খুরুমজরি,

লৈবাকসিগী আইন মন্ত্রী শ্রী রবিসঙ্কর প্রসাদ জী, গুজরাতকী মুখ্য মন্ত্রী শ্রী বিজয় রুপানি জী, সুপ্রিম কোর্তকী জস্তিস এম.আর. সাহ জী, গুজরাত হায় কোর্তকী চীফ জস্তিস শ্রীমান বিক্রম নাথ জী, গুজরাত লৈঙাক্কী মন্ত্রী ময়াম, গুজরাত হায় কোর্তকী ইকায়খুম্নরবা জজশিং, ভারতকী সোলিসিতর জেনেরেল শ্রী তুসার মেহতা জী, এদভোকেত জেনেরেল গুজরাত শ্রী কমল ত্রিবেদি জী, ‘বার’গী ইকায়খুম্নরবা লুপ্লোয়শিং, ইকায়খুম্নরবা ইচিল ইনাউ পুম্নমক!

গুজরাত হায়কোর্তকী দাইমন্দ জুবিলীগী তাঞ্জা অসিদা ময়াম পুম্নমক্কী মফমদা নুংঙাইবা ফোঙদোকচরি‍। হৌখিবা চহী ৬০সিদা গুজরাত হায়কোর্ত অমসুং বার অনিমক্না মখোয়গী আইনগী মরমদা খঙ হৈবা, ৱাখল অমদি লৌশিংনা মশাগী ওইবা তোপ তোপ্পা মশক অমা তাকচরি‍। গুজরাত হায়কোর্তনা অচুম্বা অমদি অচুম্বা ৱায়েলগীদমক থৌদাং চাউনা য়াদুনা থবক তৌরিবা, সংবিধানগী থৌদাং ইচঙ থৌনা পাঙথোক্লিবা অসিনা ভারতকী ৱায়েল চুপ্লি অমসুং মীয়ামগী লৈঙাক অনিমকপু হেন্না মপাঙ্গল কনখৎহল্লি‍। গুজরাত হায়কোর্তকী কাউঙম্লরোইদবা খোঙচৎকী তাঙ্কক অসিদা ঙসি পোস্তেল স্তাম্প অমা পুথোক্লি‍। ঙসিগী তাঞ্জাসিদা ঐনা ৱায়েল পথাপকা মরী লৈনবা ময়াম পুম্নমক, গুজরাতকী মীয়াম পুম্নমক্কী মফমদা য়াইফ-পাউজেল পীজরি‍। ইকায়খুম্নবদা মতিক চারবশিং, ঐখোয়গী সংবিধান্দা লেজিসলেচর, একজেক্যুতিব অমসুং জুদিসিয়রীদা পীরিবা থৌদাংশিং অসি ঐখোয়গী সংবিধানগী থৱায়গুম্বনি‍। ঙসি লৈবাক মীয়াম পুম্নমক্না নুংঙাইবগা লোয়ননা ঐখোয়গী জুদিসিয়রীনা – ৱায়েল লোয়শঙনা সংবিধানগী থৱায়বু ঙাকপগী মখোয়গী থৌদাং ইচঙ থৌনা পাঙথোক্লি হায়না হায়বা ঙম্লি‍। ঐখোয়গী জুদিসিয়রীনা মতম পুম্নমক্তা ঐখোয়গী সংবিধানবু কুপ্না নৈনদুনা অমদি শন্দোক্না তাক্তুনা সংবিধানবু মপাঙ্গল কনহল্লি‍। লৈবাক মীয়ামগী হক ঙাকপবু ওইরবসু, মশাগী মনীং তমজবা ঙাকপবু ওইরবসু, লৈবাক্কীদমক খ্বাইদগী মরুওইনা লৌফম থোকপা তাঞ্জা লাকপা মতমদসু জুদিসিয়রীনা মখোয়গী হায়রিবা থৌদাংশিং অসি খঙনা শরুক য়ারি‍। অদোম পুম্নমক্নসু নীংথিনা খঙবিরবদুনি ভারতকী খুন্নাইলোন্দা রুল ওফ লো অসি চহী চা কয়াদগী খুন্থোক্লোন অমসুং খুন্নাইগী মরুওইবা পাদম অমা ওইদুনা লাক্লি‍। ঐখোয়গী অরিবা লাইরিকশিংদা ‘ন্যায়মুলং সুরাজ্য স্য়াত্’ হায়বদি অফবা লৈঙাক্কী মরুদি অচুম্বা ৱায়েলনি, রুল ওফ লোনি হায়না হায়বিরম্মি‍। হায়রিবা ৱাখল্লোনসি মমাঙথক্তগী ঐখোয়গী চৎনবীগী শরুক অমা ওইদুনা লাক্লি, লাইৱা অসিনা ঐখোয়গী নীংতম লালহৌবু থৌনা হাপখি, অমদি হায়রিবা ৱাখল্লোনসিমক ঐখোয়গী সংবিধান লেংবিরম্বশিংনা সিংবিধান শেম্লমবা মতমদা খ্বাইদগী থাক ৱাংনা থম্লম্মি‍। ঐখোয়গী সংবিধানগী ৱাহৌদোক্তা রুল ওফ লোগী থৌদাং অসিবু উৎলি‍।

