শেল-থুমগী সেক্তরগা মরী লৈনবা ঐহাক্কী মরূপ খুদিংদা ইকায়-খুম্নবা উৎচরি। হন্দক্কী চহিগী বজেৎ অসিদা মরু ওইবা খোঙথাং কয়া পায়খৎখ্রে হায়বসি নখোয় খুদিংনা খঙনরবনি। বেঙ্কিং ওইরো, নন-বেঙ্কিং নত্ত্রগা ইন্স্যুরেন্স ওইরো, ঐখোয়না শেল-থুমগী হীরম খুদিংমকপু মপাঙ্গল হেনগগৎহন্নবা থৌরাং অমা মীয়ামদা উৎলি। পব্লিক সেক্তর ইন্সতিত্যুসনশিংবু মতৌ করম্না কনখৎহন্নবা  অমসুং প্রাইভেৎ সেক্তরনা শরুক য়ারকপগী থৌওংবু পাকথোক-চাউথোকহন্নবা ঐখোয়না হোৎনরিবা অসিসু নখোয়না ফংলবনি। বজেৎকী মতুংদা হীরমসিদা ৱারী শাবসি য়াম্না মরু ওইগনি মরমদি পব্লিক অমসুং প্রাইভেৎ সেক্তর অনিমক্না খোঙথাংশিং অসি তুং লমচৎকীদমক্তা পায়খৎমিন্নগদবনি। সরকারনা হীরম কয়া অমবু হান্না তৌদবা য়াদে অমসুং মসিদা খোঙফম চেৎলিবা অসিগী মরমদা নখোয়না খঙগদবনি, অমসুং য়াম্না মরু ওইবা অমা ওইনা, সরকারনসু নখোয়গী পাউতাক অমসুং অনিংবা-অপাম্বশিংবুসু খঙগদবনি। ঐখোয়না লৈবাক অসিবু ২১শুবা চহি-চাদা পুরক্নবা হোৎনরিবা অয়াঙবা খোঙজেল অসিদা নখোয়না তেংবাংবগী মথৌসু য়াম্না তাই অমসুং মসিনা মরম ওইদুনা, হৌজিক ওইরিবা মালেমগী ফিভমগী খুদোংচাবা লৌনবগীদমক্তা ঙসি শান্নগদৌরিবা ৱারীশিং অসি য়াম্না মরু ওইগনি।

মরূপশিং,

সরকারনা লৈবাক অসিগী শেল-থুমগী সেক্তরগী মতাংদা য়েংলিবা মিৎয়েং অসি য়াম্না ময়েক লারে। করিগুম্বা অমসুং য়ানি-য়ারোই হায়না খন্নবগী মফম অমত্তা লৈতে। ঐখোয়না খ্বাইদগী ইহান-হানবা ওইনা পাংথোক্কদবা অসিদি শেল থম্লিবা অমসুং শেল থাদরিবশিং অসিনা থাজবা অমসুং নুং-পান ফাওনা উবা ঙম্বগী মতিক লৈগদবনি। ঐখোয়গী লৈবাক্কী শেল-থুমগী পথাপ অসিনা পোৎলম অমদা য়ুম্ফম ওইরি – পোৎলম অদুদু ‘থাজবা’ হায়বসিনি। মহাক্না তাল্লিবা শেলগী ঙাক-শেন্দুনা থমগনি হায়বগী থাজবা, মহাক্কী থাদরিবা শেনফম অদুনা চাউখৎলক্কনি হায়বগী থাজবা অমসুং লৈবাক অসি চাউখৎলক্কনি হায়বগী থাজবা। বেঙ্কিং অমসুং নন-বেঙ্কিং সেক্তরদা চৎনরম্বা অরিবা থৌওংশিংদা অচৌবা অহোংবা লাক্লি। হৌজিক্তি, অহোংবা পুরকপা হায়বসি ঐখোয়গীসু তঙাই-ফদবা অমা ওইরে। অনম কন্দুনা শেল পুহনবদগী ঐখোয়গী লৈবাক্কী শেল-থুমগী ফিভমদা চহি ১০-১২গী মমাংদা অকায়বা কয়া লৈখিবদু নখোয় খুদিংনা খঙনরবনি। নুং-পান ফাওনা উদবা ক্রেদিৎকী চৎনবীদগী থোক্লক্নবা তোঙাংবা খোঙথাং কয়া অমা পায়খৎলি। হৌজিক্তি, এন.পি.এ.বু কার্পেৎকী মখাদা থমজিনবা, মফম কয়াদা উত্তুনা নান্থোকপগী মহুত্তা, নুমিৎ ১গী এন.পি.এ. পাউদম্বসু তঙাই ফদবা ওইরে।

