ঙসি ভর্চুএল ওইনা পাংথোকপা অহানবা জি-২০ ফাইনান্স মিনিস্তরশিং অমসুং সেন্ত্রেল বেঙ্ক গভর্নরশিংগী মীফমদা ফাইনান্স অমসুং কোর্পোরেত এফেয়ার্সকী য়ুনিয়ন মিনিস্তর শ্রীমতি নিরমালা সিতারমন শরুক য়াখ্রে। ইতালিনা প্রসিদেন্ত ওইদুনা পাংথোকখিবা মীফম অদুদা মালেমগী শেন-থুমগী ফিবম, শেন-থুমগী লমদা থেংনরিবা খুদোংচাদবশিং, মী খুদিংমক শেন-থুমগী খুদোংচাবা ফংহনবা অমসুং তুংকোইনা চৎনগদবা ফাইনান্সকী মতাং য়াওনা অতোপ্পা হিরমশিংগা লোয়ন্না অওনবা পুরক্নবা অমসুং হান্নগী ফিবমদা হল্লক্নবা থৌশিলশিং খন্নখি।

লাইচৎ অসি লাকশিন্নবা ভারতকী থৌশিলগী মতাংদা শ্রীমতি সিতারমন্না হায়খি শেন্থং পীদুনা, দাইরেক্ত ত্রান্সফর তৌদুনা, চীঞ্জাক পীদুনা, শেন-থুমগী পেকেজশিং পীদুনা অমসুং লৈঙাক্কী অহোঙবা য়াংনা পুরক্তুনা ভারত মশাগী ওইবা থৌশিলশিংনা মীয়াম মতেং পাংখি। মালেমদা খ্বাইদগী চাউবা তিকা থাবগী থবক ভারতনা পায়খৎলি অমসুং মসি অশা য়াম্না লৈবা খোঙজং অমনি। ভারতনা লৈবাক কয়াদা তিকা ফংহল্লে।

মীফম অদুদা, মালেমগী চাউখৎপা অমসুং তুংকোইনা চৎনগদবা শেন-থুমগী ফিবম লৈহনবদা অইং-অশাগী খল হোঙলকপনা পীরিবা চৈথেশিংগী মতাংদা জি-২০ ফাইনান্স মিনিস্তরশিং অমসুং সেন্ত্রেল বেঙ্ক গভর্নরশিংনা খন্নখ্রে। অইং-অশাগী খল হোঙলকপগী খুদোংথিবা অমসুং ইনভাইরোনমেন্ত তেক্সসেসনগী মতাংদা চপ চাবা থৌশিল অমা পায়খৎনবা প্রসিদেন্ত ওইরিবা লৈবাক্না পুখৎলকপা ৱাফমগী মতাংদা শ্রীমতি সিতারমন্না হায়খি ৱারি শানবা অসি পেরিস এগ্রিমেন্তগী মখাদা লৈগদবনি অমসুং মান্নবা ৱাখল্লোলশিংদা য়ুম্ফম ওইগদবনি অদুবু দাইত্ব য়েন্থোক্নগদবনি অমসুং ৱাশকখিবশিং মশানা থবক ওইনা পাংথোক্কদবনি। গ্রিন তেক্নোলোজিশিং পীথোক-পীশিন তৌনবা অমসুং অইং-অশাগী খল হোঙলকপা থিংনবা শেন থাদবগী মরুওইবগী মতাংদা ফাইনান্স মিনিস্তরনা তকশিনখি।

****