ঙসি সংবিধানগী হায়রিবা ৱাখল্লোন অসিবু, মরুওইবা অসিবু ঐখোয়গী ৱায়েল লোয়শঙনা থাক ৱাংনা থাঙ্গত্তুনা মায়কৈ তাক্লিবসিদা লৈবাক মীয়াম পুম্বনা চাউথোকচরি‍। ৱায়েল লোয়শঙগী মফমদা লৈরিবা থাজবা অসিনা ঐখোয়গী মীচম মীয়ামশিংগী পুক্নিংদা মশাবু থাজজবা ইথিল অমা হাপ্লি, অচুম্বগীদমক লেপ্ননবা থৌনা হাপ্লি‍। অদুগা ঐখোয়গী নীংতম্বদগী হৌজিক ফাওবগী খোঙচৎ অসিদা জুদিসিয়রীনা লৌরিবা থৌদাংগী মরমদা ৱা খন্নরকপদা ‘বার’গী থৌদাংসু খন্নবা মরু ওই‍। ঐখোয়গী চাউথোকচনিংঙাই ওইরবা অচুম্বা ৱায়েলগী য়ুম্বী অসিমক ‘বার’না য়ুম্ফম ওইরিবনি‍। চহী কয়াদগী ঐখোয়গী লৈবাকসিদা ‘বার’ অমসুং জুদিসিয়রী অনি পুন্দুনা অচুম্বা ৱায়েলগী মরুওইবা পান্দম মপুং ফাহল্লিবনি‍। ঐখোয়গী সংবিধান্না অচুম্বা ৱায়েলগীদমক মাঙদা থম্লিবা চৎন-পথাপশিং, ভারতকী চৎনবীগী শরুক অমা ওইরিবা অচুম্বা ৱায়েলগী পরিং অসিদা অচুম্বা ৱায়েল ফংবা হায়বসি ভারত মচা পুম্নমক্কী হক্নি‍। মরম অসিনা মালেমগী খ্বাইদগী চাউবা মীয়ামগী লৈঙাকসিদা ৱর্ল্দ ক্লাস জস্তিস সিস্তেম অমা থম্বা হায়বসি জুদিসিয়রী অমসুং লৈঙাক অনিগী থৌদাংনি‍। ঐখোয়গী জস্তিস সিস্তেম অসি খুন্নাইগী খ্বাইদগী মমৈথংবদা লেপ্লিবা মীওই অদুদসু কান্নবা ফংহনবা, মীপুম খুদিংদা অচুম্বা ৱায়েল ফংহনবা, অমদি মতম চানা অচুম্বা ৱায়েল ফংহনবা সিস্তেম অমা ওইহনগদবন‍ি‍। ঙসি ৱায়েল লোয়শঙগুম্না লৈঙাক অসিনসু মায়কৈ অসিদা মশাগী থৌদাং মপুং ফানা পাঙথোক্নবা নীংহন্নবা লৈতনা হোৎনরি‍। ভারতকী মীয়ামগী লৈঙাক্না, ঐখোয়গী ৱায়েল লোয়শঙনা খ্বাইদগী খুদোংচাদ্রবা মতমদসু ভারতকী মীয়ামগীদমক অচুম্বা ৱায়েলগী হক ঙাক্তুনা লাক্লি‍।