মরূপশিং,

সরকারনা কারবারদা অকুম-অকা কয়া লৈ হায়বা অসিসু নীংথিনা খঙলি। কারবার খুদিংমক মাই পাক্কনি অমসুং অপাম্বা শেন্দোং তানগনি হায়বা লৈতে হায়বা অসিসু সরকারনা য়ারবা ৱাফম্নি। ঐখোয়না করিগুম্বা মতমদা ঐখোয়গী ইচা-ইশুশিংনা ঐখোয়না অপাম্বা তৌরক্তবা মতমদা ৱাখল খরা খন্থনৈ। কনানবু মচাশিংবু মাই পাক্তবা পাম্বগে, অদুবু মসিসু থোক্তবা নত্তে। মরম অদুনা, সরকারনা হীরমশিং অসি নীংথিজনা খঙই। কারবারগী ৱারেপ খুদিংমক্তা অরানবা ৱাখল অমসুং মশাগী ওইজবা থিবগী থৌওং লৈতে হায়বা ফাওবদি সরকারনা খঙদবা নত্তে। মরম অদুনা, অশেংবা ৱাখলগা লোয়ননা লৌখিবা ৱারেপশিংদা থাজবা অমসুং মদুবু শৌগৎপা অসি সরকারগী তৌফম থোকপা থৌদাংনি অমসুং তুংদসু অদুমক শৌগৎকনি। অচুম্বা ৱাখল্লোনগা লোয়ননা পাংথোকখিবা থবক খুদিংগীদমক্তদি ঐহাক্না মতম পুম্বদা লেপ্তুনা লৈগনি হায়না ঐহাক্না শেল-থুমগী সেক্তরদা লৈরিবা মীওইশিংদা হায়জনীংই। ঐঙোন্দা খুদম ওইনা লৌবীয়ু! ইন্সোল্ভেন্সী অমসুং বেঙ্ক্রপ্তসী কোদকী থৌওংশিং অসিনা শেল পুথোকপা অমসুং শেল পুশিনবা মীওইশিংদা মশাদা থাজবগী ইথিল পীরিবনি।

মরূপশিং,

অচম্বা ইমুংশিংগী চাগাবু ঙাক-শেনবা, সরকারগী খুদোংচাবশিংবু লায়রবশিংদা নীংথিনা অমসুং অতোপ্পদা চাইথোক্তনা য়ৌহনবা, লৈবাক চাউখৎহন্নবগীদমক্তা ইনফ্রাস্ত্রকচরগা মরী লৈনবা শেল-থাদবগী থৌওংশিংবু খুমাং চাউশিলহনবা হায়বসি ঐখোয়গী খ্বাইদগী হান্না পাংথোক্কদবা থৌওংশিংনি। মসিগী পান্দমশিং অসিবু মীয়ামদা খঙহন্নবগীদমক্তা, সেক্তরশিং অসিদা শেমদোকপগী থৌওংশিং অসি পাংথোকখ্রিবনি। মালেমগী খ্বাইদগী চাউবা শেল-থুমগী ইন্সতিত্যুসনবু মনুং চলহনবা ওইরো, দিজিতেলগী থৌওংশিংবু খ্বাইদগী চাউবা মওংদা মনুং চলহনবা ওইরো, অসিগুম্বা হকথেংননা তেংবাংবগী অচৌবা পাম্বৈশিংগুম্বা নত্ত্রগা অপিকপা বেঙ্কশিংবু পুন্সিনবগী পান্দম অসিদি ভারতকী শেল-থুমগী সেক্তরবু মপাঙ্গল কলহন্দুনা হকথেংননা মথৌ তৌবা ঙমহন্নবনি। হন্দক্কী চহিগী বজেৎ অসিদসু, ঐখোয়না মসিগী মঙলান অসি মাং-থানা পুখৎলিবনি।

