ইন্দিয়ন এয়র ফোর্সনা তুং কোইনদগী চৎনরক্লবা মিগ-২১ বিসোন্দগী হৌদুনা হৌজিক্কী মতমগা চপ-চান্নবা রাফাএল এয়রক্রাফ ফাওবা মীরমদা শাবা তোঙান-তোঙানবা এয়রক্রাফ কয়া শিজিন্নরি। মরোমদোম লেপচবা ঙম্বা হেলহন্নবা অমসুং আই.এ.এফ.কী এয়রকারফ অমসুং সীস্তেমশিংগী শেন্নবদা তঙাই ফদনা চঙগদবা পোৎলমশিং থেংনবা ঙম্নবগীদমক্তা লমদমসিদা এয়রক্রাফ অমসুং সীস্তেমশিংদা চঙবা পোৎলমশিং শেম-শানবা অমসুং লমদম অসিদা শেম-শাজবা এয়রক্রাফ শেম্বা অমসুং ওভরহাউল (আর.ও.ঐচ.)কী খুদোংচাবা লৈহনবা অসি আই.এ.এফ.কী মিৎয়েং চঙবা হীরম অমা ওইরি।

আই.এ.এফ.কী ওইনা নৎ, বোল্ৎ, কেবল, গাস্কেৎ, স্প্রিংনচিংবা এয়রক্রাফ জেনেরেল পর্পজ স্পেয়রদগী হৌদুনা এভিওনিক্সকী খুৎলায়, এরোইঞ্জিন এসেসরীনচিংবা অৱাংবা থাক্কী পোৎলমশিং অসিবু লমদম অসিদা শাজবগী হীরমদা কান্নগদবা অমসুং তৌবা ঙম্বগী মতিক কয়া লৈ। এয়রক্রাফ অমসুং সীস্তেমশিং শেন্ননবা লমদমসিদা স্পেয়র পার্ত শাবগী থৌওং অসি লৈবাক অসিগী মফম কয়াদা লৈরিবা আই.এ.এফ.কী বেজ রীপেয়র দীপো (বি.আর.দি.)শিং অমসুং নাশিক্তা লৈবা নম্বর ১ সেন্ত্রেল ইন্দেজেনাইজেসন অমসুং মেন্যুফেকচরিং দীপো (সি.আই.এম.দি.)গী খুত্থাংদা পাংথোক্লি।

আই.এ.এফ.কী মরোমদোম লেপচবা অমসুং আত্মানির্ভর ভারত মিসনগী শরুক অমা ওইনা, আই.এ.এফ.না লমদম অসিদা পোত্থোক শাজবগী খোঙজেল হেনগৎহনবা অমসুং ইন্দিয়ন এরোস্পেস অমসুং দিফেন্স ইন্দস্ত্রীদা শরুক য়াবগী খুদোংচাবা, মরু ওইনা এম.এস.এম.ই.শিংদা, খুদোংচাবা পীবসু হেনগৎহল্লক্লি।  হীরম অসিগী মতাংদা, আই.এ.এফ.না চাউরাক্না স্পেয়র ৪০০০ রোমবু তঙাই ফদনা লমদম অসিদা শাজবা য়ানবা শক-খঙবগী থৌওংসু হৌরে। লমদম অসিদা মরু ওইনা শাজবগী পোৎলমশিংগী মনুংদা এভিএসন গ্রেদ ফিলতর (ফুএল, হাইদ্রোলিক অমসুং ন্যুমেতিক), এরোইঞ্জিন ব্যারিং, হাইদ্রোলিক অমসুং হ্যুমেতিক হোজ, মলতিফঙ্কসন দিস্প্লে, এভিএসন গ্রেদ সর্কিৎ ব্রেকর, লেম্প ফিলামেন্ত, স্পার্ক প্লগনচিংবা কয়া অমগী মমিং পনবা য়াই। ভারতকী এরোস্পেস অমসুং দিফেন্স ইন্দস্ত্রীদা এম.এস.এম.ই.শিং য়াওনা আই.এ.এফ.কা খুৎশম্নদুনা লমদম অসিদা পোত্থোক শাজবগী খোঙথাং অসিদা পাউ-চাউরবা খুদোংচাবা কয়া অমা হৌজিক লৈরে।

স্পেয়র অমসুং মনুং-চনবা পোৎলমশিং শাবগী মথক্তা, আই.এ.এফ.না মিৎয়েং চঙলিবা অতোপ্পা হীরম অমদি ইন্দস্ত্রীশিংগা খুৎশম্নদুনা ভারতকী মনুংদা মগুন লৈবা রোতেবল/শেমদোক-শেমজিন তৌবা য়াবা রীপেয়র অমসুং ওভর্হোল (আর.ও.ঐচ.)গী ফেসিলিতী শেমগৎপনি। মসিগী পান্দম অসি ফংনবগীদমক্তা, আই.এ.এফ.না মশাগী ওইবা এম.আর.ও.গী ফেসিলিতী শেমগৎপগী থৌওংশিংদা পুক্নিং চঙবতা নত্তনা শেল-থাদবা মীওইশিংদগী য়াম্লবা শেনফম লৌবগী পান্দমসু থম্লি। মসিগী থৌওংশিং অসিনা মরম ওইদুনা পোৎলম শেম্বদা মতম চঙবা হন্থহনবা  অমসুং লৈরিবা এসেৎশিংগী মথৌ তৌবগী চাংসু হেনগৎহনগনি।

লমদম অসিদা শেম-শাবগী তঙাই-ফদবা লৈবশিংবু খন্দোক্নবগীদমক্তা, বি.আর.ও./সি.আই.এম.দি.না সি.পি.পি.পি.গী পোর্তেলগী খুত্থাংদা থোকখিবা আর.এফ.পি.গী অকুপ্পা ৱারোলশিংসু আই.এ.এফ.কী ৱেবসাইৎ indianairforce.nic.in দসু হাপ্লে। মসিগী মথক্তা, অৱাংবা থাক্কী এক্স-ইম্পোর্ত স্পেয়র (অমগী মমলনা লুপা লাখ ১০দগী হেনবা)গী পোৎলম ২০০ হেনবগী পরিংসু ঙাক-শেল মন্ত্রালয়গী ৱেবসাইত্তা (srijandefence.gov.in) হাপ্লি।

আই.এ.এফ.না এরো-ইন্দিয়াগী মনুংদা মসিগী হোল-সি.দা লৈবা মখোয়গী স্তোলদা লমদম অসিদা শেম-শাজবগী তঙাই ফদবা পোৎলম কয়া অমসু উৎকনি। তোঙান-তোঙানবা বি.আর.ও.গী মীহুৎশিংসু স্তোল অসিদা ইন্দস্ত্রীগী মীওই কয়া অমগা লমদম অসিদা পোত্থোক শাজবগী তঙাই ফদবা অমসুং মসিগা মরী লৈনবা থবকশিংগী মতাংদা তাকপী তম্বীনবগীদমক্তা লৈগনি।

***