মালেমগী লাইচৎ কোরোনাগী মতমদা মসিগী খ্বাইদগী ৱাংবা খুদম অমুক হন্না উবা ফংখি‍। লাংফমগী মতমসিদা মায়কৈ অমদা লৈবাক অসিনা মশাগী ফিরেপ উৎপা মতমদা, মায়কৈ অমরোমদা ঐখোয়গী ৱায়েল লোয়শঙনসু মখোয়গী ফিরেপ অমসুং থৌদাং পাঙথোকপগী খুদম চপ চানা উৎখি‍। লোকদাউন হৌরকপা মতমদা গুজরাত হায়কোর্তনা ভুদিও কন্ফরেন্সিংগী খুত্থাঙদা ৱায়েল চত্থবা হৌখি, অসুম্না এস.এম.এস. কোল-আউত, কেসশিংগী ই-ফাইলিং, অমদি ‘ইমেল মাই কেস স্তেতস’কী সর্ভিসশিং হৌদোকখি, কোর্তকী দিস্প্লে বোর্দবু য়ুত্যুবতা স্ত্রীমিং তৌবসু হৌদোকখিবা, নুমিৎ খুদিং জজমেন্ত অমসুং য়াথংশিং ৱেবসাইত্তা থাগৎখিবা, হায়রিবা কয়াসিনা ঐখোয়গী জস্তিস সিস্তেম অসি কয়াগী মতিক চুশিন্নবা ঙম্বগে অমদি অচুম্বা ৱায়েলগীদমক মখোয়না কদায় ফাওবা হোৎনবগে হায়বদু তাকখি‍। ফীভমসিদা কোর্তকী প্রোসীদিং লাইব স্ত্রীমিং তৌবা অহানবা কোর্ত ওইরে, অমদি ওপন কোর্তকী মতাঙদা মতম শাংনা খন্নদুনা লাকখিবা অদুসু গুজরাত হায়কোর্তনা থবক ওইনা উৎলে হায়বা ৱাফম ঐঙোন্দা পাউদম্লক্লি‍। আইন মন্ত্রালয়না ই-কোর্ত ইন্তিগ্রেতেদ মিসন মোদ প্রোজেক্তকী মখাদা দিজিতেল ইনফ্রাস্ত্রকচর শেমগৎলিবা অসিনা তেনখ্রবা মতমসিদা ঐখোয়গী কোর্তশিংবু ভর্চুএল কোর্ত ওইনা থবক তৌহনবদা মতেং ওইরি হায়বসি ঐখোয়গীদমক্তা নুংঙাইবা ৱাফম অমনি‍। দিজিতেল ইন্দিয়া মিসন্না ঙসিদি খোঙজেল য়াঙনা ঐখোয়গী জস্তিস সিস্তেমবু মতমগা চুনবা ওইহল্লি‍।