মরূপশিং,

হন্দক্কী চহিসিদা, ঐখোয়না অনৌবা পব্লিক সেক্তর পোলিসী অমা লাউথোকখ্রে। মসিগী পোলিসী অসিদা ফাইনেন্সিএল সেক্তরসু মনুং চনগনি। ঐখোয়গী শেন্মিৎলোন্দা বেঙ্কিং অমসুং ইন্স্যুরেন্সকী মতিক য়াম্না লৈ। মসিগী ওইথোকপা য়াবশিং অসি য়েংলদুনা, ঐখোয়না হন্দক্কী বজেৎ অসিদা খোঙথাং কয়া অমা য়াওহল্লি। খোঙথাংশিং অসিগী মনুং চনবশিংদি পব্লিক সেক্তর বেঙ্ক অনি প্রাইভেতাইজেসন তৌবা, ইন্স্যুরেন্স সেক্তরদা লৈবা এফ.দি.আই. কেপ্পু ৭৪% ফাওবা হেনগৎহনবা, নত্ত্রগা এল.আই.সি.গী আই.পি.ও. হৌদোকপা অসিনি।

মরূপশিং,

ঐখোয়না লন্নাইগী ইন্তর্প্রাইসশিংবু য়ারিবমখৈ পুক্নিং থৌগৎনবা লেপ্তনা হোৎনরি। অদুবু, মসিগা লোয়ননা বেঙ্কিং অমসুং ইন্স্যুরেন্সকী হীরমদা পব্লিক সেক্তরনা নীংথিজনা শরক য়াবা অসি লৈবাক অসিগী য়াম্না তঙাই ফদবা হীরম অমা ওইরি। লায়রবা অমসুং শোত্থরবশিংবু ঙাক-শেনবগী মথৌসু য়াম্না তারি। পব্লিক সেক্তরবু মপাঙ্গল কনখৎহন্নবগীদমক্তা, ইক্বিতী কেপিতেল ইনফ্যুসন্দা অহেনবা মিৎয়েং চঙলি। মসিগী মথক্তা, বেঙ্কশিংগী এন.পি.এ.শিংবু শেন্ননবগীদমক্তা অনৌবা এ.আর.সি.গী মওং অমসু শেমগৎলিবনি। মসিগী এ.আর.আই. অসিনা লোনশিংবু অহেনবা মিৎয়েং চঙদুনা য়েংগনি। মসিনা পব্লিক সেক্তরগী বেঙ্কশিংগী মপাঙ্গল হেনগৎহনগনি অমসুং মখোয়না শেল পুথোকহনবা ঙম্বগী মতিকসু হেনগৎহনগনি।

মরূপশিং,

মান্নবা অমা ওইনা, ইনফ্রাস্ত্রকচর অমসুং ইন্দস্ত্রীগী প্রোজেক্ত খরা চাউখৎহন্নবগীদমক্তা অনৌবা দিভেলপমেন্ত ফাইনান্স ইন্সতিত্যুসন অমসু শেম্লি। মসিগী খোঙথাংশিং অসিবু ইনফ্রাস্ত্রকচর অমসুং ইন্দস্ত্রীগী প্রোজেক্তশিংগী মতম কুইনদগী লৈরক্লবা শেল-থুমগী তেংবাংগী মথৌ তাবশিং য়েংদুনা পায়খৎপনি। মসিগী মথক্তা, সোভরেন ৱেল্থ ফন্দ, পেন্সন ফন্দ অমসুং ইন্স্যুরেন্স কম্পেনীশিংদসু ইনফ্রাস্ত্রকচরদা শেল থাদহন্নবা পুক্নিং থৌগৎলি। কোর্পোরেৎ বোন্দ মার্কেৎশিংদা অশাংবা মতমগী বোন্দ পীবা ঙমহন্নবা অনৌবা বেকস্তোপ ফেসিলিতীশিংসু পীরিবনি।

