہ کی جانب سے  2023  کو  باجرے کے  بین الاقوامی  سال  کے اعلان کے ساتھ ہی  اندرون  ملک اور  بیرون ملک باجرے کی مانگ میں تیزی سے اضافہ ہوگا اور اس سے ہمارے  کاشت کاروں کو بے حد فائدہ ہوگا۔ انہوں نے  زراعت اور خوراک کی ڈبہ بندی کے سیکٹر کو بھی  اس موقع  سے بھر پور فائدہ اٹھانے کی  تاکید کی۔

وزیراعظم نے اس بات کو اجاگر کیا کہ  اس سال کے بجٹ میں پی ایل آئی اسکیم  سے متعلق  اسکیموں کے لئے تقریباً  دو لاکھ  کروڑ روپے  مختص کئے گئے ہیں۔ پیدا وار کا اوسطاً پانچ فیصد ترغیبات کے طور پر  دیا جاتا ہے۔ اس کا مطلب ہے کہ پی ایل آئی اسکیموں سے  اگلے پانچ برسوں کے دوران ملک میں  520 بلین امریکی ڈالر کی مالیت  کی  پیداوار ہوگی۔ یہ بھی  تخمینہ لگایا گیا ہے کہ جن  شعبوں کے لئے  پی ایل آئی اسکیم تشکیل دی گئی ہے، اس میں  افرادی قوت دو گنی ہو جائے گی۔

 وزیراعظم نے کہا کہ  پی ایل آئی سے متعلق اعلانات کو تیزی کے ساتھ  نافذ  کیا جا رہا ہے۔ انہوں نے کہا کہ حال ہی میں آئی ٹی ہارڈ ویئر اور ٹیلی کام  آلات مینوفیکچرنگ میں  منظور شدہ  پی ایل آئی  اسکیموں کی وجہ سے  پیداوار  اور  گھریلو  ویلو ایڈیشن میں  غیر معمولی اضافہ ہوگا۔ تخمینہ ہے کہ آئی ٹی ہارڈ ویئر اگلے 4 برسوں میں  تین ٹریلین  روپے کی مالیت کی پیداوار  کو حاصل کرلے گی اور گھریلو  ویلو ایڈیشن  میں  اگلے پانچ برسوں میں  موجودہ پانچ سے دس فیصد سے 20 سے 25   فیصد تک  اضافے کی توقع ہے۔ اسی طرح ٹیلی کام کے آلات کی تیاری میں  اگلے 5  برسوں میں  تقریبا 2.5  لاکھ کروڑ روپے  کا اضافہ ہوگا۔ وزیراعظم نے کہا کہ  ہمیں اس پوزیشن میں ہونا چاہئے کہ ہم  اس سے  2  لاکھ کروڑ روپے  کی مالیت  کی بر آمدات کرسکیں۔

وزیراعظم نے  امید ظاہر کی کہ  پی ایل آئی کے  سبب  فارما سیکٹر میں  اگلے 5-6 برسوں کے دوران  15  ہزار کروڑ روپے سے زیادہ  کی سرمایہ کاری  ہوگی اور  فارما  کی فروخت  3 لاکھ کروڑ روپے ہوگی اور  بر آمدات  میں  دو لاکھ کروڑ روپے کی مالیت  کا اضافہ ہوگا۔

وزیراعظم نے زور دے کر کہا کہ  جس طرح ہندوستان آج  انسانیت کی خدمت کر رہا ہے، ہندوستان  دنیا بھر میں ایک بڑا برانڈ  بن چکا ہے۔ ہندوستان کا اعتبار اور ہندوستان کی شناخت مسلسل  نئی بلندیوں کو چھو رہی ہیں۔ انہوں نے کہا کہ  برانڈ  ہندوستان  مسلسل  نئی اونچائیوں کو  چھو رہا ہے۔ انہوں نے کہا کہ ہماری  دواؤں ، ہمارے طبی پیشہ ور افراد اور ہمارے طبی آلات  کے سلسلے میں پوری دنیا میں اعتماد میں اضافہ ہوا ہے۔ اس اعتماد سے فائدہ اٹھانے کے لئے  انہوں نے  فارما سیکٹر سے زور دے کر کہا  کہ وہ اس کے لئے طویل مدتی حکمت عملی  وضع کریں۔ انہوں  نے کہا کہ  پی ایل آئی اسکیم کو  ہندوستان میں موبائل فون  اور الیکٹرانک  سازو سامان کو تیار کرنے کے لئے  گزشتہ سال  شروع کیا گیا تھا۔ وبا کے دوران بھی   اس سیکٹر  نے پچھلے برس  35  ہزار کروڑ روپے کی مالیت  کا سامان  تیار کیا اور   اس سیکٹر  میں تقریبا 1300  کروڑ روپے  کی  نئی سرمایہ کاری ہوئی۔ اس  علاوہ  اس  سیکٹر نے  ہزاروں  نئی ملازمتیں پیدا کیں۔

وزیراعظم نے کہا کہ  پی ایل آئی اسکیم سے  ملک کے ایم ایس ایم ای  ماحولی نظام پر  بڑا  اثر پڑے گا۔ اس کے  ذریعے  ہر ایک  سیکٹر میں  یونٹیں پیدا ہوں گی، جس سے مکمل ویلیو چین میں  ایک نئے سپلائر بیس کی ضرورت ہوگی۔ انہوں نے صنعت پر زور دیا کہ  وہ  پی ایل آئی اسکیم میں شامل ہو کر  اس سے فائدہ اٹھائیں۔ انہوں نے کہا کہ  صنعت کا فوکس  اپنے ملک اور دنیا کے لئے  بہترین معیار کے  سامان تیار کرنے پر  ہونا چاہئے۔ انہوں نے  صنعت پر زور دیا کہ وہ  تیزی کے ساتھ  بدلتی ہوئی دنیا کی  ضرورتوں کے مطابق  اختراعات کرے، تحقیق وترقی میں  ہماری  شراکت داری کو بڑھائے،  افرادی قوت کی صلاحیتوں کو جدید تر بنائے  اور نئی ٹیکنالوجی کا استعمال کرے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ش ح۔ م ع۔ ق ر

4U- 218