ঙসি লৈবাকসিদা ৱায়েল লোয়শঙ লিশিং ১৮ হেনবা কম্প্যুতরাইজ ওইখ্রে‍। সুপ্রিম কোর্ত্তগী ভিদিও কন্ফরেন্সিং অমসুং তেলি কন্ফরেনইংগী লিগেল সেংতিতী ফংলবা মতুংদা হৌজিক্তি ৱায়েল লোয়শঙশিংদা ই-প্রোসীদিংগী খোঙজেল য়াঙ্খৎলক্লি‍। ঐখোয়গী সুপ্রিম কোর্ত মশামকসু ঙসি মালেমগী ভিদিও কন্ফরেন্সিংগী খুত্থাঙদা খ্বাইদগী মশিং য়াম্না ৱায়েল চত্থবা সুপ্রিম কোর্ত ওইরে হায়বা ৱাফমসি তাবদা ঐখোয় পুম্নমক্কী চাউথোকচবা হেনগৎহল্লে‍। ঐখোয়গী হায়কোর্তশিং অমসুং দিস্ত্রিক্ত কোর্তশিংসু কোবিদকী মতমদা ভুদিও কন্ফরেন্সিংগী খুত্থাঙদা ৱায়েল মশিং য়াম্না চত্থখ্রে‍। কেসশিং ই-ফাইলিং তৌবগী খুদোংচাবসিনসু ‘ইজ ওফ জস্তিস’পু অনৌবা লম্বী অমা পীরি‍। মতৌ অসুম্না ঙসি ঐখোয়গী ৱায়েল লোয়শঙশিংদা কেস খুদিংমক্কী য়ুনিক আইদেন্তিফিকেসন কোদ অমদি ক্যু.আর. কোদ পীরি‍। মসিনা কেসকা মরী লৈনবা ঈ-পাউশিং লৌবদা লায়হন্বদা নত্তনা মসিনা নেসনেল জুদিসিএল দেতা গ্রীদপুসু মওং অমদা হেন্না মপাঙ্গল কনখৎহল্লে‍। নেসনেল জুদিসিএল দেতা গ্রীদকী মতেংনা উকিলশিং অমসুং ৱাকৎলোয়শিংনা ক্লিক অমদা কেস অমসুং য়াথং পুম্নমক য়েংবা য়াহল্লে‍। ইজ ওফ জস্তিস অসিনা ঐখোয়গী মীয়ামগী ইজ ওফ লিভিংগী ফীভম ফগৎহনবদা নত্তনা লৈবাকসিদা ইজ ওফ দুইং বিজিনসেকী ফীভমসু ফগৎহল্লে‍। মসিনা মপা লৈবাক্কী ইনভেস্তরশিংগী মফমদা ভারত্তা মখোয়গী অচুম্বা ৱায়েলগী হক ঙাক্তুনা থম্লি হায়বা থাজবসু লৈহল্লে‍। ২০১৮গী ইজ ওফ দুইং বিজিনেস রিপোর্ত্তা ৱর্ল্দ বেঙ্কনা নেসনে জুদিসিএল দেতা গ্রীদপু থাগৎখি‍।