মরূপশিং,

আত্মানির্ভর ভারতকী ইথিলবুসু ঐখোয়না নীংথিনা শেন্নরি। মরোমদোম লেপচবা ঙম্বা ভারত অসি অচৌবা ইন্দস্ত্রী নত্ত্রগা অচৌবা শহরশিংখক্তনা ওইহনগদবা নত্তে। মিসন অসিদা খুঙ্গং অমসুং অপিকপা শহরশিংগী অপিকপা ওন্তোপ্রিনর্শিং, মীচম মীয়াম্না তেংবাংবা অসি মিসন অসিগী ওইনা য়াম্না মরু ওইবা থৌওং অমা ওইগনি। মরোমদোম লেপচবা ঙম্বা ভারত অসি লৌমী অমসুং লৌউ-শিংউগী পোত্থোকশিংবু হেন্না ফগৎহন্নবা থবক তৌবা য়ুনিৎশিংনা ওইহনগদৌরিবনি। ঐখোয়গী এম.এস.এম.ই.শিং অমসুং স্তার্ত-অপশিংনা মরোমদোম লেপচবা ঙম্বা ভারত ওইহনগনি। অদুগা, আত্মানির্ভর ভারতকী অচৌবা তেংবাংদি ঐখোয়গী স্তার্ত-অপ অমসুং এম.এস.এম.ই.শিংদগী লাক্কনি। মরম অদুনা, কোরোনাগী মতম অসিদা এম.এস.এম.ই.শিংগী ওইবা থৌরাং কয়া অমা শেমখ্রবনি। চাউরাকপা ইন্তর্প্রাইস লাখ ৯০না মসিগী থৌরাং অসিগী কান্নবা লৌখি অমসুং ত্রিলিয়ন ২.৪গী ক্রেদিৎসু ফংখি। মসিগী এম.এস.এম.ই.শিং অমসুং স্তার্ত-অপশিং অসিদা শৌগত্তুনা শেল থাদবগী কান্নবশিং অসি নখোয়না খঙলবনি। সরকারনা লৌউ-শিংউ, কোয়লা অমসুং স্পেস সেক্তরশিংবু শেমদোকপা পুরক্নবগীদমক্তা অয়াবা কয়া পীখ্রবনি। হৌজিক্তি খুঙ্গংশিং অমসুং অপিকপা শহরশিংদা অসিগুম্বা অপাম্বা লৈববু মশক খঙদোক্তুনা মখোয়বু আত্মানির্ভর ভারতকী মপাঙ্গল ওইহনবা হায়বসি লৈবাক অসিগী শেল-থুমগী সেক্তরশিংগী থৌদাং ওইরবনি।

মরূপশিং,

ঐখোয়গী শেন্মিৎলোন অসিনা খোঙজেল য়াঙনা চাউখৎলকপগা লোয়ননা, ক্রেদিৎ ফ্লো অসিসু চপ মান্ননা মরু ওইরক্লি। অনৌবা সেক্তর অমসুং অনৌবা ওন্তোপ্রিনর্শিংদা মতৌ করম্না ক্রেদিৎ ফংহনগদগে হায়বসি নখোয়না য়েংশিনগদবনি। নখোয়না অনৌবা স্তার্ত-অপ অমসুং ফিন-তেকশিংগী অনৌবা অমসুং অফবা শেল-থুমগী পোত্থোক পুথোকপদা মিৎয়েং চঙগদবনি। ঐখোয়গী ফিন-তেকশিংনা ঙসিদি নীংথিনা থবক তৌরি অমসুং সেক্তর অসিগী তৌবা ঙম্বা মতিক খুদিংমক য়েংথোক্লি হায়বসি নখোয়না লোইনা খঙলবনি। ঐখোয়গী ফিন-তেকশিংনা কোরোনাগী মতমগী মনুংদা লোইশিনখিবা স্তার্ত-অপশিংগী য়ানবশিংদা শরুক য়াম্না য়াখি। হন্দক্কী চহি অসিদসু, মসিগী চৎনবী অসি মখা তাখিগনি হায়না অখঙ-অহৈশিংনা হায়রি, মরম অদুনা নখোয়নসু অনৌবা থৌওং কয়া অমা থিদোক্কদবনি। মান্নবা অমা ওইনা, ঐখোয়গী সোসিএল সেক্যুরিতী কভরেজ অসিবু মালেমগী ওইহন্নবা হোৎনবদা নহাক্কী করি থৌদাং করি ওইগদগে হায়বা অসিসু খঙগদবনি। নখোয়না হীরম অসিদা নীংথিনা খঙবনিনা, মসিগী ৱেবিনার অসিদগী অফবা পাউতাক অমসুং ৱাহৌদোক কয়া থোক্লক্কনি। অদুনা, ঐহাক্না নখোয় খুদিংমক্না নখোয়গী খ্বাইদগী ফজবা অদু পুথোকহন্নীংই। ঙসিগী খন্ন-নৈনবগী থৌরম অসিদগী থোক্লকপা মহৈ অসুনা আত্মানির্ভর ভারত অমসুং মীয়ামগী য়াই-য়ুম্বালগী থবকশিংদা য়াম্না তেংবাংগনি অমসুং মসিদা মীয়াম্না থাজবগী চাংসু হেন্না লুশিনহনগনি।

