অহমেদবাদকী মফম পুম্নমক ক্রিকেৎকী ৱারিনা পুংনিন নিনখ্রে৷ মকোক থোংবা ক্রিকেতরশিং অসিনা শহর অসিদা থা অমরোম লৈগদৌরিবা মরম্না শহর অসিদা ক্রেকেতিং ফিবর লৈরগনি৷ অনিশুবা তেস্ত অসি ঙম্লবা মতুংদা ক্রিকেৎ মাই পাকপগী নুংঙাইবা অসি অতিয়া ফংনা ৱাংখ্রে অমসুং মখাতানা ইংলেন্দগা শান্নগদৌরিবা অসি মেতচ অসিগী মাই পাকপগী নুংঙাইবা অদু মীয়ামশিংনা খৌরাংনা ঙাইরি৷ মালেম অসিগী খ্বাইদগী চাওরবা ক্রিকেৎ স্তেদিয়ম শঙ্গাবা অসিসু মীয়ামগী পুক্নিং চিংশিনফম ওইরগনি৷ ভারতকী রাস্ত্রপতি শ্রী রাম নাথ কোবিন্দনা মোতেরা স্তেদিয়ম শঙ্গাগদৌরিবা অসিগীদমক অখন্নবা এরেঞ্জমেন্তশিং শিন লাংখ্রে৷ ঙসিদগী হৌদুনা রাস্ত্রপতি রাম নাথ কোবিন্দ নুমিৎ নিনিগী ওইবা গুজরাত খোঙচৎ চৎখ্রে৷ ঙসি গান্ধীনগরদা লৈরিবা গুজরাত সেন্ত্রেল য়ুনিভর্সিতীগী অহুমশুবা গ্রেজুয়েসন থৌরম অসি য়াওরবা মতুংদা হয়েং নুংথিল অমসুং নুমিদাং শান্নগদৌরিবা তেস্ত মেতচ শান্নদ্রিঙৈ মাংওইননা মহাক্না মোতেরা ক্রিকেৎ স্তেদিয়ম অসি শঙ্গারগনি৷ মসিগীদমক স্তেদিয়ম অসিগী মনাক্তা অখন্নবা দুম অমা শেমখ্রে৷ কেন্দ্রগী গৃহ মন্ত্রী শ্রী অমিত শাহগা লোইননা স্পোর্তস্কী রাজ্যগী কেন্দ্রগী মন্ত্রী শ্রী কিরন রিজিজু, রাজ্যপাল শ্রী অচারিয়া দেবরত অমসুং অতোপ্পা মশক নাইরবা মীওইশিংনা শরুক য়াদুনা অনৌবা স্পোর্তস এনক্লেবকী উরেপ-উয়ুংশু তম্লগনি৷ দুম মফম অদুদগী রাস্ত্রপতিনা মোতেরা স্তেদিয়ম অসি ভর্চুয়েল্লী ওইনা শঙ্গারদুনা ক্রিকেৎ স্তেদিয়ম অসি মাইখুম হাংদোক্লগনি৷

মোতেরা স্তেদিয়ম অসিগী নাকল অনিমক্তা শাগদৌরিবা স্পোর্তস এনক্লেবকী মোদেল অদু রাস্ত্রপতিদা ফংহল্লগনি৷ মসিগী মতুং তারকপদা রাস্ত্রপতি অসিনা স্তেদিয়ম অসিগী পর্মিজেস্তা লৈরিবা হোল ওফ ফেম অসিদা চৎতুনা য়েংলগনি৷ হোল ওফ ফেম অসিদা মালেম অসিদা ক্রিকেৎ মশান্না অসিদা মশক নাইরবা ক্রিকেতরশিং অসিগী ফোতোগ্রাফশিং উৎলগনি৷ অসিগীসু মথক্তা হৌজিক ফাওবদা মোতেরা স্তেদিয়ম অসিদা শান্নখিবা মেতচ পুম্নমক অদু নিংশিংবা ওইনা চাওরাক্না মেতচ চাম্মগা য়াংখৈরোমগী পিকচরশিং অদু উৎলগনি৷ মোতেরাদা শান্নখিবা ২০১১ ৱাল্দ কপ অসিদা শরুক য়াখিবা তীম পুম্নমক অসিগী ওতোগ্রাফ বেতশিং অদুসু মসিদা উৎলগনি৷

মতুং তারকপদা রাস্ত্রপতি শ্রী রাম নাথ কোবিন্দনা স্তেদিয়ম অসিদা লৈরিবা সর্দার বল্লভবাই পতেলগী মুত্রি অসিদা লৈ হুক্লগনি অমসুং ভারত অমসুং ইংলেন্দ ক্রিকেৎ তীম অসিদা য়াওগদৌরিবা শান্নরোইশিং অসিগসু উন্নরগনি৷ মীওই লাখ ১.১০ চল্লিবা স্তেদিয়ম অসিদা কোরোনা গাইদলাইনশিং অসিগী মতুং ইন্না তিকেৎ ৫০% খক্তমক য়োনখ্রে৷ মেতচ অসি দ্রোন কেমেরা য়াওনা হাই-তেক কেমেরা ৩০রোম শিজিন্নদুনা লাইব তেলিকাস্ত তৌরগনি৷

মীয়ামশিং অসিগী নুংঙাইবা ফোংদোকপগী মতমশিং অদু লৌহৌনবা তোঙান তোঙানবা কেমেরাশিং খুদম ওইনা মেন কেমেরা, স্ত্রাইক জোন কেমেরা, ফিল্দ কেমেরা, রন আউত কেমেরা, হোক-আই কেমেরাশিং শিজিন্নরগনি৷ মোতেরা স্তেদিয়ম য়াওনা সবরমতি অমসুং গান্ধীনগরদা সেক্যুরিতীগী ফিভম ফনা লৈন্নবা অখন্নবা এরেঞ্জমেন্তশিং শিন লাংলগনি৷ হয়েং শঙ্গাগদৌরিবা অমসুং শান্নগদৌরিবা তেস্ত মেতচ অসি মীয়ামশিং অসিনা খৌরাংনা ঙাইরি৷

ঙসিদি ভারত অমসুং ইংলেন্দ তীম অনিমক প্রেক্তিস য়াম্না কন্না তৌখি৷ মোতেরাগী পিতচ পর্ফোমেন্স অসিসু ক্রিকেৎ এনালাইস্তশিং অসিগী ওইনা য়াম্না মরু ওইবা সবজেক্ত অমা ওইরগনি৷ নুংথিল-নুমিদাং শান্নগদৌরিবা মেতচ অসিগী মনুংদা ফ্লদলাইতশিং অসিনা অয়েংবা মীয়ামশিং অসিগী নুংঙাইবা অদু হেন্না মশক থোকহল্লগনি৷

                                                                                     *****