ইকায়খুম্নবদা মতিক চারবশিং,

লাক্কদৌরিবা নুমিৎশিংদা ভারত্তা ইজ ওফ জস্তিস হেন্না খোঙজেল য়াঙহন্নবা সুপ্রিম কোর্তকী ই-কম্মিতীনা এন.আই.সি.গা পুন্না থবক পায়খৎমিন্নরি‍। মপাঙ্গল কল্লবা ঙাকশেলগা লোয়ননা ক্লাউদ বেজ ইনফ্রাস্ত্রকচরশিংগী খুদোংচাবসু হাপচিন্নবা থবক পায়খৎলি‍। ঐখোয়গী জস্তিস সিস্তেমবু ফ্যুচর রেদী ওইহন্নবগীদমক ৱায়েল চত্থবদা আর্তিফিসিএল ইন্তলিজেন্স শীজিন্নবা য়াবরা, এ.আই. শীজিন্নবা য়াবরা হায়বা ৱাফমসু থিজিল্লি‍। আর্তিফিসিএল ইন্তলিজেন্সনা জুদিসিয়রীবু হেন্না মতিং হাপ্পা ঙমগনি অমদি খোঙজেলসু য়াঙখৎহনগনি‍। হায়রিবা থৌরাংশিং অসিদা লৈবাকসিগী আত্মনিরভর ভারত অভিয়ান্না চাউরবা থৌদাং লৌরক্কদৌরি‍। আত্মনিরভর ভারত অভিয়ানগী মখাদা ঐখোয়গী ভিদিও কন্ফরেন্সিংগী ফম্পাক অমসু শেমগৎলি‍। লৈবাকসিদা দিজিতেল দিভাইদ হন্থহন্নবা মীচম মীয়ামদা মতেং ওইনবগীদমক হায়কোর্ত অমসুং দিস্ত্রিক্ত কোর্তশিংদা ই-সেবা কেন্দ্রশিংসু হাংদোক্লি‍। লাইচৎকী লুরবা তান্ফমসিদা ওনলাইন ই-লোক অদালতসু অনৌবা মচৎ অমা ওইরে হায়বসি ঐখোয় খুদিংমক্না উনরে‍। মপা চানরিবা ৱাফম অমদি চহী ৩৫-৪০গী মমাঙদা জুনাগরদা অহানবা লোক অদালত পাঙথোকখিবদু গুজরাতসিমক্তদনি‍। ঙসিদি ই-লোক অদালত মতম চঙহন্দবা অমদি খুদোংচাবা কয়া য়াওরবা অচুম্বা ৱায়েলগী থৌওং অমা ওইরক্লি‍। লৈবাকসিগী স্তেত ২৪দা হৌজিক ফাওবদা কেস কয়া ই-লোক অদালত্তা লাকখ্রে, অমদি মখোয়শিংদুগী ৱারোইশিনসু পুরক্লি‍। হায়রিবা খোঙজেল, খুদোংচাবা অমদি থাজবা অসি ঐখোয়গী ৱায়েল পথাপগী মথৌ তাবনি‍। গুজরাতনা ৱাফম অমদসু মাগী থৌদাংগীদমক্তা চাউথোকচরি, ইভিনিং কোর্তকী খুদোংচাবা হৌদোকখিবা অমদি লায়রবশিংগী য়াইফনবগীদমক থৌরাং কয়া পায়খৎখিবা অহানবা স্তেত গুজরাতনি‍। খুন্নাই খুদিংদা চৎন-পথাপ অমসুং কাঙলোনশিং অচুম্বা ৱায়েলদা য়ুম্ফম ওই‍। অচুম্বা ৱায়েলনা মীয়ামগী নুংনাংবা কোকহল্লি অমদি নুংনাংবা লৈতবা খুন্নাই অমনা চাউখৎপগী মতাঙদা ৱাখল খল্লি, ফিরেপ লৌই, অমদি হোৎনদুনা চাউখৎ মায়কৈদা মাঙদা চঙশিল্লি‍। ঐখোয়গী ৱায়েল লোয়শঙ, ৱায়েল লোয়শঙগা মরী লৈনবা খঙ-হৈরবা ময়াম পুম্নমক্না ঐখোয়গী সংবিধানগী অচুম্বা ৱায়েলগী থৌনাবু নীংহন্নবা লৈতনা চেৎশিনহনখিগনি হায়না ঐনা থাজৈ‍। অচুম্বা ৱায়েলগী পাঙ্গল অসিদগী ঐখোয়গী লৈবাকসিনা মাঙদা চঙশিনগদৌরিবনি, অমদি মরোমদোম লেপচবা ভারতকী মঙলান ঐখোয় পুম্নমক্কী থৌদাংনা, ঐখোয়না হোৎনবনা, ঐখোয়গী অপুনবগী থৌনানা, ঐখোয়গী ফিরেপকী পাঙ্গল, ঐখোয়না লেপ্তনা হোৎনদুনা মঙফাওনহনগনি‍। য়াইফ-পাউজেল অসিগা লোয়ননা অমুক্কা হন্না ময়াম পুম্নমক্কী মফমদা দাইমন্দ জুবিলীগী নুংঙাইবা ফোঙদোকচরি‍। য়াম্লবা য়াইফ-পাউজেল পীজরি‍।

থাগৎচরি !

***