মরূপশিং,

চহি কয়া অসিগী মনুংদা, তেক্নোলোজী নীংথিজনা শিজিন্নবা অমসুং অনৌবা থৌওং পুথোকখিবা অসিনা শেল-থুমগী হীরম্বু পুম্নমক্তা মনুং চলহনবদা অচৌবা থৌদাং লৌখি। ঙসিদি, লৈবাক অসিগী মীওই করোর ১৩০গী আধার কার্দ লৈরে; লৈবাক মচা করোর ৪১ হেনবগী জন ধন একাউন্ত লৈরে। মসিগী মনুংদগী জন-ধনগী একাউন্ত চাউরাক্না ৫৫%দি নুপীশিংগীনি অমসুং মসিদা চাউরাক্না লুপা করোর লাখ অমগা মখায়দি হাপখ্রে। কোরোনাগী মতমগী মনুংদসু, জন ধন একাউন্তকী তেংবাংদগী ইচে-ইচল মিলিয়ন কয়াদা হকথেংননা তেংবাংবা ঙমখি। ঙসিদি, য়ু.পি.আই.না থা খুদিংগী লুপা করোর লাখ ৪ হেনবগী ত্রাঞ্জেক্সন তৌরি অমসুং রুপে কার্দকী মশিং অসিসু করোর ৬০ য়ৌরে। আধার অমসুং মীওই অমবু খুদক্তা শক্তাকপা য়াবা, ইন্দিয়া পোস্ত বেঙ্ককী চাউরবা নেৎৱর্ক অমসুং কম্মন সর্ভিস সেন্তর লাখ কয়া অমা লৈবদগী লৈবাক অসিগী মনুং-হঞ্জিনবা মফমশিংদা শেল-থুমগী সেবা কয়া য়ৌবা ঙম্লে। ঙসিদি, লৈবাক অসিগী বেঙ্ক মিত্রা লাখ ২ হেনবনা আধার ইনেবল পামেন্ত সীস্তেম (এ.ই.পি.এস.)গী খুৎলায়শিংগী তেংবাংদগী মীয়ামগী ময়ুমদা বেঙ্কিংগী খুদোংচাবশিং ফংহল্লি। হীরম অসিগা মরী লৈননা, পোস্ত ওফিস লাখ ১.২৫ হেনবদসু তেংবাংলি। মসিগী বেঙ্ক মিত্রশিং অসিনা মমাং চহিগী এপ্রিল অমসুং জুনগী মরক্তা মখোয়গী এ.ই.পি.এস. খুৎলায়শিংগী তেংবাংদগী খুঙ্গংগী মীওইশিংনা লুপা করোর ৫৩,০০০ হেনবগী শেনফম ত্রাঞ্জেক্সন তৌহনখি হায়বসি তাবদা নখোয়না অঙকপা ফাওগনি। অদুগা হায়রিবা মতম অসি, লৈবাক অসিদা কোরোনানা মরম ওইদুনা লোকদাউন লৈরিঙৈগী মনুংদনি।

মরূপশিং,

ঙসিদি, ভারতকী মফম খুদিং অসি পাম্বৈ অমা নত্ত্রগা অমগী খুত্থাংদগী লৈবাক অসিগী শেল-থুমগী সেক্তরগী মনুং চনবা ঙম্লে হায়না চাউথোকচবা য়ারবনি। চহি ১০গী খুজিং কয়াদগী শেল-থুমগী থৌওং য়ারক্তনা লাকখিবা অদুদগী ৱাংমা লান্থোক্লক্তুনা ঙসিদি লৈবাক অসি মপাঙ্গল কনবা হেনগৎলক্লি। মীয়ামগা লোয়ননা, মীয়াম পুন্না চাউখৎমিন্নবগী মন্ত্রা অসি শেল-থুমগী সেক্তরশিংদা ময়েক লানা উবা ফংলে। ঙসিদি, লায়রবা ওইরো। লৌমী ওইরো, শন লোইবা ওইরো, ঙা-ফাবা ওইরো নত্ত্রগা অপিকপা দুকান ফম্বা মীওই ওইরো, মীওই খুদিংনা ক্রেদিৎ ফংবা ঙম্লে।

মুদ্রা স্কিমদগী হৌখিবা চহিশিংদা চাউরাক্না লুপা করোর লাখ অমদি অপিকপা কারবারশিংদা থাদদুনা য়ৌহনখ্রে। মসিদসু, চাউরাক্না ৭০%দি নুপীশিংনি অমসুং ৫০%না দলিৎ, শোত্থরবা ত্রাইবেলশিং অমসুং অপিকপা কারবার তৌবশিংনি। পি.এম. কিসান স্বানিধি স্কিমগী মখাদা চাউরাকপা লৌমী ইমুং করোর ১১গী একাউন্ততা লুপা করোর ১,১৫,০০০ হেন্না হাপখ্রে। থা খরগী মমাংদসু, লম্বীদা দুকান ফম্বশিংগীদমক্তা প্রধান মন্ত্রী স্বানিধি য়োজনা হৌদোকখি। মসিগী কাঙলুপশিং অসি লৈবাক অসিগী শেল-থুমগী সেক্তরদা অহানবা ওইনা হাপখিবনি। হৌজিক ফাওবদা, লম্বীদা দুকান ফম্বা চাউরাকপা মীওই লাখ ১৫দা মীওই অমমমদা লুপা লিশিং ১০গী লোন পীখি। মখোয়শিং অসি পথাপ অসিদা অমুক খক্তা য়াওহনগদবা নত্তে। মখোয়গী ক্রেদিৎ হিস্তরী অসিনা মখোয়না তুংদা লোন লৌবদসু তেংবাংগনি। মান্নবা ওইনা, ত্রেদ অমসুং পি.এস.বি. লোনগুম্বা প্লেৎফোর্মশিংগী খুত্থাংদা এম.এস.এম.ই.শিংদা অহোঙবা লোনশিংসু ফংহনখি। কিসান ক্রেদিৎ কার্দকুম্বা খুদোংচাবশিং অসিনা অপিকপা লৌমী, শা-শন শেনবা অমসুং ঙা-য়োকপা মীওইশিংবুসু মওং-মরিল নাইদবা শেল পুবগী থৌওংশিংদগী নিং তমহল্লবনি।

মরূপশিং,

হৌজিক্তি, প্রাইভেৎ সেক্তরশিংসু অসিগুম্বা ঐখোয়গী খুন্নাইগী মীওইশিং অসিগীদমক্তা শেল-থুমগী অনৌবা তেংবাং করম্না পীসিগে হায়না খন্দবা য়াররোই। ঐখোয়গী সেল্ফ হেল্প গ্রুপশিংদা হীরম খুদিংদা, পোত্থোক পুথোকপদগী হৌরগা সেবা পীবা ফাওবদা, থবক তৌবগী মতিক লৈ। মসিগী কাঙবু অসিগী ক্রেদিৎকী লীচৎশিং অসি য়াম্না নীংথিবনি হায়বসি নখোয়নসু থেংনরম্লগনি। অসিগুম্বা কাঙবুশিং অসিগী খুত্থাংদা প্রাইভেৎ সেক্তরশিংনা খুঙ্গংগী ইনফ্রাস্ত্রকচরদা শেল থাদবা য়াবগী ওইথোকপশিং য়েংথোকপা য়াগনি। হীরম অসি য়াইফ-য়ুম্বাল খক্তগী নত্তে, মসিনা কারবারগী নীংথিবা মওং অমা ওইরকপসু য়াই।

মরূপশিং,

শেল-থুমগী হীরমশিংনা মনুং চল্লকপগা লোয়ননা লৈবাক অসিনা শেল-থুমগী ফিভমশিং মপাঙ্গল কনখৎলকপগী মাইকৈদা খোংজেল থুনা চঙশিল্লি। ভারতকী ফিন-তেক অসি মথংগী চহি ৫দদি লুপা ত্রিলিয়ন ৬কী মথক্তা ওইরগনি হায়না পানরি। ফিন-তেক সেক্তরগী চাউখৎপা য়াবগী মতিক য়েংলদুনা আই.এফ.এস.সি. গিফ সিতীদা মালেমগী থাক্তা লৈবা শেল-থুমগী হব অমসু শারবনি। ভারত্তা মতমগা চানবা ইনফ্রাস্ত্রকচর শেমগৎপা অসি ঐখোয়গী অপাম্বতা নত্তনা মরোমদোম লেপচবা ভারত অমগী তঙাই ফদবা হীরম অমসুনি। মরম অদুনা, সেক্তর অসিগী ওইবা ৱাখল চাউবা ইনফ্রাস্ত্রকচরগী পান্দম কয়া অমা থম্লিবনি। মসিগী পান্দমশিং অসি ফংনবগীদমক্তা শেল থাদবা তাই। হীরম অসিদা শেল থাদরকপগী পুক্নিং চীংশিন্নবা হোৎনবা য়াবা থবক খুদিংমক পায়খৎলি। মসিগী পান্দমশিং অসি শেল-থুমগী সেক্তর খুদিংনা থৱাই য়াওনা শৌগৎলকপা মতমদা খক্তা ফংবা ঙমগনি।

মরূপশিং,

ঐখোয়গী শেল-থুমগী পথাও অসিবু মপাঙ্গল লৈহন্নবগীদমক্তা ঐখোয়গী বেঙ্কিং সেক্তরবু খুমাং চাউশিলহন্নবা সরকারনা খোঙফম চেৎলি। হৌজিক ফাওবদা চত্থরিবা বেঙ্কিংগী শেমদোকপশিং অসি মখা তানা চত্থখিগনি। নখোয়না শেমদোকপশিং অমসুং মসিগী কান্নবশিং অসিবু বজেত্তা থবক ওইনা পাংথোকপগী মতাংদা মমল নাইদ্রবা কান্নরবা পাউতাক কয়া পীরক্কনি হায়না ঐহাক্না থাজবা থম্মি। সেক্তর অসিগী মরী লৈননা লৈবাক অসিদা অমসুং মালেমগী মফম খুদিংদা লৈরিবা অখঙ-অহৈশিংনা ঙসিদি হীরম অসিগী মতাংদা লমজিংবীগনি হায়বগী থাজবা থম্মি। নখোয়না পীরকপা পাউতাক খুদিংমক ঐখোয়গী সরকারগী ওইনা য়াম্না মরু ওইবা ৱাফম ওইগনি। নখোয়না চিংনবা লৈতনা মাংদা লৈরিবা মতমশিং অসিদা করি তৌবা য়াবগে অমসুং তুং-লমচৎকীদমক্তা মতৌ করম্না চৎমিন্নগদগে হায়বগী পাউতাক পীবিরকউ। করিগুম্বা শিংনবা কয়া লৈরবসু, ঐখোয়না মখোয়বু মতৌ করম্না মাইথীবা পীগনি? নখোয়না নশাগী থৌদাং য়াদুনা লৈবাক অসিবু মাং থানা পুদুনা চৎপদা মতৌ করম্না খোঙলোই ওইমিন্নবা য়াগদগে? ঐখোয়না হীরমশিং অসিগী মতাংদা নীংথিনা থৌরাং য়াত্তুনা, পান্দম থমদুনা অমসুং অকক্নবা মতমগী মনুংদা খ্বাইদগী অহেনবা কান্নবা লৌদুনা খন্ননীংই। নখোয়গী মতমশিং অসিগী মমল নাইদে হায়বা ঐহাক্না খঙই অমসুং মসিদগী হেন্না মমল নাইদবদি, নখোয়গী পাউতাক অমসুং ঐখোয় পুন্না লৌমিন্নবা ৱারেপশিংনি। নখোয়বু অমুক্কা হন্না  ঐহাক্না থাগৎচরি।

খঙহঞ্জবাঃ মসিগী ৱাফমশিং অসি প্রধান মন্ত্রীনা থমখিবা ৱাফমগী চাউরাকপা ৱারোলনি। অশেংবা ৱারোলদি হিন্দিদা ঙাংখিবনি।

***